![](https://pratidhvani.com/wp-content/uploads/2024/07/m3.jpg)
ರಾಹುಲ್ಗಾಂಧಿಯನ್ನು ಇನ್ನು ಪಪ್ಪು ಎನ್ನಲಾಗುವುದಿಲ್ಲ. ತಮಾಷೆಯಾಗಿ ನೋಡಲಾಗುವುದಿಲ್ಲ
ಮೂಲ ಲೇಖಕರು: ವೀರ ಸಾಂಘ್ವಿ
ಕನ್ನಡಕ್ಕೆ : ನಾ ದಿವಾಕರ
2024ರ ಚುನಾವಣೆಗಳನ್ನು ವಸ್ತುನಿಷ್ಠವಾಗಿ ವಿಶ್ಲೇಷಿಸಿ ತುಲನಾತ್ಮಕವಾಗಿ ನೋಡಲು, ನಿಷ್ಪಕ್ಷಪಾತವಾಗಿ ಪರಾಮರ್ಶಿಸಲು ಸಾಕಷ್ಟು ಸಮಯ ದೊರೆತಿದೆ ಈ ಚುನಾವಣೆಗಳ ಫಲಿತಾಂಶಗಳಿಂದ ದೇಶದ ಆಡಳಿತ ವ್ಯವಸ್ಥೆಯಲ್ಲಿ ಏನಾದರೂ ಬದಲಾಗಿದೆಯೇ ಎಂಬ ಜಟಿಲ ಪ್ರಶ್ನೆಗೆ ಉತ್ತರ ಶೋಧಿಸಬೇಕಿದೆ. ಪ್ರಧಾನಿ ನರೇಂದ್ರ ಮೋದಿಯವರ ಮೂರನೇ ಅವಧಿಯು ಎರಡನೇ ಅವಧಿಯಂತೆಯೇ ಇರಲಿದೆಯೇ? ಅವರು ತುಂಬಾ ಆತ್ಮವಿಶ್ವಾಸದಿಂದ ನಿರೀಕ್ಷಿಸಿದ ಸಂಖ್ಯೆಗಳನ್ನು ತಲುಪುವದರಲ್ಲಿ ಬಿಜೆಪಿ ವಿಫಲವಾಗಿರುವುದು ಅವರ ಸಾಮರ್ಥ್ಯವನ್ನು ಕುಗ್ಗಿಸಿದೆಯೇ ? ಅಥವಾ ಇದು ಮೋದಿ 2.0 ಅಂತೆಯೇ ಎಂದಿನ ಸರ್ಕಾರವಾಗಲಿದೆಯೇ ? ಈ ಪ್ರಶ್ನೆಗಳೊಂದಿಗೇ ರಾಜಕೀಯ ಪಕ್ಷಗಳು ಸಾಮಾನ್ಯವಾಗಿ ವ್ಯಕ್ತಪಡಿಸುವ ಅಭಿಪ್ರಾಯಗಳಿಗಿಂತಲೂ ಭಿನ್ನವಾದ, ಜಟಿಲ ಸನ್ನಿವೇಶವನ್ನು ನಾವು ಎದುರಿಸುತ್ತಿರುವುದು ಸ್ಪಷ್ಟ.
