ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆಯ (ಇಸ್ರೊ) ಮಹತ್ವದ ಚಂದ್ರಯಾನ 3 ಅಂತಿಮ ಹಂತದಲ್ಲಿದೆ. ಸಂಜೆ 6.04 ಸುಮಾರಿಗೆ ವಿಕ್ರಮ್ ಲ್ಯಾಂಡ ಚಂದ್ರನ ಮೇಲೆ ಅಡಿ ಇಡಲಿದ್ದು, ಐತಿಹಾಸಿಕ ಕ್ಷಣಕ್ಕೆ ಇಡೀ ವಿಶ್ವವೇ ಕಾತರದಿಂದ ಕಾಯುತ್ತಿದೆ. ಚಂದ್ರಯಾನ 2ರಿಂದ ಪಾಠ ಕಲಿತಿರುವ ಇಸ್ರೊ ಈ ಬಾರಿ ಸಾಫ್ಟ್ ಲ್ಯಾಂಡಿಂಗ್ ಮಾಡುವ ಉತ್ಸಾಹದಲ್ಲಿದೆ.
ಏನಿದು ‘ಸಾಫ್ಟ್ ಲ್ಯಾಂಡಿಂಗ್’?
ಸರಳವಾಗಿ ಹೇಳುವುದಾದರೆ, ‘ಸಾಫ್ಟ್ ಲ್ಯಾಂಡಿಂಗ್’ ಎಂಬುದು ಬಾಹ್ಯಾಕಾಶ ನೌಕೆಯ ಯಶಸ್ವಿ ಲ್ಯಾಂಡಿಂಗ್ ಅನ್ನು ಸೂಚಿಸುತ್ತದೆ, ಅದಕ್ಕೆ ಸ್ವತಃ ಅಥವಾ ಅದರ ಪೇಲೋಡ್ಗೆ ಯಾವುದೇ ಗಮನಾರ್ಹ ಹಾನಿ ಅನುಭವಿಸದೆ ಸುರಕ್ಷಿತವಾಗಿ ನಿಗದಿತ ಸ್ಥಳದಲ್ಲಿ ಇಳಿಯುವುದಕ್ಕೆ ಸಾಫ್ಟ್ ಲ್ಯಾಂಡಿಂಗ್ ಎನ್ನಲಾಗುತ್ತದೆ.
ಆದರೆ, ಸಾಫ್ಟ್ ಲ್ಯಾಂಡಿಂಗ್ ಆಗದೆ ಗಗನನೌಕೆಗೆ ಹಾನಿಯಾಗಿ ಆಗುವ ಲ್ಯಾಂಡಿಂಗ್ಗೆ ‘ಹಾರ್ಡ್ ಲ್ಯಾಂಡಿಂಗ್’, ಕ್ರಾಶ್ ಲ್ಯಾಂಡಿಂಗ್ ಎನ್ನಲಾಗುತ್ತದೆ. ಇದರಿಂದ ಗಗನನೌಕೆಯ ವೈಜ್ಞಾನಿಕ ಉಪಕರಣಗಳಿಗೆ ಹಾನಿಯಾಗಿ ಸಂಪೂರ್ಣ ಯೋಜನೆಯೇ ವಿಫಲವಾಗಬಹುದು. ಚಂದ್ರಯಾನ-2ರಲ್ಲಿ ಗಗನನೌಕೆ ಕ್ರಾಶ್ ಲ್ಯಾಂಡಿಂಗ್ ಆಗುವ ಮೂಲಕ ಸಂಪರ್ಕ ಕಳೆದುಕೊಂಡಿತ್ತು. ವಿಕ್ರಮ್ ಲ್ಯಾಂಡರ್ನಲ್ಲಿ ಸಾಫ್ಟ್ ವೇರ್ ದೋಷ ಕಂಡು ಬಂದ ಹಿನ್ನೆಲೆಯಲ್ಲಿ ಯೋಜನೆ ವಿಫಲವಾಗಿತ್ತು. ಇದನ್ನು ‘ಹಾರ್ಡ್ ಲ್ಯಾಂಡಿಂಗ್’ ಎಂದು ಅಂದಿನ ಇಸ್ರೋ ಮುಖ್ಯಸ್ಥ ಕೆ.ಶಿವನ್ ಕರೆದಿದ್ದರು.
ಚಂದ್ರಯಾನ-2 ಆರ್ಬಿಟರ್ ಇನ್ನೂ ಅಖಂಡವಾಗಿದ್ದು, ಚಂದ್ರನ ಕಕ್ಷೆಯಲ್ಲಿದೆ.
ಚಂದ್ರಯಾನ 3 ಸಾಫ್ಟ್ ಲ್ಯಾಂಡಿಂಗ್ ಬಗ್ಗೆ ಏಕಿಷ್ಟು ಮಹತ್ವ?
ಚಂದ್ರಯಾನ-3, ಚಂದ್ರಯಾನ-2 ರೀತಿ ಆರ್ಬಿಟರ್ ಮಾಡ್ಯೂಲ್ ಹೊಂದಿಲ್ಲ. ಚಂದ್ರನ ದಕ್ಷಿಣ ಧ್ರುವದಲ್ಲಿ ಚಂದ್ರಯಾನ-2ಕ್ಕೆ ಸಾಧ್ಯವಾಗದೇ ಇರುವುದನ್ನು ಸಾಧಿಸುವ ಉದ್ದೇಶ ಇದರದ್ದಾಗಿದೆ. ರೋವರ್ ಬಳಸಿ ಅಲ್ಲಿನ ಮಣ್ಣು, ವಾತಾವರಣ ಅಧ್ಯಯನ ನಡೆಸುವುದು ಇದರ ಉದ್ದೇಶವಾಗಿದೆ.
ಲ್ಯಾಂಡಿಂಗ್ ಸಮಯದಲ್ಲಿ ಯಾವುದೇ ಹಾನಿ ಉಂಟಾದರೆ ರೋವರ್ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯಿದೆ. ಹಾಗಾಗಿ, ಕಾರ್ಯಾಚರಣೆಯನ್ನು ಗಂಭೀರವಾಗಿ ಅಪಾಯಕ್ಕೆ ತಳ್ಳಬಹುದು. ಹಾಗಾಗಿ, ಈ ಸಾಧ್ಯತೆಯನ್ನು ಗಮನದಲ್ಲಿಟ್ಟುಕೊಂಡು ಮತ್ತು ಚಂದ್ರಯಾನ-2ರ ಅನುಭವದ ಜೊತೆ ಯಾವುದೇ ದೋಷ ಆಗದಂತೆ ಇಸ್ರೊ ಈ ಬಾರಿ ವಿಶೇಷವಾಗಿ ಜಾಗರೂಕವಾಗಿದೆ.