ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್ಡಿಒ) ಅಭಿವೃದ್ಧಿಪಡಿಸಿದ ಕರೊನಾ ವೈರಸ್ ವಿರೋಧಿ ಔಷಧಿಯನ್ನು ರಾಷ್ಟ್ರ ರಾಜಧಾನಿಯ ಕೆಲವು ಆಸ್ಪತ್ರೆಗಳಿಗೆ ಸುಮಾರು 10,000 ಡೋಸ್‌ಗಳನ್ನು ವಿತರಿಸುವ ಮೂಲಕ ಕೇಂದ್ರ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಅವರು ನಿನ್ನೆ ಬಿಡುಗಡೆ ಮಾಡಿದರು.
2-deoxy-D-glucose ಅಥವಾ 2-DG ಎಂದು ಕರೆಯಲ್ಪಡುವ ಈ ಔಷಧಿಯನ್ನು ಹೈದರಾಬಾದ್ ಮೂಲದ ಫಾರ್ಮಾ ದೈತ್ಯ ಡಾ.ರೆಡ್ಡಿ’ಸ್ ಲ್ಯಾಬೊರೇಟರೀಸ್ ಸಹಯೋಗದೊಂದಿಗೆ ಡಿಆರ್ಡಿಒ ಲ್ಯಾಬ್ ಅಭಿವೃದ್ಧಿಪಡಿಸಿದೆ. ದೇಶದ ಉನ್ನತ ಮಟ್ಟದ ಔಷಧ ನಿಯಂತ್ರಕ ಸಂಸ್ಥೆಯಾದ ಡ್ರಗ್ ಕಂಟ್ರೋಲರ್ ಜನರಲ್ ಆಫ್ ಇಂಡಿಯಾ (ಡಿಸಿಜಿಐ) ತುರ್ತು ಬಳಕೆಗಾಗಿ ಈ ಔಷಧಿಯನ್ನು ಅನುಮೋದಿಸಿದೆ.
ಮೂಲತಃ ಈ ಔಷಧಿಯನ್ನು ಕ್ಯಾನ್ಸರ್ ಚಿಕಿತ್ಸೆಗೆಂದು ತಯಾರಿಸಲಾಗಿತ್ತು. ಆದರೆ ಡ್ರಗ್ ಕಂಟ್ರೋಲರ್ ನಿಂದ ಅದಕ್ಕೆ ಅನುಮತಿ ಸಿಕ್ಕಿರಲಿಲ್ಲ.
ಈ ಔಷಧವನ್ನು ಡಿಆರ್ಡಿಒ ಪ್ರಯೋಗಾಲಯಗಳಲ್ಲಿ ಪರೀಕ್ಷಿಸಲಾಗಿತ್ತು ಮತ್ತು ಸಹಯೋಗದ ಭಾಗವಾಗಿ 2014 ರಲ್ಲಿ ಡಾ. ರೆಡ್ಡಿ ಅವರ ಪ್ರಯೋಗಾಲಯಗಳಿಗೆ ನೀಡಲಾಯಿತು ಎಂದು ಡಿಆರ್‌ಡಿಒನ INMAS ಹೆಚ್ಚುವರಿ ನಿರ್ದೇಶಕ ಡಾ. ಸಧೀರ್ ಚಂದ್ನಾ ಹೇಳಿದ್ದಾರೆ. ಔಷಧದ ಮೂಲ ಕಾರ್ಯವಿಧಾನವು ಗ್ಲೈಕೋಲಿಸಿಸ್ ಅನ್ನು ಪ್ರತಿಬಂಧಿಸುತ್ತದೆ, ಅಥವಾ ಜೀವಕೋಶಗಳು ಶಕ್ತಿಗಾಗಿ ಗ್ಲೂಕೋಸ್ ಅನ್ನು ಒಡೆಯುವ ವಿಧಾನಗಳಲ್ಲಿ ಒಂದಾಗಿದೆ. ಈ ವಿಧಾನವನ್ನು ಕ್ಯಾನ್ಸರ್ ಕೋಶಗಳನ್ನು ಕೊಲ್ಲಲು ಬಳಸಿದಾಗ ಅದು ವೈರಸ್ ಕೋಶಗಳನ್ನೂ ತಡೆದಿತ್ತು.
