ಚೆನ್ನೈ: ತಮಿಳುನಾಡು ಮುಖ್ಯಮಂತ್ರಿ ಸಿ. ಜೋಸೆಫ್ ವಿಜಯ್ (CM Vijay) ಅವರು ರಾಜ್ಯದ ಸರ್ಕಾರಿ ಆಸ್ಪತ್ರೆಗಳಲ್ಲಿ (Government Hospital) ಜನಿಸುವ ನವಜಾತ ಶಿಶುಗಳಿಗಾಗಿ ನೂತನ ‘ತಾಯ್ ಮಾಮನ್ ತಂಗ ಮೋದಿರಂ’ (ಸೋದರಮಾವನ ಬಂಗಾರದ ಉಂಗುರ) ಯೋಜನೆಗೆ ಮದುರೈನ ಸರ್ಕಾರಿ ರಾಜಾಜಿ ಆಸ್ಪತ್ರೆಯಲ್ಲಿ ಸೆಪ್ಟೆಂಬರ್ 28 ರಂದು ಅಧಿಕೃತ ಚಾಲನೆ ನೀಡಿದ್ದಾರೆ.
ಉಪಚುನಾವಣೆ ನಡೆಯಲಿರುವ ಮಧುರಾಂತಕಂ ಹಾಗೂ ಧಾರಾಪುರಂ ಕ್ಷೇತ್ರಗಳನ್ನು ಹೊರತುಪಡಿಸಿ, ರಾಜ್ಯದ ಎಲ್ಲಾ ಸರ್ಕಾರಿ ಆಸ್ಪತ್ರೆಗಳು ಹಾಗೂ ಪ್ರಾಥಮಿಕ ಆರೋಗ್ಯ ಕೇಂದ್ರಗಳಲ್ಲಿ ಈ ಯೋಜನೆಯನ್ನು ಜಾರಿಗೊಳಿಸಲಾಗುತ್ತಿದೆ.
ಸರ್ಕಾರಿ ಆಸ್ಪತ್ರೆಗಳಲ್ಲಿ ಜನಿಸುವ ಕಂದಮ್ಮಗಳಿಗೆ 22 ಕ್ಯಾರೆಟ್ ಬಂಗಾರ
ಈ ಯೋಜನೆಯ ಅಡಿಯಲ್ಲಿ ಅರ್ಹ ನವಜಾತ ಶಿಶುಗಳಿಗೆ 1 ಗ್ರಾಂ ತೂಕದ 22 ಕ್ಯಾರೆಟ್ ಚಿನ್ನದ ಉಂಗುರವನ್ನು ಉಡುಗೊರೆಯಾಗಿ ನೀಡಲಾಗುತ್ತದೆ. ತಮಿಳು ಸಂಸ್ಕೃತಿಯ ಸೋದರಮಾವನ ಪ್ರೀತಿಯ ಸಂಕೇತವಾಗಿ ಈ ಕಾರ್ಯಕ್ರಮವನ್ನು ರೂಪಿಸಲಾಗಿದ್ದು, ಸರ್ಕಾರಿ ಆರೋಗ್ಯ ಸೇವೆಗಳ ಮೇಲೆ ಸಾರ್ವಜನಿಕರ ವಿಶ್ವಾಸವನ್ನು ಹೆಚ್ಚಿಸುವುದು ಹಾಗೂ ತಾಯಿ-ಮಗುವಿನ ಕಲ್ಯಾಣವನ್ನು ಉತ್ತೇಜಿಸುವುದು ಇದರ ಮುಖ್ಯ ಉದ್ದೇಶವಾಗಿದೆ. ಪ್ರತಿ ಉಂಗುರವು ವಿಶಿಷ್ಟ ಸೀರಿಯಲ್ ಸಂಖ್ಯೆಯನ್ನು ಹೊಂದಿರಲಿದ್ದು, ಸುರಕ್ಷಿತವಾದ ವಿಶೇಷ ಪ್ಯಾಕಿಂಗ್ನಲ್ಲಿ ಫಲಾನುಭವಿಗಳಿಗೆ ತಲುಪಲಿದೆ.
