-ಕೃಷ್ಣಮಣಿ
ಬೆಂಗಳೂರಿನಲ್ಲಿ ವಾಸ ಮಾಡುವ ಜನರಿಗೆ ಬಹುಮುಖ್ಯವಾದ ಸಮಸ್ಯೆ ಅಂದ್ರೆ ರಸ್ತೆಗಳಲ್ಲಿ ಓಡಾಡುವಾಗ ಟ್ರಾಫಿಕ್ನಲ್ಲಿ ಗಂಟೆಗಟ್ಟಲೆ ನಿಲ್ಲೋದು. ಇದೀಗ ಟ್ರಾಫಿಕ್ ಸಮಸ್ಯೆ ಹತ್ತಿಕ್ಕಲು ಜಪಾನ್ ಟೆಕ್ನಾಲಜಿ ಬಳಸಲು ಬೆಂಗಳೂರು ಪೊಲೀಸ್ರು ಸಜ್ಜಾಗಿದ್ದಾರೆ. ದೇಶದಲ್ಲೇ ಪ್ರಪ್ರಥಮ ಬಾರಿಗೆ ನಗರದ 28 ಪ್ರಮುಖ ಜಂಕ್ಷನ್ಗಳಲ್ಲಿ ಮೋಡ್ರಾಟೋ ತಂತ್ರಜ್ಞಾನ ಬಳಸಲು ತಯಾರಿ ನಡೆದಿದೆ. ನಗರ ಭೂ ಸಾರಿಗೆ ನಿರ್ದೇಶನಾಲಯದಿಂದ ಯೋಜನೆ ಜಾರಿಯಾಗ್ತಿದ್ದು, ಮಾರ್ಚ್ ಅಂತ್ಯಕ್ಕೆ ಟೆಸ್ಟಿಂಗ್ ಪೂರ್ಣಗೊಳ್ಳಲಿದ್ದು, ಆ ಬಳಿಕ ಆಟೋಮ್ಯಾಟಿಕ್ ಸಿಗ್ನಲಿಂಗ್ ವ್ಯವಸ್ಥೆಗೆ ಚಾಲನೆ ಸಿಗಲಿದೆ.
ಬೆಂಗಳೂರಿನ ಪ್ರಮುಖ ಸಿಗ್ನಲ್ಗಳು ಸ್ವಯಂ ಚಾಲಿತವಾಗಿ ಕಾರ್ಯ ನಿರ್ವಹಿಸಲಿವೆ. ASCT ಮೂಲಕ ಪಾದಚಾರಿಗಳಿಗೆ ಸಿಗ್ನಲ್ಗಳು ಅನುಕೂಲ ಮಾಡಿಕೊಡಲಿವೆ. ರಸ್ತೆಯಲ್ಲಿ ಟ್ರಾಫಿಕ್ ಕ್ಯೂ ಎಷ್ಟು ದೂರ ಇದೆ ಎನ್ನುವುದನ್ನು ಪತ್ತೆ ಮಾಡುವ ಮೂಲಕ ಸಿಗ್ನಲ್ ಎಷ್ಟು ಸಮಯ ಇರಬೇಕು ಅನ್ನೋದನ್ನು ನಿರ್ಧಾರ ಮಾಡಲಿದೆ. ಟ್ರಾಫಿಕ್ ದಟ್ಟಣೆ ನೋಡಿಕೊಂಡು ಸ್ವಯಂ ಚಾಲಿತವಾಗಿ ಕೆಲಸ ನಿರ್ವಹಿಸಲಿದೆ. ನಗರದ 28 ಪ್ರಮುಖ ಜಂಕ್ಷನ್ಗಳಲ್ಲಿ ನೂತನ ಟೆಕ್ನಾಲಜಿ ಅಳವಡಿಕೆಯಾಗಿದ್ದು, ಶೀಘ್ರದಲ್ಲೇ ಕಾರ್ಯಾರಂಭ ಮಾಡಲಿದೆ. ಮೊಡೆರೆಟೊ ಅಂದರೆ ಮ್ಯಾನೇಜ್ಮೆಂಟ್ ಆಫ್ ಒರಿಜನ್ ಡೆಸ್ಟಿನೇಷನ್ ರಿಲೇಟೆಡ್ ಅಡಾಪ್ಟೇಶನ್ ಫಾರ್ ಟ್ರಾಫಿಕ್ ಆಪ್ಟಿಮೈಸೇಶನ್ ವ್ಯವಸ್ಥೆ .
