ಬೆಂಗಳೂರು : ನಗರದ ನಿರಂತರ ವಿದ್ಯುತ್ ಬೇಡಿಕೆಯನ್ನು ಪೂರೈಸಲು ಹಾಗೂ ವಿದ್ಯುತ್ ಪ್ರಸರಣ ಜಾಲವನ್ನು ಮತ್ತಷ್ಟು ಸಶಕ್ತಗೊಳಿಸಲು ಕರ್ನಾಟಕ ವಿದ್ಯುತ್ ಪ್ರಸರಣ ನಿಗಮ ನಿಯಮಿತ (KPTCL) 12 ಕಿಲೋಮೀಟರ್ ಉದ್ದದ 220 ಕೆವಿ ಮಲ್ಟಿ ಸರ್ಕ್ಯೂಟ್ ಪ್ರಸರಣ ಮಾರ್ಗವನ್ನು ಯಶಸ್ವಿಯಾಗಿ ಕಮಿಷನ್ ಮಾಡಿದೆ. ಬೆಂಗಳೂರು (Bengaluru) ತಾಂತ್ರಿಕ ಹಾಗೂ ಸ್ಥಳಾವಕಾಶದ ಸವಾಲುಗಳ ನಡುವೆಯೂ ಈ ಬೃಹತ್ ಕಾಮಗಾರಿಯನ್ನು ಪೂರ್ಣಗೊಳಿಸುವ ಮೂಲಕ ಕೆಪಿಟಿಸಿಎಲ್ ತನ್ನ ಮೂಲಸೌಕರ್ಯ ಅಭಿವೃದ್ಧಿಯಲ್ಲಿ ಹೊಸ ಮೈಲಿಗಲ್ಲು ಸ್ಥಾಪಿಸಿದೆ.
ಡಬಲ್ LILO ಸಂಪರ್ಕದೊಂದಿಗೆ ಜಾಲ ಬಲವರ್ಧನೆ
ಈ ಮಹತ್ವದ ಯೋಜನೆಯನ್ನು ಬಾಗಲೂರು ರಸ್ತೆ ಕ್ರಾಸಿಂಗ್ ಸಮೀಪದ ಕೇಬಲ್ ಟರ್ಮಿನೇಟಿಂಗ್ ಟವರ್‌ನಿಂದ ಅನುಷ್ಠಾನಗೊಳಿಸಲಾಗಿದೆ. ಪ್ರಸ್ತುತ ಕಾರ್ಯನಿರ್ವಹಿಸುತ್ತಿರುವ 220 ಕೆವಿ ಹೂಡಿ–ಎಚ್‌ಬಿಆರ್ ಹಾಗೂ ಐಟಿಐ–ಮಾನ್ಯತಾ ಟೆಕ್ ಪಾರ್ಕ್ ಪ್ರಸರಣ ಮಾರ್ಗಗಳಿಗೆ ಡಬಲ್ LILO (ಲೈನ್-ಇನ್ ಲೈನ್-ಔಟ್) ಸಂಪರ್ಕವನ್ನು ಕಲ್ಪಿಸಲಾಗಿದೆ. ಈ ವ್ಯವಸ್ಥೆಯಿಂದಾಗಿ ನಗರದ ಪ್ರಮುಖ ತಾಂತ್ರಿಕ ಮತ್ತು ವಸತಿ ವಲಯಗಳಿಗೆ ವಿದ್ಯುತ್ ಪ್ರಸರಣ ಸಾಮರ್ಥ್ಯ ಹೆಚ್ಚಲಿದ್ದು, ಗ್ರಿಡ್‌ನ ಕಾರ್ಯಕ್ಷಮತೆ ಹಾಗೂ ವಿಶ್ವಾಸಾರ್ಹತೆ ಮತ್ತಷ್ಟು ಸುಧಾರಿಸಲಿದೆ.
