ನವದೆಹಲಿ : ಅಕ್ಟೋಬರ್ (October) ತಿಂಗಳ ಆರಂಭದೊಂದಿಗೆ ದೇಶದಲ್ಲಿ ಹತ್ತು ಹಲವು ಪ್ರಮುಖ ಹಣಕಾಸು ಹಾಗೂ ದೈನಂದಿನ ನಿಯಮಗಳಲ್ಲಿ (Rules Change) ಮಹತ್ವದ ಬದಲಾವಣೆಗಳು ಜಾರಿಗೆ ಬರಲಿವೆ. ಎಲ್‌ಪಿಜಿ ಸಿಲಿಂಡರ್ ದರ, ಬ್ಯಾಂಕಿಂಗ್ ನಿಯಮಗಳು, ಸ್ಥಿರ ಠೇವಣಿ ದರಗಳು ಹಾಗೂ ಗೃಹೋಪಯೋಗಿ ವಸ್ತುಗಳ ಬೆಲೆಯಲ್ಲಿ ಪರಿಷ್ಕರಣೆಯಾಗಲಿದ್ದು, ಪ್ರತಿಯೊಬ್ಬ ನಾಗರಿಕನ ಮಾಸಿಕ ಬಜೆಟ್ ಮೇಲೆ ಇದು ನೇರ ಪ್ರಭಾವ ಬೀರಲಿದೆ.
ಎಲ್‌ಪಿಜಿ ಸಿಲಿಂಡರ್ ಪರಿಷ್ಕೃತ ದರಗಳು
ಪ್ರತಿ ತಿಂಗಳ ಮೊದಲ ದಿನದಂತೆ ತೈಲ ಮಾರುಕಟ್ಟೆ ಕಂಪನಿಗಳು ಎಲ್‌ಪಿಜಿ ಸಿಲಿಂಡರ್ ಬೆಲೆಗಳನ್ನು ಪರಿಷ್ಕರಿಸುತ್ತವೆ. ವಾಣಿಜ್ಯ ಸಿಲಿಂಡರ್ ದರಗಳಲ್ಲಿ ನಿರಂತರ ಏರಿಳಿತಗಳು ಕಂಡುಬರುತ್ತಿದ್ದು, ಗೃಹಬಳಕೆಯ 14 ಕೆಜಿ ಸಿಲಿಂಡರ್ ದರ ಬಹುತೇಕ ಸ್ಥಿರವಾಗಿದೆ. ಪ್ರಸ್ತುತ ದೆಹಲಿಯಲ್ಲಿ ಇದರ ದರ 942 ರೂಪಾಯಿ, ಕೋಲ್ಕತ್ತಾದಲ್ಲಿ 968 ರೂಪಾಯಿ, ಮುಂಬೈನಲ್ಲಿ 941.50 ರೂಪಾಯಿ ಹಾಗೂ ಚೆನ್ನೈನಲ್ಲಿ 957.50 ರೂಪಾಯಿಯಷ್ಟಿದೆ.
ಎಲ್‌ಪಿಜಿ ಸಬ್ಸಿಡಿಗೆ ಇ-ಕೆವೈಸಿ ಕಡ್ಡಾಯ
ಗೃಹಬಳಕೆಯ ಸಿಲಿಂಡರ್‌ಗೆ ಸಬ್ಸಿಡಿ ಪಡೆಯುವ ಗ್ರಾಹಕರಿಗೆ ಹೊಸ ನಿಯಮ ಅನ್ವಯವಾಗಲಿದೆ. ಇನ್ನು ಮುಂದೆ ಸಬ್ಸಿಡಿ ಮೊತ್ತ ಖಾತೆಗೆ ಜಮೆಯಾಗಬೇಕಾದರೆ ಆಧಾರ್ ಬಯೋಮೆಟ್ರಿಕ್ ದೃಢೀಕರಣ ಅಥವಾ ಇ-ಕೆವೈಸಿ ಪೂರ್ಣಗೊಳಿಸುವುದು ಕಡ್ಡಾಯ. ಈಗಾಗಲೇ ಈ ಪ್ರಕ್ರಿಯೆ ಮುಗಿಸಿರುವ ಗ್ರಾಹಕರು ಮತ್ತೆ ಇದನ್ನು ಮಾಡುವ ಅಗತ್ಯವಿರುವುದಿಲ್ಲ.