ಹಾಗಾಗಿ ಔಷಧದ ಗರಿಷ್ಠ ಡೋಸೇಜ್ ಅನ್ನು ಮೌಲ್ಯಮಾಪನ ಮಾಡಲು ರೆಡ್ಡಿ ಲ್ಯಾಬ್ಸ್ DCGIನ ವಿಷಯ ತಜ್ಞರ ಸಮಿತಿಗೆ (Subject Expert Committee) ಈ ಔಷಧಿಯನ್ನು ಒದಗಿಸಿತ್ತು. ವಾಣಿಜ್ಯಿಕವಾಗಿ ಮಾರುಕಟ್ಟೆಗೆ ಅನುಮತಿ ಪಡೆಯಲು ಎರಡನೇ ಹಂತದ ಪ್ರಯೋಗದ ದತ್ತಾಂಶವನ್ನು ಒದಗಿಸಿತ್ತು. ಆದರೆ ಎಸ್‌ಇಸಿ ಕೋವಿಡ್ ವೈರಸನ್ನು ಕೊಂದಿದೆ ಎಂದು ಸಾಬೀತು ಪಡಿಸಲು ದೊಡ್ಡ ರೀತಿಯಲ್ಲಿ 3ನೇ ಹಂತದ ಪ್ರಯೋಗವನ್ನು ‘ಸಾಕಷ್ಟು ಮಾದರಿ’ಗಳೊಂದಿಗೆ ಮತ್ತು ‘ಸ್ಪಷ್ಟವಾಗಿ ವ್ಯಾಖ್ಯಾನಿಸಲಾದ’ ಮಾನದಂಡಗಳೊಂದಿಗೆ ನಡೆಸಬೇಕು ಶಿಫಾರಸು ಮಾಡಿತ್ತು ಎಂದು ‘ದಿ ಹಿಂದು’ ವರದಿ ಮಾಡಿದೆ.
ಔಷಧದ ಯಶಸ್ಸನ್ನು ಪ್ರಕಟಿಸಿದ ಡಿಆರ್ಡಿಒ ಪತ್ರಿಕಾ ಹೇಳಿಕೆಯನ್ನು ಬಿಡುಗಡೆ ಮಾಡಿದ್ದು “ಈ molecule ಆಸ್ಪತ್ರೆಗೆ ದಾಖಲಾದ ರೋಗಿಗಳನ್ನು ವೇಗವಾಗಿ ಚೇತರಿಸಿಕೊಳ್ಳಲು ಸಹಾಯ ಮಾಡುತ್ತದೆ ಮತ್ತು ಪೂರಕ ಆಮ್ಲಜನಕದ ಅವಲಂಬನೆಯನ್ನು ಕಡಿಮೆ ಮಾಡುತ್ತದೆ ಎಂದು ಕ್ಲಿನಿಕಲ್ ಪ್ರಯೋಗ ಫಲಿತಾಂಶಗಳು ತೋರಿಸಿವೆ” ಎಂದು ಹೇಳಿದೆ.
ಆದರೆ, “ಕ್ಯಾನ್ಸರ್ ಕೋಶಗಳು ಅವುಗಳ ಉಳಿವಿಗಾಗಿ ಗ್ಲೂಕೋಸ್ ಅನ್ನು ಹೆಚ್ಚು ಅವಲಂಬಿಸಿವೆ ಮತ್ತು ಆದ್ದರಿಂದ ಅವುಗಳನ್ನು 2ಡಿಜಿಯೊಂದಿಗೆ ಟ್ಯಾಗ್ ಮಾಡುವ ಮೂಲಕ ನಾವು ಕ್ಯಾನ್ಸರ್ ಕೋಶಗಳ ಬೆಳವಣಿಗೆಯನ್ನು ನಿರ್ಬಂಧಿಸಬಹುದು. ಆದರೆ ಇದು ಮೆದುಳಿನ ಜೀವಕೋಶಗಳಂತಹ (ನ್ಯೂರಾನ್‌ಗಳು) ಹೆಚ್ಚಿನ ಗ್ಲೂಕೋಸ್ ಬಳಸುವ ಸಾಮಾನ್ಯ ಕೋಶಗಳ ಮೇಲೂ ಪರಿಣಾಮ ಬೀರಬಹುದು ಮತ್ತು ಮೆದುಳಿಗೆ ಸಂಬಂಧಿಸಿದ ಅಡ್ಡಪರಿಣಾಮಗಳಿಗೆ ಕಾರಣವಾಗಬಹುದು ”ಎಂದು ಕೇರಳದ ರಾಜಗಿರಿ ಆಸ್ಪತ್ರೆಯ ಹೆಪಟಾಲಜಿ ಮತ್ತು ಲಿವರ್ ಟ್ರಾನ್ಸ್‌ಪ್ಲಾಂಟ್ ಮೆಡಿಸಿನ್‌ನಲ್ಲಿ ಪರಿಣತಿ ಹೊಂದಿರುವ ಡಾ. ಸಿರಿಯಾಕ್ ಅಬ್ಬಿ ಫಿಲಿಪ್ಸ್ ತಿಳಿಸಿರುವುದಾಗಿ ‘ದಿ ಹಿಂದು’ ವರದಿ ಮಾಡಿದೆ.