ದಟ್ಟ ನಗರ ಪ್ರದೇಶದಲ್ಲಿ ವಿಶೇಷ ಎಂಜಿನಿಯರಿಂಗ್ ವಿನ್ಯಾಸ
ಜನನಿಬಿಡ ಬೆಂಗಳೂರು ನಗರ ಪ್ರದೇಶದಲ್ಲಿ ಪ್ರಸರಣ ಜಾಲ ವಿಸ್ತರಿಸುವುದು ಅತ್ಯಂತ ಕ್ಲಿಷ್ಟಕರವಾದ ಕಾರ್ಯವಾಗಿತ್ತು. ಸ್ಥಳಾವಕಾಶದ ಕೊರತೆ, ಹಾಲಿ ವಿದ್ಯುತ್ ಜಾಲಗಳು, ಸಂಚಾರ ದಟ್ಟಣೆ ಹಾಗೂ ಇತರೆ ನಗರ ಮೂಲಸೌಕರ್ಯಗಳನ್ನು ಗಮನದಲ್ಲಿಟ್ಟುಕೊಂಡು ಸೂಕ್ತ ಎಂಜಿನಿಯರಿಂಗ್ ವಿನ್ಯಾಸವನ್ನು ರೂಪಿಸಲಾಯಿತು. ಯೋಜನೆಯ ಭಾಗವಾಗಿ, ವಿದ್ಯಾನಗರ ಪ್ರದೇಶದಲ್ಲಿ ಲಭ್ಯವಿದ್ದ ಮಾರ್ಗದ ಜಾಗವನ್ನು ತಾಂತ್ರಿಕವಾಗಿ ಸಮರ್ಥವಾಗಿ ಬಳಸಿಕೊಂಡು 220 ಕೆವಿ ಮಲ್ಟಿ ಸರ್ಕ್ಯೂಟ್ ಮಾರ್ಗವನ್ನು ನಿರ್ಮಿಸಲಾಗಿದೆ. ಕಿರಿದಾದ ಕಾರ್ಯಸ್ಥಳದಲ್ಲಿ ಸುರಕ್ಷತಾ ಕ್ರಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಿ, ವಿವಿಧ ಇಲಾಖೆಗಳ ಸಮನ್ವಯದೊಂದಿಗೆ ಕೆಪಿಟಿಸಿಎಲ್ ಎಂಜಿನಿಯರ್ಗಳು ಮತ್ತು ತಾಂತ್ರಿಕ ಸಿಬ್ಬಂದಿ ಈ ಕಾಮಗಾರಿಯನ್ನು ಯಶಸ್ವಿಗೊಳಿಸಿದ್ದಾರೆ.
ಇಂಧನ ಸಚಿವ ಕೆ.ಜೆ. ಜಾರ್ಜ್ ಶ್ಲಾಘನೆ
ಯೋಜನೆಯ ಯಶಸ್ವಿ ಅನುಷ್ಠಾನದ ಕುರಿತು ಮೆಚ್ಚುಗೆ ವ್ಯಕ್ತಪಡಿಸಿದ ಇಂಧನ ಹಾಗೂ ಪ್ರವಾಸೋದ್ಯಮ ಸಚಿವ ಕೆ.ಜೆ. ಜಾರ್ಜ್, “ಬೆಂಗಳೂರಿನಲ್ಲಿ ವಿದ್ಯುತ್ ಬೇಡಿಕೆ ಕ್ಷಿಪ್ರವಾಗಿ ಬೆಳೆಯುತ್ತಿದ್ದು, ಅದಕ್ಕೆ ತಕ್ಕಂತೆ ಪ್ರಸರಣ ಮೂಲಸೌಕರ್ಯವನ್ನು ಆಧುನೀಕರಿಸಲಾಗುತ್ತಿದೆ. ನಗರ ಪ್ರದೇಶದ ಪ್ರತಿಯೊಂದು ಯೋಜನೆಗೂ ಅದರದ್ದೇ ಆದ ಭೌಗೋಳಿಕ ಮತ್ತು ತಾಂತ್ರಿಕ ಮಿತಿಗಳಿರುತ್ತವೆ. ಈ ಯೋಜನೆಯಲ್ಲಿ ಎದುರಾದ ಎಲ್ಲಾ ಅಡೆತಡೆಗಳಿಗೆ ಕೆಪಿಟಿಸಿಎಲ್ ತಂಡವು ಸೂಕ್ತ ಎಂಜಿನಿಯರಿಂಗ್ ಪರಿಹಾರ ಕಂಡುಕೊಂಡು ಕಾಮಗಾರಿಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿರುವುದು ಅತ್ಯಂತ ಶ್ಲಾಘನೀಯ,” ಎಂದು ತಿಳಿಸಿದರು.