ಸಿಲಿಂಡರ್ ಡೆಲಿವರಿಗೆ ಒಟಿಪಿ ದೃಢೀಕರಣ
ಗ್ಯಾಸ್ ಸಿಲಿಂಡರ್ ವಿತರಣಾ ವ್ಯವಸ್ಥೆಯನ್ನು ಇನ್ನಷ್ಟು ಪಾರದರ್ಶಕಗೊಳಿಸಲು ಒಟಿಪಿ ಆಧಾರಿತ ವಿತರಣಾ ವ್ಯವಸ್ಥೆ ಜಾರಿಗೆ ಬರಲಿದೆ. ಸಿಲಿಂಡರ್ ಡೆಲಿವರಿ ಪಡೆಯುವ ಸಮಯದಲ್ಲಿ ಕೇವಲ ರಸೀದಿ ಇದ್ದರೆ ಸಾಲದು, ಬದಲಿಗೆ ಗ್ರಾಹಕರ ನೋಂದಾಯಿತ ಮೊಬೈಲ್ ಸಂಖ್ಯೆಗೆ ಬರುವ ಒಟಿಪಿ ಕೋಡ್ ಅನ್ನು ವಿತರಕರಿಗೆ ನೀಡಿ ದೃಢೀಕರಿಸಬೇಕಾಗುತ್ತದೆ.
ವಿಮಾನ ಇಂಧನ ದರ ಬದಲಾವಣೆ
ತೈಲ ಕಂಪನಿಗಳು ವಿಮಾನ ಇಂಧನ ಅಥವಾ ಏರ್ ಟರ್ಬೈನ್ ಇಂಧನದ (ಎಟಿಎಫ್) ಹೊಸ ದರಗಳನ್ನು ಪ್ರಕಟಿಸಲಿವೆ. ಎಟಿಎಫ್ ದರದಲ್ಲಿನ ಏರಿಳಿತವು ವಿಮಾನ ಪ್ರಯಾಣಿಕರ ಟಿಕೆಟ್ ದರದ ಮೇಲೆ ನೇರ ಪರಿಣಾಮ ಬೀರುತ್ತದೆ. ಪ್ರಸ್ತುತ ಪ್ರತಿ ಕಿಲೋಲೀಟರ್‌ಗೆ ದೆಹಲಿಯಲ್ಲಿ 1,04,927 ರೂಪಾಯಿ, ಕೋಲ್ಕತ್ತಾದಲ್ಲಿ 1,09,450 ರೂಪಾಯಿ, ಮುಂಬೈನಲ್ಲಿ 98,247 ರೂಪಾಯಿ ಹಾಗೂ ಚೆನ್ನೈನಲ್ಲಿ 1,09,873 ರೂಪಾಯಿ ದರವಿದೆ.
