ನವದೆಹಲಿ: ಇತ್ತೀಚೆಗೆ ರೈಲಿನ ಪ್ರಥಮ ದರ್ಜೆಯ ಹವಾನಿಯಂತ್ರಿತ (ಎಸಿ) ಬೋಗಿಯನ್ನು ಮೊದಲರಾತ್ರಿ (ಫಸ್ಟ್ ನೈಟ್) ಕೋಣೆಯಂತೆ ಅಲಂಕರಿಸಿದ್ದ ವಿಡಿಯೊ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿತ್ತು. ಇದೀಗ ಅದೇ ರೀತಿಯಾಗಿ ರೈಲಿನೊಳಗೆ ಅರ್ಚಕರಿಂದ ಪೂಜೆ ನಡೆಸುತ್ತಿರುವ ಮತ್ತೊಂದು ವಿಡಿಯೊ ವೈರಲ್ ಆಗಿದ್ದು, “ರೈಲಿನಲ್ಲಿ ಈ ರೀತಿಯ ಧಾರ್ಮಿಕ ಕಾರ್ಯಕ್ರಮ ನಡೆಸಲು ಅವಕಾಶ ಇದೆಯೇ?” ಎಂಬ ಪ್ರಶ್ನೆಗಳು ಸಾರ್ವಜನಿಕರಲ್ಲಿ ಮೂಡಿದ್ದವು. ಈ ಕುರಿತು ಉತ್ತರ ರೈಲ್ವೆ ಇಲಾಖೆ ಅಧಿಕೃತವಾಗಿ ಸ್ಪಷ್ಟನೆ ನೀಡಿದೆ.
ವೈರಲ್ ಆಗಿರುವ ವಿಡಿಯೊದಲ್ಲಿ ರೈಲಿನ ಕೋಚ್ನೊಳಗೆ ಅರ್ಚಕರೊಬ್ಬರು ಪೂಜೆ ನೆರವೇರಿಸುತ್ತಿರುವ ದೃಶ್ಯವಿದ್ದು, ಅವರ ಸುತ್ತ ಬಿಳಿ ವಸ್ತ್ರ ಧರಿಸಿದ ಕೆಲವರು ಪೂಜೆಯಲ್ಲಿ ಭಾಗವಹಿಸಿರುವುದು ಕಂಡುಬರುತ್ತದೆ. ಈ ದೃಶ್ಯ ಸಾಮಾನ್ಯ ಪ್ರಯಾಣಿಕರ ಬೋಗಿಯಲ್ಲಿ ನಡೆದಿರುವುದೆಂದು ಭಾವಿಸಿದ ಹಲವರು ರೈಲ್ವೆ ಇಲಾಖೆಯನ್ನು ಪ್ರಶ್ನಿಸಿ ಸಾಮಾಜಿಕ ಜಾಲತಾಣಗಳಲ್ಲಿ ಆಕ್ಷೇಪ ವ್ಯಕ್ತಪಡಿಸಿದ್ದರು.
ರೈಲ್ವೆ ಇಲಾಖೆ ಹೇಳಿದ್ದೇನು?
ವಿಡಿಯೊ ವ್ಯಾಪಕ ಚರ್ಚೆಗೆ ಕಾರಣವಾಗುತ್ತಿದ್ದಂತೆ ಉತ್ತರ ರೈಲ್ವೆ ತನ್ನ ಅಧಿಕೃತ ಎಕ್ಸ್ (X) ಖಾತೆಯಲ್ಲಿ ಸ್ಪಷ್ಟನೆ ನೀಡಿದೆ. ಪೂಜೆ ನಡೆದಿರುವುದು ಸಾಮಾನ್ಯ ಪ್ರಯಾಣಿಕರ ಕೋಚ್ನಲ್ಲಿ ಅಲ್ಲ. ಅದು ಖಾಸಗಿಯಾಗಿ ಬುಕ್ ಮಾಡಲಾಗಿದ್ದ ವಿಶೇಷ ಸಲೂನ್ ಕಾರ್ (Saloon Car) ಆಗಿದೆ ಎಂದು ಇಲಾಖೆ ತಿಳಿಸಿದೆ.
