ಪಾರ್ಸಾ ವೆಂಕಟೇಶ್ವರ್ ರಾವ್
ಮೂಲ : Modi’s Ayodhya overdrive: Will dreams match reality?
Deccan Chronicle 14th Jan 2024
ಅನುವಾದ : ನಾ ದಿವಾಕರ
ಜನವರಿ 22 ರಂದು ಅಯೋಧ್ಯೆಯಲ್ಲಿ ರಾಮ ಮಂದಿರ ಪ್ರತಿಷ್ಠಾಪಿಸುತ್ತಿರುವುದರ ಹಿನ್ನೆಲೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿಯವರು ತೋರುತ್ತಿರುವ ಅತಿಯಾದ ಉತ್ಸಾಹಕ್ಕೂ, ದೇವಾಲಯದ ಕಾರ್ಯಚಟುವಟಿಕೆಗಳ ಉಸ್ತುವಾರಿಗಾಗಿ ನೋಡಿಕೊಳ್ಳಲು ಕೇಂದ್ರ ಸರ್ಕಾರ ನೇಮಿಸಿದ ಶ್ರೀ ರಾಮ್ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್ ಮಾಡುತ್ತಿರುವ ಸಿದ್ಧತೆಗಳಿಗೂ ನಡುವೆ ಹೆಚ್ಚಿನ ವ್ಯತ್ಯಾಸಗಳನ್ನು ಗುರುತಿಸಲಾಗುವುದಿಲ್ಲ. ಡಿಸೆಂಬರ್ 30 ರಂದು ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣವನ್ನು ಉದ್ಘಾಟಿಸಲು ಹಾಗೂ ದೇವಾಲಯ ಪಟ್ಟಣದಿಂದ ವಂದೇ ಭಾರತ್ ಮತ್ತು ಅಮೃತ್ ಭಾರತ್ ರೈಲುಗಳಿಗೆ ಹಸಿರು ನಿಶಾನೆ ತೋರಲು ಪ್ರಧಾನಿ ಅಯೋಧ್ಯೆಗೆ ತೆರಳಿದ್ದರು. ಆ ಸ್ಥಳದ ಅಭಿವೃದ್ಧಿಗೆ 11,100 ಕೋಟಿ ರೂ.ಗಳ ಯೋಜನೆಗಳನ್ನು ಮತ್ತು ಉತ್ತರ ಪ್ರದೇಶದ ಇತರ ಭಾಗಗಳಲ್ಲಿನ ಯೋಜನೆಗಳಿಗೆ 4,600 ಕೋಟಿ ರೂ.ಗಳ ಯೋಜನೆಗಳನ್ನು ಮೋದಿ ಘೋಷಿಸಿದ್ದರು. ಯಾತ್ರಾ ಕೇಂದ್ರಗಳನ್ನು ಸ್ಥಳೀಯ ಮತ್ತು ವಿದೇಶಿ ಪ್ರವಾಸಿಗರ ಸ್ಟಾರ್ ತಾಣಗಳಾಗಿ ಪರಿವರ್ತಿಸುವ ಮೂಲಕ ಭಾರತದ ಸಾಂಸ್ಕೃತಿಕ ವೈಭವವನ್ನು ಪುನರುಜ್ಜೀವನಗೊಳಿಸುವುದಾಗಿ ಪ್ರಧಾನಿ ಮೋದಿ ತಮ್ಮದೇ ವಿಶಿಷ್ಟ ಶೈಲಿಯಲ್ಲಿ ಘೋಷಿಸಿದ್ದಾರೆ. ಸಹಜವಾಗಿಯೇ ಸಾಂಸ್ಕೃತಿಕ ಆರ್ಥಿಕತೆಯ ಪ್ರಗತಿಯ ಒಂದು ಭಾಗವಾಗಿ ಅಯೋಧ್ಯೆಯೊಂದಿಗೆ ಉಜ್ಜಯಿನಿ ಮತ್ತು ವಾರಣಾಸಿಯನ್ನು ಸಹ ಒಳಗೊಳ್ಳುವುದಾಗಿ ಪ್ರಧಾನಿ ಮೋದಿ ಹೇಳಿದ್ದಾರೆ.
