ಕಾಶ್ಮೀರಿ ಜನತೆಯ ಹಕ್ಕು ಮತ್ತು ಸ್ವಾತಂತ್ರ್ಯವನ್ನು ಭಾರತ ಸರ್ಕಾರ ಮರಳಿಸಬೇಕು ಎಂದು ಹೇಳಿರುವ ಡೆಮಾಕ್ರಟಿಕ್ ಪಕ್ಷದ ಅಮೇರಿಕಾ ಅಧ್ಯಕ್ಷ ಅಭ್ಯರ್ಥಿ ಜೋ ಬೈಡೆನ್, ಭಾರತದಲ್ಲಿ ಪೌರತ್ವ ಕಾಯ್ದೆ ತಿದ್ದುಪಡಿ ಹಾಗೂ ಅಸ್ಸಾಮ್ನಲ್ಲಿ ಎನ್ಆರ್ಸಿ ಹೇರಿರುವ ಕುರಿತು ಕಳವಳ ವ್ಯಕ್ತ ಪಡಿಸಿದ್ದಾರೆ.
ತನ್ನ ಚುನಾವಣಾ ಪ್ರಚಾರ ವೆಬ್ಸೈಟಿನಲ್ಲಿ ತನ್ನ ನಿಲುವು ಮತ್ತು ನಂಬಿಕೆಯ ಆಶಯವನ್ನು ವ್ಯಕ್ತಪಡಿಸಿರುವ ಜೋ- ಹಲವು ಪಂಡಗಳು, ಹಲವು ಜಾತಿ-ಧರ್ಮಗಳೊಂದಿಗೆ ಸೌಹಾರ್ದತೆಯಿಂದ ಬಾಳುವ, ಜಾತ್ಯಾತೀತೆಯ ಸುದೀರ್ಘ ಇತಿಹಾಸವಿರುವ ಪ್ರಜಾಪ್ರಭುತ್ವ ಭಾರತಕ್ಕೆ ಈ ಕ್ರಮಗಳು ಸರಿ ಹೊಂದುವುದಿಲ್ಲ ಎಂದು ಅಭಿಪ್ರಾಯಿಸಿದ್ದಾರೆ.
ಅಮೇರಿಕನ್ ಮುಸ್ಲಿಮರು ಅನುಭವಿಸುತ್ತಿರುವ ಜ್ವಲಂತ ಸಮಸ್ಯೆಗಳ ವಿರುದ್ಧ ಹೋರಾಡಲು ಅವರ ಜೊತೆ ನಿಲ್ಲುವುದಾಗಿ ಹೇಳಿಕೊಂಡಿರುವ ಅಧ್ಯಕ್ಷೀಯ ಅಭ್ಯರ್ಥಿ ʼಜನಾಂಗೀಯ ಹಲ್ಲೆ, ಇಸ್ಲಾಮೋಫೋಬಿಯಾ ಮುಂತಾದ ಸವಾಲುಗಳನ್ನು ಅಮೇರಿಕನ್ ಮುಸ್ಲಿಮರು ಎದುರಿಸುತ್ತಿದ್ದಾರೆ, ಅಮೇರಿಕಾದ ಅಭಿವೃಧ್ದಿಗಳಲ್ಲಿ ಅಮೇರಿಕನ್ ಮುಸ್ಲಿಮರ ಪಾಲೂ ಇದೆ ಎಂದು ಹೇಳಿದ್ದಾರೆ.
