ನಮ್ಮ ಮೆಟ್ರೋ ಮೇಲೆನಮ್ಮ ಮೆಟ್ರೋ ಮೇಲೆ ಕಲ್ಲು ತೂರಾಟ : ಮೆಟ್ರೋ ಅಪ್ ಅಂಡ್ ಡೌನ್ ರ್ಯಾಪ್ ಗೆ CCTV ಅಳವಡಿಸಿದ BMRCL! ಕಲ್ಲು ತೂರಾಟ : ಮೆಟ್ರೋ ಅಪ್ ಅಂಡ್ ಡೌನ್ ರ್ಯಾಪ್ ಗೆ CCTV ಅಳವಡಿಸಿದ BMRCL!
ದಿನಕಳೆದಂತೆ ಮೆಟ್ರೋ ಸಂಚಾರವನ್ನ ಇಷ್ಟ ಪಡುವವರ ಸಂಖ್ಯೆ ಹೆಚ್ಚಾಗುತ್ತಿದೆ. ದಿನದಿಂದ ದಿನಕ್ಕೆ ಹೆಚ್ಚಿನ ಪ್ರಯಾಣಿಕರನ್ನು ಹೊಂದುತ್ತಿರುವ ನಮ್ಮ ಮೆಟ್ರೋಗೆ ಕೆಲ ಕಿಡಿಗೇಡಿಗಳು ಕಲ್ಲು ತೂರಾಟ ನಡೆಸುತ್ತಿದ್ದಾರೆ. ಈ ಘಟನೆಯಿಂದ ಎಚ್ಚೆತ್ತ ಮೆಟ್ರೋ ನಿಗಮ ಕಲ್ಲು ತೂರುವ ಕಿಡಿಗೇಡಿಗಳ ವಿರುದ್ಧ ದೂರು ದಾಖಲಿಸಿ, ಕಾನೂನು ಕ್ರಮಕ್ಕೆ ಮುಂದಾಗಿದೆ.
ಮೆಟ್ರೋ ರೈಲಿಗೆ ಕಲ್ಲು ತೂರಾಟ ಮಾಡುವ ಕಿಡಿಗೇಡಿಗಳ ವಿರುದ್ಧ ಕಾನೂನು ಕ್ರಮ
ಕಳೆದ ಕೆಲ ದಿನಗಳಿಂದ ಮೆಟ್ರೋ ರೈಲು ಸಂಚಾರದ ವೇಳೆ ಕೆಲ ಕಿಡಿಗೇಡಿಗಳು ರೈಲಿಗೆ ಕಲ್ಲು ತೂರಾಟ ನಡೆಸುತ್ತಿದ್ದರು. ಮಾಗಡಿ ರಸ್ತೆ ನಿಲ್ದಾಣದಿಂದ ಎಂಜಿ ರಸ್ತೆ ರೀಚ್ ನಲ್ಲಿ ಸುರಂಗ ಮಾರ್ಗವಿದ್ದು, ಮಾಗಡಿ ರಸ್ತೆಯಲ್ಲಿ ಡೌನ್ ರ್ಯಾಂಪ್ ಮೂಲಕ ಮೆಟ್ರೋ ರೈಲು ಸುರಂಗ ಮಾರ್ಗ ಪ್ರವೇಶಿಸುತ್ತದೆ. ಈ ವೇಳೆ ರೈಲು ರಸ್ತೆಯ ಮೇಲ್ಮಟ್ಟಕ್ಕೆ ಸಂಚಾರ ಮಾಡುವಾಗ ಅಕ್ಕಪಕ್ಕದ ಕಟ್ಟಡದ ಮೇಲೆ ನಿಂತು ಕೆಲ ಕಿಡಿಗೇಡಿಗಳು ರೈಲಿಗೆ ಕಲ್ಲು ತೂರಾಟ ಮಾಡುತ್ತಿದ್ದರು. ಕೆಲ ವರ್ಷಗಳ ಹಿಂದೆ ಬೆಂಗಳೂರಲ್ಲಿ ಮೆಟ್ರೋ ಸುರಂಗ ಮಾರ್ಗ ಮೊದಲ ಬಾರಿಗೆ ಆರಂಭವಾದಗಲೂ ಈ ರೀತಿಯ ಘಟನೆ ಆಗಿತ್ತು. ಆದಾದ ಬಳಿಕ ಮತ್ತೆ ಈ ರೀತಿಯ ಸಮಾಜಘಾತುಕ ಹಾಗೂ ಸಾರ್ವಜನಿಕರ ಆಸ್ತಿಗಳನ್ನ ಹಾನಿ ಮಾಡುವಂತಹ ಕೆಲಸ ನಡೆಯುತ್ತಿದ್ದು ಸದ್ಯ BMRCL ಎಚ್ಚೆತ್ತುಕೊಂಡಿದೆ. ಕಲ್ಲು ತೂರಾಟವಾಗುತ್ತಿದ್ದ ಸ್ಥಳಗಳಲ್ಲಿ 10 ಸಿಸಿಟಿವಿ ಕ್ಯಾಮರಾ ಅಳವಡಿಸಿ ಕೃತ್ಯ ನಡೆಸುವವರ ಮೇಲೆ ನಿಗಾ ಇಟ್ಟಿದೆ.