![](https://pratidhvani.com/wp-content/uploads/2024/01/vijaykarnataka-2-2-1024x768.webp)
ಪ್ರಧಾನಿ ಮೋದಿಯವರ ಭಾಷಣಗಳು ಮತ್ತು ಸಂಜ್ಞೆಗಳಲ್ಲಿನ ಭಾವಪರವಶತೆ ಮತ್ತು ಹರುಷದ ಭಾವನೆಯನ್ನು ,ಬಹುಕಾಲದಿಂದ ಭಾರತೀಯ ಜನತಾ ಪಕ್ಷದ ರಾಜಕೀಯ ಕಾರ್ಯಸೂಚಿಯ ಭಾಗವಾಗಿರುವ ಅಯೋಧ್ಯೆ ದೇವಾಲಯದ ಪ್ರಾಮುಖ್ಯತೆಯಲ್ಲಿ ಗುರುತಿಸಬಹುದು. ಲೋಕಸಭಾ ಚುನಾವಣೆಗೆ ಕೆಲವೇ ತಿಂಗಳುಗಳು ಬಾಕಿ ಇರುವಾಗ, ದೇವಾಲಯದ ಬಗ್ಗೆ ಹಿಂದೆಂದಿಗಿಂತಲೂ ತೀವ್ರತೆಯಿಂದ ಪ್ರಚಾರ ಮಾಡಲು ಪ್ರಧಾನಿ ಬಯಸುತ್ತಾರೆ ಹಾಗೆಯೇ ದೇವಾಲಯ ನಿರ್ಮಾಣದ ಪ್ರತಿಯೊಂದು ಬೆಳವಣಿಗೆಯೊಂದಿಗೂ ನಿಕಟ ಸಂಬಂಧ ಹೊಂದಲು ಅಪೇಕ್ಷಿಸುತ್ತಾರೆ. ಹಾಗಾಗಿಯೇ ಮೋದಿ ತಮ್ಮ ವಿಶ್ವಾಸಾರ್ಹ ವ್ಯಕ್ತಿ ಮತ್ತು ಪ್ರಧಾನ ಕಾರ್ಯದರ್ಶಿ ನೃಪೇಂದ್ರ ಮಿಶ್ರಾ ಅವರನ್ನು ದೇವಾಲಯ ನಿರ್ಮಾಣ ಸಮಿತಿಯ ಮುಖ್ಯಸ್ಥರನ್ನಾಗಿ ನಿಯೋಜಿಸಿದ್ದರು. ಈ ಜವಾಬ್ದಾರಿಯನ್ನು ಬೇರೆ ಯಾವುದೇ ಸಂಸ್ಥೆಗೆ ಬಿಟ್ಟುಕೊಡಲು ಬಯಸಲಿಲ್ಲ. ದೇವಾಲಯವನ್ನು ನಿರ್ಮಿಸಿದ ಕೀರ್ತಿ ಪ್ರಧಾನಿಗೆ ಸಲ್ಲಬೇಕು ಎನ್ನುವುದು ಅವರ ಇಂಗಿತವಾಗಿದೆ. ದೇವಾಲಯದ ಟ್ರಸ್ಟ್ ಉದ್ಘಾಟನೆಯ ಸಮಯದವರೆಗೆ ಮಾತ್ರ ನಾಮಮಾತ್ರವಾಗಿದ್ದು ಪ್ರಧಾನ ಮಂತ್ರಿಯ ಪರವಾಗಿ ಕಾರ್ಯನಿರ್ವಹಿಸುವಂತಿದೆ. ಮೋದಿ ತಮ್ಮ ವಿಶ್ವಾಸಾರ್ಹ ಸಹಾಯಕರ ಮೂಲಕ ವಿಜಯೋತ್ಸವ ಉದ್ಘಾಟನಾ ಸಮಾರಂಭವನ್ನು ಆಯೋಜಿಸುತ್ತಿದ್ದಾರೆ. ನರೇಂದ್ರ ಮೋದಿ ಈ ವೈಭವದ ಕಾರ್ಯಕ್ರಮದ ಸಿದ್ಧತೆಗಳನ್ನು ಮುಂಚೂಣಿಯಿಂದ ಮುನ್ನಡೆಸುತ್ತಿರುವ ಸಂದರ್ಭದಲ್ಲಿ ಭಗವಾನ್ ರಾಮನನ್ನು ಮೀರಿ ಜನಾಕರ್ಷಣೆ ಗಳಿಸಿದ್ದಾರೆ.