![](https://pratidhvani.com/wp-content/uploads/2024/02/92729063_newairportroadnearhebbal.jpg)
ಪ್ರಾರಂಭಿಕವಾಗಿ ಬೆಂಗಳೂರಿನ ಎಂ.ಜಿ.ರಸ್ತೆ, ಹೊಸೂರು ರಸ್ತೆ, ಹಳೇ ಮದ್ರಾಸ್ ರಸ್ತೆ, ಕ್ವೀನ್ಸ್ ಸ್ಟ್ಯಾಚ್ಯೂ ಸರ್ಕಲ್, ಅನಿಲ್ ಕುಂಬ್ಳೆ ಸರ್ಕಲ್, ಕಾವೇರಿ ಆರ್ಟ್ಸ್ ಮತ್ತು ಕ್ರಾಫ್ಟ್ ಸರ್ಕಲ್, ಮೆಯೋ ಹಾಲ್, ವೆಬ್ಸ್ ಸರ್ಕಲ್, ಟ್ರಿನಿಟಿ ಸರ್ಕಲ್, ಟ್ರಿನಿಟಿ ಚರ್ಚ್ ರಸ್ತೆ, ಬೇಗಂ ಮಾಲ್ ಅಡಿಗಾಸ್ ಜಂಕ್ಷನ್, ಮಣಿಪಾಲ್ ಸೆಂಟರ್, ಕಾಮರಾಜ ರಸ್ತೆ, ಶಿವಾಜಿನಗರ, ಒಪೇರಾ ಜಂಕ್ಷನ್, ಅಶೋಕನಗರ ಜಂಕ್ಷನ್, ಮದರ್ ಥೆರೆಸಾ ಜಂಕ್ಷನ್, ಗರುಡ ಮಾಲ್ ಜಂಕ್ಷನ್, ಹಾಸ್ಮಾಟ್ ಜಂಕ್ಷನ್, ಕೆನ್ಸಿಂಗ್ಟನ್ ಓವೆಲ್ ಜಂಕ್ಷನ್, ಥಾಮರೈ ಕಣ್ಣನ್ ಜಂಕ್ಷನ್, ಆಂಜನೇಯ ದೇವಸ್ಥಾನ ಜಂಕ್ಷನ್, ಹಳೆ ಮದ್ರಾಸ್ ರಸ್ತೆ , ಸ್ವಾಮಿ ವಿವೇಕಾನಂದ ಸ್ಟೇಷನ್, ಡಬಲ್ ರೋಡ್ ಜಂಕ್ಷನ್ನಲ್ಲಿ ಮೊದಲಿಗೆ ಅಳವಡಿಕೆ ಮಾಡಲಾಗುತ್ತದೆ.
ಈ ನೂತನ ಜಪಾನ್ ತಂತ್ರಜ್ಞಾನ ವ್ಯವಸ್ಥೆ ಟ್ರಾಫಿಕ್ ದಟ್ಟಣೆ ಕಡಿಮೆ ಮಾಡುವುದರ ಜೊತೆಗೆ ಜಂಕ್ಷನ್ಗಳ ಸಿಗ್ನಲ್ಗಳಲ್ಲಿ ಹೆಚ್ಚು ಹೊತ್ತು ಕಾಯಬೇಕಾಗುವ ಸಮಯವನ್ನು ತಗ್ಗಿಸಲಿದೆ. ಜೊತೆಗೆ ತುರ್ತು ವಾಹನಗಳ ಸಂಚಾರಕ್ಕೆ ಅನುಕೂಲವಾಗುವಂತೆ ಬದಲಿಸಲು ಅವಕಾಶ ಇದೆ. ಜಪಾನ್ನ ನಗೋಯಾ ಎಲೆಕ್ಟ್ರಿಕ್ ವರ್ಕ್ಸ್ ಕಂಪೆನಿಯು ಈ ಯೋಜನೆಯ ಅನುಷ್ಠಾನದ ಗುತ್ತಿಗೆ ಪಡೆದುಕೊಂಡಿದೆ. ಬೆಂಗಳೂರಿನ ಪ್ರಮುಖ 28 ಜಂಕ್ಷನ್ಗಳಲ್ಲಿ ಅಳವಡಿಕೆ ಮಾಡಲು ನಿರ್ಧಾರ ಮಾಡಲಾಗಿದೆ. ಆರ್ಟಿಫೀಷಿಯಲ್ ಇಂಟೆಲಿಜೆನ್ಸ್ ರೀತಿಯಲ್ಲಿ ಕೆಲಸ ಮಾಡುವ ಈ ನೂತನ ತಂತ್ರಜ್ಞಾನ ಬೆಂಗಳೂರಿಗರಿಗೆ ಸಣ್ಣ ಪ್ರಮಾಣದಲ್ಲಿ ಆದರೂ ಟ್ರಾಫಿಕ್ ಸಮಸ್ಯೆಗೆ ರಿಲೀಫ್ ನೀಡುವ ಸಾಧ್ಯತೆಯಿದೆ.
#karnataka #bengaluru #bengalurutraffic #trafficcissue #trafficjam