ಸಿಬ್ಬಂದಿಯ ಸಮನ್ವಯಕ್ಕೆ ಸಂದ ಜಯ: ಎಂಡಿ ಡಾ. ವಿ. ರಾಮ್ ಪ್ರಸಾತ್ ಮನೋಹರ್
ಕೆಪಿಟಿಸಿಎಲ್ ವ್ಯವಸ್ಥಾಪಕ ನಿರ್ದೇಶಕರಾದ ಡಾ. ವಿ. ರಾಮ್ ಪ್ರಸಾತ್ ಮನೋಹರ್ ಮಾತನಾಡಿ, “ಈ ಯೋಜನೆಯ ತಾಂತ್ರಿಕ ಅಗತ್ಯಗಳು ಅತ್ಯಂತ ವಿಶಿಷ್ಟವಾಗಿದ್ದವು. ಸ್ಥಳೀಯ ಪರಿಸ್ಥಿತಿಯನ್ನು ಸಮಗ್ರವಾಗಿ ಅಧ್ಯಯನ ಮಾಡಿ, ಪ್ರಾಯೋಗಿಕವಾಗಿ ಕಾರ್ಯಸಾಧ್ಯವಾದ ವಿನ್ಯಾಸವನ್ನು ಅಳವಡಿಸಿಕೊಳ್ಳಲಾಯಿತು. ಚಾಲ್ತಿಯಲ್ಲಿದ್ದ ವಿದ್ಯುತ್ ಜಾಲ ಹಾಗೂ ನಗರ ಮೂಲಸೌಕರ್ಯದ ನಡುವೆ 12 ಕಿ.ಮೀ. ಉದ್ದದ ಮಲ್ಟಿ ಸರ್ಕ್ಯೂಟ್ ಮಾರ್ಗವನ್ನು ಕಮಿಷನ್ ಮಾಡಿರುವುದು ನಮ್ಮ ಎಂಜಿನಿಯರ್ಗಳು ಮತ್ತು ಸಿಬ್ಬಂದಿಯ ತಾಂತ್ರಿಕ ಕೌಶಲ ಹಾಗೂ ದಕ್ಷತೆಗೆ ಸಾಕ್ಷಿಯಾಗಿದೆ. ಕೆಪಿಟಿಸಿಎಲ್‌ನ ಪ್ರತಿಯೊಂದು ಯೋಜನೆಯನ್ನು ವಿದ್ಯುತ್ ಬೇಡಿಕೆ, ಗ್ರಿಡ್ ಸ್ಥಿರತೆ, ಸುರಕ್ಷತೆ ಮತ್ತು ಭವಿಷ್ಯದ ದೀರ್ಘಕಾಲೀನ ಅಗತ್ಯಗಳನ್ನು ಪರಿಗಣಿಸಿಯೇ ರೂಪಿಸಲಾಗುತ್ತದೆ,” ಎಂದು ವಿವರಿಸಿದರು.
ಎವರೆಸ್ಟ್ ಜೀರಿಗೆ ಪುಡಿಯಲ್ಲಿ ಅಪಾಯಕಾರಿ ಕೀಟನಾಶಕ ಅಂಶ ಪತ್ತೆ: ಮಾರುಕಟ್ಟೆಯಿಂದ ಹಿಂಪಡೆಯಲು ಆದೇಶ | FSSAI
