ಶುಕ್ರವಾರದಂದು 17 ವರ್ಷದ ಅಪ್ರಾಪ್ತ ಬಾಲಕ, ಉನ್ನತ ಅಧಿಕಾರಿಗಳನ್ನು ಭೇಟಿಯಾಗಿ ತನ್ನ ಮೇಲಿರುವ ಪ್ರಕರಣ ಕೈಬಿಡುವಂತೆ ಮನವಿ ಮಾಡಿಕೊಂಡ ಬಳಿಕ ಎಪ್ರಿಲ್‌ 4 ರಂದು ನಡೆದ ಈ ಘಟನೆ ಬೆಳಕಿಗೆ ಬಂದಿದೆ.
ಹನ್ನೊಂದನೆಯ ತರಗತಿಯಲ್ಲಿ ಕಲಿಯುತ್ತಿರುವ ಬಾಲಕ, ಸರ್ಕಾರ ನೀಡುವ ಒಂದು ಸಾವಿರ ರುಪಾಯಿಯ ಹಣಕಾಸಿನ ಯೋಜನೆಗೆ ಅರ್ಜಿ ಸಲ್ಲಿಸಲು ಬೇಕಾದಂತಹ ದಾಖಲೆಗಳ ಫೊಟೋಕಾಪಿ ಪಡೆಯಲು ಗೊನೆಗಂಡ್ಲದ ಅಂಗಡಿಯೊಂದಕ್ಕೆ ತನ್ನ ಸಹೋದರನೊಂದಿಗೆ ತೆರಳಿದ್ದಾನೆ. ಅಲ್ಲಿಗೆ ಆಗಮಿಸಿದ ಸ್ಥಳೀಯ ಪೋಲಿಸ್ ಸಿಬ್ಬಂದಿಗಳು ಅಂಗಡಿ ಮಾಲಿಕ ಮತ್ತು ಇವರಿಬ್ಬರ ಮೇಲೆ ಐಪಿಸಿ ಸೆಕ್ಷನ್‌ 188 ರಡಿಯಲ್ಲಿ ಪ್ರಕರಣ ದಾಖಲಿಸಿದ್ದಾರೆ.
“ತಮ್ಮ ಮೊಬೈಲ್ ಫೋನ್‌ಗಳನ್ನು ವಶಕ್ಕೆ ಪಡೆದುಕೊಂಡ ಪೋಲಿಸರು, ಮರುದಿನ ಠಾಣೆಗೆ ಹಾಜರಾಗಲು ಸೂಚಿಸಿದ್ದಾರೆ. ಮರುದಿನ ಪೋಲಿಸ್ ಠಾಣೆಗೆ ತೆರಳಿದಾಗ ಫೋನ್‌ ಹಿಂದಿರುಗಿಸಿದರು ಆದರೆ ಪ್ರಕರಣ ರದ್ದುಗೊಳಿಸುವ ನಮ್ಮ ಮನವಿಗೆ ಅವರು ಕಿವಿಗೊಡಲಿಲ್ಲ. ಬದಲು ಕೋರ್ಟಿನಲ್ಲಿ ಪ್ರಕರಣ ಎದುರಿಸುವಂತೆ ಹೇಳಿದ್ದಾರೆ” ಎಂದು ಬಾಲಕ ಹೇಳಿದ್ದಾನೆ.
ತನ್ನ ಮೇಲಿರುವ ಪ್ರಕರಣ ಕೈ ಬಿಡುವಂತೆ ಕೋರಿ ವಿವಿಧ ಉನ್ನತಾಧಿಕಾರಿಗಳ ಕಛೇರಿಗಳಿಗೆ ಅಲೆದಾಡಿದ್ದಾನೆ. ಪೋಲಿಸ್ ಪ್ರಕರಣ ದಾಖಲಾಗಿರುವುದರಿಂದ ಭವಿಷ್ಯದಲ್ಲಿ ತನಗೆ ಕೆಲಸ ಪಡೆಯಲು ಕಷ್ಟವಾಗಬಹುದೆಂಬ ಆತಂಕದಲ್ಲಿ ಬಾಲಕ ದಿನದೂಡುತ್ತಿದ್ದಾನೆ.
ಪ್ರಕರಣ ಸದ್ಯ ಜಿಲ್ಲಾ ಪೋಲಿಸ್ ವರಿಷ್ಟಾಧಿಕಾರಿ ಕೆ ಫಕೀರಪ್ಪ ಗಮನಕ್ಕೆ ಬಂದಿದ್ದು, ತನಿಖೆ ನಡೆಸಿ ಪೋಲಿಸರು ತಪ್ಪಿತಸ್ಥರೆಂದು ಅರಿವಾದರೆ ಅವರ ವಿರುಧ್ಧ ಕ್ರಮ ಕೈಗೊಳ್ಳಲಾಗುವುದು ಎಂದಿದ್ದಾರೆ.
ADVERTISEMENT
