ಹೊಸದಿಲ್ಲಿ: ಸಂಪತ್ತಿನ ಸುರಕ್ಷತೆ ಗ್ರಾಹಕರಿಗೆ ಬಹುದೊಡ್ಡ ಸವಾಲಾಗಿರುವ ಈ ದಿನಗಳಲ್ಲಿ ಬ್ಯಾಂಕ್ ಲಾಕರ್ಗಳನ್ನು ಬಾಡಿಗೆಗೆ ಪಡೆದು, ಅದರಲ್ಲಿ ಬೆಲೆಬಾಳುವ ವಸ್ತುಗಳನ್ನು ಇರಿಸುವುದು ಸುರಕ್ಷಿತ ಎಂದೇ ಭಾವಿಸಲಾಗಿದೆ. ಹೀಗಾಗಿ ಬ್ಯಾಂಕ್ಗಳು ಶುಲ್ಕ ಪಾವತಿಸಿಕೊಂಡು ಗ್ರಾಹಕರಿಗೆ ಲಾಕರ್ಗಳನ್ನು ಒದಗಿಸುತ್ತಿವೆ. ಇದೇ ವೇಳೆ ಬ್ಯಾಂಕ್ಗಳು ಕೂಡ ಗ್ರಾಹಕರ ಬೆಲೆಬಾಳುವ ವಸ್ತುಗಳನ್ನು ಸುರಕ್ಷಿತವಾಗಿಡಲು ಹಲವಾರು ನಿಯಮಾವಳಿಗಳನ್ನು ಅನುಸರಿಸುವಂತೆ ರಿಸರ್ವ್ ಬ್ಯಾಂಕ್ ಕಾಲಕಾಲಕ್ಕೆ ಹೊಸ ಮಾರ್ಗದರ್ಶಿ ಸೂತ್ರಗಳನ್ನು ಪ್ರಕಟಿಸುತ್ತಲೇ ಇದೆ.
ಇದೀಗ ಬ್ಯಾಂಕ್ ಲಾಕರ್ಗಳಿಗೆ ಸಂಬಂಧಿಸಿದಂತೆ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ಪರಿಷ್ಕೃತ ಮಾರ್ಗಸೂಚಿಯನ್ನು ಪ್ರಕಟಿಸಿದೆ. ಅದರ ಪ್ರಕಾರ ಈ ವರ್ಷ ಡಿಸೆಂಬರ್ 31ರ ಒಳಗಾಗಿ ಲಾಕರ್ ಹೊಂದಿರುವವರು ಪರಿಷ್ಕೃತ ಲಾಕರ್ ಒಪ್ಪಂದಕ್ಕೆ ಬದ್ಧವಾಗಿರಲು ಕೇಂದ್ರೀಯ ಬ್ಯಾಂಕ್ ಸೂಚಿಸಿದೆ.
ಪರಿಷ್ಕೃತ ಲಾಕರ್ ಒಪ್ಪಂದದ ಪ್ರಕಾರ ಆಭರಣಗಳು ಮತ್ತು ಅಮೂಲ್ಯ ದಾಖಲೆಗಳನ್ನು ಲಾಕರ್ನಲ್ಲಿ ಇಡಬಹುದಾಗಿದೆ. ಜನನ ಪ್ರಮಾಣ ಪತ್ರಗಳು, ಮದುವೆ ಪ್ರಮಾಣ ಪತ್ರಗಳು, ಸಾಲದ ಪತ್ರಗಳು, ಉಳಿತಾಯ ಬಾಂಡ್ಗಳು, ವಿಮಾ ಪಾಲಿಸಿ ದಾಖಲೆಗಳು ಮತ್ತಿತರ ವೈಯಕ್ತಿಕ ದಾಖಲೆಗಳನ್ನು ಲಾಕರ್ನಲ್ಲಿ ಇಡಲು ಅನುಮತಿ ನೀಡಲಾಗಿದೆ. ಆದರೆ ಹಣ ಮತ್ತು ಕರೆನ್ಸಿ ನೋಟುಗಳನ್ನು ಇನ್ನು ಮುಂದೆ ಲಾಕರ್ಗಳಲ್ಲಿ ಇಡುವಂತಿಲ್ಲ ಎಂದು ಭಾರತೀಯ ರಿಸರ್ವ್ ಬ್ಯಾಂಕ್ನ ನೂತನ ಮಾರ್ಗಸೂಚಿಯಲ್ಲಿ ಹೇಳಲಾಗಿದೆ.
