ಗಾಂಧಿನಗರ, ಮೆಜೆಸ್ಟಿಕ್ ಸುತ್ತ ಮುತ್ತಲಿನ ಸಂಚಾರದ ಕಿರಿಕಿರಿ ತಪ್ಪಿಸಲು ಬಿಬಿಎಂಪಿ ಬಹುಮಹಡಿಯ ಪಾರ್ಕಿಂಗ್ ಕಟ್ಟಡ ನಿರ್ಮಾಣ ಮಾಡಿದೆ. ಸುಮಾರು 70 ಕೋಟಿಗೂ ಅಧಿಕ ಬಜೆಟ್ ನಲ್ಲಿ ಈ ಪಾರ್ಕಿಂಗ್ ಕಟ್ಟಡ ಕಟ್ಟಲಾಗಿದೆ. ಇದು ಈಗ ಲೋಕಾರ್ಪಣೆಗೊಳ್ಳಲು ಸಿದ್ಧಗೊಳ್ಳುತ್ತಿದೆ.
ಪಾರ್ಕಿಂಗ್ನಿಂದಾಗಿ ಸಂಚಾರ ದಟ್ಟಣೆ ಬೆಂಗಳೂರಿನಲ್ಲಿ ಮಾಮೂಲು. ಅದರಲ್ಲಿ ರಾಜಧಾನಿಯ ಹೃದಯ ಭಾಗ ಗಾಂಧಿನಗರ, ಮೆಜೆಸ್ಟಿಕ್ ಕಡೆ ಕಂಡಕಂಡಲ್ಲಿ ವಾಹನ ನಿಲ್ಲಿಸಿ ಸಂಚಾರ ದಟ್ಟಣೆ ಉಂಟಾಗುತ್ತದೆ. ಈ ಭಾಗದಲ್ಲಿ ಇದಕ್ಕೊಂಡು ಶಾಶ್ವತ ಪರಿಹಾರ ಕಂಡುಕೊಳ್ಳುವ ನಿಟ್ಟಿನಲ್ಲಿ ಪೊಲೀಸ್ ಇಲಾಖೆಯ ಮನವಿಯ ಮೇರೆಗೆ ಬಿಬಿಎಂಪಿ ಬಹುಮಹಡಿ ಪಾರ್ಕಿಂಗ್ ಕಟ್ಟಡ ನಿರ್ಮಿಸಲು ತೀರ್ಮಾನಿಸಿತ್ತು. ಕೊನೆಗೆ ಬೇಡಿಕೆಯಂತೆ ಮಲ್ಟಿ ಫ್ಲೋರ್ಡ್ ಪಾರ್ಕಿಂಗ್ ಬಿಲ್ಡಿಂಗ್ ನಿರ್ಮಾಣವನ್ನೂ ಪಾಲಿಕೆ ಮುಗಿಸಿದೆ. ಆದರೆ ಇದೀಗ ಅದೇ ಪಾಲಿಕೆ ಪಾಲಿಗೆ ತಲೆ ನೋವಾಗಿ ಪರಿಣಮಿಸಿದೆ. ಅಂದಹಾಗೆ, ಈ ಬಹುಮಹಡಿ ಪಾರ್ಕಿಂಗ್ ಕಟ್ಟಡವಿರುವುದು ಫ್ರೀಡಂ ಪಾರ್ಕ್ ಪಕ್ಕದಲ್ಲಿ.
ಟೆಂಡರ್ ಪಡೆಯಲು ಗುತ್ತಿಗೆದಾರರ ಹಿಂದೇಟಿನಿಂದ ಪಾಲಿಕೆಗೆ ಟೆನ್ಷನ್ !
