ವಿಜ್ಞಾನ ಲೋಕವನ್ನು ಅಚ್ಚರಿಗೊಳಿಸುವಂತಹ ಮಹತ್ವದ ಸಂಶೋಧನೆಯೊಂದು ಬೆಳಕಿಗೆ ಬಂದಿದೆ. ಕೆಂಪು ಗ್ರಹ ಎಂದು ಕರೆಯಲ್ಪಡುವ ಮಂಗಳ ಗ್ರಹದಲ್ಲಿ ಒಂದು ಕಾಲದಲ್ಲಿ ಭೂಮಿಯ ಗಂಗಾ ಹಾಗೂ ಅಮೆಜಾನ್ ನದಿಗಳಿಗೆ ಸರಿಸಾಟಿಯಾದ ಬೃಹತ್ ನದಿ ವ್ಯವಸ್ಥೆಗಳು ಹರಿಯುತ್ತಿದ್ದವು ಎಂಬುದನ್ನು ವಿಜ್ಞಾನಿಗಳು ಮೊದಲ ಬಾರಿಗೆ ನಕ್ಷೆ (ಮ್ಯಾಪಿಂಗ್) ಮೂಲಕ ದೃಢಪಡಿಸಿದ್ದಾರೆ.
ಅಮೆರಿಕದ ಯುನಿವರ್ಸಿಟಿ ಆಫ್ ಟೆಕ್ಸಾಸ್ ಸಂಶೋಧಕರು ನಡೆಸಿದ ಈ ಅಧ್ಯಯನದ ವರದಿ ಪ್ರತಿಷ್ಠಿತ ‘ಪ್ರೊಸೀಡಿಂಗ್ಸ್ ಆಫ್ ದಿ ನ್ಯಾಷನಲ್ ಅಕಾಡೆಮಿ ಆಫ್ ಸೈನ್ಸಸ್’ (PNAS) ಜರ್ನಲ್ನಲ್ಲಿ ಪ್ರಕಟವಾಗಿದೆ. ಸಂಶೋಧನೆಯಲ್ಲಿ ಮಂಗಳ ಗ್ರಹದಲ್ಲಿ ಒಟ್ಟು 16 ಬೃಹತ್ ನದಿ ಪಾತ್ರಗಳು ಪತ್ತೆಯಾಗಿದ್ದು, ಅವುಗಳು ಪರಸ್ಪರ ಸಂಪರ್ಕ ಹೊಂದಿದ್ದ ಜಲಮಾರ್ಗಗಳ ಭಾಗವಾಗಿದ್ದವು ಎಂದು ತಿಳಿಸಲಾಗಿದೆ.
ಕೋಟ್ಯಂತರ ವರ್ಷಗಳ ಹಿಂದೆ ಮಂಗಳ ಗ್ರಹವು ಇಂದಿನಂತೆ ನಿರ್ಜೀವವಾಗಿರದೆ, ಹೆಚ್ಚು ಬೆಚ್ಚಗಿನ ಹಾಗೂ ಆರ್ದ್ರ ವಾತಾವರಣ ಹೊಂದಿತ್ತು ಎಂದು ವಿಜ್ಞಾನಿಗಳು ಅಭಿಪ್ರಾಯಪಟ್ಟಿದ್ದಾರೆ. ಆ ಕಾಲದಲ್ಲಿ ಸುರಿದ ಭಾರಿ ಮಳೆಯಿಂದ ಕಣಿವೆಗಳು ನಿರ್ಮಾಣವಾಗಿ, ನದಿಗಳ ಮೂಲಕ ನೀರು ಸರೋವರಗಳು ಹಾಗೂ ಸಾಗರಗಳಿಗೆ ಹರಿಯುತ್ತಿತ್ತು ಎನ್ನಲಾಗಿದೆ.ಭೂಮಿಯ ಮೇಲಿನ ನದಿ ಪಾತ್ರಗಳು ಜೀವವೈವಿಧ್ಯಕ್ಕೆ ಆಶ್ರಯವಾಗಿರುವಂತೆ, ಮಂಗಳದಲ್ಲಿಯೂ ಇಂತಹ ಪರಿಸ್ಥಿತಿ ಇದ್ದಿದ್ದರೆ ಅಲ್ಲಿ ಸೂಕ್ಷ್ಮಜೀವಿಗಳು ಬದುಕಿರುವ ಸಾಧ್ಯತೆ ಇದೆ ಎಂದು ಸಂಶೋಧಕರು ಅಂದಾಜಿಸಿದ್ದಾರೆ.