ಎಸ್‌ಬಿಐ ಎಟಿಎಂ ಹಿಂಪಡೆಯುವಿಕೆ ಶುಲ್ಕ ಪರಿಷ್ಕರಣೆ
ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಗ್ರಾಹಕರಿಗೆ ನಗದು ಹಿಂಪಡೆಯುವ ಮಿತಿ ಹಾಗೂ ಶುಲ್ಕಗಳಲ್ಲಿ ಬದಲಾವಣೆಯಾಗಲಿದೆ. ಶಾಖೆಗಳ ಮೂಲಕ ತೆರೆಯಲಾದ ಮೂಲ ಉಳಿತಾಯ ಠೇವಣಿ ಖಾತೆದಾರರಿಗೆ ನಾಲ್ಕು ಉಚಿತ ವ್ಯವಹಾರಗಳ ನಂತರ ಪ್ರತಿ ಎಟಿಎಂ ಹಿಂಪಡೆಯುವಿಕೆಗೆ 15 ರೂಪಾಯಿ ಜೊತೆಗೆ ಜಿಎಸ್‌ಟಿ ವಿಧಿಸಲಾಗುತ್ತದೆ. ವೇತನ ಖಾತೆದಾರರ ಮಾಸಿಕ ಉಚಿತ ಎಟಿಎಂ ವ್ಯವಹಾರಗಳ ಮಿತಿಯನ್ನು ಹತ್ತರಿಂದ ಐದಕ್ಕೆ ಇಳಿಸಲಾಗಿದ್ದು, ಆರನೇ ವ್ಯವಹಾರದಿಂದ 23 ರೂಪಾಯಿ ಜೊತೆಗೆ ಜಿಎಸ್‌ಟಿ ಶುಲ್ಕ ಕಡಿತವಾಗಲಿದೆ. ಉಚಿತ ಮಿತಿ ಮೀರಿದ ಆರ್ಥಿಕೇತರ ವ್ಯವಹಾರಗಳಿಗೂ 11 ರೂಪಾಯಿ ಹಾಗೂ ಜಿಎಸ್‌ಟಿ ಅನ್ವಯವಾಗಲಿದೆ.
ಆರ್‌ಬಿಐನಿಂದ ಸ್ಥಿರ ಠೇವಣಿ ಹೊಸ ಮಾರ್ಗಸೂಚಿ
ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಫಿಕ್ಸೆಡ್ ಡೆಪಾಸಿಟ್ ಬಡ್ಡಿದರಗಳಿಗೆ ಸಂಬಂಧಿಸಿದ ನಿಯಮಗಳನ್ನು ಬದಲಾಯಿಸುತ್ತಿದೆ. ಬ್ಯಾಂಕುಗಳು ಪ್ರತಿದಿನ ಬೆಳಗ್ಗೆ 10 ಗಂಟೆಯೊಳಗೆ ಎಫ್‌ಡಿ ಬಡ್ಡಿದರಗಳ ವಿವರಗಳನ್ನು ತಮ್ಮ ಜಾಲತಾಣಗಳಲ್ಲಿ ನವೀಕರಿಸಬೇಕು. ಒಂದೇ ದಿನದಲ್ಲಿ ಸ್ವೀಕರಿಸುವ ಎಫ್‌ಡಿ ಠೇವಣಿಗಳ ಮೇಲೆ ಯಾವುದೇ ತಾರತಮ್ಯವಿಲ್ಲದೆ ಸಮಾನ ಬಡ್ಡಿದರವನ್ನು ನೀಡಬೇಕು ಎಂದು ಕಟ್ಟುನಿಟ್ಟಿನ ಸೂಚನೆ ನೀಡಲಾಗಿದೆ.
ಎನ್‌ಆರ್‌ಐ ಆಸ್ತಿ ಖರೀದಿ ಪ್ರಕ್ರಿಯೆ ಸುಲಭ
ಅನಿವಾಸಿ ಭಾರತೀಯರಿಂದ ಆಸ್ತಿ ಖರೀದಿಸುವ ಪ್ರಕ್ರಿಯೆಯನ್ನು ಆದಾಯ ತೆರಿಗೆ ಇಲಾಖೆ ಸರಳಗೊಳಿಸಿದೆ. ದೇಶೀಯ ವ್ಯಕ್ತಿಗಳು ಹಾಗೂ ಅವಿಭಕ್ತ ಹಿಂದೂ ಕುಟುಂಬಗಳು ಇನ್ನು ಮುಂದೆ ಪ್ರತ್ಯೇಕವಾಗಿ ಟಿಡಿಎಸ್ ಪ್ರಕ್ರಿಯೆ ನಡೆಸಬೇಕಿಲ್ಲ. ಖರೀದಿದಾರರು ತಮ್ಮ ಪ್ಯಾನ್ ಕಾರ್ಡ್ ಆಧಾರದ ಮೇಲೆಯೇ ಟಿಡಿಎಸ್ ಕಡಿತಗೊಳಿಸಿ, ಜಮೆ ಮಾಡಿ ವಿವರಗಳನ್ನು ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ.
