ಕಳೆದ ವರ್ಷದ ಆರಂಭದಲ್ಲಿ ಹಿಂದೂ ಧರ್ಮಕ್ಕೆ ಮತಾಂತರಗೊಂಡ ಉತ್ತರ ಪ್ರದೇಶದ ಶಿಯಾ ವಕ್ಫ್ ಮಂಡಳಿಯ ಮಾಜಿ ಮುಖ್ಯಸ್ಥ ವಸೀಂ ರಿಜ್ವಿ ಅವರು ತಮ್ಮ “ಘರ್ ವಾಪಸಿ” ನಂತರ ಹಿಂದೂ ಸಮಾಜವು ಅವರನ್ನು ಪ್ರೀತಿಯಿಂದ ಸ್ವೀಕರಿಸಲಿಲ್ಲ ಎಂದು ವೀಡಿಯೊವನ್ನು ಬಿಡುಗಡೆ ಮಾಡಿದ್ದಾರೆ.
ಇದೀಗ ಟ್ವಿಟ್ಟರ್ನಲ್ಲಿ ಶೇರ್ ಆಗುತ್ತಿರುವ ವಿಡಿಯೋದಲ್ಲಿ ಹಿಂದೂ ಧರ್ಮಕ್ಕೆ ಮತಾಂತರಗೊಂಡ ನಂತರ ಜಿತೇಂದ್ರ ತ್ಯಾಗಿ ಎಂದು ಹೆಸರು ಬದಲಿಸಿಕೊಂಡಿರುವ ರಿಜ್ವಿ, ತನಗೆ ಅರ್ಹವಾದ ಪ್ರೀತಿಯನ್ನು ಹಿಂದೂ ಸಮಾಜದಿಂದ ಸ್ವೀಕರಿಸಿಲ್ಲ ಎಂಬ ನೋವನ್ನು ವ್ಯಕ್ತಪಡಿಸುತ್ತಿರುವುದನ್ನು ಕಾಣಬಹುದು.
ತಾನು ಖಿನ್ನತೆಯಿಂದ ಬಳಲುತ್ತಿದ್ದೇನೆ, ಹಾಗೂ ತನ್ನ ಶತ್ರುಗಳಿಂದ ಕೊಲ್ಲಲ್ಪಡುವ ಬದಲು ತನ್ನ ಜೀವನವನ್ನು ತಾನೇ ಕೊನೆಗೊಳಿಸಲು ಬಯಸಬಹುದು ಎಂದು ಅವರು ಹೇಳಿದ್ದಾರೆ.
ಅವರು ಹಿಂದೂ ಧರ್ಮಕ್ಕೆ ಮತಾಂತರಗೊಳ್ಳುವ ನಿರ್ಧಾರವು ಸಾವಧಾನಿಕ ನಿರ್ಧಾರವಾಗಿತ್ತು ಮತ್ತು ಅವರು ತಮ್ಮ “ಘರ್ ವಾಪಸಿ” ಗಾಗಿ ವಿಷಾದಿಸುವುದಿಲ್ಲ. ಆದರೆ ಇಸ್ಲಾಂ ಧರ್ಮದಿಂದ ಮತಾಂತರಗೊಂಡ ನಂತರ ಹಿಂದೂ ಸಮಾಜದಲ್ಲಿ ಅವರನ್ನು ಹೇಗೆ ನಡೆಸಿಕೊಂಡರು ಎಂಬುದರ ಬಗ್ಗೆ ನಿರಾಶೆಗೊಂಡಿದ್ದಾರೆ ಎಂದು ಹೇಳಿದ್ದಾರೆ.
“ಹಲವು ವರ್ಷಗಳ ನಂತರ ಮನೆಗೆ ಹಿಂದಿರುಗಿದ ದೂರದ ಸಂಬಂಧಿಯಂತೆ ನನ್ನನ್ನು ನಡೆಸಿಕೊಳ್ಳಲಾಯಿತು. ಒಟ್ಟಿಗೆ ವಾಸಿಸುವ ಕುಟುಂಬದ ಸದಸ್ಯರು ಹಲವಾರು ವರ್ಷಗಳ ನಂತರ ಹಿಂದಿರುಗಿದ ತಮ್ಮ ದೂರದ ಸಂಬಂಧಿಯೊಂದಿಗೆ ಬೆರೆಯದ ರೀತಿ, ಹಿಂದೂ ಸಮಾಜವು ನನ್ನನ್ನು ಸಹ ಸ್ವೀಕರಿಸಲಿಲ್ಲ” ಎಂದು ಅವರು ವಿಡಿಯೋದಲ್ಲಿ ಹೇಳಿದ್ದಾರೆ.