ಟ್ರಂಪ್ ಭಾವಿಸಿರುವಂತಹ ಅಮೇರಿಕಾ ನಮ್ಮ ಅಮೇರಿಕವಲ್ಲವೆಂದು ಹೇಳುತ್ತಲೇ ಅಭಿಯಾನ ಶುರು ಮಾಡಿದ ಜೋ, ಇಲ್ಲಿ(ಅಮೇರಿಕಾ) ನೆಲೆಸಿರುವವರು ಎಲ್ಲಿಂದ ಬಂದವರು, ಅವರ ಕುಟುಂಬಸ್ಥರು ಎಲ್ಲಿ ನೆಲೆಸಿದ್ದಾರೆ, ಅವರು ಹೇಗೆ ಕಾಣುತ್ತಾರೆ ಹಾಗೂ ಯಾವ ಜನಾಂಗ ಮತ್ತು ನಂಬಿಕೆ ಯಾವುದೂ ಇಲ್ಲಿ ಮುಖ್ಯವಾಗುವುದಿಲ್ಲ. ಎಲ್ಲಾ ಪುರುಷ ಮತ್ತು ಮಹಿಳೆಯರು ಸಮಾನರು ಹಾಗೂ ಎಲ್ಲರಿಗೂ ಗೌರವಪೂರ್ವಕವಾಗಿ ಬದುಕಲು ಹಕ್ಕು ಇದೆ ಎಂಬುವುದು ಅಮೇರಿಕಾದ ಸಿದ್ಧಾಂತ. ಹಾಗೂ ಈ ಸಿದ್ಧಾಂತ ಯಾವುದೇ ಮಿಲಿಟರಿ, ಶಕ್ತಿಶಾಲಿ ಸರ್ವಾಧಿಕಾರಿಗಿಂತ ಬಲಯುತವಾದದ್ದು ಎಂದು ಹೇಳಿದ್ದಾರೆ. ನಮ್ಮ ಪೀಳಿಗೆಯ ಎಲ್ಲರೂ ಈ ಅಲೋಚನೆಯೊಂದಿಗೆ ಸಂಪೂರ್ಣವಾಗಿ ಹೊಂದಿಕೊಳ್ಳದಿದ್ದರೂ ನಮ್ಮ ಮುಂದಿನ ತಲೆಮಾರು ಈ ವಿಶಾಲ ಮನೋಭಾವದೊಂದಿಗೆ ಬದುಕಬಲ್ಲರು ಎಂಬ ವಿಶ್ವಾಸವನ್ನು ವ್ಯಕ್ತಪಡಿಸಿದ್ದಾರೆ.
ಡೊನಾಲ್ಡ್ ಟ್ರಂಪ್ ಅಮೇರಿಕಾ ಅಧ್ಯಕ್ಷನಾಗಿ ಅಧಿಕಾರ ವಹಿಸಿಕೊಂಡಾಗಿನಿಂದ ಅಮೇರಿಕರಲ್ಲದ ಜನರ, ನಿರಾಶ್ರಿತರು, ಅಲ್ಪಸಂಖ್ಯಾತರು ಹಾಗೂ ಮುಸಲ್ಮಾನರ ವಿರುದ್ಧ ಆಕ್ರಮಣಕಾರಿ ನಿಲುವನ್ನು ತಳೆದಿದ್ದಾರೆ. ಟ್ರಂಪ್ನ ಮುಸ್ಲಿಂ ವಿರೋಧಿ ನೀತಿಗಳು ನಮ್ಮ ಆರ್ಥಿಕತೆ ಹಾಗೂ ನೈತಿಕತೆಯ ಮೇಲೆ ಬಲವಾದ ಹೊಡೆತ ನೀಡಿದೆ. ಅಮೇರಿಕಗೆ ಮುಸ್ಲಿಮರ ಪ್ರವೇಶ ನಿರ್ಭಂಧಿಸುವುದರಿಂದ ದೇಶ ಭದ್ರವಾಗಿರುತ್ತದೆ ಎಂಬ ವಾದಕ್ಕೆ ಯಾವ ಹುರುಳೂ ಇಲ್ಲ, ವೈಜ್ಞಾನಿಕ ಕಾರಣವೂ ಇಲ್ಲ ಎಂದು ಅಧ್ಯಕ್ಷೀಯ ಅಭ್ಯರ್ಥಿ ಹೇಳಿದ್ದಾರೆ.
