ಹುಟ್ಟುಹಬ್ಬ ಆಚರಿಸಲು ಕೌಟುಂಬಿಕ ಕೂಟವನ್ನು ಆಯೋಜಿಸಿದ ವೇಳೆ ಸಾಮಾಜಿಕ ಅಂತರ ಪಾಲಿಸಿಲ್ಲ ಹಾಗೂ ಆ ಮೂಲಕ ಕೋವಿಡ್ 19 ನಿಯಮಗಳನ್ನು ಉಲ್ಲಂಘಿಸಿದ್ದಾರೆಂಬ ಕಾರಣಕ್ಕೆ ನಾರ್ವೆಯ ಪ್ರಧಾನಮಂತ್ರಿ ಎರ್ನಾ ಸೊಲ್ಬರ್ಗ್ ಅವರಿಗೆ ಸ್ಥಳೀಯ ಪೊಲೀಸರು ದಂಡ ವಿಧಿಸಿದ್ದಾರೆ.
ನಾರ್ವೆಯ ಸುಮಾರು 20,000 ಕ್ರೌನ್ಗಳನ್ನು (ಭಾರತದ ಸುಮಾರು 1 ಲಕ್ಷದ 75 ಸಾವಿರ ರುಪಾಯಿ) ದಂಡವಾಗಿ ವಿಧಿಸಲಾಗಿದೆ ಎಂದು ಪೊಲೀಸ್ ಮುಖ್ಯಸ್ಥ ಓಲ್ ಸೆವಾರ್ಡ್ ಮಾಧ್ಯಮಗೋಷ್ಟಿಯಲ್ಲಿ ತಿಳಿಸಿದ್ದಾರೆ.
10 ಕ್ಕೂ ಹೆಚ್ಚು ಜನರ ಕೂಟಗಳಿಗೆ ಸರ್ಕಾರದ ನಿಷೇಧದ ಹೊರತಾಗಿಯೂ, ಫೆಬ್ರವರಿ ಅಂತ್ಯದಲ್ಲಿ ಮೌಂಟೇನ್ ರೆಸಾರ್ಟ್ನಲ್ಲಿ 13 ಕುಟುಂಬ ಸದಸ್ಯರೊಂದಿಗೆ ತನ್ನ 60 ನೇ ಹುಟ್ಟುಹಬ್ಬದ ಕಾರ್ಯಕ್ರಮವನ್ನು ಆಯೋಜಿಸಿದ್ದಕ್ಕಾಗಿ ಪ್ರಧಾನಮಂತ್ರಿ ಕಳೆದ ತಿಂಗಳು ಸಾರ್ವಜನಿಕ ಕ್ಷಮೆಯಾಚಿಸಿದ್ದರು.
ಅಂತಹ ಹೆಚ್ಚಿನ ಪ್ರಕರಣಗಳಲ್ಲಿ ಪೊಲೀಸರು ದಂಡ ವಿಧಿಸುತ್ತಿರಲಿಲ್ಲವಾದರೂ, ನಿರ್ಬಂಧಗಳನ್ನು ವಿಧಿಸುವ ಸರ್ಕಾರದ ಕಾರ್ಯಗಳಲ್ಲಿ ಪ್ರಧಾನಿ ಮಾರ್ಗದರ್ಶಕರಾಗಿರಬೇಕು ಎಂಬ ಕಾರಣಕ್ಕಾಗಿ ದಂಡ ವಿಧಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ರೆಸ್ಟಾರೆಂಟ್ ಒಂದರಲ್ಲಿ ಹುಟ್ಟುಹಬ್ಬವನ್ನು ಆಚರಿಸಲು ಪ್ರಧಾನಿ ಎರ್ನಾ ಸೊಲ್ಬರ್ಗ್ ಅವರು ಹಾಗೂ ಅವರ ಪತಿ ಸಿಂಡ್ರೆ ಫಿನ್ನೆಸ್ ನಿರ್ಧರಿಸಿಕೊಂಡಿದ್ದಾರೆ. ಅದರಂತೆ, ಕಾರ್ಯಕ್ರಮವನ್ನು ಫಿನ್ನೆಸ್ ಆಯೋಜಿಸಿದ್ದಾರೆ ಎಂದು ಪೊಲೀಸ್ ಮುಖ್ಯಸ್ಥ ತಿಳಿಸಿದ್ದಾರೆ.
ಅವರು (ಪ್ರಧಾನಿ ಪತಿ) ಕೂಡ ಕಾನೂನು ಉಲ್ಲಂಘಿಸಿದ್ದಾರೆ, ಅದಾಗ್ಯೂ ಅವರಿಗೆ ದಂಡ ವಿಧಿಸಲಾಗಿಲ್ಲ. ಆಚರಣೆ ನಡೆದ ರೆಸ್ಟೋರೆಂಟ್ ಸಹ ಕಾನೂನು ಉಲ್ಲಂಘಿಸಿರುವುದು ಕಂಡುಬಂದರೂ ಅದಕ್ಕೆ ದಂಡ ವಿಧಿಸಲಾಗಿಲ್ಲ ಎಂದು ಪೊಲೀಸರು ತಿಳಿಸಿದ್ದಾರೆ.
ಪ್ರಧಾನಮಂತ್ರಿ ನಿಯಮಗಳನ್ನು ಪಾಲಿಸುವಲ್ಲಿ ಮುಂಚೂಣಿಯಲ್ಲಿರಬೇಕು. ಹಾಗೂ ಅದು ಅವರು ತಪ್ಪಿದ್ದಕ್ಕಾಗಿ ಅವರಿಗೆ ಮಾತ್ರ ದಂಡ ವಿಧಿಸಲಾಗಿದೆಯೆಂದು ಓಲ್ ಸೆವಾರ್ಡ್ ತಿಳಿಸಿದ್ದಾರೆ.
