ನವದೆಹಲಿ : ಸೆಪ್ಟೆಂಬರ್ ತಿಂಗಳು ಮುಕ್ತಾಯದ ಹಂತ ತಲುಪಿದ್ದು, ಅಕ್ಟೋಬರ್ (October) ತಿಂಗಳ ಆರಂಭದಿಂದ ದೇಶಾದ್ಯಂತ ಹಲವು ಮಹತ್ವದ ಆರ್ಥಿಕ ಮತ್ತು ನಾಗರಿಕ ನಿಯಮಗಳಲ್ಲಿ (Rules Change) ಬದಲಾವಣೆಗಳು ಜಾರಿಗೆ ಬರಲಿವೆ. ಎಲ್ಪಿಜಿ ಸಿಲಿಂಡರ್ ಬೆಲೆಗಳು, ಬ್ಯಾಂಕ್ ಎಟಿಎಂ ಶುಲ್ಕಗಳು, ಸ್ಥಿರ ಠೇವಣಿ ನಿಯಮಗಳು ಹಾಗೂ ಗೃಹೋಪಯೋಗಿ ವಸ್ತುಗಳ ಬೆಲೆಗಳಲ್ಲಿ ಈ ಬದಲಾವಣೆಗಳು ಕಂಡುಬರಲಿದ್ದು, ಜನಸಾಮಾನ್ಯರ ಮಾಸಿಕ ಬಜೆಟ್ ಮೇಲೆ ನೇರ ಪರಿಣಾಮ ಬೀರಲಿವೆ.
ಎಲ್ಪಿಜಿ ಸಿಲಿಂಡರ್ ಬೆಲೆ ಪರಿಷ್ಕರಣೆ
ಪ್ರತಿ ತಿಂಗಳ ಮೊದಲ ದಿನದಂತೆ ತೈಲ ಮಾರುಕಟ್ಟೆ ಕಂಪನಿಗಳು ಅಕ್ಟೋಬರ್ 1 ರಂದು ಎಲ್ಪಿಜಿ ಸಿಲಿಂಡರ್ಗಳ ಹೊಸ ದರಗಳನ್ನು ಪ್ರಕಟಿಸಲಿವೆ. ಇತ್ತೀಚಿನ ದಿನಗಳಲ್ಲಿ ವಾಣಿಜ್ಯ ಸಿಲಿಂಡರ್ಗಳ ಬೆಲೆಯಲ್ಲಿ ವ್ಯತ್ಯಾಸಗಳಾಗುತ್ತಿದ್ದು, ಗೃಹಬಳಕೆಯ 14 ಕೆಜಿ ಸಿಲಿಂಡರ್ ದರ ಸ್ಥಿರವಾಗಿದೆ. ಪ್ರಸ್ತುತ ದೆಹಲಿಯಲ್ಲಿ ಇದರ ದರ ₹942, ಕೋಲ್ಕತ್ತಾದಲ್ಲಿ ₹968, ಮುಂಬೈನಲ್ಲಿ ₹941.50 ಹಾಗೂ ಚೆನ್ನೈನಲ್ಲಿ ₹957.50 ರಷ್ಟಿದ್ದು, ಹೊಸ ದರಗಳ ಮೇಲೆ ಎಲ್ಲರ ಗಮನ ನೆಟ್ಟಿದೆ.
ಎಲ್ಪಿಜಿ ಸಬ್ಸಿಡಿ ಪಡೆಯಲು ಬಯೋಮೆಟ್ರಿಕ್ ಕಡ್ಡಾಯ
ಗೃಹಬಳಕೆಯ ಸಬ್ಸಿಡಿ ಸಿಲಿಂಡರ್ ಪಡೆಯಲು ಅಕ್ಟೋಬರ್ 1 ರಿಂದ ಕಠಿಣ ನಿಯಮ ಜಾರಿಗೆ ಬರುತ್ತಿದೆ. ಸಬ್ಸಿಡಿ ಸೌಲಭ್ಯ ಮುಂದುವರಿಯಬೇಕಾದರೆ ಗ್ರಾಹಕರು ಆಧಾರ್ ಬಯೋಮೆಟ್ರಿಕ್ ದೃಢೀಕರಣ ಅಥವಾ ಇ-ಕೆವೈಸಿ ಪ್ರಕ್ರಿಯೆಯನ್ನು ಪೂರ್ಣಗೊಳಿಸುವುದು ಕಡ್ಡಾಯವಾಗಿದೆ. ಈಗಾಗಲೇ ಈ ಪ್ರಕ್ರಿಯೆ ಮುಗಿಸಿರುವ ಗ್ರಾಹಕರು ಪುನಃ ಮಾಡಿಸುವ ಅಗತ್ಯವಿಲ್ಲ.