ಅರ್ಹತೆಯ ಮಾನದಂಡ ಹಾಗೂ ಅಗತ್ಯ ದಾಖಲೆಗಳು
ಈ ಸೌಲಭ್ಯವನ್ನು ಪಡೆಯಲು ತಾಯಂದಿರು ತಮಿಳುನಾಡಿನ ಖಾಯಂ ನಿವಾಸಿಗಳಾಗಿರಬೇಕು. ಜತೆಗೆ ಗರ್ಭಿಣಿ ಮತ್ತು ಶಿಶು ಸಮಗ್ರ ಕಣ್ಗಾವಲು (PICME) ವ್ಯವಸ್ಥೆಯಲ್ಲಿ ನೋಂದಾಯಿಸಿಕೊಂಡು ಸಂತಾನೋತ್ಪತ್ತಿ ಮತ್ತು ಮಕ್ಕಳ ಆರೋಗ್ಯ (RCH) ಗುರುತಿನ ಚೀಟಿ ಹೊಂದಿರಬೇಕಾಗುತ್ತದೆ. ಉಂಗುರ ಪಡೆಯುವ ಸಂದರ್ಭದಲ್ಲಿ ಇ-ಕೆವೈಸಿ ಪರಿಶೀಲನೆ ಪೂರ್ಣಗೊಂಡ ಆಧಾರ್ ಕಾರ್ಡ್ ಹಾಗೂ ನಿಗದಿತ ಗುರುತಿನ ಅಥವಾ ವಾಸಸ್ಥಳದ ದಾಖಲೆಯನ್ನು ಹಾಜರುಪಡಿಸುವುದು ಕಡ್ಡಾಯವಾಗಿದೆ.
ವ್ಯವಸ್ಥಿತ ವಿತರಣೆ ಮತ್ತು ಹಿಂಬಾಕಿ ಫಲಾನುಭವಿಗಳಿಗೆ ಸೌಲಭ್ಯ
ವಿತರಣಾ ಕೇಂದ್ರಗಳಲ್ಲಿ ನೂಕುನುಗ್ಗಲು ತಪ್ಪಿಸಲು ಬೆಳಗ್ಗೆ 25 ಹಾಗೂ ಮಧ್ಯಾಹ್ನ 25 ಫಲಾನುಭವಿಗಳಿಗೆ ಮಾತ್ರ ಅವಕಾಶ ನೀಡಲಾಗುತ್ತದೆ. ಗ್ರಾಮ ಆರೋಗ್ಯ ದಾದಿಯರ ಮೂಲಕ ಫಲಾನುಭವಿಗಳಿಗೆ ದಿನಾಂಕ ಹಾಗೂ ಸಮಯದ ಮಾಹಿತಿಯನ್ನು ಮುಂಚಿತವಾಗಿಯೇ ತಲುಪಿಸಲಾಗುವುದು. ಜೂನ್ 22 ರಿಂದ ಯೋಜನೆಯ ಆರಂಭದ ದಿನಾಂಕದವರೆಗೆ ಜನಿಸಿದ ಶಿಶುಗಳ ಹಿಂಬಾಕಿಯನ್ನು ಪೂರ್ಣಗೊಳಿಸಲು ರಾಜ್ಯಾದ್ಯಂತ 107 ಕೇಂದ್ರಗಳನ್ನು ತೆರೆಯಲಾಗಿದ್ದು, ಪ್ರತಿ ಕೇಂದ್ರದಲ್ಲಿ ದಿನಕ್ಕೆ 100 ಶಿಶುಗಳಿಗೆ ಉಂಗುರ ವಿತರಿಸಲಾಗುತ್ತದೆ. ಯೋಜನೆಯ ಚಾಲನೆಯ ನಂತರ ಜನಿಸುವ ಮಕ್ಕಳಿಗೆ ಅವರು ಜನಿಸಿದ ಸರ್ಕಾರಿ ಆಸ್ಪತ್ರೆಯಿಂದ ಬಿಡುಗಡೆಯಾಗುವ ದಿನವೇ ಸ್ಥಳದಲ್ಲೇ ಉಂಗುರವನ್ನು ನೀಡಲಾಗುತ್ತದೆ. ಫಲಾನುಭವಿಗಳು ಕೇಂದ್ರಗಳಿಗೆ ತೆರಳಲು ಜಿಲ್ಲಾಡಳಿತದ ವತಿಯಿಂದ ಸಾರಿಗೆ ವ್ಯವಸ್ಥೆಯನ್ನೂ ಕಲ್ಪಿಸಲಾಗಿದೆ.
ದೇಶದ ಕೃಷಿಯಲ್ಲಿ ರೈತ ಮಹಿಳೆಯರ ಪಾತ್ರ ಪ್ರಮುಖವಾದುದು : ವಿಧಾನಸಭೆ ಸಭಾಧ್ಯಕ್ಷ ಜಿ.ಎಸ್.ಪಾಟೀಲ | GS Patil