ಎಲಿವೇಡೆಟ್ ಕನೆಕ್ಟಿಂಗ್ ಜಂಕ್ಷನ್ ಗಳಲ್ಲಿ ಹೈ ಸೆಕ್ಯೂರಿಟಿ !
ಕಲ್ಲು ತೂರಾಟವಾಗುತ್ತಿದ್ದ ಪ್ರದೇಶಗಳಿಗೆ ಮೆಟ್ರೋ ನಿಗಮ ಸಿಸಿಟಿವಿ ಕ್ಯಾಮರಾ ಅಳವಡಿಸಿದ್ದು ದಿನದ 24 ಗಂಟೆಯೂ ಕ್ಯಾಮರಾಗಳು ನಿಗಾ ಇಡಲಿವೆ. ಇನ್ಮುಂದೆ ಯಾರಾದರೂ ಕಲ್ಲು ತೂರಾಟ ಮಾಡಿದರೆ ಸಿಸಿ ಕ್ಯಾಮರಾ ಮೂಲಕ ಮಾಹಿತಿ ಕಲೆಹಾಕಿ ಪೋಲಿಸ್ ಠಾಣೆಗೆ ದೂರು ನೀಡಲು ಮೆಟ್ರೋ ನಿಗಮ ನಿರ್ಧರಿಸಿದೆ. ಮೆಟ್ರೋ ಸುರಕ್ಷತೆ ಸಂಬಂಧ ಅಧಿಕಾರಿಗಳ ಜೊತೆ ಸಭೆ ನಡೆಸಲಾಗಿದ್ದು ಸುರಂಗ ಮಾರ್ಗ ಹಾಗೂ ಎಲಿವೇಡೆಟ್ ಕನೆಕ್ಟಿಂಗ್ ಜಂಕ್ಷನ್ ಗಳಲ್ಲಿ ಸೆಕ್ಯೂರಿಟಿ ಅಲರ್ಟ್ ಮಾಡಲಾಗಿದೆ. ಕ್ಯಾಮರಾ ಅಳವಡಿಸಿದ ನಂತರದಿಂದ ಈ ರೀತಿಯ ಪ್ರಕರಣ ಕಂಡುಬಂದಿಲ್ಲ. ಒಂದು ವೇಳೆ ಕಲ್ಲು ತೂರಿದರೆ ಅಂಥವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲು BMRCL ನಿರ್ಧರಿಸಿದೆ.
ಅಂಡರ್ ರ್ಯಾಪ್ ತಡೆಗೋಡೆ ಎತ್ತರಿಸುವಿಕೆಗೆ ಚಿಂತನೆ !
ಈ ಘಟನೆ ಬಳಿಕ ಮೆಟ್ರೋ ನಿಗಮ ಗೋಡೆಗಳನ್ನ ಎತ್ತರಿಸುವ ಬಗ್ಗೆ ಚರ್ಚೆ ನಡೆಸಲಾಗಿದೆ. ಆದರೆ ಗೋಡೆ ಎತ್ತರಿಸಿದರೆ ಮೆಟ್ರೋ ನಿಗಮಕ್ಕೆ ಹೆಚ್ಚಿನ ಆರ್ಥಿಕ ಹೊರೆ ಬೀಳಲಿದೆ. ಹೀಗಾಗಿ ಈ ಪ್ರಸ್ತಾವನೆ ಕೈಬಿಟ್ಟಿದ್ದು ಸದ್ಯ ಕ್ಯಾಮರಾ ಕಣ್ಗಾವಲು ಇಡಲಾಗಿದೆ. ಕಲ್ಲು ತೂರಾಟದಿಂದ ಮೆಟ್ರೋ ಬೋಗಿಗೆ ಯಾವುದೇ ಹಾನಿಯಾಗಿಲ್ಲ ಅಂತಾ ಮೆಟ್ರೋ ನಿಗಮ ಸ್ಪಷ್ಟಪಡಿಸಿದೆ. ಒಟ್ಟಾರೆ ಸಾರ್ವಜನಿಕ ಆಸ್ತಿಯನ್ನು ಉಳಿಸಿಕೊಳ್ಳಬೇಕಾದವರೇ ಅದನ್ನ ಹಾಳು ಮಾಡಲು ಮುಂದಾಗಿರೋದು ವಿಪರ್ಯಾಸ. ಹೀಗಾಗಿ ಮೆಟ್ರೋ ನಿಗಮ ಅಂತಹವರ ವಿರುದ್ದ ಕ್ರಮ ಕೈಗೊಳ್ಳುವುದು ಅವಶ್ಯಕವಾಗಿದೆ.
