ಯಶ್ ಅಭಿನಯದ ಟಾಕ್ಸಿಕ್ ಸಿನಿಮಾ ಮೇಲೆ ಜನರಿಗೆ ಸಿಕ್ಕಾಪಟ್ಟೆ ನಿರೀಕ್ಷೆ ಇದೆ. ಆ ನಿರೀಕ್ಷೆ ಮತ್ತಷ್ಟು ದುಪ್ಪಟ್ಟಾಗಿದೆ ಕೂಡ. ಅದಕ್ಕೆ ಕಾರಣ, ಸಿನಿಮಾದ ಮೇಕಿಂಗ್ ವಿಡಿಯೋ ರಿಲೀಸ್ ಆಗಿರೋದು. ಹೌದು, ಜೂನ್ 8 (ಇಂದು) ನಿರ್ದೇಶಕಿ ಗೀತು ಮೋಹನ್ ದಾಸ್ ಅವರ ಹುಟ್ಟುಹಬ್ಬ. ಆ ಹಿನ್ನೆಲೆಯಲ್ಲಿ ಚಿತ್ರತಂಡ ಟಾಕ್ಸಿಕ್ ಸಿನಿಮಾದ ಮೇಕಿಂಗ್ ವಿಡಿಯೋ ತುಣುಕನ್ನು ಬಿಡುಗಡೆ ಮಾಡಿದೆ. 1 ನಿಮಿಷ 2 ಸೆಕೆಂಡ್ಗಳ ಮೇಕಿಂಗ್ ಟೀಸರ್ ರಿಲೀಸ್ ಆಗಿದ್ದು ಸದ್ಯಕ್ಕದು ಕುತೂಹಲ ಮೂಡಿಸಿದೆ.
ಮಲಯಾಳಂ ನಿರ್ದೇಶಕಿ ಗೀತು ಮೋಹನ್ದಾಸ್ ಇದೇ ಮೊದಲ ಸಲ ಪ್ಯಾನ್ ವರ್ಲ್ಡ್ ಚಿತ್ರ ಮಾಡಿದ್ದಾರೆ. ತೆರೆ ಹಿಂದೆ ನಡೆದ ಒಂದಷ್ಟು ಸ್ವಾರಸ್ಯಕರ ದೃಶ್ಯಗಳು, ಅಲ್ಲಿ ನಡೆದ ಒಂದಷ್ಟು ಒದ್ದಾಟಗಳನ್ನು ಟೀಸರ್ನಲ್ಲಿ ಕಾಣಬಹುದು. ಬಿಗ್ ಬಜೆಟ್ ಚಿತ್ರಗಳೆಂದರೆ ಕೇವಲ ಪುರುಷ ನಿರ್ದೇಶಕರಷ್ಟೇ ಮಾಡಬೇಕು ಎಂಬಂತಿದ್ದ ಸಿದ್ಧ ಸೂತ್ರವನ್ನ ಯಶ್ ಬ್ರೇಕ್ ಮಾಡಿರುವುದೇ ವಿಶೇಷ.
ಕೆಜಿಎಫ್-2 ಬಳಿಕ ಸಾಲು ಸಾಲು ನಿರ್ದೇಶಕರು ಯಶ್ ಅವರಿಗೆ ಚಿತ್ರ ಮಾಡಲು ಮುಂದಾಗಿದ್ದರೂ ಸಹ, ಗೀತು ಮೋಹನ್ದಾಸ್ ಅವರಿಗೆ ಯಶ್ ಅವರು ಅವಕಾಶ ಕೊಟ್ಟಿದ್ದರು. ತೆರೆ ಮುಂದಿನ ಗೀತು ಆರ್ಭಟವನ್ನ ಈ ಹಿಂದೆ ಬಿಡುಗಡೆಯಾದ ಟೀಸರ್ನಲ್ಲಿ ನೋಡಿದ್ದಾಗಿದೆ. ಇದೀಗ ಚಿತ್ರ ಚೆನ್ನಾಗಿ ಕಾಣಬೇಕು ಅಂತ ಗೀತು ಏನೆಲ್ಲಾ ಕಷ್ಟ ಬಿದ್ದಿದ್ದಾರೆ ಅನ್ನೋದನ್ನು ಆ ಮೇಕಿಂಗ್ನಲ್ಲಿ ತೋರಿಸಲಾಗಿದೆ.
ಇನ್ನು, ‘ಟಾಕ್ಸಿಕ್’ ಚಿತ್ರದ ಬಿಡುಗಡೆ ದಿನಾಂಕ ಮುಂದಕ್ಕೆ ಹೋಗುತ್ತಲೇ ಇದೆ. ಇದರಿಂದ ಚಿತ್ರ ರೀಶೂಟ್ ಆಗುತ್ತಿದೆ ಎಂದೇ ಸುದ್ದಿ ಹಬ್ಬಿತ್ತು. ಈ ಹಿನ್ನೆಲೆ ಗೀತು ಹುಟ್ಟುಹಬ್ಬಕ್ಕೆ ಮೇಕಿಂಗ್ ವಿಡಿಯೋ ರಿಲೀಸ್ ಆಗುವುದೇ ಡೌಟ್ ಎನ್ನಲಾಗಿತ್ತು. ಆದರೆ ಎಲ್ಲಾ ವದಂತಿಗೆ ಬ್ರೇಕ್ ಹಾಕುವಂತೆ ಇದೀಗ ಮೇಕಿಂಗ್ ವಿಡಿಯೋ ರಿಲೀಸ್ ಆಗಿದೆ. ಅಂದಹಾಗೆ, ಟಾಕ್ಸಿಕ್ ಈ ವರ್ಷವೇ ತೆರೆಗೆ ಅಪ್ಪಳಿಸೋ ಸಾಧ್ಯತೆ ಇದೆ.