ಬಿಬಿಎಂಪಿ ಅಂದಾಜು 79 ಕೋಟಿ ರೂಪಾಯಿ ವೆಚ್ಚದಲ್ಲಿ ಈ ಬಹುಮಹಡಿ ಪಾರ್ಕಿಂಗ್ ಬಿಲ್ಡಿಂಗ್ ಅನ್ನು ನಿರ್ಮಾಣ ಮಾಡಿದೆ. ಇಷ್ಟೂ ದೊಡ್ಡ ಮೊತ್ತದಲ್ಲಿ ಕಟ್ಟಡ ನಿರ್ಮಾಣ ಮಾಡಿ ಇದೀಗ ಟೆಂಡರ್ ನೀಡಲಾಗದೆ ಟೆನ್ಷನ್ ನಲ್ಲಿದೆ ಪಾಲಿಕೆ. ಹೌದು, ಪಾಲಿಕೆಯ ಈ ಹೊಸ ಕಟ್ಟಡ ಗುತ್ತಿಗೆ ಪಡೆಯಲು ಗುತ್ತಿಗೆದಾರರು ಹಿಂದೇಟು ಹಾಕುತ್ತಿದ್ದಾರೆ. ಕೋಟಿ ಕೋಟಿ ವೆಚ್ಚದಲ್ಲಿ ಪಾರ್ಕಿಂಗ್ ಕಟ್ಟಡ ನಿರ್ಮಾಣ ಮಾಡಿ, ಕಾಂಟ್ರ್ಯಾಕ್ಟರ್ಸ್ ಇಲ್ಲದೆ ಪರದಾಡುತ್ತಿದೆ ಪಾಲಿಕೆ. ಪ್ರತಿಭಟನೆ, ಸಮಾವೇಶ ಸೇರಿದ ಸಾರ್ವಜನಿಕ ಕಾರ್ಯಕ್ರಮಗಳನ್ನು ಗಮನದಲ್ಲಿಟ್ಟುಕೊಂಡು ಕಟ್ಟಡ ನಿರ್ಮಾಣ ಮಾಡಿದರೂ ಟೆಂಡರ್ ಪಡೆಯಲು ಗುತ್ತಿಗೆದಾರರು ಹಿಂದೇಟು ಹಾಕುತ್ತಿದ್ದಾರೆ.
79 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣಗೊಂಡಿರುವ ಬಹುಮಹಡಿ ಕಟ್ಟಡ !
ಪಾಲಿಕೆ ವತಿಯಿಂದ ಸುಮಾರು 79 ಕೋಟಿ ಹಣದಲ್ಲಿ ನಿರ್ಮಿಸಿರುವ ಈ ಪಾರ್ಕಿಂಗ್ ಕಟ್ಟಡದಿಂದ ಮೆಜೆಸ್ಟಿಕ್, ಗಾಂಧಿನಗರ, ಫ್ರೀಡಂ ಪಾರ್ಕ್ ಸುತ್ತಮುತ್ತ ಪಾರ್ಕಿಂಗ್ ದಟ್ಟಣೆ ಕಡಿಮೆ ಮಾಡುವ ಯೋಜನೆ ಹಾಕಿಕೊಂಡಿತ್ತು ಪಾಲಿಕೆ. ಕಾರು, ಧ್ವಿಚಕ್ರ ವಾಹನಗಳು ಸೇರಿದಂತೆ ಸುಮಾರು ಒಂದು ಸಾವಿರಕ್ಕೂ ಅಧಿಕ ವಾಹನಗಳಿಗೆ ಪಾರ್ಕಿಂಗ್ ವ್ಯವಸ್ಥೆ ಇಲ್ಲಿ ಮಾಡಲಾಗಿದೆ. ಪಾಲಿಕೆಯಿಂದ ವಾರ್ಷಿಕ 4.5 ಕೋಟಿ ಅದಾಯ ನಿರೀಕ್ಷೆ ಇಡಲಾಗಿದೆ. ಹೀಗಾಗಿ ಇಷ್ಟೊಂದು ದೊಡ್ಡ ಮೊತ್ತದ ಆದಾಯ ಗುತ್ತಿಗೆದಾರರಿಗೆ ಇಲ್ಲಿಂದ ಸಿಗುತ್ತೋ ಇಲ್ಲವೋ ಎಂಬುವುದೇ ಅನುಮಾನ. ಹೀಗಾಗಿ ಗುತ್ತಿಗೆದಾರರು ಟೆಂಡರ್ ಪಡೆದುಕೊಳ್ಳಲು ಹಿಂದೇಟು ಹಾಕುತ್ತಿದ್ದಾರೆ. ಕಳೆದ ಒಂದು ತಿಂಗಳಿಂದ ಪಾರ್ಕಿಂಗ್ ಟೆಂಡರ್ ಕರೆದರೂ ಯಾವುದೇ ಗುತ್ತಿಗೆ ಕಂಪೆನಿಗಳು ಮುಂದೆ ಬಂದಿಲ್ಲ.
ಟೆಂಡರ್ ಆಗದ ಭಾರವನ್ನು ಜನರ ಮೇಲೆ ಹೊರೆಸಲು ಬಿಬಿಎಂಪಿ ಪ್ಲ್ಯಾನ್ !
