ನವದೆಹಲಿ : ಇರಾನ್ ಮೇಲೆ ನಡೆಸಿರುವ ಇಸ್ರೇಲ್ ಹಾಗೂ ಅಮೆರಿಕ ದೇಶಗಳ ಯುದ್ಧಕ್ಕೆ ಇಂದು 22 ದಿನಗಳಾಗಿವೆ. ಆದರೆ ಈ ಮೂರು ವಾರಗಳಲ್ಲಿ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇರಾನ್ ಸೇನೆ ಮುಗಿದಿದೆ, ಅಲ್ಲಿ ಅಪಾರ ಪ್ರಮಾಣದ ಆಸ್ತಿ ಪಾಸ್ತಿ ಹಾಗೂ ಸೇನಾ ನೆಲೆಗಳು, ವಾಯು ನೆಲೆಗಳನ್ನು ಧ್ವಂಸ ಮಾಡಿದ್ದೇವೆ ಎಂಬ ಇತ್ಯಾದಿ ಹೇಳಿಕೆಗಳನ್ನು ನೀಡುತ್ತಿದ್ದರು. ಯುದ್ಧ ಆರಂಭಿಸಿದ್ದಾಗಿನಿಂದ ಹಿಡಿದು ಪ್ರತಿ ದಿನ ಮಾಧ್ಯಮಗಳಿಗೆ ಮನಬಂದಂತೆ ಕಪೋಲ ಕಲ್ಪಿತ ಮಾಹಿತಿ ತುಂಬುತ್ತಿದ್ದರು.
ಆದರೆ ಅಮೆರಿಕದ ಹಸಿ ಹಸಿ ಸುಳ್ಳುಗಳನ್ನು ಇದೀಗ ಇರಾನ್ ಜಗತ್ತಿನ ಮುಂದೆ ಬಟಾ ಬಯಲು ಮಾಡಿದೆ. ಈಗಾಗಲೇ ನಾವು ಹೇಳಿಕೊಂಡಂತೆ ಅಮೆರಿಕದ F-35 ವಿಮಾನ ಉರುಳಿಸಿದ್ದೇವೆ. ಯುಎಸ್ಎಸ್ನ ಜೆರಾಲ್ಡ್ ಫೋರ್ಡ್, ಅಮೆರಿಕದ ಅಬ್ರಹಾಂ ಲಿಂಕನ್ ನೌಕೆಯು ನೆಲಕಚ್ಚಿದೆ. ಈ ಯುದ್ಧದಲ್ಲಿ ಅಮೆರಿಕಕ್ಕೆ ಗೆಲುವಾಗಲು ಸಾಧ್ಯವೇ ಇಲ್ಲ, ಟ್ರಂಪ್ ಹೇಳಿರುವುದು ಎಲ್ಲ ಸುಳ್ಳು ಎಂದು ಇರಾನ್ನ ವಿದೇಶಾಂಗ ಸಚಿವ ಸೈಯ್ಯದ್ ಅಬ್ಬಾಸ್ ಅರಾಘ್ಚಿ ಕಿಡಿ ಕಾರಿದ್ದಾರೆ.
ವಿಯೆಟ್ನಾಂನಲ್ಲಿ ನೂರಾರು ಅಮೆರಿಕನ್ ಸೈನಿಕರು ಸಾವನ್ನಪ್ಪಿದ್ದಾಗ ಆ ಫಲಿತಾಂಶವು ಸ್ಪಷ್ಟವಾಗಿದ್ದಾಗಲೂ, ಯುದ್ಧವು ಚೆನ್ನಾಗಿ ನಡೆಯುತ್ತಿದೆ ಎಂದು ಎಲ್ಲರಿಗೂ ಭರವಸೆ ನೀಡಲು ಜನರಲ್ ವಿಲಿಯಂ ವೆಸ್ಟ್ಮೋರ್ಲ್ಯಾಂಡ್ ಅವರನ್ನು ಮನೆಗೆ ಕರೆಸಿದ್ದೀರಿ ಎಂದು ಟೀಕಿಸಿದ್ದಾರೆ.
