ಕೇರಳದ ಪ್ರಸಿದ್ಧ ಕೊಟ್ಟಿಯೂರು ಶಿವಕ್ಷೇತ್ರ ಇತ್ತೀಚೆಗೆ ಮತ್ತೆ ಸುದ್ದಿಯಲ್ಲಿದೆ. ದೇವಾಲಯಕ್ಕೆ ಭೇಟಿ ನೀಡುವ ಭಕ್ತರಿಗೆ ಸಮರ್ಪಕ ಸೌಲಭ್ಯಗಳ ಕೊರತೆ ಇದೆ ಎಂಬ ಆರೋಪಗಳು ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಗ್ರಾಸವಾಗಿವೆ. ಆದರೆ ಪ್ರಕೃತಿಯ ಮಡಿಲಿನಲ್ಲಿ ನೆಲೆಸಿರುವ ಈ ಪವಿತ್ರ ಕ್ಷೇತ್ರದ ಇತಿಹಾಸ, ಪುರಾಣ ಮಹತ್ವ ಮತ್ತು ವಿಶಿಷ್ಟ ಆಚರಣೆಗಳು ಸಾವಿರಾರು ಭಕ್ತರನ್ನು ವರ್ಷದಿಂದ ವರ್ಷಕ್ಕೆ ಸೆಳೆಯುತ್ತಿವೆ.ಉತ್ತರ ಕೇರಳದ ಕಣ್ಣೂರು ಜಿಲ್ಲೆಯ ದಟ್ಟ ಅರಣ್ಯ ಪ್ರದೇಶದಲ್ಲಿ, ಬಾವಲಿ ನದಿಯ ದಡದಲ್ಲಿ ನೆಲೆಸಿರುವ ಕೊಟ್ಟಿಯೂರು ಶಿವ ದೇವಾಲಯವು ಕೇರಳದ ಅತ್ಯಂತ ಪುರಾತನ ಯಾತ್ರಾ ಕ್ಷೇತ್ರಗಳಲ್ಲಿ ಒಂದಾಗಿದೆ. ಪಶ್ಚಿಮ ಘಟ್ಟಗಳ ಸುಂದರ ಪರಿಸರದ ನಡುವೆ ಇರುವ ಈ ಕ್ಷೇತ್ರವು ಆಧ್ಯಾತ್ಮಿಕ ಮಹತ್ವಕ್ಕಾಗಿ ಪ್ರಸಿದ್ಧವಾಗಿದೆ.
ಕೊಟ್ಟಿಯೂರು ಕ್ಷೇತ್ರದಲ್ಲಿ ‘ಅಕ್ಕರೆ ಕೊಟ್ಟಿಯೂರು’ ಮತ್ತು ‘ಇಕ್ಕರೆ ಕೊಟ್ಟಿಯೂರು’ ಎಂಬ ಎರಡು ಪ್ರಮುಖ ದೇವಾಲಯಗಳಿವೆ. ಇಕ್ಕರೆ ಕೊಟ್ಟಿಯೂರು ವರ್ಷಪೂರ್ತಿ ಭಕ್ತರಿಗೆ ತೆರೆದಿರುತ್ತದೆ. ಆದರೆ ಅಕ್ಕರೆ ಕೊಟ್ಟಿಯೂರು ದೇವಾಲಯವು ವೈಶಾಖ ಮಹೋತ್ಸವದ ವೇಳೆ ವರ್ಷದಲ್ಲಿ ಕೇವಲ 28 ದಿನ ಮಾತ್ರ ಭಕ್ತರ ದರ್ಶನಕ್ಕೆ ಅವಕಾಶ ನೀಡುತ್ತದೆ.
ಈ ಅವಧಿಯಲ್ಲಿ ಸಾವಿರಾರು ಭಕ್ತರು ದೇವರ ದರ್ಶನ ಪಡೆಯಲು ಆಗಮಿಸುತ್ತಾರೆ. ಉತ್ಸವ ಮುಗಿದ ಬಳಿಕ ದೇವಾಲಯದ ಸುತ್ತಮುತ್ತಲಿನ ಪ್ರದೇಶ ಮತ್ತೆ ಪ್ರಕೃತಿಯ ಅಧೀನಕ್ಕೆ ಮರಳುತ್ತದೆ.
ಪುರಾಣಗಳಲ್ಲಿ ಉಲ್ಲೇಖಗೊಂಡ ಪವಿತ್ರ ಕ್ಷೇತ್ರ
ಹಿಂದೂ ಪುರಾಣಗಳ ಪ್ರಕಾರ, ದಕ್ಷಪ್ರಜಾಪತಿ ನಡೆಸಿದ ಯಾಗದಲ್ಲಿ ಅವಮಾನಕ್ಕೊಳಗಾದ ಸತಿ ದೇವಿಯು ಇದೇ ಸ್ಥಳದಲ್ಲಿ ಯೋಗಾಗ್ನಿಗೆ ಆಹುತಿಯಾದಳು ಎಂದು ನಂಬಲಾಗಿದೆ. ಪತ್ನಿಯ ಮರಣದಿಂದ ಕೋಪಗೊಂಡ ಶಿವನು ವೀರಭದ್ರನ ರೂಪದಲ್ಲಿ ದಕ್ಷನ ಯಾಗವನ್ನು ಧ್ವಂಸಗೊಳಿಸಿದನೆಂಬ ಕಥೆ ಈ ಕ್ಷೇತ್ರದೊಂದಿಗೆ ಬೆಸೆದುಕೊಂಡಿದೆ.