ಈ ಭಾಗದಲ್ಲಿ ಕೆಲವು ಉಚಿತ ಪಾರ್ಕಿಂಗ್ ವ್ಯವಸ್ಥೆ ಮಾಡಲಾಗಿದೆ. ಪಕ್ಕದಲ್ಲೇ ಫ್ರೀಡಂ ಪಾರ್ಕ್ ಕೂಡ ಇರುವುದರಿಂದ ಸಾರ್ವಜನಿಕ ವಾಹನಗಳು ನಿಲುಗಡೆಯಾಗುತ್ತಿದೆ. ಇದರಿಂದಾಗಿ ಗುತ್ತಿಗೆದಾರರಿಗೆ ಟೆಂಡರ್ ಪಡೆಯಲು ಮುಳುವಾಯ್ತು ಎಂದು ಹೇಳಲಾಗಿದೆ. ಈ ಉಚಿತ ವಾಹನ ನಿಲುಗಡೆಯಲ್ಲಿ ವಾಹನ ನಿಲ್ಲಿಸಿದರೆ ಶುಲ್ಕ ವಿಧಿಸುವ ಬಹುಮಹಡಿ ಪಾರ್ಕಿಂಗ್ಗೆ ಜನ ಬರುವುದಿಲ್ಲ ಎಂಬುವುದು ಗುತ್ತಿಗೆದಾರರ ವಾದ. ಈ ಹಿನ್ನೆಲೆಯಲ್ಲಿ ಗುತ್ತಿಗೆದಾರರು ಟೆಂಡರ್ ನಲ್ಲಿ ಭಾಗವಹಿಸಲು ಹಿಂದೇಟು ಹಾಕುತ್ತಿದ್ದಾರೆ. ಹೀಗಾಗಿ ಬಿಬಿಎಂಪಿ ಮೆಜೆಸ್ಟಿಕ್, ಗಾಂಧಿನಗರ ಸುತ್ತಮುತ್ತ ರಸ್ತೆಗಳಲ್ಲಿ ನಿಲುಗಡೆಗೆ ಪಾರ್ಕಿಂಗ್ ಶುಲ್ಕ ಹೇರಲು ತೀರ್ಮಾನಿಸಿದೆ. ಈ ಮೂಲಕ ಸದ್ಯಕ್ಕೆ ಶುರುವಾಗಿರುವ ಬಹುಮಹಡಿ ಪಾರ್ಕಿಂಗ್ ಟೆಂಡರ್ ತಲೆ ನೋವನ್ನು ನಿಭಾಯಿಸುವ ಲೆಕ್ಕಾಚಾರ ಹಾಕಿಕೊಂಡಿದೆ ಬಿಬಿಎಂಪಿ.
ವಾಹನ ಕಳ್ಳರ ಕಾಟ !
ಗಾಂಧಿನಗರ ಹಾಗೂ ಫ್ರೀಡಂ ಪಾರ್ಕ್ ಸುತ್ತ ಮುತ್ತ ನಕಲಿ ಕೀಲಿ ಕೈ ಬಳಸಿ ದ್ವಿಚಕ್ರ ವಾಹನ ಕಳವು ಮಾಡುವ ಪ್ರಕರಣಗಳು ನಡೆಯುತ್ತಿದ್ದವು. ಬೆಳ್ಳಗ್ಗೆ ರಸ್ತೆ ಬದಿ ವಾಹನ ನಿಲುಗಡೆ ಮಾಡಿ ತೆರಳಿದ್ದರೆ ಸಾಯಂಕಾಲದ ವೇಳೆಗೆ ವಾಹನಗಳು ನಿಲ್ಲಿಸಿದ ಜಾಗದಲ್ಲಿ ಇರುತ್ತಿರಲಿಲ್. ಪೊಲೀಸರಿಗೆ ದೂರು ನೀಡಿದರು ಸಹ ಯಾವುದೇ ಪ್ರಯೋಜನವಾಗುತ್ತಿರಲಿಲ್ಲ ಈ ಕಟ್ಟಡವು ವಾಹನ ಸವಾರರ ಬಳಕೆಗೆ ಲಭಿಸಿದ ನಂತರ ವಾಹನಗಳು ಸುರಕ್ಷಿತವಾಗಿರಲಿವೆ.
ವಿದ್ಯುತ್ ಉತ್ಪಾದನೆ !
ಕಟ್ಟಡದಲ್ಲಿ ಒಟ್ಟು 556 ಕಾರು ಹಾಗೂ 445 ದ್ವಿಚಕ್ರ ವಾಹನಗಳನ್ನು ಏಕಕಾಲದಲ್ಲಿ ನಿಲ್ಲಿಸಬಹುದು. ಕಟ್ಟಡದ ಚಾವಣಿಯಲ್ಲಿ ಸೋಲಾರ್ ಪ್ಯಾನಲ್ಗಳನ್ನು ಅಳವಡಿಸಲಾಗಿದ್ದು ಪ್ರತಿನಿತ್ಯ 500ಕಿಲೋ ವ್ಯಾಟ್ ವಿದ್ಯುತ್ ಉತ್ಪಾದಿಸಲಾಗುವುದು ಲಿಫ್ಟ್ ಹಾಗೂ ಬೆಳಕಿನ ವ್ಯವಸ್ಥೆಗೆ ಇದೇ ವಿದ್ಯುತ್ ಬಳಸಲಾಗುವುದು.