ಈ ಅಧ್ಯಯನಕ್ಕಾಗಿ ವಿಜ್ಞಾನಿಗಳು ನಾಸಾದ ಮಾರ್ಸ್ ಆರ್ಬಿಟರ್ ಲೇಸರ್ ಆಲ್ಟಿಮೀಟರ್ (MOLA) ಮತ್ತು ಮಾರ್ಸ್ ರೆಕನೈಸನ್ಸ್ ಆರ್ಬಿಟರ್ನ ಕಾಂಟೆಕ್ಸ್ಟ್ ಕ್ಯಾಮೆರಾ (CTX) ಒದಗಿಸಿದ ಮಾಹಿತಿಯನ್ನು ಬಳಸಿಕೊಂಡಿದ್ದಾರೆ.ಸಂಶೋಧನೆಯಲ್ಲಿ ಗುರುತಿಸಲಾದ 19 ಪ್ರಮುಖ ಜಲಮಾರ್ಗಗಳ ಪೈಕಿ 16 ನದಿ ಪಾತ್ರಗಳು ತಲಾ ಒಂದು ಲಕ್ಷ ಚದರ ಕಿಲೋಮೀಟರ್ಗಿಂತಲೂ ಹೆಚ್ಚಿನ ವಿಸ್ತೀರ್ಣ ಹೊಂದಿವೆ ಎಂಬುದು ವಿಶೇಷ.
ಮಣ್ಣಿನ ಸವೆತವೂ ಭಾರೀ ಪ್ರಮಾಣದಲ್ಲಿ ನಡೆದಿದೆ,
ಈ ನದಿಗಳು ಮಂಗಳದ ಕೇವಲ 5 ಪ್ರತಿಶತ ಪ್ರದೇಶದಲ್ಲಿದ್ದರೂ, ಗ್ರಹದ ಒಟ್ಟು ನದಿ ಸವೆತದ 42 ಪ್ರತಿಶತಕ್ಕೆ ಕಾರಣವಾಗಿವೆ. ಸುಮಾರು 28 ಸಾವಿರ ಕ್ಯೂಬಿಕ್ ಕಿಲೋಮೀಟರ್ ಮಣ್ಣು ಈ ಜಲಮಾರ್ಗಗಳ ಮೂಲಕ ಸಾಗಿರಬಹುದು ಎಂದು ಅಂದಾಜಿಸಲಾಗಿದೆ. ಈ ಹೂಳಿನಲ್ಲಿ ಜೀವಕ್ಕೆ ಅಗತ್ಯವಾದ ಪೋಷಕಾಂಶಗಳು ಇರಬಹುದೆಂಬ ನಿರೀಕ್ಷೆಯೂ ಮೂಡಿದೆ.
ಸುಮಾರು 450 ಕೋಟಿ ವರ್ಷಗಳ ಹಿಂದೆ ರೂಪುಗೊಂಡ ಮಂಗಳ ಗ್ರಹದಲ್ಲಿ 200 ಕೋಟಿ ವರ್ಷಗಳ ಹಿಂದಿನವರೆಗೂ ನೀರು ಇತ್ತು ಎಂದು ವಿಜ್ಞಾನಿಗಳು ನಂಬಿದ್ದಾರೆ. ಬಳಿಕ ಕಾಂತೀಯ ಕ್ಷೇತ್ರ ಹಾಗೂ ವಾತಾವರಣದ ನಷ್ಟದಿಂದ ನೀರು ಸಂಪೂರ್ಣವಾಗಿ ಆವಿಯಾಗಿ ಗ್ರಹ ಬರಿದಾಗಿದೆ.ಈಗ ಪತ್ತೆಯಾಗಿರುವ 16 ಬೃಹತ್ ನದಿ ಪಾತ್ರಗಳು ಮುಂದಿನ ದಿನಗಳಲ್ಲಿ ಮಂಗಳ ಗ್ರಹಕ್ಕೆ ತೆರಳಲಿರುವ ರೋವರ್ಗಳು ಹಾಗೂ ಪ್ರಾಚೀನ ಜೀವದ ಕುರುಹುಗಳನ್ನು ಹುಡುಕುವ ಸಂಶೋಧನಾ ಮಿಷನ್ಗಳಿಗೆ ಪ್ರಮುಖ ಗುರಿಯಾಗಲಿವೆ.
