ಸೋನಿಪತ್ : ಹರಿಯಾಣದ ಸೋನಿಪತ್ನ ಸಿಕ್ಕಾ ಕಾಲೋನಿಯಲ್ಲಿ ಆರು ತಿಂಗಳ ಹಸುಗೂಸಿನ ಮೇಲೆ ಪಿಟ್ಬುಲ್ ತಳಿಯ ನಾಯಿಯೊಂದು ಭೀಕರವಾಗಿ ದಾಳಿ ನಡೆಸಿದ್ದು, ಮಗು ಗಂಭೀರವಾಗಿ ಗಾಯಗೊಂಡಿರುವ ಆಘಾತಕಾರಿ ಘಟನೆ ನಡೆದಿದೆ.
ಮಗುವನ್ನು ಆಕೆಯ ಚಿಕ್ಕಮ್ಮ ಎತ್ತಿಕೊಂಡು ರಸ್ತೆಯಲ್ಲಿ ವಾಕಿಂಗ್ ಕರೆದೊಯ್ದಿದ್ದಾಗ ಈ ದುರ್ಘಟನೆ ಸಂಭವಿಸಿದೆ. ಏಕಾಏಕಿ ನುಗ್ಗಿ ಬಂದ ಪಿಟ್ಬುಲ್ ನಾಯಿ, ಮಗುವಿನ ಮೇಲೆರಗಿದೆ. ನಾಯಿಯ ರಭಸಕ್ಕೆ ಮಹಿಳೆ ಮತ್ತು ಮಗು ಇಬ್ಬರೂ ನೆಲಕ್ಕುರುಳಿದ್ದಾರೆ. ಮಹಿಳೆ ಮಗುವನ್ನು ರಕ್ಷಿಸಲು ಶತಪ್ರಯತ್ನ ಪಟ್ಟರೂ, ನಾಯಿ ಮಗುವನ್ನು ಬಾಯಲ್ಲಿ ಕಚ್ಚಿ ಹಿಡಿದು ರಸ್ತೆಯುದ್ದಕ್ಕೂ ಎಳೆದೊಯ್ದು ಗಾಯಗೊಳಿಸಿದೆ. ಸ್ಥಳೀಯರು ನಾಯಿಯನ್ನು ಬಿಡಿಸಲು ಹರಸಾಹಸ ಪಟ್ಟರೂ ಅದು ಮಗುವನ್ನು ಬಿಡದೆ ದಾಳಿ ಮುಂದುವರಿಸಿತ್ತು. ಈ ಬೆಚ್ಚಿಬೀಳಿಸುವ ದೃಶ್ಯಗಳು ಸಮೀಪದ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿವೆ.
ದಾಳಿಯಿಂದ ತೀವ್ರವಾಗಿ ಗಾಯಗೊಂಡ ಮಗುವನ್ನು ತಕ್ಷಣವೇ ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ, ಪರಿಸ್ಥಿತಿ ಚಿಂತಾಜನಕವಾಗಿದ್ದರಿಂದ ಹೆಚ್ಚಿನ ಚಿಕಿತ್ಸೆಗಾಗಿ ರೋಹ್ಟಕ್ ಆಸ್ಪತ್ರೆಗೆ ರವಾನಿಸಲಾಗಿದೆ.