![](https://pratidhvani.com/wp-content/uploads/2024/01/rama-clipart-19-1.gif)
ಕಳಪೆ ಮಟ್ಟದ ಯಾವುದೇ ಕೆಲಸದಲ್ಲೂ ಅವರು ವಿಶ್ವಾಸ ಇರಿಸುವುದಿಲ್ಲ ಎನ್ನುವುದನ್ನು ಈಗ ಪ್ರಧಾನಿ ಮೋದಿಯವರಲ್ಲಿ ಗುರುತಿಸಬಹುದಾದ ಮುಖ್ಯಲಕ್ಷಣವಾಗಿದೆ. ಯಾವುದೇ ಕೆಲಸ ಕಾರ್ಯಗಳನ್ನು ಸಮರ್ಪಕವಾಗಿ ಸನ್ನಿವೇಶಕ್ಕೆ ತಕ್ಕಂತೆ ನಿರ್ವಹಿಸುವುದು ಅವರ ಧ್ಯೇಯವಾಗಿರುತ್ತದೆ. ಈ ಕೆಲಸಗಳನ್ನು ನಿರ್ವಹಿಸುತ್ತಿರುವವರ ಅತಿರೇಕಗಳಾಗಲೀ, ಅಸಂಗತತೆಯಾಗಲೀ ಮೋದಿಯವರಿಗೆ ಮುಜುಗರ ಉಂಟುಮಾಡುವುದಿಲ್ಲ. ಅಯೋಧ್ಯೆಯಲ್ಲಿ ನಿರ್ಮಿಸಲಾದ ಮತ್ತು ಉದ್ಘಾಟಿಸಲಾಗುವ ರಾಮ ಮಂದಿರವು ಈ ಬೇಸಿಗೆಯಲ್ಲಿ ಲೋಕಸಭಾ ಚುನಾವಣೆಯ ಮೇಲೆ ಎಷ್ಟರ ಮಟ್ಟಿಗೆ ಪ್ರಭಾವ ಬೀರುತ್ತದೆ ? ಎನ್ನುವ ಪ್ರಶ್ನೆಯೂ ಮುಖ್ಯವಾಗುತ್ತದೆ. ಪ್ರಧಾನಿ ಮೋದಿ ಇದನ್ನು ಪರಿಣಾಮಕಾರಿ ಪ್ರಚಾರದ ವಿಷಯವಾಗಿ ಪರಿವರ್ತಿಸಲು ಬಯಸಿದ್ದಾರೆ ಹಾಗಾಗಿಯೇ ಈ ದೃಷ್ಟಿಯಿಂದಲೇ ಅಯೋಧ್ಯೆಯ ಸುತ್ತ ಪ್ರಭಾವಶಾಲಿ ಅಲೆಯನ್ನು ಸೃಷ್ಟಿಸಲಾಗುತ್ತಿದೆ.
![](https://pratidhvani.com/wp-content/uploads/2024/01/Modi_1705250345102_1705250345342-1-jpg.webp)
ಕಳೆದ 20 ವರ್ಷಗಳಿಂದ ಉತ್ತರಪ್ರದೇಶದಲ್ಲಿ ರಾಮ ಮಂದಿರದ ಸುತ್ತಲಿನ ಬೆಳವಣಿಗೆಗಳು ಬಿಜೆಪಿಗೆ ರಾಜಕೀಯವಾಗಿ ಲಾಭದಾಯಕವಾಗಿದೆ. ಈಗ ದೇವಾಲಯವು ಅಂತಿಮವಾಗಿ ನಿರ್ಮಾಣವಾಗಿದೆ. ಆದರೆ ಅದು ಇನ್ನು ಮುಂದೆಯೂ ಮತಗಳನ್ನು ಪಡೆಯುತ್ತದೆಯೇ ? ಉತ್ತರ ಪ್ರದೇಶವು ಹಿಂದುತ್ವ ಪಕ್ಷಕ್ಕೆ ಬಹುತೇಕ ಅವಿಭಾಜ್ಯ ಕೋಟೆಯಾಗಿ ಮಾರ್ಪಟ್ಟಿದೆ. ದೇವಾಲಯದ ಚುನಾವಣಾ ಕಾರ್ಡ್ ಪಾರ್ಟಿಯ ಬತ್ತಳಿಕೆಗೆ ಇನ್ನೂ ಎಷ್ಟು ಮತಗಳನ್ನು, ಅಸ್ತ್ರಗಳನ್ನು ಸೇರಿಸುತ್ತದೆ ? ಉತ್ತರ ಪ್ರದೇಶ ಸರ್ಕಾರದ ಆರ್ಥಿಕ ಮತ್ತು ಆಡಳಿತ ವ್ಯವಸ್ಥೆಯಲ್ಲಿ ತನ್ನ ಸಾಧನೆಗಳ ಬಗ್ಗೆ ಹೆಚ್ಚಿನದಾಗಿ ಹೇಳಿಕೊಳ್ಳಲು ಏನೂ ಇಲ್ಲದ ಕಾರಣ, ಪ್ರಧಾನಿ ಮೋದಿ ಅವರು ಭವ್ಯ ರಾಜಕೀಯ ಉದ್ದೇಶದೊಂದಿಗೆ ದೇವಾಲಯದ ಉದ್ಘಾಟನೆಯನ್ನು ಆಯೋಜಿಸುತ್ತಿರುವುದು ರಾಜ್ಯದಲ್ಲಿ ಪಕ್ಷವು ಈ ಭಾವನಾತ್ಮಕ ಅಂಶವನ್ನು ಹೆಚ್ಚು ಪರಿಣಾಮಕಾರಿಯಾಗಿ ಬಳಸಿಕೊಳ್ಳಬಹುದು.
ಈ ಭಾವನಾತ್ಮಕ ಅಲೆಯು ಬಿಹಾರವನ್ನು ಹೊರತುಪಡಿಸಿ ಇತರ ಹಿಂದಿ ಬೆಲ್ಟ್ ರಾಜ್ಯಗಳಿಗೂ ವಿಸ್ತರಿಸುತ್ತದೆ. 10 ವರ್ಷಗಳ ಅಧಿಕಾರದ ನಂತರವೂ, ಪ್ರಧಾನಿ ಮೋದಿ ಮತ್ತು ಬಿಜೆಪಿ ಹಳೆಯ ಅಯೋಧ್ಯೆ ದೇವಾಲಯದ ವಿಚಾರವನ್ನೇ ಅವಲಂಬಿಸುವುದು ನಿರಾಶಾದಾಯಕವಾಗಿ ಕಾಣುತ್ತದೆ. ಆದರೆ ಮೋದಿ ಅವರು ಈ ಬಗ್ಗೆ ಹೆಚ್ಚು ತಲೆಕೆಡಿಸಿಕೊಳ್ಳುವುದಿಲ್ಲ. ಅವರು ಚುನಾವಣೆಯಲ್ಲಿ ಗೆಲ್ಲುವತ್ತ ಹೆಚ್ಚಿನ ಗಮನ ಹರಿಸಿದ್ದಾರೆ ಈ ನಿಟ್ಟಿನಲ್ಲಿ ಯಾವುದೇ ಉಪಯುಕ್ತವಾದ ವಿಷಯವನ್ನಾದರೂ ಬಳಸಿಕೊಳ್ಳುತ್ತಾರೆ. ಈ ದೃಷ್ಟಿಯಿಂದ ದೇವಾಲಯದ ವಿಷಯವು ಅತ್ಯಂತ ಸೂಕ್ತವೂ, ಪರಿಣಾಮಕಾರಿಯೂ ಆಗುತ್ತದೆ. ಹಿಂದೂ ರಾಷ್ಟ್ರದ ವೈಭವವನ್ನು ಪುನರುಜ್ಜೀವನಗೊಳಿಸುವ ಮತ್ತು ಅದನ್ನು ಅಂತರರಾಷ್ಟ್ರೀಯ ಗಮನದ ಕೇಂದ್ರವನ್ನಾಗಿ ಮಾಡುವ ನಿಟ್ಟಿನಲ್ಲಿ ಅಯೋಧ್ಯೆಯನ್ನು ಬಳಸಿಕೊಳ್ಳುವ ಮೋದಿ ಅವರ ಆಲೋಚನೆಯು ಬಹಳ ಕುತೂಹಲಕಾರಿಯಾಗಿದೆ. ರಾಷ್ಟ್ರೀಯ ಸ್ವಯಂಸೇವಕ ಸಂಘದ ಬೆಂಬಲದೊಂದಿಗೆ ಮೋದಿ ಮತ್ತು ಬಿಜೆಪಿ ನಡೆಯಬಯಸುವ ಬಲಪಂಥೀಯ ರಾಷ್ಟ್ರೀಯತೆಯ ಸ್ವಾಭಾವಿಕ ಮಾರ್ಗವಾಗಿ ಇದು ಕಾಣುತ್ತದೆ.