2024ರ ಮುನ್ನ ಸರ್ಕಾರದಲ್ಲಿ, ಆಡಳಿತ ವಲಯದಲ್ಲಿ, ನ್ಯಾಯಾಂಗ ಮತ್ತು ಮಾಧ್ಯಮ ಕ್ಷೇತ್ರದಲ್ಲಿ ಅನೇಕರು ನರೇಂದ್ರ ಮೋದಿಯವರು ಜೀವನದುದ್ದಕ್ಕೂ ಪ್ರಧಾನಿಯಾಗಿ ಮುಂದುವರೆಯುತ್ತಾರೆ ಎಂದೇ ನಂಬಿದ್ದರು. ಹಾಗಾಗಿಯೇ ಯಾವುದೇ ಪ್ರತಿರೋಧಗಳಾದರೂ ನಿರರ್ಥಕ ಎಂದೇ ಭಾವಿಸಲಾಗಿತ್ತು. ಬಿಜೆಪಿ ಬಯಸಿದಂತೆ ನವ ಭಾರತದ ಮುನ್ನಡೆಗೆ ಪ್ರತಿಯೊಬ್ಬರೂ ಹೊಂದಿಕೊಳ್ಳಬೇಕು ಎಂದೇ ಪರಿಭಾವಿಸಲಾಗಿತ್ತು. ಪ್ರತಿಪಕ್ಷಗಳು ದುರ್ಬಲವಾಗಿದ್ದು, ಅವಕಾಶವಿಲ್ಲದೆ ಸೊರಗುತ್ತಿದ್ದ ಕಾರಣ ಈ ಪಕ್ಷಗಳ ಬಗ್ಗೆ ಗಮನ ಕೇಂದ್ರೀಕರಿಸುವುದರಲ್ಲಿ ಅರ್ಥವಿಲ್ಲ ಎಂಬ ನಂಬಿಕೆಯ ಪರಿಣಾಮ ಹಲವು ಮಾಧ್ಯಮಗಳು ಸರ್ಕಾರದ ಪರ ವಹಿಸಿಕೊಂಡು ಗೋದಿ ಮೀಡಿಯಾ, ಅಂದರೆ ಮಡಿಲ ಮಾಧ್ಯಮಗಳು ಎಂದೇ ಹೆಸರುಗಳಿಸಿದ್ದವು.
![](https://pratidhvani.com/wp-content/uploads/2024/07/modi1.jpg)
ಕೊನೆಯಾದ ಕನಸು(The end of the dream)
ತಾತ್ವಿಕವಾಗಿ ಭಾರತವು ಪತ್ರಿಕಾ ಸ್ವಾತಂತ್ರ್ಯವನ್ನು ಹೊಂದಿದೆ. ಆದರೆ ಟಿವಿಯಲ್ಲಿ ಪ್ರಸಾರವಾಗುವ ಸುದ್ದಿ, ವರದಿ, ವಿಶ್ಲೇಷಣೆಗಳನ್ನು ಸರ್ಕಾರವು ತುಂಬಾ ಬಿಗಿಯಾಗಿ ನಿಯಂತ್ರಿಸುವುದರಿಂದ ಮತ್ತು ಮುದ್ರಣದಲ್ಲಿ ಕಾಣಿಸಿಕೊಳ್ಳುವ ಯಾವುದೇ ವಿಷಯದ ಬಗ್ಗೆ ತುಂಬಾ ಸೂಕ್ಷ್ಮಗ್ರಾಹಿಯಾಗಿರುವುದರಿಂದ, ಮಾಧ್ಯಮ ಸಮೂಹಗಳ ಮಾಲೀಕರು ಮತ್ತು ದುರದೃಷ್ಟವಶಾತ್ ಅನೇಕ ಪತ್ರಕರ್ತರೂ ಸಹ ಸುದ್ದಿಗಳನ್ನು ನ್ಯಾಯಯುತವಾಗಿ ವರದಿ ಮಾಡುವುದರ ಬದಲು, ಆಳ್ವಿಕೆಯ ಕೇಂದ್ರಗಳನ್ನು ಸಂತೃಪ್ತಿಪಡಿಸುವಂತಹ ತಂತ್ರಗಳನ್ನು ಅನುಸರಿಸುವುದು ಹೆಚ್ಚು ಸುರಕ್ಷಿತ ಮತ್ತು ಸುಲಭ ಮಾರ್ಗ ಎಂದು ನಿರ್ಧರಿಸಿದರು.
