ಸೂಪರ್ಸ್ಟಾರ್ ಯಶ್ ಅಭಿಮಾನಿಗಳು ಬಹುದಿನಗಳಿಂದ ಕಾದಿದ್ದ ಕ್ಷಣ ಕೊನೆಗೂ ಬಂದಿದೆ. ಬಹುನಿರೀಕ್ಷಿತ ‘ಟಾಕ್ಸಿಕ್’ ಸಿನಿಮಾ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿದ್ದು, ರಾಕಿಂಗ್ ಸ್ಟಾರ್ ಅಭಿಮಾನಿಗಳ ಸಂಭ್ರಮ ಜೋರಾಗಿದೆ. ಸಿನಿಮಾ ಬಿಡುಗಡೆಯ ಬೆನ್ನಲ್ಲೇ ಯಶ್ ಮಾತ್ರವಲ್ಲದೆ, ಕಿಯಾರಾ ಅಡ್ವಾಣಿ ಅವರ ಅಭಿನಯ ಹಾಗೂ ಪಾತ್ರದ ಬಗ್ಗೆಯೂ ಭಾರೀ ಚರ್ಚೆ ನಡೆಯುತ್ತಿದೆ.
ಈ ನಡುವೆ ‘ಟಾಕ್ಸಿಕ್’ ಚಿತ್ರದ ಟೀಸರ್ ಮತ್ತು ಟ್ರೈಲರ್ನಲ್ಲಿ ಕಿಯಾರಾ ಅಡ್ವಾಣಿ ಪಾತ್ರಕ್ಕೆ ಕನ್ನಡ ಧ್ವನಿ ನೀಡಿದ ಡಬ್ಬಿಂಗ್ ಕಲಾವಿದೆ ರಿಚಾ ಶಾಸ್ತ್ರಿ ಅವರ ಕಥೆಯೂ ಗಮನ ಸೆಳೆಯುತ್ತಿದೆ.
ಕಳೆದ 10 ವರ್ಷಗಳಿಂದ ಚಿತ್ರರಂಗದಲ್ಲಿ ಗುರುತಿಸಿಕೊಂಡಿರುವ ರಿಚಾ, ಕೊರೊನಾ ಬಳಿಕ ಡಬ್ಬಿಂಗ್ ಕ್ಷೇತ್ರದಲ್ಲಿ ಹೆಚ್ಚು ಸಕ್ರಿಯರಾಗಿದ್ದಾರೆ. ಇತ್ತೀಚಿನ ಪಾಡ್ಕಾಸ್ಟ್ವೊಂದರಲ್ಲಿ ಮಾತನಾಡಿರುವ ಅವರು, ‘ಟಾಕ್ಸಿಕ್’ ಚಿತ್ರಕ್ಕೆ ಅವಕಾಶ ಸಿಕ್ಕಿದ್ದು ಹೇಗೆ, 120ಕ್ಕೂ ಹೆಚ್ಚು ಮಂದಿಯ ನಡುವೆ ಆಡಿಷನ್ ಗೆದ್ದು ಕಿಯಾರಾ ಪಾತ್ರಕ್ಕೆ ಧ್ವನಿ ನೀಡಿದ್ದು ಹೇಗೆ ಹಾಗೂ ಯಶ್ ಅವರೊಂದಿಗೆ ಕೆಲಸ ಮಾಡಿದ ಅನುಭವವನ್ನು ಹಂಚಿಕೊಂಡಿದ್ದಾರೆ.
‘ಟಾಕ್ಸಿಕ್’ ಚಿತ್ರದ ಡಬ್ಬಿಂಗ್ಗಾಗಿ ಆಕಾಶ್ ಸ್ಟುಡಿಯೋದಿಂದ ಜಯದೇವ್ ಮೋಹನ್ ಅವರು ರಿಚಾ ಅವರಿಗೆ ಕರೆ ಮಾಡಿದ್ದರು. ಸ್ಯಾಂಪಲ್ ನೀಡಲು ತೆರಳಿದ್ದ ಅವರು ತಾರಾ ಸುತಾರಿಯಾ ಹಾಗೂ ನಯನತಾರಾ ಪಾತ್ರಗಳಿಗೆ ಧ್ವನಿ ನೀಡಿ ಬಂದಿದ್ದರು.ಆದರೆ ಅಲ್ಲಿ ಈಗಾಗಲೇ 100ರಿಂದ 120ಕ್ಕೂ ಹೆಚ್ಚು ಮಂದಿ ಆಡಿಷನ್ ನೀಡಿರುವುದು ರಿಚಾ ಅವರಿಗೆ ತಿಳಿಯಿತು. ಇದರಿಂದ ತಾನು ಆಯ್ಕೆಯಾಗುವ ಬಗ್ಗೆ ಇದ್ದ ಆತ್ಮವಿಶ್ವಾಸವೂ ಕಡಿಮೆಯಾಯಿತು ಎಂದು ಅವರು ನೆನಪಿಸಿಕೊಂಡಿದ್ದಾರೆ. ಆದರೆ ಕೊನೆಗೆ ಅವರ ಪ್ರತಿಭೆ ಕೈಹಿಡಿದಿದ್ದು, ತಾರಾ ಸುತಾರಿಯಾ ಪಾತ್ರಕ್ಕೆ ರಿಚಾ ಅವರ ಧ್ವನಿ ಆಯ್ಕೆಯಾಯಿತು.
