ಭಾರತದ ಅತ್ಯಂತ ಪ್ರಮುಖ ದಿನಪತ್ರಿಕೆಯಾದ ದೈನಿಕ್ ಭಾಸ್ಕರ್ ಕಚೇರಿಗಳ ಮೇಲೆ ಆದಾಯ ತೆರಿಗೆ ಇಲಾಖೆಯ ಅಧಿಕಾರಿಗಳು ದಾಳಿ ನಡೆಸಿದ್ದಾರೆ. ತೆರಿಗೆ ಕಳ್ಳತನದ ಆರೋಪದ ಮೇಲೆ ಈ ದಾಳಿ ನಡೆಸಲಾಗಿದೆ ಎಂದು ಅಧಿಕಾರಿಗಳು ಹೇಳಿದ್ದಾರೆ.
ದೈನಿಕ್ ಭಾಸ್ಕರ್ ನ ದೆಹಲಿ, ಮಧ್ಯ ಪ್ರದೇಶ, ರಾಜಸ್ಥಾನ, ಗುಜರಾತ್ ಮತ್ತು ಮಹಾರಾಷ್ಟ್ರದ ಕಚೇರಿಗಳ ಮೇಲೆ ಏಕಕಾಲಕ್ಕೆ ದಾಳಿ ನಡೆಸಲಾಗಿದೆ. ಇದರೊಂದಿಗೆ ದೈನಿಕ್ ಭಾಸ್ಕರ್ ಗ್ರೂಪ್ ನ ಒಡೆತನ ಹೊಂದಿರುವವರ ಮನೆಗಳ ಮೇಲೆಯೂ ದಾಳಿ ನಡೆಸಲಾಗಿದೆ.
ಏಪ್ರಿಲ್,ಮೇ ತಿಂಗಳಲ್ಲಿ ಕರೋನಾ ಎರಡನೇ ಅಲೆಯ ಅಬ್ಬರದ ಸಾಕ್ಷಾತ್ ಚಿತ್ರಣವನ್ನು ದೈನಿಕ್ ಭಾಸ್ಕರ್ ಜನರ ಮುಂದೆ ಇಟ್ಟಿತ್ತು. ಮುಖ್ಯವಾಗಿ ಗುಜರಾತ್ ನ ಕೋವಿಡ್ ಸಾವುಗಳ ಕುರಿತು ಸರ್ಕಾರ ಸುಳ್ಳು ಹೇಳುತ್ತಿರುವುದನ್ನು ದೈನಿಕ್ ಭಾಸ್ಕರ್ ವರದಿ ಮಾಡಿತ್ತು. ಇದರಿಂದಾಗಿ ಸರ್ಕಾರದ ಕೆಂಗಣ್ಣಿಗೆ ಗುರಿಯಾಗಿತ್ತು.
ಕೇವಲ ಕೋವಿಡ್ ಸಾವುಗಳಷ್ಟೇ ಅಲ್ಲದೇ, ಆಕ್ಸಿಜನ್, ಬೆಡ್, ಲಸಿಕೆಗಳ ಕೊರತೆಯ ಕುರಿತು ಕೂಡಾ ಸರ್ಕಾರದ ಗಮನ ಸೆಳೆಯಲು ಪ್ರಯತ್ನಿಸಿತ್ತು. ಆದರೆ, ದೈನಿಕ್ ಭಾಸ್ಕರ್ ನ ಈ ಪ್ರಯತ್ನವು ಸರ್ಕಾರದ ಕೋಪಕ್ಕೆ ಕಾರಣವಾಯಿತೇ ಹೊರತು, ಸರ್ಕಾರ ಮಾತ್ರ ಪರಿಸ್ಥಿತಿಯನ್ನು ಉತ್ತಮಗೊಳಿಸುವ ಪ್ರಯತ್ನ ಮಾಡಲಿಲ್ಲ.
ಇದರೊಂದಿಗೆ, ಉತ್ತರ ಪ್ರದೇಶದಲ್ಲಿ ಗಂಗಾ ನದಿಯಲ್ಲಿ ತೇಲಿ ಬಂದ ಶವಗಳ ಕುರಿತು ಸರಣಿ ವರದಿಗಳನ್ನು ಪ್ರಕಟಿಸಿತ್ತು. ಈ ಘಟನೆಯ ಕಹಿ ಸತ್ಯವನ್ನು ಜನರ ಮುಂದೆ ತೆರೆದಿಟ್ಟಿತ್ತು. ಗಂಗಾ ನದಿಯ ದಡದಲ್ಲಿಯೇ ಆ ಶವಗಳನ್ನು ದಫನ್ ಮಾಡಿರುವ ಕುರಿತಾಗಿಯೂ ವರದಿಯನ್ನು ಪ್ರಕಟಿಸಿತ್ತು.
ಸುಮಾರು ಒಂದು ತಿಂಗಳ ಹಿಂದೆ, ದೈನಿಕ್ ಭಾಸ್ಕರ್ ಸಂಪಾದಕರಾದ ಓಮ್ ಗೌರ್ ಅವರ ಸಂಪಾದಕೀಯ ಲೇಖನವನ್ನು ‘The New York Times’ ಪತ್ರಿಕೆಯು ಪ್ರಕಟಿಸಿತ್ತು. ಕರೋನಾ ಸೋಂಕು ನಿರ್ವಹಿಸುವಲ್ಲಿ ಸರ್ಕಾರದ ವೈಫಲ್ಯತೆಯನ್ನು ಕಣ್ಣಿಗೆ ಕಟ್ಟುವ ರೀತಿ ವಿವರಿಸಲಾಗಿತ್ತು. “ದೇಶದ ಪವಿತ್ರ ನದಿನರೇಂದ್ರ ಮೋದಿ ಆಡಳಿತದ ವೈಫಲ್ಯತೆ ಹಾಗೂ ಮೋಸದಾಟವನ್ನು ತೆರೆದಿಟ್ಟಿದೆ,” ಎಂದು ಅವರು ಬರೆದಿದ್ದರು.
ಈ ಎಲ್ಲಾ ಕಾರಣಗಲಿಗೆ ಇತ್ತೀಚಿನ ದಿನಗಳಲ್ಲಿ ಸಾಮಾನ್ಯವೆಂಬಂತೆ ಕೇಂದ್ರ ಸರ್ಕಾರವು ತನ್ನ ಅಧೀನ ಸಂಸ್ಥೆಗಳನ್ನು ಪತ್ರಿಕೆಯ ವಿರುದ್ದ ಛೂ ಬಿಟ್ಟಿದೆ. ಇಲ್ಲಿಯವರೆಗೆ ರಾಜಕೀಯ ವಿರೋಧಿಗಳ ಬಳಕೆಯಾಗುತ್ತಿದ್ದ ಐಟಿ, ಸಿಬಿಐ, ಇಡಿ ಅಸ್ತ್ರ ಈಗ ಪತ್ರಿಕೆಗಳ ವಿರುದ್ದವೂ ಬಳಕೆಯಾಗುತ್ತಿದೆ. ಪತ್ರಿಕಾ ಸ್ವಾತಂತ್ರ್ಯದ ದಮನದ ವಿರುದ್ದ ದನಿ ಎತ್ತಬೇಕಾದ ಅನಿವಾರ್ಯತೆ ಎದುರಾಗಿದೆ.
