ನವದೆಹಲಿ : ದೇಶದಲ್ಲಿ ಹಬ್ಬದ (Festival) ಸಂಭ್ರಮ ಶುರುವಾಗುತ್ತಿದ್ದಂತೆ ಪ್ರಮುಖ ಇ-ಕಾಮರ್ಸ್ ವೇದಿಕೆಗಳು ಭರ್ಜರಿ ಮಾರಾಟ ಮೇಳಗಳನ್ನು ಆರಂಭಿಸಿವೆ. ವಿವಿಧ ಮಾದರಿಯ ಗ್ಯಾಜೆಟ್‌ಗಳು ಹಾಗೂ ನಿತ್ಯಬಳಕೆಯ ವಸ್ತುಗಳ ಮೇಲೆ ಆಕರ್ಷಕ ರಿಯಾಯಿತಿ ಮತ್ತು ಕೊಡುಗೆಗಳನ್ನು ನೀಡಲಾಗುತ್ತಿದೆ. ಆದರೆ ಈ ಹಬ್ಬದ ರಿಯಾಯಿತಿಗಳ ಭರಾಟೆಯ ನಡುವೆ ಸೈಬರ್ ವಂಚಕರು (Cyber fraudsters) ಸಕ್ರಿಯರಾಗಿದ್ದು, ಜನರನ್ನು ವಂಚಿಸಲು ಬಲೆ ಬೀಸಿದ್ದಾರೆ. ಹೀಗಾಗಿ ನಕಲಿ ಶಾಪಿಂಗ್ ತಾಣಗಳು ಮತ್ತು ಆಕರ್ಷಕ ಸುಳ್ಳು ಆಫರ್‌ಗಳ ಬಗ್ಗೆ ನಾಗರಿಕರು ಜಾಗರೂಕರಾಗಿರಬೇಕು ಎಂದು ಕೇಂದ್ರ ಸರ್ಕಾರ ಎಚ್ಚರಿಕೆ ನೀಡಿದೆ.
Popular shopping brands के नाम पर दिखने वाला हर festive offer genuine नहीं होता https://t.co/IkmjfTNqDl
— CyberDost I4C (@Cyberdost) October 21, 2026
ಗ್ರಾಹಕರನ್ನು ವಂಚಿಸಲು ನಕಲಿ ತಾಣಗಳ ಸೃಷ್ಟಿ
ಕೇಂದ್ರ ಸರ್ಕಾರದ ‘ಸೈಬರ್ ದೋಸ್ತ್’ (CyberDost I4C) ಈ ಕುರಿತು ಅಧಿಕೃತ ಮಾಹಿತಿ ಹಂಚಿಕೊಂಡಿದ್ದು, ಪ್ರಸಿದ್ಧ ಬ್ರ್ಯಾಂಡ್‌ಗಳ ಹೆಸರು ಮತ್ತು ಲೋಗೋಗಳನ್ನು ಬಳಸಿ ವಂಚಕರು ಸಾಮಾಜಿಕ ಜಾಲತಾಣಗಳಲ್ಲಿ ಜಾಹೀರಾತುಗಳನ್ನು ಹರಡುತ್ತಿದ್ದಾರೆ ಎಂದು ತಿಳಿಸಿದೆ. ಗ್ರಾಹಕರಿಗೆ ನೈಜ ಅನಿಸುವ ರೀತಿಯಲ್ಲಿಯೇ ನಕಲಿ ವೆಬ್‌ಸೈಟ್‌ಗಳನ್ನು ಸೃಷ್ಟಿಸಲಾಗುತ್ತಿದ್ದು, ಇವುಗಳ ಮೂಲಕ ಹಣ ಕದಿಯುವ ಹಾಗೂ ವೈಯಕ್ತಿಕ ವಿವರಗಳನ್ನು ದುರುಪಯೋಗಪಡಿಸಿಕೊಳ್ಳುವ ಹುನ್ನಾರ ನಡೆಯುತ್ತಿದೆ. ಇಂತಹ ಆಕರ್ಷಕ ಜಾಹೀರಾತುಗಳ ಮೇಲೆ ಕ್ಲಿಕ್ ಮಾಡಿ ಮಾಡುವ ಯಾವುದೇ ಪಾವತಿಗಳು ನೇರವಾಗಿ ವಂಚಕರ ಕೈಸೇರಲಿವೆ ಎಂದು ಅಧಿಕಾರಿಗಳು ಸ್ಪಷ್ಟಪಡಿಸಿದ್ದಾರೆ.
ಆನ್‌ಲೈನ್ ಶಾಪಿಂಗ್ ಮಾಡುವಾಗ ವಹಿಸಬೇಕಾದ ಮುನ್ನೆಚ್ಚರಿಕೆಗಳು
ಯಾವುದೇ ಜಾಲತಾಣದಲ್ಲಿ ಖರೀದಿ ಮಾಡುವ ಮುನ್ನ ಅದರ ವೆಬ್ ವಿಳಾಸವನ್ನು (URL) ಕೂಲಂಕಷವಾಗಿ ಪರಿಶೀಲಿಸುವುದು ಅತ್ಯಗತ್ಯ. ಸಾಮಾಜಿಕ ಜಾಲತಾಣಗಳು ಅಥವಾ ಸಂದೇಶಗಳಲ್ಲಿ ಬರುವ ಅನುಮಾನಾಸ್ಪದ ಜಾಹೀರಾತು ಲಿಂಕ್‌ಗಳನ್ನು ಕ್ಲಿಕ್ ಮಾಡುವುದನ್ನು ಸಂಪೂರ್ಣವಾಗಿ ತಪ್ಪಿಸಬೇಕು. ಸರ್ಚ್ ಇಂಜಿನ್‌ಗಳಲ್ಲಿ ಹುಡುಕಾಟ ನಡೆಸುವಾಗ ಪ್ರಾಯೋಜಿತ (Sponsored) ಫಲಿತಾಂಶಗಳ ಮೇಲೆ ಕ್ಲಿಕ್ ಮಾಡುವ ಬದಲು ಅಧಿಕೃತ ತಾಣಗಳನ್ನೇ ಆಯ್ಕೆ ಮಾಡಿಕೊಳ್ಳಬೇಕು. ಯಾವುದೇ ಆಫರ್ ಕಂಡರೂ ನೇರವಾಗಿ ಸಂಬಂಧಪಟ್ಟ ಇ-ಕಾಮರ್ಸ್ ಸಂಸ್ಥೆಯ ಅಧಿಕೃತ ಆ್ಯಪ್ ಅಥವಾ ಅಧಿಕೃತ ವೆಬ್‌ಸೈಟ್‌ಗೆ ತೆರಳಿ ದೃಢಪಡಿಸಿಕೊಳ್ಳುವುದು ಉತ್ತಮ. ಅಪರಿಚಿತ ಅಥವಾ ಹೊಸ ವೆಬ್‌ಸೈಟ್‌ಗಳಲ್ಲಿ ಮುಂಗಡ ಹಣ ಪಾವತಿಸದೆ, ವಸ್ತುಗಳು ಕೈಸೇರಿದ ನಂತರ ಹಣ ಪಾವತಿಸುವ ‘ಕ್ಯಾಶ್ ಆನ್ ಡೆಲಿವರಿ’ (COD) ಆಯ್ಕೆಯನ್ನು ಆಯ್ದುಕೊಳ್ಳುವುದು ಸುರಕ್ಷಿತ.
