ಹಬ್ಬದ ಸಂಭ್ರಮ ಆರಂಭವಾಯಿತೆಂದರೆ ಮನೆಗಳಲ್ಲಿ ಸಿದ್ಧತೆಗಳೂ ಶುರುವಾಗುತ್ತವೆ. ಹೊಸ ಬಟ್ಟೆ, ಸಿಹಿತಿಂಡಿ, ಹೂವಿನ ಅಲಂಕಾರ, ಪೂಜಾ ಸಾಮಗ್ರಿ, ಉಡುಗೊರೆಗಳ ಖರೀದಿ ಹೀಗೆ ಹಲವು ಕೆಲಸಗಳಲ್ಲಿ ಜನರು ತೊಡಗಿಸಿಕೊಳ್ಳುತ್ತಾರೆ. ಹಿಂದೆ ಈ ಎಲ್ಲ ವಸ್ತುಗಳನ್ನು ಖರೀದಿಸಲು ಮಾರುಕಟ್ಟೆಗಳಿಗೆ ಅಲೆದಾಡಬೇಕಿತ್ತು. ಆದರೆ ಈಗ ತಂತ್ರಜ್ಞಾನ ಬೆಳೆದಂತೆ ಶಾಪಿಂಗ್ ವಿಧಾನವೂ ಬದಲಾಗಿದೆ. ಮನೆಯಲ್ಲೇ ಕುಳಿತು ಮೊಬೈಲ್‌ನಲ್ಲಿ ಆರ್ಡರ್ ಮಾಡಿದರೆ ಸಾಕು, ಬೇಕಾದ ವಸ್ತುಗಳು ಕೆಲವೇ ನಿಮಿಷಗಳಲ್ಲಿ ಮನೆ ಬಾಗಿಲಿಗೆ ತಲುಪುತ್ತವೆ.
ವಿಶೇಷವೆಂದರೆ, ದಿನಸಿ ಮತ್ತು ತಿಂಡಿಗಳ ಖರೀದಿಗೆ ಸೀಮಿತವಾಗಿದ್ದ ಆನ್‌ಲೈನ್ ಶಾಪಿಂಗ್ ಈಗ ಚಿನ್ನದ ನಾಣ್ಯ, ಬೆಳ್ಳಿ ಬಾರ್ ಖರೀದಿಸುವ ಮಟ್ಟಕ್ಕೂ ವಿಸ್ತರಿಸಿದೆ. ಈ ಬಾರಿಯ ದೀಪಾವಳಿಯಲ್ಲಿ ಭಾರತೀಯರು ಕಾಜು ಕಟ್ಲಿಯಿಂದ ಹಿಡಿದು ಲಕ್ಷ್ಮೀ-ಗಣೇಶನ ಚಿತ್ರವಿರುವ ಚಿನ್ನದ ನಾಣ್ಯಗಳವರೆಗೆ ಹಲವು ವಸ್ತುಗಳನ್ನು ಆನ್‌ಲೈನ್‌ನಲ್ಲಿ ಖರೀದಿಸಿದ್ದಾರೆ. ಸ್ವಿಗ್ಗಿ ಇನ್‌ಸ್ಟಾಮಾರ್ಟ್ ಮತ್ತು ಜೆಪ್ಟೊ ಬಿಡುಗಡೆ ಮಾಡಿರುವ ಅಂಕಿ-ಅಂಶಗಳು ಹಬ್ಬದ ಖರೀದಿಯಲ್ಲಿ ಕ್ವಿಕ್ ಕಾಮರ್ಸ್ ವೇದಿಕೆಗಳ ಪ್ರಭಾವ ಹೆಚ್ಚುತ್ತಿರುವುದನ್ನು ತೋರಿಸಿವೆ.
ಈ ಬಾರಿಯ ದೀಪಾವಳಿಯಲ್ಲಿ ಕ್ವಿಕ್ ಕಾಮರ್ಸ್ ಪ್ಲಾಟ್‌ಫಾರ್ಮ್‌ಗಳಲ್ಲಿ ಹಬ್ಬದ ಖರೀದಿ ಭರ್ಜರಿಯಾಗಿ ನಡೆದಿದೆ. ಕುಟುಂಬದವರು, ಸ್ನೇಹಿತರು ಹಾಗೂ ಆಪ್ತರಿಗೆ ಉಡುಗೊರೆ ನೀಡಲು ಜನರು ಹೆಚ್ಚಿನ ಆಸಕ್ತಿ ತೋರಿದ್ದಾರೆ.