ಇಂತಹ ಪರಿಸ್ಥಿತಿ ಮತ್ತು ವಿದ್ಯಮಾನ ಭಾರತಕ್ಕೆ ಹೊಸತೇನಲ್ಲ. 1976ರ ಹೊತ್ತಿಗೆ ಇಂದಿರಾ ಗಾಂಧಿಯವರ ತುರ್ತು ಪರಿಸ್ಥಿತಿಯ ಆಡಳಿತವು ಪತ್ರಿಕೆಗಳನ್ನು ಸೆನ್ಸಾರ್ ಮಾಡಲು ಹೆಚ್ಚು ಪ್ರಾಶಸ್ತ್ಯ ನೀಡಲೇ ಇಲ್ಲ. ಏಕೆಂದರೆ ಇನ್ನು ಮುಂದೆ ಪರಿಸ್ಥಿತಿಗಳು ಹೀಗೆಯೇ ಇರುತ್ತವೆ ಎಂಬ ವಿಶ್ವಾಸದೊಂದಿಗೆ ಮಾಧ್ಯಮಗಳು ಸರ್ಕಾರದ ಪರ ವಹಿಸಲಾರಂಭಿಸಿದ್ದವು. ಎಲ್.ಕೆ. ಅಡ್ವಾಣಿಯವರು ಹೇಳಿದ್ದಂತೆ ಪತ್ರಿಕೆಗಳನ್ನು ಬಾಗುವಂತೆ ಕೇಳಲಾಯಿತು, ಆದರೆ ಅದು ತೆವಳಲು ನಿರ್ಧರಿಸಿದ್ದವು. 1977ರಲ್ಲಿ ಕಾಂಗ್ರೆಸ್ ಸೋತಾಗ ಆ ಹಂತ ಅಂತ್ಯವಾಯಿತು.
ಈ ಬಾರಿ ಬಿಜೆಪಿ ಸೋತಿಲ್ಲ. ಮತ್ತೆ ಅಧಿಕಾರಕ್ಕೆ ಬಂದಿದೆಯಾದರೂ ನರೇಂದ್ರ ಮೋದಿ ಶಾಶ್ವತವಾಗಿ ಮುಂದುವರಿಯುವ ಸಾಧ್ಯತೆಗಳು ಕಡಿಮೆಯಾಗಿವೆ. ಮುಂದಿನ ಚುನಾವಣೆಯಲ್ಲಿ ಅವರು ಸೋಲುವ ಸಾಧ್ಯತೆಗಳನ್ನೂ ಅಲ್ಲಗಳೆಯಲಾಗುವುದಿಲ್ಲ. ಈ ಒಂದು ಅರಿವು ಮಾಧ್ಯಮಗಳ ಮೇಲೆ ಮಾತ್ರವಲ್ಲ, ವಿಧೇಯ ನಾಗರಿಕ ಸೇವಕರು ಮತ್ತು ಪೊಲೀಸ್ ಅಧಿಕಾರಿಗಳ ಮೇಲೂ ಪರಿಣಾಮ ಬೀರಿದೆ. ಮುಂದೊಂದು ದಿನ ಮತ್ತೊಬ್ಬ ನಾಯಕನಿಗೆ ಉತ್ತರಿಸಬೇಕಾಗುತ್ತದೆ ಎಂದು ಎಂದಿಗೂ ಯೋಚಿಸಿರಲಿಲ್ಲ. ಈಗ ಯೋಚಿಸುವಂತಾಗಿದೆ. ಈಗಲೂ ಸಹ ನರೇಂದ್ರ ಮೋದಿ ಬಲಿಷ್ಠ ಪ್ರಧಾನಿಯಾಗಿದ್ದರೂ, ಶಾಶ್ವತವಾಗಿ ಪ್ರಧಾನಿಯಾಗುವುದು ಸಾಧ್ಯವಿಲ್ಲ ಎನ್ನುವುದು ನಿಚ್ಚಳವಾಗಿದೆ.