ಆದರೆ ಆಧುನಿಕ ತಂತ್ರಜ್ಞಾನ ಮತ್ತು ಪ್ರಾಚೀನ ಸಂಪ್ರದಾಯದ ಎರಡು ದೋಣಿಗಳಲ್ಲಿ ಒಟ್ಟಿಗೆ ಚಲಿಸುವ ಸವಾರಿ ಮಾಡುವ ಭಾರತದ ನಡೆಗೆ ದೊಡ್ಡ ಪೆಟ್ಟು ಬೀಳುತ್ತದೆ. ಏಕೆಂದರೆ ತಂತ್ರಜ್ಞಾನವು ಮೂಲತಃ ವಿಜ್ಞಾನ ಮತ್ತು ನಿರ್ದಿಷ್ಟ ಮನೋಭಾವವನ್ನು ಆಧರಿಸಿರುತ್ತದೆ. ಈ ಹಾದಿಯಲ್ಲಿ ಹಿಂತಿರುಗಿ ನೋಡುವುದಕ್ಕಿಂತಲೂ ಮುಂಗಾಣ್ಕೆ ಮುಖ್ಯವಾಗುತ್ತದೆ. ಒಂದು ದೇಶವಾಗಲಿ, ಒಂದು ಪಕ್ಷವಾಗಲಿ ಅಥವಾ ನಾಯಕನಾಗಲಿ ಗತಕಾಲದ ಮಹಾನ್ ಸಾಧನೆಗಳ ಬಗ್ಗೆ ಮಾತನಾಡುತ್ತಾ ಭವಿಷ್ಯದತ್ತ ಸಾಗಲು ಸಾಧ್ಯವಿಲ್ಲ. ಆದರೆ ಬಿಜೆಪಿ ಭಾರತದ ಕಲ್ಪಿತ ಗತಕಾಲದಲ್ಲಿ ಆಳವಾಗಿ ಬೇರೂರಿದೆ ಮತ್ತು ಅದರ ಬೌದ್ಧಿಕ ಸಂಪತ್ತಿನ ಬಗ್ಗೆ ತಿಳುವಳಿಕೆಯಿಲ್ಲದಂತೆ ವರ್ತಿಸುತ್ತಿದೆ. ಬಲಪಂಥೀಯ ವಿಶ್ವ ದೃಷ್ಟಿಕೋನವು ಪುನರ್ನಿರ್ಮಿಸಲಾಗದ ಭೂತಕಾಲವನ್ನು ಪ್ರಚೋದಿಸುವುದರಿಂದ ಅದು ತಿರುಚಲ್ಪಟ್ಟಿರುತ್ತದೆ. ಅಯೋಧ್ಯೆಯ ರಾಮ ಮಂದಿರದ ಸುತ್ತ ಇರುವ ಭಾವನಾತ್ಮಕತೆಯ ಅಂಶಗಳು ಕವಿ ವಾಲ್ಮೀಕಿಯ ಕಲ್ಪನೆ. ಇದು ಮನುಷ್ಯನ ಸೌಭಾಗ್ಯ ಮತ್ತು ದುರ್ಭಾಗ್ಯಗಳ ಕಲಾತ್ಮಕ ದೃಷ್ಟಿಕೋನವನ್ನು ಪ್ರಸ್ತುತಪಡಿಸುವ ಒಂದು ಕಥಾನಕವಾಗಿದೆ. ರಾಮನ ಕಥೆಯನ್ನು ಆಲೋಚನಾರಹಿತವಾಗಿ ಪರಿಗಣಿಸಿದಲ್ಲಿ , ಬುದ್ಧ ಮತ್ತು ಜೈನ ತೀರ್ಥಂಕರರ ಕಾಲದಲ್ಲಿ ವೈಭವಯುತವಾದ ಮತ್ತು ಗೌರವದ ದಿನಗಳನ್ನು ಕಂಡಿದ್ದ, ಗುಪ್ತರ ಅವಧಿಯ ಕೊನೆಯಲ್ಲಿ ರಾಜಕೀಯ ಪ್ರಾಮುಖ್ಯತೆಯನ್ನು ಪಡೆದುಕೊಂಡಿದ್ದ ಸಣ್ಣ ಪಟ್ಟಣ ಅಯೋಧ್ಯೆಯಲ್ಲಿ ಡಿಸ್ನಿಲ್ಯಾಂಡ್ ಸೃಷ್ಟಿಸಿದಂತಾಗುತ್ತದೆ.