ಜೆಪ್ಟೊ ಬಿಡುಗಡೆ ಮಾಡಿರುವ ಮಾಹಿತಿಯ ಪ್ರಕಾರ, ಕಳೆದ ವರ್ಷದ ದೀಪಾವಳಿಗೆ ಹೋಲಿಸಿದರೆ ಈ ಬಾರಿ ಗಿಫ್ಟ್ ಹ್ಯಾಂಪರ್‌ಗಳ ಆರ್ಡರ್‌ಗಳು ಮೂರು ಪಟ್ಟು ಹೆಚ್ಚಾಗಿವೆ. ದೀಪಗಳ ಖರೀದಿಯಲ್ಲೂ ಗ್ರಾಹಕರು ಉತ್ಸಾಹ ತೋರಿಸಿದ್ದು, ಹಬ್ಬದ ಸಂದರ್ಭದಲ್ಲಿ ಬರೋಬ್ಬರಿ 4.68 ಲಕ್ಷ ದೀಪಗಳಿಗೆ ಆರ್ಡರ್ ಬಂದಿದೆ. ಹೂವು ಮತ್ತು ಹೂವಿನ ಮಾಲೆಗಳ ಖರೀದಿಯೂ ಕಳೆದ ವರ್ಷಕ್ಕೆ ಹೋಲಿಸಿದರೆ 2.5 ಪಟ್ಟು ಹೆಚ್ಚಾಗಿದೆ.
ದೀಪಾವಳಿ ಎಂದರೆ ಸಿಹಿತಿಂಡಿಗಳಿಲ್ಲದೆ ಸಂಭ್ರಮ ಪೂರ್ಣವಾಗುವುದಿಲ್ಲ. ಅತಿಥಿಗಳಿಗೆ ಸಿಹಿ ಹಂಚುವುದು, ಸ್ನೇಹಿತರು ಮತ್ತು ಸಂಬಂಧಿಕರಿಗೆ ಉಡುಗೊರೆಯಾಗಿ ನೀಡುವುದು ಹಬ್ಬದ ಸಂಪ್ರದಾಯದ ಭಾಗವಾಗಿದೆ.
ಈ ಬಾರಿ ಸ್ವಿಗ್ಗಿ ಇನ್‌ಸ್ಟಾಮಾರ್ಟ್‌ನಲ್ಲಿ ಅತಿ ಹೆಚ್ಚು ಆರ್ಡರ್ ಪಡೆದ ಸಿಹಿತಿಂಡಿಯಾಗಿ ಕಾಜು ಕಟ್ಲಿ ಮೊದಲ ಸ್ಥಾನದಲ್ಲಿದೆ. ಮೋತಿಚೂರ್ ಲಡ್ಡು ಮತ್ತು ಬೇಸನ್ ಲಡ್ಡು ನಂತರದ ಸ್ಥಾನಗಳನ್ನು ಪಡೆದುಕೊಂಡಿವೆ. ಇತ್ತ ಜೆಪ್ಟೊದಲ್ಲಿ ಲಡ್ಡುಗಳಿಗೆ ಹೆಚ್ಚಿನ ಆರ್ಡರ್ ಬಂದಿದ್ದರೆ, ಒಟ್ಟಾರೆ ಮಾರಾಟದ ಪ್ರಮಾಣದಲ್ಲಿ ಸೋನ್ ಪಾಪ್ಡಿ ಮೊದಲ ಸ್ಥಾನದಲ್ಲಿದೆ.
ದೀಪಾವಳಿ ಎಂದರೆ ಪೂಜೆ ಮತ್ತು ಸಿಹಿತಿಂಡಿಗಳಷ್ಟೇ ಅಲ್ಲ; ಕುಟುಂಬ ಹಾಗೂ ಸ್ನೇಹಿತರೊಂದಿಗೆ ಪಾರ್ಟಿ ಮಾಡುವ ಸಂಭ್ರಮವೂ ಇದೆ. ಇದಕ್ಕೆ ಸಾಕ್ಷಿಯೆಂಬಂತೆ ಸ್ವಿಗ್ಗಿ ಇನ್‌ಸ್ಟಾಮಾರ್ಟ್‌ನಲ್ಲಿ ಪಾರ್ಟಿಗೆ ಸಂಬಂಧಿಸಿದ ಆರ್ಡರ್‌ಗಳು ಕಳೆದ ವರ್ಷಕ್ಕೆ ಹೋಲಿಸಿದರೆ ಶೇ.162ರಷ್ಟು ಹೆಚ್ಚಾಗಿವೆ. ತಿಂಡಿ ಮತ್ತು ಸ್ನ್ಯಾಕ್ಸ್‌ಗಳ ಖರೀದಿಯಲ್ಲೂ ಶೇ.42ರಷ್ಟು ಏರಿಕೆ ಕಂಡುಬಂದಿದೆ.ಅಚ್ಚರಿಯ ಸಂಗತಿಯೆಂದರೆ, ಹಬ್ಬಕ್ಕೂ ಮುನ್ನ ಅತಿ ಹೆಚ್ಚು ಆರ್ಡರ್ ಪಡೆದ ಗ್ರಾಸರಿ ಅಲ್ಲದ ವಸ್ತುವಾಗಿ ಡಯಟ್ ಕೋಕ್ ಗುರುತಿಸಿಕೊಂಡಿದೆ. ಇದರ ಜೊತೆಗೆ ಬಟ್ಟೆ, ಆಭರಣ, ಹೇರ್ ಆಕ್ಸೆಸರೀಸ್, ಎಲೆಕ್ಟ್ರಾನಿಕ್ಸ್ ಮತ್ತು ಅಡುಗೆಮನೆಗೆ ಸಂಬಂಧಿಸಿದ ವಸ್ತುಗಳಿಗೂ ಬೇಡಿಕೆ ಹೆಚ್ಚಾಗಿದೆ.
