ಭಾರತದಲ್ಲಿ ಇದುವರೆಗೆ 1.96 ಮಿಲಿಯನ್ ಹೆಕ್ಟೇರ್‌ನಲ್ಲಿ ಬೇಸಿಗೆ-ಬಿತ್ತನೆಯ ಭತ್ತವನ್ನು ನೆಡಲಾಗಿದೆ ಎಂದು ಕೃಷಿ ಸಚಿವಾಲಯದ ಅಂಕಿಅಂಶಗಳು ಹೇಳಿವೆ. ಕಳೆದ ವರ್ಷಕ್ಕೆ ಹೋಲಿಸಿದರೆ ಇದು 46 ಶೇಕಡಾದಷ್ಟು ಕಡಿಮೆಯಾಗಿದೆ. ಇದಕ್ಕೆ ಮುಖ್ಯ ಕಾರಣ ಮಾನ್ಸೂನ್‌ನ ದುರ್ಬಲ ಆರಂಭ. ಜೂನ್‌ನಲ್ಲಿ ಮಾನ್ಸೂನ್ ಮಳೆಯು ಭಾರತಕ್ಕೆ ಆಗಮವಾಗುತ್ತಿದ್ದಂತೆ ರೈತರು ಸಾಮಾನ್ಯವಾಗಿ ಅಕ್ಕಿ, ಜೋಳ, ಹತ್ತಿ, ಸೋಯಾಬೀನ್, ಕಬ್ಬು ಮತ್ತು ಕಡಲೆಕಾಯಿಗಳನ್ನು ನೆಡಲು ಪ್ರಾರಂಭಿಸುತ್ತಾರೆ. ಈ ಬಿತ್ತನೆ ಸಾಮಾನ್ಯವಾಗಿ ಜುಲೈ ವರೆಗೆ ಇರುತ್ತದೆ.
ಭಾರತದ ಕೃಷಿ ಮತ್ತು ಉದ್ಯೋಗದಲ್ಲಿ ಮಾನ್ಸೂನ್ ಮಳೆಯು ನಿರ್ಣಾಯಕ ಪಾತ್ರವನ್ನು ವಹಿಸುತ್ತಿದ್ದು ಇದು ದೇಶದ ಸುಮಾರು 50 ಪ್ರತಿಶತದಷ್ಟು ಉದ್ಯೋಗಗಳಿಗೆ ಆಸರೆಯಾಗಿದೆ. ಆದರೆ ಈ ಬಾರಿಯ ಮುಂಗಾರಿನ ದುರ್ಬಲ ಆರಂಭ ಕೃಷಿ ಕ್ಷೇತ್ರದ ಮೇಲೆ ವ್ಯತಿರಿಕ್ತ ಪರಿಣಾಮ ಬೀರಿದೆ. ದೇಶದ ಹಲವೆಡೆ ಈಗಾಗಲೇ ವಿಪರೀತ ಶಾಖದಿಂದಾಗಿ ಗೋಧಿ ಬೆಳೆಯು ಹಾಳಾಗಿದೆ. ಈ ವರ್ಷ ಅಕ್ಕಿಯ ಉತ್ಪಾದನೆಯೂ ಕಡಿಮೆ ಆದರೆ ದೇಶೀಯ ಮಾರುಕಟ್ಟೆಯ ಜೊತೆಗೆ ರಫ್ತಿನ ಮೇಲೂ ಪರಿಣಾಮ ಬೀರಲಿದೆ ಎಂಬ ಆತಂಕ ವ್ಯಕ್ತವಾಗಿದೆ.
