ಬೆಂಗಳೂರು, ಏಪ್ರಿಲ್ 10: ಕಾರ್ಮಿಕ ಹಾಗೂ ಧಾರವಾಡ ಜಿಲ್ಲಾ ಉಸ್ತುವಾರಿ ಸಚಿವರಾದ ಸಂತೋಷ್ ಲಾಡ್ ಅವರು, ಸ್ವಿಟ್ಜರ್ಲೆಂಡ್ ನ ವ್ಯವಹಾರ ನಿಯೋಗದ ಸದಸ್ಯರೊಂದಿಗೆ ಔತಣಕೂಟದೊಂದಿಗೆ ಸಭೆ ನಡೆಸಿ ಹಲವು ವಿಷಯಗಳ ಕುರಿತು ಚರ್ಚೆ ನಡೆಸಿದರು.
ಅಂತರರಾಷ್ಟ್ರೀಯ ಪಾಲುದಾರಿಕೆಯಲ್ಲಿ ಕರ್ನಾಟಕದ ಸಂಭಾವ್ಯ ಸಹಯೋಗ, ಸೇರಿದಂತೆ ಹಲವು ವಿಷಯಗಳ ಕುರಿತು ಮಾತುಕತೆ ನಡೆಸಿದರು. ವಿಶೇಷವಾಗಿ ಮೂಲಸೌಕರ್ಯ ಮತ್ತು ಸುಸ್ಥಿರ ಸಾರಿಗೆ ಕ್ಷೇತ್ರಗಳಲ್ಲಿ ಕೈಗೊಳ್ಳಬಹುದಾದ ಸಹಯೋಗದ ಬಗ್ಗೆ ನಿಯೋಗದ ಸದಸ್ಯರು ಮಾತುಕತೆ ನಡೆಸಿದರು. ಕರ್ನಾಟಕವು ಜಾಗತಿಕ ಪಾಲುದಾರಿಕೆಯಲ್ಲಿ ಆಸಕ್ತಿ ಹೊಂದಿದ್ದು, ಈ ಸಂಬಂಧ ಸೃಷ್ಟಿಸಬಹುದಾದ ಅವಕಾಶಗಳ ಬಗ್ಗೆಯೂ ಚರ್ಚೆಯಾಯಿತು.
ಈ ಸಭೆಯಲ್ಲಿ ಸ್ವಿಟ್ಜರ್ಲೆಂಡ್ ನ ಹೆಸ್ (HESS) ಮೊಬಿಲಿಟಿ ಕಂಪನಿಯ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಅಲೆಕ್ಸ್ ನಾಫ್, ಹೆಸ್ ಇಂಡಿಯಾದ ಸಿಇಒ ಕಿಶೋರ್ ಮತ್ತು ಎಸ್ಎಸ್ಬಿ ಇನ್ಫ್ರಾದ ನಿರ್ದೇಶಕ ಬುರಾಕ್ ಸೆನ್ಸರ್ ನಿಯೋಗದಲ್ಲಿದ್ದರು. ಸ್ವಾರ್ಟ್, ಸ್ವಚ್ಛ ಮತ್ತು ಮುಂದಿನ ಭವಿಷ್ಯಕ್ಕೆ ತಕ್ಕುದಾದ ಮೂಲಸೌಕರ್ಯವನ್ನು ಸೃಷ್ಟಿಸುವ ಬದ್ಧತೆಯ ಬಗ್ಗೆ ಮಾತುಕತೆ ನಡೆಸಿದರು.
ಸ್ವಿಟ್ಜರ್ಲ್ಯಾಂಡ್ನ ಎಸ್ಎಸ್ಬಿ ಇನ್ಫ್ರಾ , ಹೈ-ಸ್ಪೀಡ್ ರೈಲು, ಜಲಾಶಯಗಳು, ಪರ್ಯಾಯ ಇಂಧನ ಕ್ಷೇತ್ರದಲ್ಲಿ ಆಸಕ್ತಿ ಹೊಂದಿರುವ ಪ್ರಮುಖ ಕಂಪನಿಯಾಗಿದೆ.
1882 ರಲ್ಲಿ ಆರಂಭವಾದ ಹೆಸ್, ಟ್ರಾಲಿ ಬಸ್, ಎಲೆಕ್ಟ್ರಿಕ್ ಬಸ್ಗಳಲ್ಲಿ ಅನ್ವೇಷಣೆಗೆ ಹೆಸರುವಾಸಿಯಾಗಿದೆ. ಆಧುನಿಕ ದಿನಗಳಲ್ಲಿ ನಗರಗಳಲ್ಲಿನ ಸುಸ್ಥಿರ ಸಾರಿಗೆ ಸಮಸ್ಯೆಗಳಿಗೆ ಅತ್ಯಾಧುನಿಕ ಪರಿಹಾರವನ್ನು ಒದಗಿಸುವಲ್ಲಿ ಹೆಸರು ಪಡೆದಿದೆ.
ಹುಬ್ಬಳ್ಳಿ ಮತ್ತು ಧಾರವಾಡ ನಗರಗಳ ನಡುವೆ ಲೈಟ್ ಟ್ರಾಮ್ ಸಾರಿಗೆ ವ್ಯವಸ್ಥೆ ಆರಂಭಿಸುವ ನಿಟ್ಟಿನಲ್ಲಿ ಸಚಿವ ಸಂತೋಷ್ ಲಾಡ್ ಅವರು ಆಸಕ್ತಿ ಹೊಂದಿದ್ದು, ಸ್ವಿಟ್ಜರ್ ಲ್ಯಾಂಡ್ನಲ್ಲಿ ಲೈಟ್ ಟ್ರಾಮ್ನ ಸಂಚರಿಸಿ ಕಾರ್ಯ ಸಾಧ್ಯತೆ ಬಗ್ಗೆ ಪರಿಶೀಲನೆ ನಡೆಸಿದ್ದರು.
ಭವಿಷ್ಯದಲ್ಲಿ ಅವಳಿ ನಗರಗಳ ನಡುವೆ ಪ್ರಯಾಣಿಸುವ ಜನರನ್ನು ಗಮನದಲ್ಲಿಟ್ಟುಕೊಂಡು, ಪ್ರಯಾಣಿಕರ ಅನುಕೂಲವನ್ನು ಗುರಿಯಾಗಿರಿಸಿಕೊಂಡು ಪ್ರಯಾಣಿಕ ಸ್ನೇಹಿ ಅತ್ಯಾಧುನಿಕ ಸಾರಿಗೆ ವ್ಯವಸ್ಥೆ ಅಳವಡಿಸುವುದು ಸಚಿವ ಲಾಡ್ ಅವರ ಚಿಂತನೆಯಾಗಿದೆ.