ದೀಪಾವಳಿ ಸಂದರ್ಭದಲ್ಲಿ ಧನ್‌ತೇರಸ್ ದಿನ ಚಿನ್ನ ಮತ್ತು ಬೆಳ್ಳಿ ಖರೀದಿಸುವುದು ಭಾರತೀಯರ ಸಂಪ್ರದಾಯ. ಈ ಸಂಪ್ರದಾಯ ಆನ್‌ಲೈನ್ ಶಾಪಿಂಗ್‌ನಲ್ಲೂ ಮುಂದುವರಿದಿದೆ.
ಸ್ವಿಗ್ಗಿ ಇನ್‌ಸ್ಟಾಮಾರ್ಟ್ ನೀಡಿರುವ ಮಾಹಿತಿಯ ಪ್ರಕಾರ, ನವೆಂಬರ್ 6ರಂದು ಮಧ್ಯರಾತ್ರಿ 12 ಗಂಟೆ 30 ಸೆಕೆಂಡ್‌ಗೆ ಹೈದರಾಬಾದ್‌ನಿಂದ ಮೊದಲ ಚಿನ್ನದ ನಾಣ್ಯದ ಆರ್ಡರ್ ಬಂದಿದೆ. ಹೂವಿನ ವಿನ್ಯಾಸ ಹೊಂದಿದ್ದ 24 ಕ್ಯಾರಟ್ ಚಿನ್ನದ ನಾಣ್ಯವನ್ನು ಗ್ರಾಹಕರು ಆರ್ಡರ್ ಮಾಡಿದ್ದರು. ಇದಾದ ಕೇವಲ ನಾಲ್ಕು ಸೆಕೆಂಡ್‌ಗಳಲ್ಲೇ ಬೆಂಗಳೂರಿನಿಂದ ಮೊದಲ ಬೆಳ್ಳಿ ನಾಣ್ಯದ ಆರ್ಡರ್ ದಾಖಲಾಗಿದೆ.
ಖರೀದಿಯಾದ ಚಿನ್ನದ ನಾಣ್ಯಗಳಲ್ಲಿ ಸುಮಾರು ಮೂರನೇ ಎರಡರಷ್ಟು ನಾಣ್ಯಗಳು ಹೂವಿನ ವಿನ್ಯಾಸ ಹೊಂದಿದ್ದವು. ಬೆಳ್ಳಿ ನಾಣ್ಯಗಳ ಪೈಕಿ ಶೇ.73ರಷ್ಟು ನಾಣ್ಯಗಳಲ್ಲಿ ಲಕ್ಷ್ಮೀದೇವಿ ಮತ್ತು ಗಣೇಶನ ಚಿತ್ರಗಳಿದ್ದವು. ಸಂಜೆ 6.38ರ ಸಮಯದಲ್ಲಿ ನಾಣ್ಯಗಳ ಖರೀದಿ ಗರಿಷ್ಠ ಮಟ್ಟ ತಲುಪಿತ್ತು.ಈ ಬಾರಿಯ ದೀಪಾವಳಿ ಆನ್‌ಲೈನ್ ಶಾಪಿಂಗ್‌ನಲ್ಲಿ ಮುಂಬೈ ಗ್ರಾಹಕರೊಬ್ಬರ ಖರೀದಿ ವಿಶೇಷ ಗಮನ ಸೆಳೆದಿದೆ. ಅವರು ಕ್ವಿಕ್ ಕಾಮರ್ಸ್ ಪ್ಲಾಟ್‌ಫಾರ್ಮ್ ಮೂಲಕ ಬರೋಬ್ಬರಿ ₹1.11 ಲಕ್ಷ ಮೌಲ್ಯದ ವಸ್ತುಗಳನ್ನು ಆರ್ಡರ್ ಮಾಡಿದ್ದಾರೆ. ಈ ಖರೀದಿಯಲ್ಲಿ ಲಕ್ಷ್ಮೀ-ಗಣೇಶ ಹಾಗೂ ಕಮಲದ ವಿನ್ಯಾಸ ಹೊಂದಿರುವ ಚಿನ್ನದ ನಾಣ್ಯಗಳೂ ಸೇರಿದ್ದವು.