ಒಟಿಪಿ ಆಧಾರಿತ ಸಿಲಿಂಡರ್ ವಿತರಣೆ ವ್ಯವಸ್ಥೆ
ಸಿಲಿಂಡರ್ ವಿತರಣಾ ವ್ಯವಸ್ಥೆಯನ್ನು ಇನ್ನಷ್ಟು ಪಾರದರ್ಶಕಗೊಳಿಸಲು ಅಕ್ಟೋಬರ್ನಿಂದ ಒಟಿಪಿ ಆಧಾರಿತ ವಿತರಣಾ ಸೇವೆ ಆರಂಭವಾಗಲಿದೆ. ಇನ್ನು ಮುಂದೆ ಗ್ರಾಹಕರಿಗೆ ಸಿಲಿಂಡರ್ ತಲುಪಿಸುವಾಗ ಕೇವಲ ರಶೀದಿ ಸಾಕಾಗುವುದಿಲ್ಲ; ನೋಂದಾಯಿತ ಮೊಬೈಲ್ ಸಂಖ್ಯೆಗೆ ಬರುವ ಒಟಿಪಿ (OTP) ಸಂಖ್ಯೆಯನ್ನು ವಿತರಕರಿಗೆ ನೀಡಿ ದೃಢೀಕರಿಸುವುದು ಅನಿವಾರ್ಯವಾಗಲಿದೆ.
ವಿಮಾನ ಇಂಧನ ದರ ಬದಲಾವಣೆ
ತಿಂಗಳ ಮೊದಲ ದಿನದಂದು ತೈಲ ಕಂಪನಿಗಳು ವಿಮಾನ ಇಂಧನ ಅಥವಾ ಏರ್ ಟರ್ಬೈನ್ ಇಂಧನ (ಎಟಿಎಫ್) ದರಗಳನ್ನೂ ಪರಿಷ್ಕರಿಸಲಿವೆ. ಈ ದರಗಳಲ್ಲಿನ ಏರಿಳಿತಗಳು ನೇರವಾಗಿ ವಿಮಾನ ಪ್ರಯಾಣ ದರಗಳ ಮೇಲೆ ಪ್ರಭಾವ ಬೀರಲಿವೆ. ಪ್ರಸ್ತುತ ಕಿಲೋಲೀಟರ್ಗೆ ದೆಹಲಿಯಲ್ಲಿ ₹1,04,927, ಕೋಲ್ಕತ್ತಾದಲ್ಲಿ ₹1,09,450, ಮುಂಬೈನಲ್ಲಿ ₹98,247 ಹಾಗೂ ಚೆನ್ನೈನಲ್ಲಿ ₹1,09,873 ರಷ್ಟಿದೆ.
ಎಸ್ಬಿಐ ಎಟಿಎಂ ಹಿಂಪಡೆಯುವಿಕೆ ನಿಯಮ ಹಾಗೂ ಶುಲ್ಕ ಏರಿಕೆ
ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಗ್ರಾಹಕರ ನಗದು ಹಿಂಪಡೆಯುವಿಕೆ ಶುಲ್ಕಗಳಲ್ಲಿ ಬದಲಾವಣೆ ತರಲಾಗಿದೆ. ಬಿಎಸ್ಬಿಡಿ ಖಾತೆದಾರರು ತಿಂಗಳಿಗೆ ನಾಲ್ಕು ಉಚಿತ ವಹಿವಾಟುಗಳ ನಂತರ ಪ್ರತಿ ಎಟಿಎಂ ಡ್ರಾಗೆ ₹15 ಜೊತೆಗೆ ಜಿಎಸ್ಟಿ ಪಾವತಿಸಬೇಕಾಗುತ್ತದೆ. ಜೊತೆಗೆ ಸ್ಯಾಲರಿ ಖಾತೆದಾರರ ಮಾಸಿಕ ಉಚಿತ ಮಿತಿಯನ್ನು 10 ರಿಂದ 5ಕ್ಕೆ ಇಳಿಸಲಾಗಿದ್ದು, ಮಿತಿ ಮೀರಿದ ಪ್ರತಿ ಹಣಕಾಸು ವಹಿವಾಟಿಗೆ ₹23 ಜೊತೆಗೆ ಜಿಎಸ್ಟಿ ಹಾಗೂ ಹಣಕಾಸೇತರ ವಹಿವಾಟಿಗೆ ₹11 ಜೊತೆಗೆ ಜಿಎಸ್ಟಿ ವಿಧಿಸಲಾಗುತ್ತದೆ.