ಇದರ ಬೆನ್ನಲ್ಲೇ ರಿಚಾ ತಮ್ಮ ಮನೆಯಲ್ಲಿ ಹುಟ್ಟುಹಬ್ಬದ ಗೆಟ್-ಟುಗೆದರ್ ಆಯೋಜಿಸಿದ್ದರು. ಸಂಜೆ ಸುಮಾರು 7.30ಕ್ಕೆ ಬಂದ ಒಂದು ಫೋನ್ ಕಾಲ್ ಅವರ ಇಡೀ ದಿನದ ಸಂಭ್ರಮವನ್ನು ಮತ್ತಷ್ಟು ಹೆಚ್ಚಿಸಿತು.ಜಯದೇವ್ ಮೋಹನ್ ಕರೆ ಮಾಡಿ, ನಿರ್ದೇಶಕಿ ಗೀತು ಮೋಹನ್ದಾಸ್ ಹಾಗೂ ಯಶ್ ಅವರಿಗೆ ರಿಚಾ ಅವರ ಧ್ವನಿ ಇಷ್ಟವಾಗಿದ್ದು, ಕಿಯಾರಾ ಅಡ್ವಾಣಿ ಪಾತ್ರಕ್ಕೂ ಧ್ವನಿ ನೀಡಲು ಮತ್ತೊಮ್ಮೆ ಆಡಿಷನ್ ನೀಡಬೇಕು ಎಂದು ತಿಳಿಸಿದರು. ಈ ಸುದ್ದಿ ಕೇಳಿದ ರಿಚಾ ಕೂಡಲೇ ಆಕಾಶ್ ಸ್ಟುಡಿಯೋಗೆ ತೆರಳಿದರು.
ಸ್ಟುಡಿಯೋದಲ್ಲಿ ಗೀತು ಮೋಹನ್ದಾಸ್ ಅವರು ರಿಚಾ ಅವರ ಧ್ವನಿಯನ್ನು ಮೆಚ್ಚಿಕೊಂಡರೂ, ಅಂತಿಮ ಆಯ್ಕೆಗೆ ಸುಲಭವಾದ ಸೀನ್ ನೀಡಲಿಲ್ಲ. ಭಾವುಕತೆಯಿಂದ ಕೂಡಿದ ಕಠಿಣ ಸಿಂಕ್ ಸೌಂಡ್ ಸೀನ್ ಅನ್ನು ಆಡಿಷನ್ಗಾಗಿ ನೀಡಲಾಯಿತು.ಚಳಿಯ ವಾತಾವರಣದಲ್ಲಿಯೂ ಧ್ವನಿಯಲ್ಲಿ ಭಾವನೆ, ನಡುಕ ಹಾಗೂ ಪಾತ್ರದ ತೀವ್ರತೆಯನ್ನು ಮೂಡಿಸುವ ಸವಾಲು ರಿಚಾ ಅವರ ಮುಂದಿತ್ತು. ಅದನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ ಬಳಿಕ ಸೌಂಡ್ ಇಂಜಿನಿಯರ್ ಆನಂದ್ ಕೂಡ ಅವರ ಪ್ರತಿಭೆಯನ್ನು ಮೆಚ್ಚಿಕೊಂಡರು.
ಬಳಿಕ ಕಿಯಾರಾ ಪಾತ್ರಕ್ಕೆ ಈ ಹಿಂದೆ ಆಯ್ಕೆಯಾಗಿದ್ದ ಮತ್ತೊಬ್ಬ ಕಲಾವಿದೆಯ ಧ್ವನಿಯನ್ನು ಬದಲಿಸಿ, ರಿಚಾ ಅವರ ಧ್ವನಿಯನ್ನೇ ಅಂತಿಮಗೊಳಿಸಲಾಯಿತು.ಬಾಂಬೆಯಲ್ಲಿ ಕರೆಕ್ಷನ್ ಡಬ್ಬಿಂಗ್ ನಡೆಯುತ್ತಿದ್ದ ವೇಳೆ ರಿಚಾ ಅವರಿಗೆ ಯಶ್ ಅವರನ್ನು ಹತ್ತಿರದಿಂದ ನೋಡುವ ಹಾಗೂ ಅವರ ನಿರ್ದೇಶನದಲ್ಲಿ ಕೆಲಸ ಮಾಡುವ ಅವಕಾಶವೂ ಸಿಕ್ಕಿತ್ತು.ಟ್ರೈಲರ್ ನೋಡಿದಾಗ ಯಶ್ ಕಾಣಿಸುವುದಿಲ್ಲ, ಬದಲಿಗೆ ಪಾತ್ರದಲ್ಲಿ ಸಂಪೂರ್ಣವಾಗಿ ತೊಡಗಿಸಿಕೊಂಡಿರುವ ನಟನೊಬ್ಬ ಕಾಣಿಸುತ್ತಾನೆ ಎಂದು ರಿಚಾ ತಮ್ಮ ಅನುಭವ ಹಂಚಿಕೊಂಡಿದ್ದಾರೆ. ಸಿನಿಮಾ ಹಾಲಿವುಡ್ ಮಟ್ಟದಲ್ಲಿ ಮೂಡಿಬಂದಿದೆ ಎಂಬ ಅಭಿಪ್ರಾಯವನ್ನೂ ಅವರು ವ್ಯಕ್ತಪಡಿಸಿದ್ದಾರೆ.