![](https://pratidhvani.com/wp-content/uploads/2024/07/modi-side.jpg)
ಸಾಮಾಜಿಕ ಮಾಧ್ಯಮ ಮತ್ತು ಸಂಸ್ಥೆಗಳು(Social media and organizations)
ಕಳೆದ ಹನ್ನೆರಡು ಅಥವಾ ಅದಕ್ಕಿಂತ ಹೆಚ್ಚು ವರ್ಷಗಳಲ್ಲಿ ಬಿಜೆಪಿಯ ಹೆಚ್ಚಿನ ಜನಪ್ರಿಯತೆಯು ಸಾಮಾಜಿಕ ಮಾಧ್ಯಮದ ಮೇಲಿನ ಅದರ ಪಾರಮ್ಯ ಮತ್ತು ಸಾರ್ವಜನಿಕ ಅಭಿಪ್ರಾಯವನ್ನು ರೂಪಿಸುವ ಸಾಮರ್ಥ್ಯದಿಂದ ಬಂದಿದೆ. ಅನೇಕ ಕಾರಣಗಳಿಂದಾಗಿ 2024ರ ಫಲಿತಾಂಶಗಳು ಹೊರಬರುವ ಮೊದಲೇ ಅದು ಕುಸಿಯಲು ಪ್ರಾರಂಭಿಸಿತು. ಮುಖ್ಯವಾಹಿನಿಯ ಮಾಧ್ಯಮಗಳು ಸೂತ್ರದ ಗೊಂಬೆಗಳಾಗಿ ಮಾರ್ಪಟ್ಟಾಗ ಪಾರಂಪರಿಕ-ಮುಖ್ಯವಾಹಿನಿ ಮಾಧ್ಯಮಗಳು ವಹಿಸಬೇಕಾದ ಜವಾಬ್ದಾರಿಯುತ ಪಾತ್ರವನ್ನು ಅಂತರ್ಜಾಲವು ವಹಿಸಿಕೊಂಡಿತು. ಸುದ್ದಿ ತಾಣಗಳು, ಯೂಟ್ಯೂಬ್ ಚಾನೆಲ್ಗಳು, ಫೇಸ್ಬುಕ್, ಇನ್ಸ್ಟಾಗ್ರಾಮ್ ಮತ್ತು ಟ್ವಿಟರ್ ಅಧಿಕೃತ ನಿರೂಪಣೆಗಳನ್ನು (Narratives) ಯಶಸ್ವಿಯಾಗಿ ಪ್ರಶ್ನಿಸಲಾರಂಭಿಸಿದವು. ಈ ಅಧಿಕೃತ ನಿರೂಪಣೆಗಳ ವಿಷಯಗಳ ವಿರುದ್ಧವೇ ದಾಳಿ ನಡೆಸಿದವು . ತಮ್ಮ ಮೂರನೆ ಅವಧಿಯಲ್ಲಿ ಬಿಜೆಪಿ ನಿರ್ಣಾಯಕ ಆನ್ಲೈನ್ ನಿರೂಪಣೆಗಳನ್ನು ತನ್ನ ಅನುಕೂಲಕ್ಕೆ ತಕ್ಕಂತೆ ನಿಯಂತ್ರಿಸುವ ಮಾರ್ಗಗಳನ್ನು ಕಂಡುಕೊಳ್ಳುತ್ತದೆ ಎಂದು ನಿರೀಕ್ಷಿಸಲಾಗಿತ್ತು. ಈಗಲೂ ಇದರ ಸಾಧ್ಯತೆಗಳನ್ನು ಅಲ್ಲಗಳೆಯಲಾಗುವುದಿಲ್ಲವಾದರೂ, ಮೊದಲಿನಷ್ಟು ಸುಲಭವಾಗುವುದಿಲ್ಲ.