ಅಲ್ಲದೆ, ಸರಿಯಾಗಿ ನಡೆಸಿದ ಪ್ರಯೋಗವನ್ನು ಎರಡೆರಡು ಬಾರಿ ಪರೀಕ್ಷೆ ಮಾಡಬೇಕು ಮತ್ತು ನಿರೀಕ್ಷಿತ ಫಲಿತಾಂಶಗಳನ್ನು ಸ್ಪಷ್ಟವಾಗಿ ವ್ಯಾಖ್ಯಾನಿಸಬೇಕು. ಆದರೆ ಈ ಔಷಧದ ವಿಚಾರಣೆಯ ವಿವರಗಳಲ್ಲಿ ಇದು ಸ್ಪಷ್ಟವಾಗಿಲ್ಲ ಎಂದು ನವದೆಹಲಿಯ ಹೆಪಟಾಲಜಿ ಇನ್ಸ್ಟಿಟ್ಯೂಟ್ ಆಫ್ ಲಿವರ್ ಅಂಡ್ ಬಿಲಿಯರಿ ಸೈನ್ಸಸ್ ಸಹಾಯಕ ಪ್ರಾಧ್ಯಾಪಕ ಡಾ.ಸಹಾಜ್ ರತಿ ಹೇಳಿರುವುದಾಗಿಯೂ ‘ದಿ ಹಿಂದು’ ವರದಿ ಮಾಡಿದೆ.
ಈ ಔಷಧಿ ಸೇವಿಸಿದ 42%ದಷ್ಟು ಕೋವಿಡ್ ರೋಗಿಗಳಿಗೆ ಪರ್ಯಾಯ ಆಕ್ಸಿಜನ್ ನ ಅವಲಂಬನೆಯನ್ನು ಮೂರು ದಿನಗಳೊಳಗೆ ಕಡಿಮೆ ಮಾಡಿದೆ ಎಂದು ಹೇಳುತ್ತದೆ ಆದರೆ ಈ ಸುಧಾರಣೆ ನಿರಂತರವಾಗಿದೆಯೇ? ರೋಗಿಗಳು ವೆಂಟಿಲೇಟರ್‌ಗೆ ಹೋಗುವುದನ್ನು ಇದು ನಿಜವಾಗಿಯೂ ತಡೆಯುತ್ತಿದೆಯೇ? ಇದು ಸಾವುಗಳನ್ನು ತಡೆಯುತ್ತದೆಯೇ ಎಂಬ ನಿರ್ಣಾಯಕ ಪ್ರಶ್ನೆಗಳಿಗೆ ಎಲ್ಲಿಯೂ ಉತ್ತರ ದೊರಕುವುದಿಲ್ಲ ಎನ್ನುತ್ತಾರೆ ಡಾ. ರತಿ.
ಇಷ್ಟೆಲ್ಲಾ ಪ್ರಶ್ನೆ, ಗೊಂದಲಗಳ ನಡುವೆಯೇ ವಾಟ್ಸಪ್, ಫೇಸ್‌ಬುಕ್‌ ಗಳಂತಹ ಸೋಶಿಯಲ್ ಮೀಡಿಯಾದಲ್ಲಿ ಭಾರತವು ಕೊರೊನಾಗೆ ಔಷಧಿ ಕಂಡುಹಿಡಿದಿದೆಯೆಂದೂ, ಇದು ಪ್ರಪಂಚದ ಮೊದಲ ಕೊರೊನಾ ಔಷಧಿಯೆಂದೂ ಪ್ರಚಾರ ಪಡಿಸಲಾಗುತ್ತಿದೆ. ಅಡ್ಡ ಪರಿಣಾಮಗಳ ಬಗ್ಗೆ ಸ್ಪಷ್ಟ ಮಾಹಿತಿ ಇಲ್ಲದ, ಮೂರನೇ ಹಂತದ ಪ್ರಯೋಗವನ್ನು ನಡೆಸದ, ಡ್ರಗ್ ಕಂಟ್ರೋಲರ್ ಇಲಾಖೆಯಿಂದ ಒಮ್ಮೆ ತಿರಸ್ಕೃತವಾದ ಔಷಧಿಯನ್ನು ಸರ್ಕಾರದ ಇಮೇಜ್ ಕಾಪಾಡಿಕೊಳ್ಳುವ ಏಕೈಕ ಉದ್ದೇಶದಿಂದ ಕೊರೋನಾಗೆ ದಿವ್ಯೌಷಧ ಎಂದು ಆಡಳಿತ ಪಕ್ಷದ ಬೆಂಬಲಿಗರು ಪ್ರಚಾರ ಮಾಡುತ್ತಿರುವುದು ದಿನವೊಂದಕ್ಕೆ ಸುಮಾರು ಮೂರು ಲಕ್ಷ ಹೊಸ ಕೋವಿಡ್ ಪ್ರಕರಣಗಳು ವರದಿಯಾಗುವ ದೇಶವೊಂದರ ವ್ಯಂಗ್ಯ.
