ಕೊಪ್ಪಳ: ಗಣೇಶೋತ್ಸವ ಎಂದಾಕ್ಷಣ ಡಿಜೆ ಸದ್ದು, ಪಟಾಕಿ, ಅದ್ಧೂರಿ ಮೆರವಣಿಗೆ ಕಣ್ಮುಂದೆ ಬರುತ್ತದೆ. ಸಣ್ಣ ಪ್ರಮಾಣದ ಮೆರವಣಿಗೆ ಆಯೋಜಿಸಿದರೂ ಸಾವಿರಾರು ರೂಪಾಯಿ ಖರ್ಚಾಗುತ್ತದೆ. ಅದರಲ್ಲೂ ಗಣೇಶ ಮೂರ್ತಿಗಿಂತ ಡಿಜೆ ಹಾಗೂ ಮೆರವಣಿಗೆಗೆ ಹೆಚ್ಚಿನ ಹಣ ವ್ಯಯವಾಗುವುದು ಸಾಮಾನ್ಯವಾಗಿದೆ.
ಇಷ್ಟೆಲ್ಲ ಖರ್ಚು ಮಾಡಿದರೂ ಕೆಲವೊಮ್ಮೆ ಮೆರವಣಿಗೆಯಲ್ಲಿ ಗಲಾಟೆ, ಅಹಿತಕರ ಘಟನೆಗಳು ನಡೆಯುವ ಪ್ರಕರಣಗಳೂ ಕಂಡುಬರುತ್ತವೆ. ಆದರೆ ಕೊಪ್ಪಳ ಜಿಲ್ಲೆಯ ಕಿನ್ನಾಳ ಗ್ರಾಮದ ಯುವಕರು ಇದಕ್ಕೆ ವಿಭಿನ್ನವಾದ ಮಾದರಿ ನೀಡಿದ್ದಾರೆ.
ಕಿನ್ನಾಳ ಗ್ರಾಮದ ಕಾಮನಕಟ್ಟಿ ಗೆಳೆಯರ ಬಳಗದ ಹಿಂದೂ ಗಜಾನನ ಮಂಡಳಿಯ ಯುವಕರು ಕಳೆದ ಮೂರು ವರ್ಷಗಳಿಂದ ಗಣೇಶೋತ್ಸವವನ್ನು ಸಾಮಾಜಿಕ ಕಾಳಜಿಯೊಂದಿಗೆ ಆಚರಿಸುತ್ತಿದ್ದಾರೆ. ಡಿಜೆ ಹಾಗೂ ಆಡಂಬರಕ್ಕೆ ಹಣ ಖರ್ಚು ಮಾಡುವ ಬದಲು ಗ್ರಾಮದ ಅಭಿವೃದ್ಧಿ ಕಾರ್ಯಗಳಿಗೆ ಬಳಸುತ್ತಿದ್ದಾರೆ.
ಕಳೆದ ವರ್ಷ ಗ್ರಾಮದ ರಸ್ತೆ ನಿರ್ಮಾಣಕ್ಕೆ ಕೈಜೋಡಿಸಿದ್ದ ಯುವಕರು, ಈ ಬಾರಿ ಎರಡು ಸರ್ಕಾರಿ ಶಾಲೆಗಳ ಆವರಣವನ್ನು ಸ್ವಚ್ಛಗೊಳಿಸಿದ್ದಾರೆ. ಅಲ್ಲದೆ, ಶಾಲೆಗಳ ಕಾಂಪೌಂಡ್ಗೆ ಬಣ್ಣ ಬಳಿದು ಹೊಸ ರೂಪ ನೀಡಿದ್ದಾರೆ.
ಗಣೇಶೋತ್ಸವದ ಹೆಸರಿನಲ್ಲಿ ದುಂದು ವೆಚ್ಚ ಮಾಡುವ ಬದಲು ಸಮಾಜಕ್ಕೆ ಉಪಯೋಗವಾಗುವ ಕಾರ್ಯಗಳಿಗೆ ಹಣ ಹಾಗೂ ಶ್ರಮ ವಿನಿಯೋಗಿಸುವ ಮೂಲಕ ಕಿನ್ನಾಳ ಗ್ರಾಮದ ಯುವಕರು ಹಬ್ಬದ ಆಚರಣೆಗೆ ಹೊಸ ಅರ್ಥ ನೀಡಿದ್ದಾರೆ. ಇವರ ಕಾರ್ಯಕ್ಕೆ ಗ್ರಾಮಸ್ಥರಿಂದಲೂ ಮೆಚ್ಚುಗೆ ವ್ಯಕ್ತವಾಗಿದೆ.