ಇದನ್ನೂ ಓದಿ : ಕನ್ನಡ ಗೀತೆಯ ಮೂಲಕ ಪ್ರಧಾನಿ ಮೋದಿ ಶುಭಾಶಯ ಸಂದೇಶ
ಮಾಧ್ಯಮಗಳು ಸಹ ಯಾವುದನ್ನೂ ಮರೆತಿಲ್ಲ, ಮುಂಚೂಣಿಯಿಂದ ಬಂದ ಆ ಅಸತ್ಯದ, ಉಡಾಫೆಯ ಮಾತುಗಳನ್ನು ಸುದ್ದಿಗೋಷ್ಠಿಯ ಹೇಳಿಕೆಗಳಲ್ಲಿ ನೋಡಿದ್ದೇವೆ. ಆದರೆ ಇವೆಲ್ಲ ನಿಮ್ಮ ಅಪಖ್ಯಾತಿಗೆ ಕಾರಣವಾಗುತ್ತವೆ ಎಂದು ಟೀಕಾಪ್ರಹಾರ ನಡೆಸಿದ್ದಾರೆ.
ಇಂದಿನವರೆಗೆ ನೀವು ವೇಗವಾಗಿ ಮುಂದುವರಿಯಿರಿ: ಅದೇ ಸ್ಕ್ರಿಪ್ಟ್, ಆದರೆ ವಿಭಿನ್ನ ಶೈಲಿಯಷ್ಟೇ; ಆ ಹೆಗ್ಸೆತ್ ಹೆಜ್ಜೆ ಹಾಕುತ್ತಾನೆ, ಸತ್ಯವನ್ನು ಮರೆಮಾಚಿ ಸುಳ್ಳನ್ನು ಹರಡುತ್ತೀರಿ ಎಂದು ಅಮೆರಿಕದ ವಿರುದ್ಧ ಅರಾಘ್ಚಿ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಈ ಯುದ್ಧದ ವಿಚಾರದಲ್ಲಿ ಅಮೆರಿಕ ಸರ್ಕಾರ ಒಂದು ಹೇಳುತ್ತಿದೆ, ಆದರೆ ವಾಸ್ತವತೆಯೇ ಬೇರೆಯಿದೆ. ಇರಾನ್ನ ವಾಯು ರಕ್ಷಣಾ ವ್ಯವಸ್ಥೆಗಳು ಸಂಪೂರ್ಣವಾಗಿ ನಾಶವಾಗಿವೆ ಎಂದು ಅಮೆರಿಕದ ಅಧಿಕಾರಿಗಳು ಹಸಿ ಸುಳ್ಳು ಹೇಳುತ್ತಿದ್ದಂತೆಯೇ ಒಂದು ಎಫ್-35 ವಿಮಾನವನ್ನು ನಾವು ಹೊಡೆದುರುಳಿಸಿದ್ದೇವೆ ಎಂದು ತಿಳಿಸಿದ್ದಾರೆ.
ಅಷ್ಟೇ ಅಲ್ಲದೆ ಇರಾನ್ನ ನೌಕಾಪಡೆಯನ್ನು ಸಂಪೂರ್ಣ ಮುಗಿಸಿದ್ದೇವೆ ಎಂಬ ಹೇಳಿಕೆಯನ್ನೂ ನೀಡುವಷ್ಟರಲ್ಲಿಯೇ, ನಾವು ಅಮೆರಿಕದ ಜೆರಾಲ್ಡ್ ಫೋರ್ಡ್ ನೌಕೆಯನ್ನು ಪುಡಿಗಟ್ಟಿದ್ದೇವೆ. ಅಮೆರಿಕದ ಸುಳ್ಳಿನ ಸರಮಾಲೆಯನ್ನೇ ಹೆಣೆಯುತ್ತಿದೆ. ಆದರೆ ಇದರಲ್ಲಿ ಗೆಲುವು ನಮ್ಮದೇ ಎಂದು ಸೈಯ್ಯದ್ ಅಬ್ಬಾಸ್ ಅರಾಘ್ಚಿ ತಮ್ಮ ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಹಂಚಿಕೊಂಡು ಅಮೆರಿಕ ಹಾಗೂ ಟ್ರಂಪ್ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ.