ಜನನ ಮತ್ತು ಮರಣ ನೋಂದಣಿ ಕಟ್ಟುನಿಟ್ಟು
ಜನನ ಹಾಗೂ ಮರಣ ನೋಂದಣಿಗೆ ನಿಗದಿಪಡಿಸಿರುವ 21 ದಿನಗಳ ಗಡುವನ್ನು ಮೀರಿದರೆ ಕಠಿಣ ದಂಡ ವಿಧಿಸುವ ನಿಯಮಗಳು ಜಾರಿಯಾಗಲಿವೆ. ವಿಳಂಬವಾಗಿ ನೋಂದಣಿ ಮಾಡಿಸುವ ಸಂದರ್ಭದಲ್ಲಿ ಕಡ್ಡಾಯವಾಗಿ ಪ್ರಮಾಣಪತ್ರ ಅಥವಾ ಅಫಿಡವಿಟ್ ಸಲ್ಲಿಸಬೇಕಾಗುತ್ತದೆ.
ಟಿವಿ, ಫ್ರಿಡ್ಜ್, ಎಸಿ ಬೆಲೆಯಲ್ಲಿ ಏರಿಕೆ
ಹಬ್ಬದ ಋತುವಿನಲ್ಲಿ ಗೃಹೋಪಯೋಗಿ ಎಲೆಕ್ಟ್ರಾನಿಕ್ ವಸ್ತುಗಳ ಬೆಲೆ ಹೆಚ್ಚಾಗುವ ಸಾಧ್ಯತೆಯಿದೆ. ತಾಮ್ರ, ಉಕ್ಕು, ಅಲ್ಯೂಮಿನಿಯಂ ಮುಂತಾದ ಕಚ್ಚಾ ಸಾಮಗ್ರಿಗಳ ಬೆಲೆ ಮತ್ತು ಸಾರಿಗೆ ವೆಚ್ಚ ಅಧಿಕವಾಗಿರುವುದರಿಂದ ಟಿವಿ, ರೆಫ್ರಿಜರೇಟರ್ ಹಾಗೂ ಏರ್ ಕಂಡಿಷನರ್‌ಗಳ ಬೆಲೆಯಲ್ಲಿ ಶೇಕಡಾ 8 ರಷ್ಟು ಏರಿಕೆಯಾಗುವ ಸಾಧ್ಯತೆಯಿದೆ.
ಅಕ್ಟೋಬರ್‌ನಲ್ಲಿ 16 ದಿನ ಬ್ಯಾಂಕ್ ರಜೆ
ಅಕ್ಟೋಬರ್ ತಿಂಗಳಲ್ಲಿ ಗಾಂಧಿ ಜಯಂತಿ, ದಸರಾ ಹಾಗೂ ವಾರಾಂತ್ಯದ ರಜೆಗಳು ಸೇರಿದಂತೆ ಒಟ್ಟು 16 ದಿನಗಳ ಕಾಲ ಬ್ಯಾಂಕ್ ಶಾಖೆಗಳು ಕಾರ್ಯನಿರ್ವಹಿಸುವುದಿಲ್ಲ. ಬ್ಯಾಂಕ್ ಕೆಲಸಗಳಿರುವ ಗ್ರಾಹಕರು ರಜಾ ದಿನಗಳ ಪಟ್ಟಿಯನ್ನು ಗಮನಿಸಿ ಯೋಜನೆ ರೂಪಿಸಿಕೊಳ್ಳುವುದು ಸೂಕ್ತ. ಶಾಖೆಗಳು ಮುಚ್ಚಿದ್ದರೂ ನೆಟ್ ಬ್ಯಾಂಕಿಂಗ್ ಹಾಗೂ ಎಟಿಎಂ ಸೇವೆಗಳು ಎಂದಿನಂತೆ ಲಭ್ಯವಿರುತ್ತವೆ.
ಇವಿ ಮಾಲೀಕರೇ ಗಮನಿಸಿ: ಅ.1ರಿಂದ ಹೊಸ ನಿಯಮ ಜಾರಿ!