ಬಿಜೆಪಿಯ ಹಿನ್ನಡೆಯಿಂದ ಸಂಭ್ರಮಿಸುತ್ತಿರುವ ವಿರೋಧ ಪಕ್ಷಗಳ ಸಂಭ್ರಮಾಚರಣೆ ಕೊಂಚ ಆತುರದ ನಡೆ ಎನಿಸಬಹುದು. ಏಕೆಂದರೆ ಸರ್ಕಾರವು ಈಗಲೂ ಸಹ ಏಜೆನ್ಸಿಗಳನ್ನು ನಿಯಂತ್ರಣದಲ್ಲಿಟ್ಟುಕೊಂಡಿದೆ. ವಿರೋಧ ಪಕ್ಷಗಳನ್ನು ಗುರಿಯಾಗಿಸಿ ಅವುಗಳನ್ನು ಬಳಸುವುದನ್ನು ಮುಂದುವರೆಸಬಹುದು. ಆರೋಪಿಗಳನ್ನು ನಿರಪರಾಧಿಗಳು ಎಂದು ಸಾಬೀತಾಗುವವರೆಗೆ ತಪ್ಪಿತಸ್ಥರೆಂದು ಪರಿಗಣಿಸುವುದಲ್ಲದೆ, ಯಾವುದೇ ಮನವರಿಕೆಯಾಗುವ ಪುರಾವೆಗಳನ್ನು ಪ್ರಸ್ತುತಪಡಿಸದೆ ಜನರನ್ನು ದೀರ್ಘಕಾಲದವರೆಗೆ ಜೈಲಿನಲ್ಲಿಡಲು ಅನುಮತಿಸುವ ಕಾನೂನುಗಳನ್ನು ಬಳಸುವುದನ್ನು ಮುಂದುವರಿಸಬಹುದು. ಆದಾಗ್ಯೂ ಕೇವಲ ಎರಡು ವಿಷಯಗಳು ಆ ಪರಿಸ್ಥಿತಿಯನ್ನು ಬದಲಾಯಿಸಬಹುದು.
ಮೊದಲನೆಯದಾಗಿ, ಕೇಂದ್ರ ತನಿಖಾ ದಳ (ಸಿಬಿಐ) ಮತ್ತು ಜಾರಿ ನಿರ್ದೇಶನಾಲಯ (ಇಡಿ) ಮೇಲಿನ ಅವಲಂಬನೆ ಈಗ ಸರ್ಕಾರದ ಮಟ್ಟಿಗೆ ಪ್ರತಿಕೂಲವಾಗುವ ಸಾಧ್ಯತೆಗಳಿವೆ ಎಂದು ಸರ್ಕಾರ ಭಾವಿಸಿದರೆ, ಪ್ರತಿಪಕ್ಷಗಳು ವಂಚಕರಿಂದ ತುಂಬಿವೆ ಮತ್ತು ಬಿಜೆಪಿ ಪ್ರಾಮಾಣಿಕರಿಂದ ತುಂಬಿದೆ ಎಂಬ ಅಧಿಕೃತ ನಿರೂಪಣೆಯನ್ನು ಯಾರೂ ನಂಬುವುದಿಲ್ಲ ಎಂದು ಸರ್ಕಾರ ನಿರ್ಧರಿಸಿದರೆ ಪರಿಸ್ಥಿತಿ ಬದಲಾಗಬಹುದು. ಎರಡನೆಯದಾಗಿ ಮುಖ್ಯ ನ್ಯಾಯಮೂರ್ತಿಗಳ ಭಾಷಣಗಳಲ್ಲಿ ನಿರಂತರವಾಗಿ ಕಾಣಿಸಿಕೊಳ್ಳುವ ವೈಯಕ್ತಿಕ ಸ್ವಾತಂತ್ರ್ಯದ ಬಗ್ಗೆ ಎಲ್ಲಾ ವಿಷಯಗಳನ್ನು ನ್ಯಾಯಾಂಗವು ಗಂಭೀರವಾಗಿ ಪರಿಗಣಿಸಲು ಪ್ರಾರಂಭಿಸಿದರೆ, ಹಾಗೂ ಜೈಲು ನಿಯಮ ಮತ್ತು ಜಾಮೀನು ಇದಕ್ಕೆ ಹೊರತಾಗಿದೆ ಎಂಬ ನಿಲುವನ್ನು ಮುಂದುವರೆಸದೆ ಹೋದರೆ ಇದು ಬದಲಾಗಬಹುದು.
