ವ್ಯಕ್ತಿಯ ಮಾನಸಿಕ ಒತ್ತಡ, ಕೌಟುಂಬಿಕ ಸಮಸ್ಯೆಗಳು, ಆರ್ಥಿಕ ಸಂಕಷ್ಟ ಸೇರಿದಂತೆ ಹಲವು ಕಾರಣಗಳು ಆತ್ಮಹತ್ಯೆಯ ಆಲೋಚನೆಗಳಿಗೆ ಕಾರಣವಾಗಬಹುದು. ಆದರೆ ವಾಯುಮಾಲಿನ್ಯವೂ ಇಂತಹ ಗಂಭೀರ ಮಾನಸಿಕ ಆರೋಗ್ಯ ಸಮಸ್ಯೆಗಳೊಂದಿಗೆ ಸಂಬಂಧ ಹೊಂದಿರಬಹುದೇ ಎಂಬುದರ ಕುರಿತು ಹೊಸ ಅಧ್ಯಯನವೊಂದು ಮಹತ್ವದ ಮಾಹಿತಿಯನ್ನು ಹೊರಹಾಕಿದೆ.
ಬ್ರಿಟನ್ನ ಕ್ವೀನ್ಸ್ ಯೂನಿವರ್ಸಿಟಿ ಬೆಲ್ಫಾಸ್ಟ್ನ ಸಾರ್ವಜನಿಕ ಆರೋಗ್ಯ ಸಂಶೋಧಕರು ನಡೆಸಿರುವ ಈ ಅಧ್ಯಯನವು ವಾಯುಮಾಲಿನ್ಯ ಸೇರಿದಂತೆ ವಿವಿಧ ಪರಿಸರ ಮಾಲಿನ್ಯಗಳು ಮಾನಸಿಕ ಆರೋಗ್ಯದ ಮೇಲೆ ಬೀರುವ ಸಂಭವನೀಯ ಪರಿಣಾಮಗಳನ್ನು ಪರಿಶೀಲಿಸಿದೆ. ಅಧ್ಯಯನವು Journal of Epidemiology & Community Healthನಲ್ಲಿ ಪ್ರಕಟವಾಗಿದೆ.
ಸಂಶೋಧಕರು 2010ರಿಂದ 2024ರ ನಡುವೆ ಪ್ರಕಟವಾದ ಅಧ್ಯಯನಗಳನ್ನು ಪರಿಶೀಲಿಸಿದ್ದು, ಒಟ್ಟು 45 ಅಧ್ಯಯನಗಳನ್ನು ವಿಮರ್ಶೆಗೆ ಒಳಪಡಿಸಿದ್ದಾರೆ. ಈ ಪೈಕಿ 29 ಅಧ್ಯಯನಗಳ ಮಾಹಿತಿಯನ್ನು ಒಟ್ಟುಗೂಡಿಸಿ ಸಂಯೋಜಿತ ವಿಶ್ಲೇಷಣೆ ನಡೆಸಲಾಗಿದೆ.
ಅಧ್ಯಯನದಲ್ಲಿ PM2.5 ಮತ್ತು PM10 ಎಂಬ ಸೂಕ್ಷ್ಮ ಕಣಗಳ ಜೊತೆಗೆ ನೈಟ್ರೋಜನ್ ಡೈಆಕ್ಸೈಡ್ (NO₂) ಕುರಿತು ವಿಶೇಷವಾಗಿ ಗಮನ ಹರಿಸಲಾಗಿದೆ.ಸಂಯೋಜಿತ ವಿಶ್ಲೇಷಣೆಯ ಪ್ರಕಾರ, PM2.5 ಮತ್ತು PM10ಗೆ ಅಲ್ಪಾವಧಿಯಲ್ಲಿ ಒಡ್ಡಿಕೊಳ್ಳುವುದು ಹಾಗೂ PM2.5 ಮತ್ತು NO₂ಗೆ ದೀರ್ಘಾವಧಿಯಲ್ಲಿ ಒಡ್ಡಿಕೊಳ್ಳುವುದು ಆತ್ಮಹತ್ಯೆಗೆ ಸಂಬಂಧಿಸಿದ ಘಟನೆಗಳು, ಆತ್ಮಹತ್ಯೆ ಪ್ರಯತ್ನಗಳು ಮತ್ತು ಗಂಭೀರ ಆತ್ಮಹತ್ಯೆ ಆಲೋಚನೆಗಳೊಂದಿಗೆ ಸಂಬಂಧ ಹೊಂದಿರಬಹುದು ಎಂದು ಅಧ್ಯಯನ ಸೂಚಿಸಿದೆ.
