ಭಾರತೀಯ ಸೇನೆಯು ಹೊಸ ಸಮವಸ್ತ್ರ ಧರಿಸಿ ಶನಿವಾರ (ಜನವರಿ 15, 2022) ಸೇನಾ ದಿನದ ಪರೇಡ್ ಪ್ರದರ್ಶಿಸಿಸಿದ್ದು, ಈಗ ಎಲ್ಲರ ಗಮನ ಸೆಳೆಯುತ್ತಿದೆ.
ಈ ಹೊಸ ಸಮವಸ್ತ್ರವನ್ನು ನ್ಯಾಷನಲ್ ಇನ್ಸ್ಟಿಟ್ಯೂಟ್ ಆಫ್ ಫ್ಯಾಶನ್ ಟೆಕ್ನಾಲಜಿ (ಎನ್ಐಎಫ್ಟಿ) ಸಹಯೋಗದಲ್ಲಿ ವಿನ್ಯಾಸಗೊಳಿಸಲಾಗಿದೆ. ಭಾರತೀಯ ಸೇನೆಗೆ ಈ ಹೊಸ ಸಮವಸ್ತ್ರ ವಿನ್ಯಾಸಗೊಳಿಸುವ ಯೋಜನೆಯಲ್ಲಿ ವಿದ್ಯಾರ್ಥಿಗಳು ಮತ್ತು ಪ್ರಾಧ್ಯಾಪಕರನ್ನು ಒಳಗೊಂಡ ಎಂಟು ತಂಡ ರಚಿಸಲಾಗಿತ್ತು. ಸೇನೆಯಲ್ಲಿರುವ ಪುರುಷರು ಮತ್ತು ಮಹಿಳೆಯರು ಧರಿಸಲು ಸುಲಭ ಮತ್ತು ಆರಾಮದಾಯಕವಾಗಿರುವಂತೆ ಸಮವಸ್ತ್ರ ಸಿದ್ಧಪಡಿಸಲು ಸೂಚಿಸಲಾಗಿತ್ತು. ಈಗ ಈ ಎಲ್ಲ ವಿಶೇಷಣಗಳನ್ನು ಒಳಗೊಂಡ ಸಮವಸ್ತ್ರವನ್ನು ಭಾರತೀಯ ಸೇನೆ ಒದಗಿಸಿದೆ.
ಯುದ್ಧದ ದಕ್ಷತೆಯನ್ನು ಗಮನದಲ್ಲಿಟ್ಟುಕೊಂಟು ವೈಜ್ಞಾನಿಕವಾಗಿ ವಿನ್ಯಾಸಗೊಳಿಸಲಾಗಿದೆ. ಇದು ಯುದ್ಧ ಕಾರ್ಯಾಚರಣೆಯಲ್ಲಿ ಆರಾಮದಾಯಕವಾಗಿರಲಿದೆ. ಮೊದಲು ಜಂಗಲ್ ವಾರ್ಫೇರ್, ಡೆಸರ್ಟ್ ವಾರ್ಫೇರ್ಗೆ ಸಮವಸ್ತ್ರಗಳು ಇದ್ದವು. ಈಗ ವಿವಿಧ ಭೂಪ್ರದೇಶಗಳಿಗೆ ವಿಭಿನ್ನ ಸಮವಸ್ತ್ರಗಳನ್ನು ಹೊಂದುವ ಅಗತ್ಯತೆಯನ್ನು ಈ ಸಮವಸ್ತ್ರ ದೂರಮಾಡಿದೆ.