ರೈಲ್ವೆ ಮಾಹಿತಿ ಪ್ರಕಾರ, ಈ ಐಷಾರಾಮಿ ಸಲೂನ್ ಕಾರ್ ಅನ್ನು ಪ್ರಯಾಣಿಕರು ಐಆರ್ಸಿಟಿಸಿ (IRCTC) ಮೂಲಕ ಜುಲೈ 8ರಂದು ಬುಕ್ ಮಾಡಿದ್ದರು. ಈ ವಿಶೇಷ ಕೋಚ್ಗಾಗಿ ಸುಮಾರು ₹3 ಲಕ್ಷ ಮುಂಗಡ ಹಣ ಪಾವತಿಸಲಾಗಿತ್ತು. ಬಳಿಕ ಜುಲೈ 10ರಂದು ನವದೆಹಲಿಯಿಂದ ಮುಂಬೈಗೆ ಸಂಚರಿಸಿದ ಪಶ್ಚಿಮ ಎಕ್ಸ್ಪ್ರೆಸ್ (ರೈಲು ಸಂಖ್ಯೆ 12926) ರೈಲಿಗೆ ಈ ಸಲೂನ್ ಕಾರ್ ಅನ್ನು ಜೋಡಿಸಲಾಗಿತ್ತು ಎಂದು ಇಲಾಖೆ ತಿಳಿಸಿದೆ.
ಸಲೂನ್ ಕಾರ್ ಎಂದರೇನು?
ಸಲೂನ್ ಕಾರ್ ಭಾರತೀಯ ರೈಲ್ವೆಯ ಅತ್ಯಂತ ಐಷಾರಾಮಿ ಖಾಸಗಿ ಬೋಗಿಗಳಲ್ಲಿ ಒಂದಾಗಿದೆ. ಸಾಮಾನ್ಯವಾಗಿ ಉನ್ನತಾಧಿಕಾರಿಗಳು, ವಿಐಪಿಗಳು ಅಥವಾ ಖಾಸಗಿ ಕಾರ್ಯಕ್ರಮಗಳಿಗಾಗಿ ಇದನ್ನು ಬಳಸಲಾಗುತ್ತದೆ. ಈ ಬೋಗಿಯಲ್ಲಿ ಹವಾನಿಯಂತ್ರಿತ ಮಲಗುವ ಕೊಠಡಿ, ಅಡುಗೆಮನೆ, ಲಿವಿಂಗ್ ರೂಮ್, ಡೈನಿಂಗ್ ಪ್ರದೇಶ, ಶೌಚಾಲಯ ಸೇರಿದಂತೆ ಹಲವು ಆಧುನಿಕ ಸೌಲಭ್ಯಗಳು ಲಭ್ಯವಿರುತ್ತವೆ.
ರೈಲ್ವೆ ನಿಯಮಗಳ ಪ್ರಕಾರ, ನಿಗದಿತ ಶುಲ್ಕ ಪಾವತಿಸಿ ಈ ಸಲೂನ್ ಕಾರ್ ಅನ್ನು ಖಾಸಗಿಯಾಗಿ ಬುಕ್ ಮಾಡಬಹುದಾಗಿದೆ. ಇದೇ ಹಿನ್ನೆಲೆಯಲ್ಲಿ ಆ ಖಾಸಗಿ ಬೋಗಿಯೊಳಗೆ ಧಾರ್ಮಿಕ ಕಾರ್ಯಕ್ರಮ ಆಯೋಜಿಸಲಾಗಿದ್ದು, ಇದರಲ್ಲಿ ಯಾವುದೇ ನಿಯಮ ಉಲ್ಲಂಘನೆ ನಡೆದಿಲ್ಲ ಎಂದು ಉತ್ತರ ರೈಲ್ವೆ ಸ್ಪಷ್ಟಪಡಿಸಿದೆ.
ಈ ಸ್ಪಷ್ಟನೆಯೊಂದಿಗೆ ರೈಲಿನೊಳಗೆ ಪೂಜೆ ನಡೆಸಿದ ವಿಡಿಯೊ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಕ್ತವಾಗಿದ್ದ ಗೊಂದಲ ಮತ್ತು ವಿವಾದಕ್ಕೆ ರೈಲ್ವೆ ಇಲಾಖೆ ತೆರೆ ಎಳೆದಿದೆ.