ಹೈದರಾಬಾದ್‌ನ ಗ್ರಾಹಕರೊಬ್ಬರು ₹52,215 ಮೌಲ್ಯದ ವಸ್ತುಗಳನ್ನು ಖರೀದಿಸಿದ್ದು, ಅದರಲ್ಲಿ 2 ಗ್ರಾಂ ಚಿನ್ನದ ನಾಣ್ಯ ಮತ್ತು 100 ಗ್ರಾಂ ಬೆಳ್ಳಿ ಬಾರ್ ಸೇರಿವೆ. ಬೆಂಗಳೂರಿನಲ್ಲೂ ₹32,298 ಮೌಲ್ಯದ ಆರ್ಡರ್ ದಾಖಲಾಗಿದೆ. ಈ ಖರೀದಿಯಲ್ಲಿ ಲಕ್ಷ್ಮೀದೇವಿಯ ವಿನ್ಯಾಸವಿರುವ 2 ಗ್ರಾಂ ಚಿನ್ನದ ನಾಣ್ಯ ಹಾಗೂ ಆಲಿವ್ ಎಣ್ಣೆ ಸೇರಿದ್ದವು.ನವೆಂಬರ್ 8ರ ಶಾಪಿಂಗ್ ಮಾಹಿತಿಯ ಪ್ರಕಾರ, ಬೆಳಗ್ಗೆ 11ರಿಂದ ಮಧ್ಯಾಹ್ನ 12 ಗಂಟೆಯ ಅವಧಿಯಲ್ಲಿ ಅತಿ ಹೆಚ್ಚು ಆರ್ಡರ್‌ಗಳು ದಾಖಲಾಗಿವೆ. ಅದರಲ್ಲೂ ಬೆಳಗ್ಗೆ 11 ಗಂಟೆ 18 ನಿಮಿಷಕ್ಕೆ ಒಂದೇ ನಿಮಿಷದಲ್ಲಿ ಗರಿಷ್ಠ ಸಂಖ್ಯೆಯ ಆರ್ಡರ್‌ಗಳು ಬಂದಿವೆ.
ಸ್ವಿಗ್ಗಿ ಇನ್‌ಸ್ಟಾಮಾರ್ಟ್‌ನ ಹಬ್ಬದ ಶಾಪಿಂಗ್‌ನಲ್ಲಿ ರಾಯ್‌ಪುರ, ಮಧುರೈ, ಗುವಾಹಟಿ, ತ್ರಿಶೂರ್ ಮತ್ತು ಕೊಲ್ಲಂ ನಗರಗಳೂ ಗಮನ ಸೆಳೆದಿವೆ.ಈ ಬಾರಿಯ ದೀಪಾವಳಿ ಶಾಪಿಂಗ್ ಭಾರತೀಯರ ಖರೀದಿ ಅಭ್ಯಾಸದಲ್ಲಿ ಆಗುತ್ತಿರುವ ಬದಲಾವಣೆಗೆ ಸಾಕ್ಷಿಯಾಗಿದೆ. ಹಿಂದೆ ಮಾರುಕಟ್ಟೆಗಳಿಗೆ ತೆರಳಿ ಖರೀದಿಸುತ್ತಿದ್ದ ಸಿಹಿತಿಂಡಿ, ಹೂವು, ಪೂಜಾ ಸಾಮಗ್ರಿಗಳಿಂದ ಹಿಡಿದು ಚಿನ್ನ ಮತ್ತು ಬೆಳ್ಳಿ ನಾಣ್ಯಗಳವರೆಗೆ ಎಲ್ಲವೂ ಈಗ ಮೊಬೈಲ್‌ನಲ್ಲೇ ಲಭ್ಯವಾಗುತ್ತಿದೆ. ಹಬ್ಬದ ಸಂಭ್ರಮದ ನಡುವೆ ಕ್ವಿಕ್ ಕಾಮರ್ಸ್ ವೇದಿಕೆಗಳು ಭಾರತೀಯರ ಶಾಪಿಂಗ್‌ನ ಅವಿಭಾಜ್ಯ ಭಾಗವಾಗುತ್ತಿವೆ.