ಸ್ಥಿರ ಠೇವಣಿ ಮೇಲಿನ ಆರ್ಬಿಐ ಹೊಸ ಮಾರ್ಗಸೂಚಿ
ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಫಿಕ್ಸೆಡ್ ಡೆಪಾಸಿಟ್ (ಎಫ್ಡಿ) ನಿಯಮಗಳಲ್ಲಿ ಹೊಸ ಬದಲಾವಣೆಗಳನ್ನು ತರುತ್ತಿದೆ. ಹೊಸ ನಿಬಂಧನೆಗಳ ಪ್ರಕಾರ ಬ್ಯಾಂಕುಗಳು ಪ್ರತಿದಿನ ಬೆಳಗ್ಗೆ 10 ಗಂಟೆಯೊಳಗೆ ಬಡ್ಡಿದರಗಳ ವಿವರಗಳನ್ನು ತಮ್ಮ ಜಾಲತಾಣಗಳಲ್ಲಿ ನವೀಕರಿಸಬೇಕು. ಅಲ್ಲದೆ, ಒಂದೇ ದಿನದಲ್ಲಿ ಸ್ವೀಕರಿಸಿದ ಠೇವಣಿಗಳಿಗೆ ತಾರತಮ್ಯವಿಲ್ಲದೆ ಸಮಾನ ಬಡ್ಡಿದರ ನೀಡಬೇಕು ಹಾಗೂ ಬಲ್ಕ್ ಡೆಪಾಸಿಟ್ಗಳಿಗೆ ಸಂಬಂಧಿಸಿದ ನಿಯಮಗಳಲ್ಲೂ ಬದಲಾವಣೆ ತರಲಾಗಿದೆ.
ಎನ್ಆರ್ಐ ಆಸ್ತಿ ಖರೀದಿ ಪ್ರಕ್ರಿಯೆ ಮತ್ತು ಟಿಡಿಎಸ್ ಸರಳೀಕರಣ
ಅನಿವಾಸಿ ಭಾರತೀಯರಿಂದ (ಎನ್ಆರ್ಐ) ಆಸ್ತಿ ಖರೀದಿಸುವ ಪ್ರಕ್ರಿಯೆಯನ್ನು ಸುಲಭಗೊಳಿಸಲು ಆದಾಯ ತೆರಿಗೆ ಇಲಾಖೆ ಹೊಸ ವ್ಯವಸ್ಥೆ ಜಾರಿಗೆ ತರುತ್ತಿದೆ. ಭಾರತೀಯ ನಿವಾಸಿಗಳು ಹಾಗೂ ಹಿಂದೂ ಅವಿಭಕ್ತ ಕುಟುಂಬಗಳು (HUF) ಇನ್ನು ಮುಂದೆ ಪ್ರತ್ಯೇಕವಾಗಿ ಟಿಡಿಎಸ್ ಕಡಿತಗೊಳಿಸಿ ಸಲ್ಲಿಸುವ ಸಂಕೀರ್ಣ ಪ್ರಕ್ರಿಯೆ ಇರುವುದಿಲ್ಲ. ಬದಲಾಗಿ, ತಮ್ಮ ಪ್ಯಾನ್ (PAN) ಕಾರ್ಡ್ ಮೂಲಕವೇ ಸುಲಭವಾಗಿ ಟಿಡಿಎಸ್ ಕಡಿತಗೊಳಿಸಿ ಪಾವತಿಸಬಹುದು.
