ಸೋಮವಾರ ಬಿಡುಗಡೆಯಾಗಿರುವ ನೀತಿ ಆಯೋಗದ ವರದಿ ಪ್ರಕಾರ ಕೇರಳ ಸತತ ನಾಲ್ಕನೇ ಬಾರಿಗೆ ದೇಶದಲ್ಲಿ ಉತ್ತಮ ಆರೋಗ್ಯ ಸೇವೆಯಲ್ಲಿ ಮೊದಲ ಸ್ಥಾನ ಪಡೆದಿದ್ದು, ಉತ್ತರ ಪ್ರದೇಶ ಕೊನೆಯ ಸ್ಥಾನದಲ್ಲಿ ಉಳಿದಿದೆ.
`The Healthy State Progressive India’ ಹೆಸರಿನಡಿ ನಡೆದ ಸಮೀಕ್ಷೆಯ ಪ್ರಕಾರ 2019-20ರಲ್ಲಿ 19 ದೊಡ್ಡ ರಾಜ್ಯಗಳು, 8 ಸಣ್ಣ ರಾಜ್ಯಗಳು, 7 ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಈ ಸಮೀಕ್ಷೆಯನ್ನು ನಡೆಸಲಾಗಿತ್ತು. ಮಾಹಿತಿಯ ಕೊರತೆಯಿಂದಾಗಿ ಪಶ್ಚಿಮ ಬಂಗಾಳ ಮತ್ತು ಲಡಾಖ್ನಲ್ಲಿ ಸಮೀಕ್ಷೆಯನ್ನು ನಡೆಸಿಲ್ಲ.
ದೊಡ್ಡ ರಾಜ್ಯಗಳ ಪೈಕಿ ಕೇರಳ ಮೊದಲ ಸ್ಥಾನ ಪಡೆದರೆ, ತಮಿಳುನಾಡು ಎರಡನೇ ಸ್ಥಾನ, ತೆಲಂಗಾಣ ಮೂರನೇ ಸ್ಥಾನ ಪಡೆದಿದೆ. ತೆಲಂಗಾಣ ರಾಜ್ಯವು ಆರೋಗ್ಯ ವಿಚಾರದಲ್ಲಿ ಸಾಕಷ್ಟು ಸುಧಾರಣೆ ಕಂಡಿದ್ದು ನಾಲ್ಕನೇ ಸ್ಥಾನದಿಂದ ಮೂರನೇ ಸ್ಥಾನಕ್ಕೆ ಏರಿಕೆ ಕಂಡಿದೆ. ಮಹಾರಾಷ್ಟ್ರ 5ನೇ ಸ್ಥಾನ, ಆಂಧ್ರ ಪ್ರದೇಶ ಮೂರನೇ ಸ್ಥಾನದಿಂದ ನಾಲ್ಕನೇ ಸ್ಥಾನಕ್ಕೆ ಕುಸಿತ ಕಂಡಿದೆ.
ಆರೋಗ್ಯ ಸೇವೆಗಳಲ್ಲಿ ಪ್ರಮುಖ ಸುಧಾರಣೆ ಕಂಡರೂ ಉತ್ತರ ಪ್ರದೇಶ ಕಡೆಯ ಸ್ಥಾನದಲ್ಲೇ ಉಳಿದಿದೆ. ಉತ್ತರ ಪ್ರದೇಶದ ಆರೋಗ್ಯ ಸೇವೆಯು ಒಟ್ಟಾರೆ ಶೇ.25.06% ರಿಂದ 30.57ಕ್ಕೆ ಏರಿಕೆ ಕಂಡಿದೆ. ಅಸ್ಸಾಂ ಕೂಡ 15ನೇ ಸ್ಥಾನದಿಂದ 12ನೇ ಸ್ಥಾನಕ್ಕೆ ಜಿಗಿತ ಕಂಡಿದೆ. ಈ ಹಿಂದೆ ವರದಿಯಾಗುತ್ತಿದ್ದ ಮರಣ ಪ್ರಮಾಣದಲ್ಲಿ ಇಳಿಕೆಯನ್ನು ಸಹ ಕಂಡಿದೆ. ರಾಜಸ್ಥಾನ ಆರೋಗ್ಯ ಇಲಾಖೆಯ ಕಳಪೆ ಸಾಧನೆಯೊಂದಿಗೆ 16ನೇ ಸ್ಥಾನ ಪಡೆದಿದೆ.
ಸಣ್ಣ ರಾಜ್ಯಗಳ ಪೈಕಿ ಮಿಜೋರಾಂ ಮೊದಲ ಸ್ಥಾನದಲ್ಲಿದರೆ ನಾಗಾಲ್ಯಾಂಡ್ ಕೊನೆಯ ಸ್ಥಾನದಲ್ಲಿದೆ. ಕೇಂದ್ರಾಡಳಿತ ಪ್ರದೇಶಗಳ ಪೈಕಿ ದೆಹಲಿ ಮತ್ತು ಜಮ್ಮು-ಕಾಶ್ಮೀರ ಕಳಪೆ ಸಾಧನೆಯೊಂದಿಗೆ ಕೆಳ ಹಂತದಲ್ಲಿದೆ. ಆದರೆ, ಕಳೆದ ಭಾರಿಯ ಸಮೀಕ್ಷೆಗೆ ಹೋಲಿಸಿದರೆ ದೆಹಲಿ ಮತ್ತು ಜಮ್ಮು-ಕಾಶ್ಮೀರ ಒಂದು ಸ್ಥಾನ ಸುಧಾರಿಸಿವೆ.
2018-19ರಲ್ಲಿ ನಡೆದ ಸಮೀಕ್ಷೆಯ ಪ್ರಕಾರ ದೊಡ್ಡ ರಾಜ್ಯಗಳ ಪೈಕಿ ಹಲವು ರಾಜ್ಯಗಳು ಸುಧಾರಣೆಯನ್ನು ಕಂಡಿವೆ. ಕೇರಳ ರಾಜ್ಯವು ಆರೋಗ್ಯ ವಿಚಾರದಲ್ಲಿ ಉತ್ತಮ ಪ್ರದರ್ಶನ ನೀಡಿದ್ದು ಒಟ್ಟಾರೆಯಾಗಿ ಎಲ್ಲಾ ವಿಭಾಗಗಳಲ್ಲು ಸಹ ಸುಧಾರಣೆಯನ್ನ ಕಂಡಿದೆ.