![](https://pratidhvani.com/wp-content/uploads/2024/07/mm.jpg)
ಪ್ರಬಲ ವಿರೋಧ ಪಕ್ಷಗಳು(Strong opposition parties)
ವಾಸ್ತವ ಎಂದರೆ ಇನ್ನು ಮುಂದೆ ರಾಜಕೀಯ ಪ್ರತಿರೋಧ ಮತ್ತು ವಿರೋಧಗಳನ್ನು ತಮಾಷೆ ಎಂದು ಭಾವಿಸಲಾಗುವುದಿಲ್ಲ. ರಾಹುಲ್ ಗಾಂಧಿಯನ್ನು ತಮಾಷೆಯ ವ್ಯಕ್ತಿಯಾಗಿ ಪರಿವರ್ತಿಸಿದ್ದು ಹಾಗೂ ಪಪ್ಪು ಎಂದು ಬಿಂಬಿಸಿದ್ದು ಬಿಜೆಪಿಯ ದೊಡ್ಡ ಸಾಧನೆಗಳಲ್ಲಿ ಒಂದಾಗಿತ್ತು. ರಾಹುಲ್ ಗಾಂಧಿಗಿಂತ ಮೋದಿ ಹೆಚ್ಚು ಜನಪ್ರಿಯರಾಗಿದ್ದಾರೆ ಎಂಬುದನ್ನು ಅಲ್ಲಗಳೆಯಲಾಗುವುದಿಲ್ಲ. ಆದರೆ ವಸ್ತುನಿಷ್ಠವಾಗಿ ಆಲೋಚನೆ ಮಾಡುವ ಯಾವುದೇ ವ್ಯಕ್ತಿಯು ರಾಹುಲ್ ಗಾಂಧಿಯನ್ನು ಇನ್ನು ಮುಂದೆ ತಮಾಷೆಯಾಗಿ ಪಪ್ಪು ಎಂದು ಪರಿಗಣಿಸುವುದಿಲ್ಲ. ನಾವೆಲ್ಲರೂ ಗಮನಿಸಿದಂತೆ ರಾಹುಲ್ ಕಳೆದ ದಶಕದಲ್ಲಿ ಅನೇಕ ತಪ್ಪುಗಳನ್ನು ಮಾಡಿದ್ದಾರೆ. ಆದರೆ ಇತರ ಅನೇಕ ರಾಜಕಾರಣಿಗಳಿಗಿಂತ ಭಿನ್ನವಾಗಿ, ಅವರು ತಮ್ಮ ತಪ್ಪುಗಳಿಂದ ಪಾಠ ಕಲಿತಿದ್ದಾರೆಂದು ತೋರುತ್ತದೆ. ಅವರನ್ನು ಈಗ ವಿಶ್ವಾಸಾರ್ಹ ಸವಾಲಾಗಿ ನೋಡಲಾಗುತ್ತದೆ. ಮಣಿಪುರ ಮತ್ತಿತರ ವಿಷಯಗಳಲ್ಲಿ ಸಂಸತ್ತಿನಲ್ಲಿ ಸ್ಪಷ್ಟವಾಗಿ ಮಾತನಾಡುವ ವ್ಯಕ್ತಿಯಾಗಿ ರಾಹುಲ್ ಗಾಂಧಿ ಬಿಜೆಪಿಯನ್ನು ವಿಚಲಿತವಾಗುವಂತೆ ಮಾಡಿರುವುದೂ ಸ್ವಷ್ಟ. ಈಗ ರಾಹುಲ್ ಮಾತುಗಳಿಗೆ ಯಾರೂ ನಗಲು ಸಾಧ್ಯವಿಲ್ಲ. ರಾಹುಲ್ ಇನ್ನೂ ಪರ್ಯಾಯವಾಗಿ ರೂಪುಗೊಂಡಿಲ್ಲ. ಆದರೆ ಅವರನ್ನು ಸಾರಾಸಗಟಾಗಿ ನಿರಾಕರಿಸುವ ದಿನಗಳು ಮುಗಿದಿವೆ.
