ಬೆಂಗಳೂರು: ಉದ್ಯೋಗಿಗಳನ್ನು ಕೆಲಸದಿಂದ ವಜಾ ಮಾಡುವುದು ಟೆಕ್ ಜಗತ್ತಿನ ಬಹುತೇಕ ಸಂಸ್ಥೆಗಳಿಗೆ ಸಾಮಾನ್ಯವಾದ ವಿಚಾರವಾಗಿದೆ. ಇತ್ತೀಚಿಗೆ ಅಮೆಜಾನ್(Amazon) ಸಂಸ್ಥೆ ಸಾವಿರಾರು ಉದ್ಯೋಗಿಗಳನ್ನು ಲೇ-ಆಫ್(layoffs) ಮಾಡಿದ ಬೆನ್ನಲ್ಲೇ ಇದೀಗ ಮತ್ತೊಂದು ಪ್ರತಿಷ್ಠಿತ ಕಂಪನಿ ತನ್ನ ಸಾವಿರಾರು ಉದ್ಯೋಗಿಗಳನ್ನು ಕೆಲಸದಿಂದ ವಜಾ ಮಾಡಲು ಮುಂದಾಗಿದೆ.
ಹೌದು ಪ್ರಖ್ಯಾತ ಟೆಕ್ ಕಂಪನಿ ಒರಾಕಲ್ ಸಂಸ್ಥೆ(Oracle) ಸುಮಾರು 20,000 ರಿಂದ 30,000 ಉದ್ಯೋಗಿಗಳನ್ನು ಕೆಲಸದಿಂದ ವಜಾ ಮಾಡುವ ಯೋಚನೆ ಮಾಡುತ್ತಿದೆ ಎನ್ನುವ ವಿಚಾರ ವರದಿಯಾಗಿದೆ. ಹೂಡಿಕೆ ಬ್ಯಾಂಕ್ ಟಿಡಿ ಕೋವೆನ್ ಬಿಡುಗಡೆ ಮಾಡಿದ ರಿಸರ್ಚ್ ರಿಪೋರ್ಟ್ ಪ್ರಕಾರ, ಎಐ ಡೇಟಾ ಸೆಂಟರ್ಗಳ ವಿಸ್ತರಣೆಗೆ ಬೇಕಾದ ಭಾರೀ ಹಣಕಾಸಿನ ಒತ್ತಡ ಈ ನಿರ್ಧಾರಕ್ಕೆ ಪ್ರಮುಖ ಕಾರಣವಾಗಿದೆ. ಈ ಲೇ-ಆಫ್ ಮೂಲಕ ಒರಾಕಲ್ ಸಂಸ್ಥೆ 8 ರಿಂದ 10 ಬಿಲಿಯನ್ ಡಾಲರ್ ಕ್ಯಾಶ್ ಫ್ಲೋ ಉಳಿಸಿಕೊಳ್ಳಲು ಪ್ರಯತ್ನಿಸುತ್ತಿದೆ ಎನ್ನಲಾಗಿದೆ.
ಇನ್ನು ಒರಾಕಲ್ ಸಂಸ್ಥೆ ಈಗಾಗಲೇ 100 ಬಿಲಿಯನ್ ಡಾಲರ್ಗಿಂತ ಹೆಚ್ಚು ಸಾಲ ಹೊಂದಿದ್ದು, ಅಮೆರಿಕದ ಬ್ಯಾಂಕ್ಗಳು ಹೊಸ ಸಾಲ ನೀಡಲು ಹಿಂದೇಟು ಹಾಕುತ್ತಿವೆ. ಸಾಲದ ಇಂಟರೆಸ್ಟ್ ರೇಟ್ ಕೂಡ ದ್ವಿಗುಣವಾಗಿದೆ. ಹೀಗಾಗಿ ಎಐ ಪ್ರಾಜೆಕ್ಟ್ಗಳಿಗೆ ಹಣಕಾಸು ವ್ಯವಸ್ಥೆ ಸಂಸ್ಥೆಗೆ ದೊಡ್ಡ ಸವಾಲಾಗಿದೆ ಎನ್ನಲಾಗಿದೆ.
ಒರಾಕಲ್ ಶೇರ್ ಬೆಲೆ 50%ಕ್ಕಿಂತ ಹೆಚ್ಚು ಕುಸಿತವಾಗಿದ್ದು, ಮಾರುಕಟ್ಟೆಯಲ್ಲಿ ಸುಮಾರು 463 ಬಿಲಿಯನ್ ಡಾಲರ್ ನಷ್ಟವಾಗಿದೆ. ವರದಿಗಳ ಪ್ರಕಾರ, ಓಪನ್ ಎಐ ತನ್ನ ಕೆಲವು ಎಐ ಕೆಪಾಸಿಟಿ ಅಗತ್ಯಗಳನ್ನು ಮೈಕ್ರೋಸಾಫ್ಟ್ ಮತ್ತು ಅಮೆಜಾನ್ ಕಡೆಗೆ ಡೈವರ್ಟ್ ಮಾಡುತ್ತಿದೆ. ಇದರಿಂದ ಒರಾಕಲ್ ಮೇಲಿನ ನಂಬಿಕೆ ಕಡಿಮೆಯಾಗಿದೆ ಎನ್ನಲಾಗಿದೆ. ಈವರೆಗೆ ಒರಾಕಲ್ ಈ ಲೇ-ಆಫ್ ಬಗ್ಗೆ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ. ಎಐ ಕ್ಷೇತ್ರದಲ್ಲಿ ಮುನ್ನಡೆ ಸಾಧಿಸಲು ಹೊರಟ ಕಂಪನಿ ಈಗ ಹಣಕಾಸು ಸಂಕಷ್ಟಕ್ಕೆ ಸಿಲುಕಿರುವುದು ಜಾಗತಿಕ ಟೆಕ್ ಇಂಡಸ್ಟ್ರಿಯಲ್ಲಿ ದೊಡ್ಡ ಚರ್ಚೆಗೆ ಕಾರಣವಾಗಿದೆ.
