ಅಯೋಧ್ಯೆಯಲ್ಲಿ ಶ್ರೀರಾಮನ ಮೂರ್ತಿ ವಿರಾಜಮಾನ ಆಗಲು ಕೆಲವೇ ದಿನಗಳು ಬಾಕಿ ಇವೆ. ರಾಮನ ಮೂರ್ತಿ ತಯಾರಿಸಿದ ಬಂಡೆಯನ್ನ ಆಂಜನೇಯನ ಭಕ್ತ ಗುರುತಿಸಿದ್ದು ಎಂಬುದು ಹೆಮ್ಮೆಯ ಸಂಗತಿ ಬೆಳಕಿಗೆ ಬಂದಿದೆ. ಮೂರ್ತಿ ಕೆತ್ತನೆ ಮಾಡಿರುವ ಆ ಬಂಡೆ ಹಿಂದಿನ ಕಥೆ ರೋಚಕವಾಗಿದೆ.
![](https://pratidhvani.com/wp-content/uploads/2024/01/IMG-20240118-WA0207-1024x768.webp)
ಎಲ್ಲಿ ಶ್ರೀರಾಮನು ಇರುತ್ತಾರೋ ಅಲ್ಲಿ ಹನುಮನು ಇರುತ್ತಾನೆ ಎನ್ನುವುದು ಲೋಕರೂಢಿ. ಜೊತೆಗೆ ಭಜರಂಗಿಯ ಜಪಮಂತ್ರ ಕೂಡ ಹೌದು. ಉತ್ತರ ಪ್ರದೇಶದ ಅಯೋಧ್ಯೆಯಲ್ಲಿ ಪ್ರತಿಷ್ಠಾಪನೆ ಆಗುತ್ತಿರುವ ಶ್ರೀರಾಮಚಂದ್ರ ಮೂರ್ತಿಗೂ ರಾಮಭಂಟ ಹನುಮಂತನಿಗೂ ಅವಿನಭಾವ ಸಂಬಂಧವಿದೆ.
![](https://pratidhvani.com/wp-content/uploads/2024/01/IMG-20240118-WA0206-1024x768.webp)
ಕೊಪ್ಪಳದ ಪ್ರಕಾಶ ಶಿಲ್ಪಿ ಎಂಬುವರು ಈ ಮೊದಲೇ ಶಿಲೆಯನ್ನು ಗುರುತಿಸಿದ್ದರು. ಮೈಸೂರಿನ ಅರುಣ್ ಯೋಗಿರಾಜ್ ತಯಾರಿಸಿದ ಶ್ರೀರಾಮಚಂದ್ರ ಮೂರ್ತಿ ತಯಾರಿಸಿದ ಬಂಡೆಯನ್ನು ಮೊದಲು ನೋಡಿ, ಮೂರ್ತಿ ಕೆತ್ತನೆಗೆ ಸೂಕ್ತ ಎಂದು ಆಯ್ಕೆ ಮಾಡಿದ್ದರು. ಪ್ರಕಾಶ ಶಿಲ್ಪಿಯವರ ತಂದೆ ಶೇಖಣ್ಣಾಚಾರ್ಯರು ಹನುಮ ಭಕ್ತರಾಗಿದ್ದರು. ತಂದೆ ನಿಧನದ ಬಳಿಕ ತಂದೆ ನೆನಪಿಗಾಗಿ ದಿನನಿತ್ಯ ಒಂದು ಹನುಮ ಮೂರ್ತಿ ತಯಾರಿಸಿದ ನಂತರವೇ ಊಟೋಪಚಾರ ಮಾಡುವ ಹವ್ಯಾಸ ಬೆಳೆಸಿಕೊಂಡಿರುವ ಪ್ರಕಾಶ್ ಶಿಲ್ಪಿ ಅವರ ಬಳಿ ಇದೀಗ ಬರೋಬ್ಬರಿ 6100ಕ್ಕೂ ಹೆಚ್ಚು ಹನುಮ ಮೂರ್ತಿಗಳು ಇವೆ.
![](https://pratidhvani.com/wp-content/uploads/2024/01/IMG-20240118-WA0209-1024x768.webp)
ಶಿಲ್ಪಿ ಪ್ರಕಾಶ್ ಒಮ್ಮೆ ಮೈಸೂರಿಗೆ ಹೋಗಿದ್ದರು. ಅಲ್ಲಿ ಒಂದು ಬಂಡೆಯನ್ನು ನೋಡಿದ್ದರು. ಆದರೆ ಅಳತೆಯಲ್ಲಿ ವ್ಯತ್ಯಾಸ ಆಗಿದ್ದರಿಂದ ಈ ಬಂಡೆಯನ್ನು ಖರೀದಿಸಿರಲಿಲ್ಲ. ಅಂದೇ ಅಲ್ಲೊಂದು ಹನುಮ ಮೂರ್ತಿ ತಯಾರಿಸಿ ಬಂಡೆ ಮೇಲಿಟ್ಟು ಪೂಜೆ ಸಲ್ಲಿಸಿದ್ದರು. ಇದೀಗ ಅದೇ ಬಂಡೆಯನ್ನು ಅರುಣ್ ಯೋಗಿರಾಜ್ ಖರೀದಿ ಮಾಡಿ ಶ್ರೀರಾಮನ ಮೂರ್ತಿಯನ್ನು ಕೆತ್ತನೆ ಮಾಡಿದ್ದಾರೆ. ತಾವು ನೋಡಿದ್ದ ಬಂಡೆಯಲ್ಲೇ ಶ್ರೀರಾಮನ ಮೂರ್ತಿ ಅರಳಿದೆ ಎಂಬುದು ಶಿಲ್ಪಿ ಪ್ರಕಾಶ್ ಅವರ ಸಂತಸಕ್ಕೂ ಕಾರಣವಾಗಿದೆ.
ತಂದೆ ಹನುಮಂತನ ಭಕ್ತರು ಅನ್ನೋ ಕಾರಣಕ್ಕೆ ಮಗ ಪ್ರಕಾಶ್ ದಿನಕ್ಕೊಂದು ಹನುಮನ ಮೂರ್ತಿ ಕೆತ್ತನೆ ಮಾಡಿ ಪೂಜೆ ಮಾಡಿದ ಬಳಿಕವೇ ಊಟ ಮಾಡುವ ವ್ರತ ಮಾಡುತ್ತಿದ್ದಾರೆ. ಅದೇ ಹನುಮಂತನ ಭಕ್ತ ಆಯ್ಕೆ ಮಾಡಿದ ಬಂಡೆಯೇ ಶ್ರೀರಾಮಚಂದ್ರನ ಮೂರ್ತಿಯಾಗಿರುವುದು ದೈವ ಸಂಕಲ್ಪವೇ ಸರಿ ಎನ್ನಬಹುದು. ಶ್ರೀರಾಮನ ಮೂರ್ತಿ ಕೆತ್ತನೆ ಬಳಿಕ ಬಂಡೆಯಲ್ಲಿ ಉಳಿದಿರೋ ತುಣುಕುಗಳನ್ನೇ ತೆಗೆದುಕೊಂಡು ಹನುಮನ ಮೂರ್ತಿಗಳ ಕೆತ್ತನೆಗೂ ಪ್ರಕಾಶ್ ಸಿದ್ಧತೆ ನಡೆಸಿದ್ದಾರೆ. ರಾಮಾಂಜನೇಯ ಸಂಬಂಧ ಅಷ್ಟಕ್ಕೂ ನಿರಂತರ ಅಲ್ಲವೇ..?