ಮತ್ತೊಂದೆಡೆ ಕೇಂದ್ರದಲ್ಲಿ ಕೆಲವು ಸಚಿವ ಸ್ಥಾನಗಳಿಂದ ನಿತೀಶ್ ಕುಮಾರ್ ಮತ್ತು ಚಂದ್ರಬಾಬು ನಾಯ್ಡು ತೃಪ್ತರಾಗುತ್ತಾರೆ ಎಂದು ಭಾವಿಸುವುದು ತಪ್ಪಾಗುತ್ತದೆ. ಇಬ್ಬರೂ ಮುಖ್ಯಮಂತ್ರಿಗಳು ಅಂತಹ ವಿಷಯಗಳ ಬಗ್ಗೆ ನಿಜವಾಗಿಯೂ ಕಾಳಜಿ ವಹಿಸುವುದಿಲ್ಲ. ಅವರು ತಮ್ಮ ತಮ್ಮ ರಾಜ್ಯಗಳಿಗೆ ಅಪಾರ ಮೊತ್ತದ ಹಣಕಾಸು ನೆರವು ಅಪೇಕ್ಷಿಸುತ್ತಾರೆ. ನೆರೆಯ ರಾಜ್ಯಗಳನ್ನು ಅಸೂಯೆಗೀಡುಮಾಡುವಷ್ಟು ಹಣಕಾಸು ನೆರವು ಅಪೇಕ್ಷಿಸುವ ಮೂಲಕ ಪ್ರಧಾನಮಂತ್ರಿಯ ಅಸಹಾಯಕತೆಯನ್ನು ಬಳಸಿಕೊಳ್ಳುವ ಸಾಧ್ಯತೆಗಳಿವೆ. ಸರ್ಕಾರ ಉಳಿಯಬೇಕಾದರೆ ಇವರ ಆಗ್ರಹಗಳನ್ನು ಪೂರೈಸಲು ಸಾಕಷ್ಟು ಹಣಕಾಸು ನೆರವನ್ನು ಖಚಿತಪಡಿಸಬೇಕಾಗುತ್ತದೆ. ನರೇಂದ್ರ ಮೋದಿ ಸರ್ಕಾರ ಇವರ ಹೆಚ್ಚಿನ ಬೇಡಿಕೆಗಳನ್ನು ಒಪ್ಪಿಕೊಳ್ಳಲೇಬೇಕಾಗುತ್ತದೆ ಇಲ್ಲವಾದರೆ ಸರ್ಕಾರ ಅಂತ್ಯವಾಗುತ್ತದೆ. ಮತ್ತೊಂದೆಡೆ ಈ ರೀತಿಯ ಪ್ರತಿಯೊಂದು ವಿಶೇಷ ಪ್ಯಾಕೇಜ್ಗಳು ಮೋದಿ ಸರ್ಕಾರದ ನಿಯಂತ್ರಣವನ್ನು ಸಡಿಲಗೊಳಿಸುತ್ತಲೇ ಹೋಗುತ್ತದೆ.
