ಟೈಗರ್ ಪ್ರಭಾಕರ್ ಅವರ ಪುತ್ರ ವಿನೋದ್ ಚಿತ್ರರಂಗದಲ್ಲಿ ಫ್ರಂಟ್ ಲೈನ್ ಸ್ಟಾರ್ ಅಲ್ಲದಿದ್ದರೂ ತಕ್ಕ ಮಟ್ಟಿಗೆ ತಮ್ಮನ್ನು ತಾವು ಗುರುತಿಸಿಕೊಂಡಿದ್ದಾರೆ. ಅವರ ಚಿತ್ರಗಳಿಗೆ ಇತರ ಭಾಷೆಗಳಲ್ಲೂ ಬೇಡಿಕೆ ಇದೆ. ಅವರ ಚಿತ್ರಗಳಿಗೆ ಟಿವಿ ರೈಟ್ಸ್ ಮತ್ತು ಇತರ ಭಾಷೆಗಳ ಡಬ್ಬಿಂಗ್ ರೈಟ್ಸ್ ಬಹಳ ಸುಲಭವಾಗಿ ಸಿಗುತ್ತದೆ. ಇದೇ ಕಾರಣಕ್ಕೂ ಏನೋ ವಿನೋದ್ ಈಗ ಸ್ವತಃ ತಾವೇ ನಿರ್ಮಾಣಕ್ಕೆ ಕೈ ಹಾಕಿದ್ದಾರೆ. ತಮ್ಮ ಹೋಮ್ ಬ್ಯಾನರ್ ಗೆ ಹೆಸರಿಡುವ ವಿಷಯ ಬಂದಾಗ ಅವರು ತಮ್ಮ ತಂದೆಯ ಇಮೇಜ್ ನ ಮೊರೆ ಹೋಗಿದ್ದಾರೆ. ಪ್ರಭಾಕರ್ ಅವರಿಗಿದ್ದ ಟೈಗರ್ ಎಂಬ ಬಿರುದನ್ನೇ ತಮ್ಮ ಹೋಮ್ ಬ್ಯಾನರ್ ಗೆ ಇಟ್ಟು ಟೈಗರ್ ಟಾಕೀಸ್ ಶುರು ಮಾಡಿದ್ದಾರೆ ವಿನೋದ್. ಈ ಮೂಲಕ ತಮ್ಮ ಪತ್ನಿ ನಿಶಾ ಅವರನ್ನು ನಿರ್ಮಾಪಕಿಯಾಗಿಸಿದ್ದಾರೆ ಕೂಡಾ. ಹೌದು, ವಿನೋದ್ ಪ್ರಭಾಕರ್ ನಾಯಕತ್ವದಲ್ಲಿ ಟೈಗರ್ ಟಾಕೀಸ್ ನ ಮೊದಲ ಕಾಣಿಕೆಯಾಗಿ ‘ಲಂಕಾಸುರ’ ಚಿತ್ರ ನಿರ್ಮಾಣವಾಗುತ್ತಿದೆ. ಈ ಮೂಲಕ ಖಳನಾಯಕರಾಗಿ ಹೆಸರು ಮಾಡಿದ್ದ ಪ್ರಭಾಕರ್ ಅವರ ಪುತ್ರ, ತಮ್ಮ ನಿರ್ಮಾಣದ ಮೊದಲ ಚಿತ್ರಕ್ಕೂ ‘ಲಂಕಾಸುರ’ ಎಂಬ ಖಳನಾಯಕನ ಹೆಸರನ್ನೇ ಇಟ್ಟಿದ್ದಾರೆ ಎನ್ನಬಹುದು.
ಕಳೆದವರ್ಷ ತೆರೆಕಂಡ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ “ರಾಬರ್ಟ್” ಚಿತ್ರದಲ್ಲಿ ವಿನೋದ್ ಪ್ರಭಾಕರ್ ವಿಶೇಷ ಪಾತ್ರದಲ್ಲಿ ನಟಿಸಿದ್ದರು. ಈ ಚಿತ್ರದ ಅವರ ಹೊಸಲುಕ್ ಗೆ ಅಭಿಮಾನಿಗಳು ಫಿದಾ ಆಗಿದ್ದರು. ಅದರ ಹೊರತಾಗಿಯೂ ತಮ್ಮದೇ ನಾಯಕತ್ವದ ಹಲವು ಚಿತ್ರಗಳಿಂದ ತಮ್ಮ ನಟನೆಯ ಮೂಲಕ ಜನಮನಸೂರೆಗೊಂಡಿರುವ ವಿನೋದ್ ಪ್ರಭಾಕರ್ ಈಗ ನಿರ್ಮಾಪಕರಾಗಿದ್ದಾರೆ. ತಮ್ಮ ನಿರ್ಮಾಣದ ಮೊದಲ ಹೆಜ್ಜೆಯಾಗಿ “ಲಂಕಾಸುರ” ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ.
“ಟೈಗರ್ ಟಾಕೀಸ್” ಎಂಬ ಹೆಸರಿಟ್ಟರುವ ವಿನೋದ್ ಪ್ರಭಾಕರ್ ರವರು ತಮ್ಮ ತಂದೆ ಟೈಗರ್ ಪ್ರಭಾಕರ್ ಅವರನ್ನು ಸ್ಮರಿಸಿಕೊಂಡು ಚಿತ್ರರಂಗದಲ್ಲಿ ಹೊಸ ಹುಲಿ ಹೆಜ್ಜೆ ಇಟ್ಟಿದ್ದಾರೆ. ವಿನೋದ್ ಪ್ರಭಾಕರ್ ಲಂಕಾಸುರ ಚಿತ್ರದಲ್ಲಿ ನಾಯಕನಾಗಿ ನಟಿಸಿದ್ದು, ವಿಶೇಷ ಪಾತ್ರದಲ್ಲಿ ಲೂಸ್ ಮಾದ ಯೋಗಿ ಕೂಡ ಅಭಿನಯಿಸುತ್ತಿದ್ದಾರೆ. ಇದು ಇವರಿಬ್ಬರು ಒಟ್ಟಾಗಿ ಅಭಿನಯಿಸುತ್ತಿರುವ ಮೊದಲ ಚಿತ್ರ. ದೇವರಾಜ್, ರವಿಶಂಕರ್ ಮುಂತಾದವರ ತಾರಾಬಳಗ ಸಹ ಈ ಚಿತ್ರದಲ್ಲಿದೆ.
ಆಕ್ಷನ್ ಕಥಾಹಂದರದ ಈ ಚಿತ್ರವನ್ನು ಪ್ರಮೋದ್ ಕುಮಾರ್ ಡಿ ಎಸ್ ನಿರ್ದೇಶಿಸುತ್ತಿದ್ದಾರೆ. ಸಿದ್ಲಿಂಗು, ಜಯಮ್ಮನ ಮಗ ಹಾಗೂ ಐ ಲವ್ ಯು ಮುಂತಾದ ಜನಪ್ರಿಯ ಚಿತ್ರಗಳಿಗೆ ಛಾಯಾಗ್ರಹಕರಾಗಿ ಕಾರ್ಯನಿರ್ವಹಿಸಿರುವ ಸುಜ್ಞಾನ್(ಜ್ಞಾನ ಮೂರ್ತಿ) ಈ ಚಿತ್ರಕ್ಕೆ ಛಾಯಾಗ್ರಹಕರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ. ಈಗಾಗಲೇ ಬೆಂಗಳೂರಿನಲ್ಲಿ ಈ ಚಿತ್ರದ ಚಿತ್ರೀಕರಣ ಶುರುವಾಗಿದೆ.