ಜನನ ಮತ್ತು ಮರಣ ನೋಂದಣಿ ನಿಯಮಗಳು ಕಠಿಣ
ಜನನ ಮತ್ತು ಮರಣಗಳ ನೋಂದಣಿ ಪ್ರಕ್ರಿಯೆಯಲ್ಲಿನ ವಿಳಂಬಕ್ಕೆ ಕಡಿವಾಣ ಹಾಕಲು ನಿಯಮಗಳನ್ನು ಕಠಿಣಗೊಳಿಸಲಾಗುತ್ತಿದೆ. ನಿಗದಿತ 21 ದಿನಗಳ ಗಡುವಿನ ನಂತರ ಮಾಡುವ ನೋಂದಣಿಗಳಿಗೆ ಹೆಚ್ಚಿನ ದಂಡ ವಿಧಿಸಲಾಗುತ್ತದೆ. ಜೊತೆಗೆ ಕಾಲಮಿತಿ ಮೀರಿದ ಬಳಿಕ ಸಲ್ಲಿಸುವ ಅರ್ಜಿಗಳಿಗೆ ಅಫಿಡವಿಟ್ ನೀಡುವುದು ಕಡ್ಡಾಯವಾಗುವ ಸಾಧ್ಯತೆಯಿದೆ.
ಟಿವಿ, ಫ್ರಿಡ್ಜ್ ಮತ್ತು ಎಸಿ ಬೆಲೆಗಳಲ್ಲಿ ಭಾರೀ ಏರಿಕೆ
ಹಬ್ಬದ ಸೀಸನ್ ಆರಂಭದಲ್ಲೇ ಗೃಹೋಪಯೋಗಿ ಎಲೆಕ್ಟ್ರಾನಿಕ್ ವಸ್ತುಗಳ ಖರೀದಿ ದುಬಾರಿಯಾಗಲಿದೆ. ತಾಮ್ರ, ಉಕ್ಕು, ಅಲ್ಯೂಮಿನಿಯಂ ಹಾಗೂ ಕಚ್ಚಾ ತೈಲದಂತಹ ಕಚ್ಚಾವಸ್ತುಗಳ ಬೆಲೆ ಗಣನೀಯವಾಗಿ ಏರಿಕೆಯಾಗಿರುವುದು ಮತ್ತು ಸಾರಿಗೆ ವೆಚ್ಚ ಹೆಚ್ಚಾಗಿರುವುದರಿಂದ ಟಿವಿ, ರೆಫ್ರಿಜರೇಟರ್ ಮತ್ತು ಏರ್ ಕಂಡೀಷನರ್ಗಳ ಬೆಲೆ ಶೇಕಡಾ 8 ರಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ.
ಅಕ್ಟೋಬರ್ ತಿಂಗಳಲ್ಲಿ 16 ದಿನ ಬ್ಯಾಂಕ್ ರಜೆ
ಅಕ್ಟೋಬರ್ ತಿಂಗಳಲ್ಲಿ ಬ್ಯಾಂಕ್ ಸಂಬಂಧಿತ ಕೆಲಸಗಳಿದ್ದರೆ ಗ್ರಾಹಕರು ಮುಂಚಿತವಾಗಿಯೇ ಯೋಜಿಸುವುದು ಉತ್ತಮ. ದಸರಾ ಮತ್ತು ಗಾಂಧಿ ಜಯಂತಿ ಸೇರಿದಂತೆ ವಾರದ ರಜೆಗಳೂ ಸೇರಿ ತಿಂಗಳಲ್ಲಿ ಒಟ್ಟು 16 ದಿನಗಳ ಕಾಲ ಬ್ಯಾಂಕ್ಗಳು ಮುಚ್ಚಲ್ಪಡಲಿವೆ. ಶಾಖೆಗಳು ಮುಚ್ಚಿದ್ದರೂ ಆನ್ಲೈನ್ ಬ್ಯಾಂಕಿಂಗ್ ಮತ್ತು ಎಟಿಎಂ ಸೇವೆಗಳು ಎಂದಿನಂತೆ ಕಾರ್ಯನಿರ್ವಹಿಸಲಿವೆ.