![](https://pratidhvani.com/wp-content/uploads/2024/01/No-One-Is-Like-Lord-Srirama-2.png)
ಭೂತ ಮತ್ತು ವರ್ತಮಾನದ ನಡುವಿನ ಕನಸುಗಳು ಮತ್ತು ವಾಸ್ತವಗಳ ನಡುವಿನ ವ್ಯತ್ಯಾಸವನ್ನು ಗುರುತಿಸಲು ಸಾಧ್ಯವಾಗದಿರುವುದು ರಾಷ್ಟ್ರದ ಮಾನಸಿಕ ದೌರ್ಬಲ್ಯವಾಗಿ ಕಾಣುತ್ತದೆ. ಇದು ಸಾರ್ವಜನಿಕರ ದೈನಂದಿನ ಜೀವನದಲ್ಲಿ ತೀಕ್ಷ್ಣವಾದ ಭಿನ್ನಾಭಿಪ್ರಾಯಕ್ಕೆ ಕಾರಣವಾಗುತ್ತದೆ. ಭಾರತೀಯರು ತಮ್ಮ ನಿತ್ಯ ಜೀವನ ನಿರ್ವಹಣೆಯ ಮಾರ್ಗದಲ್ಲಿ ಪುರಾಣಗಳನ್ನು ವರ್ತಮಾನದಲ್ಲಿಟ್ಟು ನೋಡುವ ಒಂದು ಪರಂಪರೆಯನ್ನು ಶತಮಾನಗಳಿಂದ ರೂಢಿಸಿಕೊಂಡಿದ್ದಾರೆ. ಆದರೆ ತಮ್ಮ ದೈನಂದಿನ ಸವಾಲುಗಳನ್ನು ಎದುರಿಸುವ ಹಾದಿಯಲ್ಲಿ ಪುರಾಣ ಅಡ್ಡಿಯಾಗಲು ಎಂದಿಗೂ ಅವಕಾಶ ನೀಡಿಲ್ಲ. ಆರೆಸ್ಸೆಸ್ ಬಿಜೆಪಿ ಮತ್ತು ಮೋದಿ ದೇಶವನ್ನು ಜಾರುವ ಹಾದಿಯಲ್ಲಿ ಮುನ್ನಡೆಸುತ್ತಿದ್ದಾರೆ, ಅಲ್ಲಿ ಗತ ವೈಭವಗಳನ್ನು ಪುನರುಜ್ಜೀವನಗೊಳಿಸುವ ಪ್ರಯತ್ನಗಳ ಮೂಲಕ ಜನರಿಗೆ ಸಾಮಾನ್ಯ ಜೀವನವನ್ನು ನಡೆಸಲು ಅವಕಾಶ ನೀಡುತ್ತಿಲ್ಲ. ಭಾರತದ ಪೌರಾಣಿಕ ಗತಕಾಲವು ಮೌಲ್ಯಯುತ ಪ್ರಜ್ಞೆಯನ್ನು ಉದ್ಧೀಪನಗೊಳಿಸುತ್ತದೆ. ಆದರೆ ಭಾರತೀಯರು ಯಾವುದೇ ರೀತಿಯ ನಾಟಕೀಯತೆಯನ್ನು ಆಶ್ರಯಿಸದೆ ಆ ಕಥೆಗಳೊಡನೆ ಮತ್ತು ಮೌಲ್ಯಗಳೊಂದಿಗೆ ಬದುಕಿದ್ದಾರೆ. ಇದು ವಾಸ್ತವ.