![](https://pratidhvani.com/wp-content/uploads/2024/07/mod-2.jpg)
ಹೊಸ ಆಡಳಿತ ಸೂತ್ರದ ನಿರೀಕ್ಷೆಯಲ್ಲಿ(In anticipation of a new governance formula)
ದೇಶವು 2024ರ ಚುನಾವಣೆಗಳಿಗೆ ಹೋದ ಸಂದರ್ಭದಲ್ಲಿ ಬಿಜೆಪಿ ಮೂರು ಪ್ರಮುಖ ಪ್ರಸ್ತಾಪಗಳನ್ನು ಹೊಂದಿತ್ತು. ಮೊದಲನೆಯದು ಪ್ರಧಾನಿಯವರ ಸ್ವಂತ ವರ್ಚಸ್ಸು. ಎರಡನೆಯದು ಪಕ್ಷದ ಆಡಳಿತದ ದಾಖಲೆ. ಮೂರನೆಯದು ಹಿಂದುತ್ವ. ಈ ಮೂರನ್ನೂ ಈಗ ಮರುಪರಿಶೀಲಿಸಬೇಕಾಗಿದೆ. ನರೇಂದ್ರ ಮೋದಿ ಇನ್ನೂ ಭಾರತದ ಅತ್ಯಂತ ಜನಪ್ರಿಯ ನಾಯಕರಾಗಿದ್ದಾರೆ. ಆದರೆ ಅವರ ಜನಪ್ರಿಯತೆಯು ಅವರ ಪಕ್ಷಕ್ಕೆ ಸಂಸದೀಯ ಬಹುಮತವನ್ನು ಗೆಲ್ಲಲು ಸಾಕಾಗುವುದಿಲ್ಲ. ಗ್ರಾಮೀಣ ಸಂಕಷ್ಟ ಮತ್ತು ನಗರ ನಿರುದ್ಯೋಗದಿಂದಾಗಿ ಬಿಜೆಪಿಯ ಆಡಳಿತದ ದಾಖಲೆಯನ್ನು ಈಗಾಗಲೇ ಪ್ರಶ್ನಿಸಲಾಗುತ್ತಿದೆ.
ಇತ್ತೀಚೆಗೆ ಪ್ರತಿ ದಿನವೂ ಕೆಲವು ಹೊಸ ನಿರಾಶಾದಾಯಕ, ಆಘಾತಕಾರಿ ಘಟನೆಗಳು ಮುಖ್ಯ ಸುದ್ದಿಗಳಾಗಿ ಹೊರಬರುತ್ತಿವೆ. ರೈಲು ಅಪಘಾತ, ಕುಸಿಯುತ್ತಿರುವ ವಿಮಾನ ನಿಲ್ದಾಣ, ಸೇತುವೆಗಳು, ಪರೀಕ್ಷಾ ಪ್ರಶ್ನೆಪತ್ರಿಕೆಗಳ ಹಗರಣ ಇತ್ಯಾದಿ. ಕೇವಲ ಆಡಳಿತದ ಗುಣಮಟ್ಟದ ಆಧಾರದ ಮೇಲೆ ಮತಗಳನ್ನು ಕೇಳಲು ಬಿಜೆಪಿ ಇನ್ನು ಮುಂದೆ ಮತದಾರರ ಮುಂದೆ ಹೋಗುವುದು ಸಾಧ್ಯವಿಲ್ಲ ಎಂಬುದು ಸ್ಪಷ್ಟವಾಗಿದೆ. ಅಂತಿಮವಾಗಿ, ಹಿಂದುತ್ವದ ಬಗ್ಗೆ ಹೇಳುವುದಾದರೆ, ಇದು ಅಪಾರ ವಿಶ್ವಾಸ ಇಟ್ಟಿರುವವರನ್ನು ಆಕರ್ಷಿಸುತ್ತದೆ. ಆದರೆ ಇದು ತನ್ನ ತೃಪ್ತಿಯ ಪರಾಕಾಷ್ಠೆ ತಲುಪಿಯಾಗಿದೆ. ನಮಗೆ ಉದ್ಯೋಗ ನೀಡಿ, ನಮಗೆ ಭರವಸೆ ನೀಡಿ;, ಕೇವಲ ದೇವಾಲಯಗಳ ಬಗ್ಗೆ ಮಾತನಾಡಬೇಡಿ, ಮುಸ್ಲಿಮರು ಎಷ್ಟು ಕೆಟ್ಟವರು ಎಂದು ಹೇಳುವ ಮೂಲಕ ಚುನಾವಣೆಗಳನ್ನು ಗೆಲ್ಲಲು ಪ್ರಯತ್ನಿಸಬೇಡಿ ಇದು 2024ರ ಚುನಾವಣಾ ಫಲಿತಾಂಶಗಳ ಮೂಲ ಸಂದೇಶವಾಗಿದೆ.