ಹಗುರವಾದ ಫ್ಯಾಬ್ರಿಕ್ ಬಟ್ಟೆಯಲ್ಲಿ ಇದು ಸಿದ್ಧವಾಗಿದ್ದು, ಕಠಿಣ ಹವಾಮಾನ ಪರಿಸ್ಥಿತಿಗಳಿಂದ ರಕ್ಷಿಸಲು ಇದು ಸಹಕಾರಿಯಾಗಿದೆ. ಇದು ಶೇ. ೭೦ ರಷ್ಟು ಹತ್ತಿ ಮತ್ತು ಶೇ.೩೦ ರಷ್ಟು ಪಾಲಿಯೆಸ್ಟರ್ನ ಸಂಯೋಜನೆಯಲ್ಲಿ ಸಿದ್ಧವಾಗಿದೆ. ಈ ಸಂಯೋಜನೆಯಿಂದಾಗಿ ವಿವಿಧ ಹವಾಮಾನ ಪರಿಸ್ಥಿತಿ, ಮಳೆ ಅಥವಾ ಬೇಸಿಗೆಯಲ್ಲಿ ಧರಿಸಲು ಸುಲಭವಾಗಿದೆ. ಮಳೆಯಿಂದ ತೋಯ್ದರೆ ಬೇಗವಾಗಿ ಒಣಗುವ ವಿಶೇಷತೆ ಹೊಂದಿದೆ.
ಹೊಸ ಸಮವಸ್ತ್ರವು ತಿಳಿ ಹಸಿರು ಹಾಗೂ ಮಣ್ಣಿನ ಬಣ್ಣ ಒಳಗೊಂಡಿದೆ. ವಿವಿಧ ಭೂಪ್ರದೇಶ ಮತ್ತು ಸೈನ್ಯದ ನಿಯೋಜನೆಯ ಪ್ರದೇಶ ಹಾಗೂ ಹವಾಮಾನ ಪರಿಸ್ಥಿತಿ ಗಮನದಲ್ಲಿಟ್ಟುಕೊಂಡು ಇದನ್ನು ಸಿದ್ದಪಡಿಸಲಾಗಿದೆ.
ಈ ಹೊಸ ಸಮವಸ್ತ್ರದಿಂದ ಟಕ್ ಮಾಡಲಾಗುವುದಿಲ್ಲ. ಒಳಗೆ ಟಿ-ಶರ್ಟ್ ಇರುತ್ತದೆ. ಜೊತೆಗೆ ಈ ಸಮವಸ್ತ್ರವು ಬಹು-ಭೂಪ್ರದೇಶ ಸ್ನೇಹಿಯಾಗಿದೆ. ಇದು ಕೇವಲ ಬಣ್ಣಗಳ ಸಂಯೋಜನೆವಾಗಿರದೇ ವಾಸ್ತವವಾಗಿ ಮರೆಮಾಚುವಿಕೆ ದೃಷ್ಟಿಯಿಂದ ಸಹಾಯಕವಾಗಲಿದೆ. ಮಹಿಳಾ ಅಧಿಕಾರಿಗಳಿಗೂ ಸ್ವಲ್ಪ ಬದಲಾವಣೆ ಮಾಡಲಾಗಿದೆ.
ಒಟ್ಟಾರೆ ಭದ್ರತೆಯನ್ನು ಗಮನದಲ್ಲಿಟ್ಟುಕೊಂಡು ಈ ಹೊಸ ಸಮವಸ್ತ್ರವನ್ನು ಸಿದ್ಧಪಡಿಸಲಾಗಿದೆ. ಇದನ್ನು ಸಿದ್ಧಪಡಿಸುವ ಮೊದಲು ಇತರ ದೇಶಗಳ ಸಮವಸ್ತ್ರಗಳನ್ನು ಅಧ್ಯಯನ ಮಾಡಿ ವಿನ್ಯಾಸ ಮಾಡಲಾಗಿದೆ.
ಇದು ಎಲ್ಟಿಟಿಇ ಸಮವಸ್ತ್ರವನ್ನು ಹೋಲುತ್ತದೆಯೇ? ಎನ್ನುವ ಪ್ರಶ್ನೆಗಳು ಕೂಡ ಕೇಳಿಬಂದಿದ್ದವು. ಭಾರತೀಯ ಸೇನೆಯು ಈ ಹೋಲಿಕೆಯನ್ನು ಅಲ್ಲಗಳೆದಿದ್ದು, ಸಮವಸ್ತ್ರಗಳು ಎಲ್ಟಿಟಿಇ ಸಮವಸ್ತ್ರಕ್ಕಿಂತ ʼವಿಶಿಷ್ಟವಾಗಿ ವಿಭಿನ್ನವಾಗಿವೆʼ ಎಂದು ಹೇಳಿದೆ.