ಈ ಘಟನೆಯ ಬಳಿಕ ಬ್ರಹ್ಮ, ವಿಷ್ಣು ಮತ್ತು ಶಿವರ ದೈವಿಕ ಸಾನ್ನಿಧ್ಯ ಹೊಂದಿದ ಕ್ಷೇತ್ರವಾಗಿ ಕೊಟ್ಟಿಯೂರು ಪ್ರಸಿದ್ಧಿಯಾಯಿತು ಎಂದು ಪುರಾಣಗಳು ಹೇಳುತ್ತವೆ.
ಈ ದೇವಾಲಯದ ಜೀರ್ಣೋದ್ಧಾರ ಕಾರ್ಯವನ್ನು ಆದಿ ಶಂಕರಾಚಾರ್ಯರು ನಡೆಸಿದ್ದು, ಇಲ್ಲಿ ನಡೆಯುವ ಹಲವು ಪೂಜಾ ವಿಧಾನಗಳು ಮತ್ತು ಉತ್ಸವಗಳ ರೂಪುರೇಷೆಗಳನ್ನು ಅವರು ನಿರ್ಧರಿಸಿದ್ದರು ಎನ್ನಲಾಗಿದೆ.ಅಕ್ಕರೆ ಕೊಟ್ಟಿಯೂರಿನ ವಿಶೇಷತೆ ಎಂದರೆ ಇಲ್ಲಿ ಸಾಂಪ್ರದಾಯಿಕ ದೇವಾಲಯದ ಕಟ್ಟಡವಿಲ್ಲ. ನದಿಯ ಕಲ್ಲುಗಳಿಂದ ನಿರ್ಮಿಸಲಾದ ವೇದಿಕೆಯ ಮೇಲೆ ಶಿವಲಿಂಗವನ್ನು ಪ್ರತಿಷ್ಠಾಪಿಸಲಾಗಿದೆ. ತುಪ್ಪಾಭಿಷೇಕದಿಂದ ಆರಂಭವಾಗುವ ಉತ್ಸವವು ಎಳೆನೀರಿನ ಅಭಿಷೇಕದೊಂದಿಗೆ ಸಮಾಪ್ತಿಗೊಳ್ಳುತ್ತದೆ.
ವೈಶಾಖ ಮಹೋತ್ಸವದ 28 ದಿನಗಳಲ್ಲಿ ನಿರ್ದಿಷ್ಟ ದಿನಗಳಲ್ಲಿ ಮಾತ್ರ ಮಹಿಳೆಯರಿಗೆ ಅಕ್ಕರೆ ಕೊಟ್ಟಿಯೂರು ಪ್ರದೇಶಕ್ಕೆ ಪ್ರವೇಶ ಮತ್ತು ಬಾವಲಿ ನದಿ ದಾಟಲು ಅವಕಾಶ ನೀಡಲಾಗುತ್ತದೆ. ಉಳಿದ ದಿನಗಳಲ್ಲಿ ಪ್ರವೇಶಕ್ಕೆ ನಿರ್ಬಂಧವಿರುತ್ತದೆ.ಕೊಟ್ಟಿಯೂರು ಉತ್ಸವದ ಪ್ರಮುಖ ಆಕರ್ಷಣೆಯಾದ ‘ಓಡಪ್ಪೂ’ ಹೂವು ಭಕ್ತರ ಗಮನ ಸೆಳೆಯುತ್ತದೆ. ಬಿದಿರಿನ ನಾರುಗಳಿಂದ ತಯಾರಿಸಲಾಗುವ ಈ ಬಿಳಿ ಹೂವು ಐಶ್ವರ್ಯ ಮತ್ತು ಶುಭದ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ಮನೆ ಹಾಗೂ ಪೂಜಾ ಕೋಣೆಯಲ್ಲಿ ಇದನ್ನು ಇಟ್ಟರೆ ಸಮೃದ್ಧಿ ಹೆಚ್ಚುತ್ತದೆ ಎಂಬ ನಂಬಿಕೆಯಿದೆ.
ಬೆಂಗಳೂರುದಿಂದ ಮೈಸೂರು, ಗುಂಡ್ಲುಪೇಟೆ, ಸುಲ್ತಾನ್ ಬತ್ತೇರಿ ಹಾಗೂ ಮಾನಂತವಾಡಿ ಮಾರ್ಗವಾಗಿ ರಸ್ತೆ ಮೂಲಕ ಸುಮಾರು 6-7 ಗಂಟೆಗಳಲ್ಲಿ ಕೊಟ್ಟಿಯೂರು ತಲುಪಬಹುದು. ಕೆಎಸ್ಆರ್ಟಿಸಿ ಬಸ್ ಸೇವೆಯೂ ಲಭ್ಯವಿದೆ.ರೈಲಿನಲ್ಲಿ ಪ್ರಯಾಣಿಸುವವರು ಕಣ್ಣೂರು ರೈಲು ನಿಲ್ದಾಣ ತಲುಪಿ ಅಲ್ಲಿಂದ ಸುಮಾರು 60 ಕಿ.ಮೀ ದೂರದ ಕೊಟ್ಟಿಯೂರಿಗೆ ಬಸ್ ಅಥವಾ ಟ್ಯಾಕ್ಸಿ ಮೂಲಕ ಹೋಗಬಹುದು. ವಿಮಾನ ಪ್ರಯಾಣಿಕರು ಕಣ್ಣೂರು ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಸುಮಾರು 80 ಕಿ.ಮೀ ದೂರದಲ್ಲಿರುವ ಈ ಕ್ಷೇತ್ರವನ್ನು ತಲುಪಬಹುದು.
