ಬೆಂಗಳೂರಿಗರಿಗೆ ಈಗ ಪಿಂಕ್ ಪೋಯಿ( ಗುಲಾಬಿ ಬಣ್ಕಣದ ಹೂ ಬಿಡುವ ಮರಗಳನ್ನು) ನೋಡುವ ಸಮಯ. ಬೆಂಗಳೂರು ಈಗ ಪಿಂಕ್ ಸಿಟಿಯಾಗಿದೆ. ಉದ್ಯಾನ ನಗರಿ’ ಎಂದೇ ಹೆಸರಾಗಿರುವ ಬೆಂಗಳೂರಿನಲ್ಲಿ ಈಗ ಗುಲಾಬಿ ಬಣ್ಣದ ಹೂವುಗಳ ನಗರಿಯಾಗಿದೆ. ಈ ಗಿಡಗಳು ಬೆಂಗಳೂರಿಗೆ ಹೇಗೆ ಬಂತು ? ಇದನ್ನು ನೆಟ್ಟವರು ಯಾರು ಗೊತ್ತೆ ?
ಸಾಮಾನ್ಯವಾಗಿ ಜನವರಿ ಕೊನೆಯ ವಾರದಿಂದ ಮಾರ್ಚ್ವರೆಗೆ ಈ ಹೂವುಗಳು ಅರಳಲು ಆರಂಭವಾಗುತ್ತವೆ. 30 ರಿಂದ 50 ಅಡಿ ತನಕ ಬೆಳೆಯುವ ಈ ಮರಗಳಲ್ಲಿ ಫೆಬ್ರುವರಿ ತಿಂಗಳಲ್ಲಿ ಪೂರ್ಣ ಪ್ರಮಾಣದಲ್ಲಿ ಹೂಗಳು ಅರಳಿ ನಗರವನ್ನು ಸುಂದರಗೊಳಿಸುತ್ತಿವೆ.
ಒಂದು ಶತಮಾನಕ್ಕೂ ಮುಂಚೆ ಭಾರತಕ್ಕೆ ಬಂದ ದಕ್ಷಿಣ ಅಮೆರಿಕ ಮೂಲದ ಟಬೂಬಿಯಾ ಜಾತಿಯ ಮರಗಳು ಈಗ ಭಾರತದ್ದಾಗಿದೆ.ಟಬೂಬಿಯಾ ಕೇವಲ ಗುಲಾಬಿ ಬಣ್ಣದಲ್ಲಿ ಮಾತ್ರವಲ್ಲ. ಹಳದಿ ಬಣ್ಣದ ಹೂವುಗಳೂ ಇವೆ. ಅದು ಪ್ರತ್ಯೇಕ ಜಾತಿಯ ಮರವಾಗಿದೆ. ಇದನ್ನು ಟಬೂಬಿಯಾ ಅರ್ಜೆಂಟಿಯಾ (ಸಿಲ್ವರ್ ಟ್ರಂಪೆಟ್ ಟ್ರೀ) ಎಂದು ಕರೆಯಲಾಗುತ್ತದೆ.
ಬ್ರಿಟಿಷರ ಕಾಲದಲ್ಲಿ ಜಾನ್ ಕ್ಯಾಮರೂನ್ ಮತ್ತು ಕೃಂಬಿಗಲ್ ಅವರು ಬೆಂಗಳೂರಿನ ಹವಾಮಾನಕ್ಕೆ ಹೊಂದಿಕೆಯಾಗುತ್ತವೆ ಎಂದು ಈ ಮರಗಳನ್ನು ವಿದೇಶದಿಂದ ತರಿಸಿ ಲಾಲ್ಬಾಗ್ ಮತ್ತು ಕಬ್ಬನ್ ಪಾರ್ಕ್ನಲ್ಲಿ ನೆಟ್ಟಿದ್ದರು. ನಂತರ 1980ರ ದಶಕದಲ್ಲಿ ಐಎಫ್ಎಸ್ ಅಧಿಕಾರಿ ಎಸ್.ಜಿ ನೇಗಿನಹಾಳ ಅವರು ನಗರದಾದ್ಯಂತ ರಸ್ತೆ ಬದಿಗಳಲ್ಲಿ ಟಬೂಬಿಯಾ ಗಿಡಗಳನ್ನು ಬೃಹತ್ ಸಂಖ್ಯೆಯಲ್ಲಿ ನೆಟ್ಟಿದ್ದರು.
ಸೇತುರಾಮ್ ಗೋಪಾಲರಾವ್ ನೇಗಿನಹಾಳ (ಎಸ್.ಜಿ ನೇಗಿನಹಾಳ). ಅರಣ್ಯ ಇಲಾಖೆಯಲ್ಲಿ ಅಧಿಕಾರಿಯಾಗಿದ್ದ ಇವರು, ಮಣ್ಣಿನ ಗುಣವನ್ನು ಅರಿತು ಯಾವ ಗಿಡಗಳನ್ನು ನೆಡಬಹುದು ಎಂದು ಪರಿಶೀಲಿಸಿದ್ದರು. ಆಗ ಅವರು ಆಯ್ಕೆ ಮಾಡಿಕೊಂಡಿದ್ದೇ ಟಬೂಬಿಯಾ ರೋಸಿಯಾ ಗಿಡಗಳನ್ನು. ಬೆಂಗಳೂರಿನಾದ್ಯಂತ 15 ಲಕ್ಷ ಗಿಡಗಳನ್ನು ಅವರು ನೆಟ್ಟಿದ್ದರು.