ಜಗತ್ತಿನ ಹಲವೆಡೆ ಜರುಗುತ್ತಿರುವ ಮುಸ್ಲಿಮ್ ವಿರೋಧಿ ಬೆಳವಣಿಗೆಗಳು ಹಾಗೂ ಹಾಲಿ ಅಮೇರಿಕಾ ಅಧ್ಯಕ್ಷರ ನೀತಿಗಳು ಅಮೇರಿಕಾದ ಮುಸ್ಲಿಮರನ್ನು ಆತಂಕಕ್ಕೆ ತಳ್ಳುತ್ತಿದೆ. ಚೀನಾದ ಉಯ್ಘರ್ನಲ್ಲಿ, ಬರ್ಮಾದ ರೊಹಿಂಗ್ಯಾದಲ್ಲಿ ಹಾಗೂ ಭಾರತದಲ್ಲಿ ಮುಸ್ಲಿಂ ಬಾಹುಳ್ಯವಿರುವ ಕಾಶ್ಮೀರದಲ್ಲಿ ಪ್ರಭುತ್ವ ನಡೆಸುತ್ತಿರುವ ದೌರ್ಜನ್ಯವು ಒಪ್ಪತಕ್ಕಂತಹದಲ್ಲ ಎಂದು ಜೋ ಹೇಳಿದ್ದಾರೆ.
ಟ್ರಂಪ್ನ್ನು ಗೆಳೆಯನೆಂದು ಹೇಳಿಕೊಳ್ಳುವ ನರೇಂದ್ರ ಮೋದಿಯವರು ಎಷ್ಟು ಆಪ್ತರೋ ಗೊತ್ತಿಲ್ಲ. ಆದರೆ ಜನರನ್ನು ಧ್ರುವೀಕರಿಸಿ ಆಡಳಿತ ನಡೆಸುವುದರಲ್ಲಿ ಇಬ್ಬರೂ ಸಮಾನಮನಸ್ಕರೇ.. ಈಗ ಅದೇ ಟ್ರಂಪ್ ಪಕ್ಷದ ವಿರೋಧ ಪಕ್ಷ ಅಧ್ಯಕ್ಷೀಯ ಅಭ್ಯರ್ಥಿ ಟ್ರಂಪ್ ಮತ್ತು ಮೋದಿಯ ನಡೆಗಳನ್ನು ಟೀಕಿಸಿ ಸೌಹಾರ್ದದ ದೇಶ ಕಟ್ಟುವ ಕನಸನ್ನು ಬಿತ್ತಿದ್ದಾರೆ. ಕರೋನಾ ನಿಯಂತ್ರಿಸುವಲ್ಲಿ ವಿಫಲತೆ, ಜನಾಂಗೀಯವಾದದ ವಿರುದ್ಧ ಭುಗಿಲೆದ್ದ ಹೋರಾಟ, ಅಂತರಾಷ್ಟ್ರೀಯ ಮಟ್ಟದಲ್ಲಿ ಕುಗ್ಗುತ್ತಿರುವ ಅಮೇರಿಕಾದ ವರ್ಚಸ್ಸು ಅಮೇರಿಕಾದಲ್ಲಿ ಟ್ರಂಪ್ನ ವಿರೋಧಿ ಅಲೆ ಎದ್ದಿರುವಂತೆ ಕಾಣುತ್ತಿದೆ. ಅಮೇರಿಕನ್ನರು ಜನಾಂಗೀಯವಾದಿ ಟ್ರಂಪನ್ನು ಆಯ್ದುಕೊಳ್ಳುತ್ತಾರೋ ಮಾನವತಾವಾದಿ ಜೋ ಬೈಡನ್ರನ್ನು ಆಯ್ಕೆ ಮಾಡುತ್ತಾರೋ ಕಾದು ನೋಡಬೇಕು.