ಯಶ್ ಅವರ ಲುಕ್ ಮುಂಚಿತವಾಗಿ ರಿವೀಲ್ ಆಗಬಾರದು ಎಂಬ ಕಾರಣಕ್ಕೆ ಅವರೊಂದಿಗೆ ಫೋಟೋ ತೆಗೆದುಕೊಳ್ಳಲು ಸಾಧ್ಯವಾಗಿರಲಿಲ್ಲ. ಆದರೆ ಅವರ ಪಕ್ಕದಲ್ಲೇ ಕುಳಿತು ಸೀನ್ಗಳ ಕುರಿತು ಇನ್ಪುಟ್ ನೀಡಿ ಕೆಲಸ ಮಾಡಿದ್ದು ತಮ್ಮ ಪಾಲಿಗೆ ವಿಶೇಷ ಅನುಭವ ಎಂದು ರಿಚಾ ಹೇಳಿದ್ದಾರೆ.‘ಟಾಕ್ಸಿಕ್’ನಲ್ಲಿ ಕಿಯಾರಾ ಅಡ್ವಾಣಿ ಕನ್ನಡ ಸಂಭಾಷಣೆಗಳಿಗೆ ತಕ್ಕಂತೆ ಲಿಪ್ ಮೂವ್ಮೆಂಟ್ ನೀಡಿದ್ದರು. ಹೀಗಾಗಿ ಅವರ ಮುಖಭಾವ, ತುಟಿ ಚಲನೆ ಹಾಗೂ ಭಾವನೆಗಳಿಗೆ ಸರಿಯಾಗಿ ಕನ್ನಡ ಧ್ವನಿಯನ್ನು ಹೊಂದಿಸುವುದು ರಿಚಾ ಅವರ ಪ್ರಮುಖ ಜವಾಬ್ದಾರಿಯಾಗಿತ್ತು.ಪರದೆಯ ಮೇಲೆ ಕಿಯಾರಾ ಅವರ ಅಭಿನಯ ಎಷ್ಟು ಮುಖ್ಯವೋ, ಅವರ ಪಾತ್ರಕ್ಕೆ ಸೂಕ್ತವಾದ ಧ್ವನಿ ನೀಡುವುದೂ ಅಷ್ಟೇ ಸವಾಲಿನ ಕೆಲಸವಾಗಿತ್ತು.
ಡಬ್ಬಿಂಗ್ ಕಲಾವಿದರಿಗೆ ಧ್ವನಿಯೇ ದೊಡ್ಡ ಆಸ್ತಿ. ‘ಟಾಕ್ಸಿಕ್’ ಚಿತ್ರದ ಕೆಲಸ ನಡೆಯುತ್ತಿದ್ದ ಸಂದರ್ಭದಲ್ಲಿ ಧ್ವನಿಗೆ ಯಾವುದೇ ತೊಂದರೆಯಾಗದಂತೆ ರಿಚಾ ಹಲವು ಮುನ್ನೆಚ್ಚರಿಕೆಗಳನ್ನು ತೆಗೆದುಕೊಂಡಿದ್ದರು.ಬಿಸಿನೀರು ಕುಡಿಯುವುದು, ಐಸ್ಕ್ರೀಮ್ ಸೇವಿಸದಿರುವುದು, ಮಳೆಯಲ್ಲಿ ನೆನೆಯದಿರುವುದು ಹಾಗೂ ಈಜುಕೊಳದಿಂದ ದೂರವಿರುವುದು ಸೇರಿದಂತೆ ಹಲವು ನಿಯಮಗಳನ್ನು ಪಾಲಿಸಿದ್ದರು. ಸಣ್ಣ ಪ್ರಮಾಣದಲ್ಲಿ ಶೀತದ ಲಕ್ಷಣ ಕಂಡುಬಂದರೂ ಧ್ವನಿ ಹಾಳಾಗದಂತೆ ತಕ್ಷಣ ಎಚ್ಚರಿಕೆ ವಹಿಸುತ್ತಿದ್ದರು.ರಿಚಾ ಅವರ ಮಾತಿನಲ್ಲೇ ಹೇಳುವುದಾದರೆ, ಧ್ವನಿಗೆ ಮುಖ ಇಲ್ಲದಿರಬಹುದು. ಆದರೆ ಪ್ರತಿಯೊಂದು ಧ್ವನಿಯ ಹಿಂದೆ ಒಂದು ಕಥೆ ಇದ್ದೇ ಇರುತ್ತದೆ.