ಇದರ ಜೊತೆಗೆ ಸಲ್ಫರ್ ಡೈಆಕ್ಸೈಡ್ (SO₂), ಓಜೋನ್ (O₃) ಮತ್ತು ಶಬ್ದ ಮಾಲಿನ್ಯಕ್ಕೂ ಇಂತಹ ಸಮಸ್ಯೆಗಳೊಂದಿಗೆ ಸಂಬಂಧವಿರಬಹುದೆಂಬ ಸೂಚನೆಗಳು ಕಂಡುಬಂದಿವೆ. ಆದರೆ ನೀರು ಮತ್ತು ಬೆಳಕಿನ ಮಾಲಿನ್ಯದ ಕುರಿತು ಲಭ್ಯವಿರುವ ಸಾಕ್ಷ್ಯಗಳು ಸ್ಪಷ್ಟವಾಗಿಲ್ಲ ಎಂದು ಸಂಶೋಧಕರು ಹೇಳಿದ್ದಾರೆ. ವಾಯುಮಾಲಿನ್ಯದಲ್ಲಿರುವ ಕೆಲವು ಅಂಶಗಳು ದೇಹದಲ್ಲಿ ಉರಿಯೂತ ಹಾಗೂ ನರಮಂಡಲದ ಮೇಲೆ ಪ್ರತಿಕೂಲ ಪರಿಣಾಮಗಳನ್ನು ಉಂಟುಮಾಡುವ ಸಾಧ್ಯತೆಯಿದೆ. ಇಂತಹ ಬದಲಾವಣೆಗಳು ಮೆದುಳಿನ ಕಾರ್ಯವೈಖರಿ, ಮನಸ್ಥಿತಿ ಹಾಗೂ ಒತ್ತಡವನ್ನು ಎದುರಿಸುವ ಸಾಮರ್ಥ್ಯದ ಮೇಲೆ ಪರಿಣಾಮ ಬೀರಬಹುದು ಎಂದು ಸಂಶೋಧಕರು ತಿಳಿಸಿದ್ದಾರೆ.
ಅಧ್ಯಯನದಲ್ಲಿ ನೀರು ಮತ್ತು ಪರಿಸರ ಮಾಲಿನ್ಯದ ಇತರ ರೂಪಗಳನ್ನೂ ಪರಿಶೀಲಿಸಲಾಗಿದೆ. ಆರ್ಸೆನಿಕ್, ಸೀಸ ಮತ್ತು ಲಿಥಿಯಂನಂತಹ ಅಂಶಗಳಿಂದ ಕಲುಷಿತವಾದ ನೀರು ಹಾಗೂ ಪರಿಸರದ ಶಬ್ದವು ನರಮಂಡಲ ಮತ್ತು ಮಾನಸಿಕ ಆರೋಗ್ಯದ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯ ಬಗ್ಗೆಯೂ ಸಂಶೋಧನೆ ನಡೆದಿದೆ.ವಿಶ್ವ ಆರೋಗ್ಯ ಸಂಸ್ಥೆಯ ಪ್ರಕಾರ, ಜಗತ್ತಿನಾದ್ಯಂತ ಪ್ರತಿ ವರ್ಷ 7 ಲಕ್ಷಕ್ಕೂ ಹೆಚ್ಚು ಜನರು ಆತ್ಮಹತ್ಯೆಯಿಂದ ಸಾವನ್ನಪ್ಪುತ್ತಾರೆ.
15ರಿಂದ 29 ವರ್ಷದ ಯುವಕರಲ್ಲಿ ಆತ್ಮಹತ್ಯೆ ಪ್ರಮುಖ ಸಾವಿನ ಕಾರಣಗಳಲ್ಲಿ ಒಂದಾಗಿದೆ.ಆದರೆ ವಾಯುಮಾಲಿನ್ಯವೇ ಆತ್ಮಹತ್ಯೆಗೆ ನೇರ ಕಾರಣ ಎಂದು ಅಧ್ಯಯನ ಹೇಳುವುದಿಲ್ಲ. ಬದಲಾಗಿ, ಮಾಲಿನ್ಯಕ್ಕೆ ಒಡ್ಡಿಕೊಳ್ಳುವುದು ಮತ್ತು ಆತ್ಮಹತ್ಯೆಗೆ ಸಂಬಂಧಿಸಿದ ಆಲೋಚನೆಗಳು ಅಥವಾ ಘಟನೆಗಳ ನಡುವೆ ಸಂಬಂಧವಿರಬಹುದೆಂಬುದನ್ನು ಅಧ್ಯಯನ ಸೂಚಿಸುತ್ತದೆ.
ಹೀಗಾಗಿ ವಾಯುಮಾಲಿನ್ಯವನ್ನು ಕೇವಲ ಶ್ವಾಸಕೋಶ ಮತ್ತು ಹೃದಯದ ಆರೋಗ್ಯಕ್ಕೆ ಸಂಬಂಧಿಸಿದ ಸಮಸ್ಯೆಯಾಗಿ ನೋಡದೆ, ಅದರ ಸಂಭವನೀಯ ಮಾನಸಿಕ ಆರೋಗ್ಯ ಪರಿಣಾಮಗಳ ಬಗ್ಗೆಯೂ ಹೆಚ್ಚಿನ ಸಂಶೋಧನೆ ನಡೆಸುವ ಅಗತ್ಯವಿದೆ ಎಂದು ಸಂಶೋಧಕರು ಒತ್ತಿಹೇಳಿದ್ದಾರೆ.