ಆದರೆ ಈ ಬಾರಿಯ ಮುಂಗಾರು ದುರ್ಬಲವಾಗಿ ಆರಂಭವಾದರೂ ಸಹ ದೇಶದ ಅರ್ಧಕ್ಕಿಂತ ಹೆಚ್ಚಿನ ಭಾಗವನ್ನು ಆವರಿಸಿದೆ, ಶೇಕಡಾ 36ರಷ್ಟಿದ್ದ ಮಳೆಯ ಕೊರತೆಯು 2 ಪ್ರತಿಶತಕ್ಕೆ ಇಳಿಕೆಯಾಗಿದೆ. ಈಗಷ್ಟೇ ನಾಟಿ ಆರಂಭವಾಗಿದ್ದು, ಮುಂಗಾರು ಮಳೆಯಲ್ಲಿ ಭತ್ತದ ಬೆಳೆ ಹೆಚ್ಚಾಗಬಹುದು ಎಂದು ಅಖಿಲ ಭಾರತ ಅಕ್ಕಿ ರಫ್ತುದಾರರ ಸಂಘದ ಅಧ್ಯಕ್ಷ ಬಿ ವಿ ಕೃಷ್ಣ ರಾವ್ ಹೇಳಿದ್ದಾರೆ. ಕೃಷಿ ಮತ್ತು ರೈತರ ಕಲ್ಯಾಣ ಸಚಿವಾಲಯವು ರಾಜ್ಯ ಸರ್ಕಾರಗಳಿಂದ ಹೆಚ್ಚಿನ ಮಾಹಿತಿಯನ್ನು ಸಂಗ್ರಹಿಸಿ ತಾತ್ಕಾಲಿಕ ಬೆಳೆ ಬಿತ್ತನೆ ಅಂಕಿಅಂಶಗಳನ್ನು ನವೀಕರಿಸುತ್ತಲೇ ಇರುತ್ತದೆ. ಸಾಮಾನ್ಯವಾಗಿ ಜೂನ್-ಸೆಪ್ಟೆಂಬರ್ ಮಾನ್ಸೂನ್ ಋತುವಿನ ಪ್ರಗತಿಯನ್ನು ಅವಲಂಬಿಸಿ ನಾಟಿ ಅಂಕಿಅಂಶಗಳು ಪರಿಷ್ಕರಣೆಗೆ ಒಳಪಟ್ಟಿರುತ್ತವೆ.
ಈ ವರ್ಷ ಇದುವರೆಗೆ ಹತ್ತಿಯನ್ನು ನೆಡಲಾದ ಪ್ರದೇಶವು ಒಟ್ಟು 3.18 ಮಿಲಿಯನ್ ಹೆಕ್ಟೇರ್‌ಗಳಾಗಿದೆ. ಕಳೆದ ವರ್ಷ 3.73 ಮಿಲಿಯನ್ ಹೆಕ್ಟೇರ್‌ ಪ್ರದೇಶದಲ್ಲಿ ಹತ್ತಿಯನ್ನು ನೆಡಲಾಗಿತ್ತು. ಹತ್ತಿ ಬೆಳೆಯುವ ಪ್ರಮುಖ ರಾಜ್ಯಗಳಾದ ಗುಜರಾತ್ ಮತ್ತು ಮಹಾರಾಷ್ಟ್ರ ಮುಂಗಾರು ಮಳೆ ವಿರಳವಾಗಿರುವುದೇ ಇದಕ್ಕೆ ಕಾರಣ ಎನ್ನಲಾಗಿದೆ.
2021 ರಲ್ಲಿ ಬಿತ್ತನೆಯಾದ 1.25 ಮಿಲಿಯನ್ ಹೆಕ್ಟೇರ್‌ಗಳಿಗೆ ಹೋಲಿಸಿದರೆ, ಬೇಸಿಗೆಯ ಮತ್ತೊಂದು ಮುಖ್ಯ ಎಣ್ಣೆಕಾಳು ಬೆಳೆಯಾದ ಸೋಯಾಬೀನ್‌ಗಳ ಬಿತ್ತನೆಯು ಈ ವರ್ಷ 278,000 ಮಿಲಿಯನ್ ಹೆಕ್ಟೇರ್‌ಗಳಷ್ಟಿದೆ. ಕಳೆದ ವರ್ಷ 1,32,000 ಹೆಕ್ಟೇರ್‌ ಪ್ರದೇಶಗಳಿಗೆ ಹೋಲಿಸಿದರೆ ಪ್ರೋಟೀನ್-ಭತ್ತದ ಪ್ರದೇಶವು 2,02,000 ಹೆಕ್ಟೇರ್‌ಗಳಿಗೆ ಏರಿತು.
ಆದರೆ ಕೆಲವು ರೈತರು ಹೆಚ್ಚು ಲಾಭದಾಯಕ ಹತ್ತಿ ಮತ್ತು ಸೋಯಾಬೀನ್‌ಗೆ ಬದಲಾಗುವ ಸಾಧ್ಯತೆ ಇರುವುದರಿಂದ ಮುಂದಿನ ಕೆಲವು ವಾರಗಳಲ್ಲಿ ಅಕ್ಕಿ ನಾಟಿಯ ವಿಸ್ತೀರ್ಣ ಕುಸಿಯಬಹುದು ಎಂದು ಮಹಾರಾಷ್ಟ್ರ ಮೂಲದ ವ್ಯಾಪಾರಿ ನಿತಿನ್ ಕಲಂತ್ರಿ ಹೇಳುತ್ತಾರೆ. ಕಬ್ಬು ನಾಟಿ ಮಾತ್ರ 5.07 ಮಿಲಿಯನ್ ಹೆಕ್ಟೇರ್‌ಗಳಲ್ಲಿದ್ದು ಬಹುತೇಕ ಕಳೆದ ವರ್ಷದಷ್ಟೇ ಇದೆ.
