ಅಮೆರಿಕದ ಅತಿದೊಡ್ಡ ಲೈಂಗಿಕ ಜಾಲ ಪ್ರಕರಣದ ಅಪರಾಧಿ ಜೆಫ್ರಿ ಎಡ್ವರ್ಡ್ ಎಪ್ಸ್ಟೀನ್(Jeffrey Edward Epstein) ಕುರಿತ ಎಪ್ಸ್ಟೀನ್ ಫೈಲ್ಸ್ ಬಹಿರಂಗಗೊಂಡಿದ್ದು, ಅಮೆರಿಕದಲ್ಲಿ ಮಾತ್ರವಲ್ಲದೇ ಜಾಗತಿಕ ಮಟ್ಟದಲ್ಲಿ ಭಾರೀ ಚರ್ಚೆ ಹುಟ್ಟಿಸಿದೆ.
ಈ ಫೈಲ್ಸ್ನಲ್ಲಿ ರಾಜಕಾರಣಿಗಳು, ಉದ್ಯಮಿಗಳು, ಮನರಂಜನೆ ಕ್ಷೇತ್ರದ ವ್ಯಕ್ತಿಗಳು ಹಾಗೂ ಸಾರ್ವಜನಿಕ ಚಿಂತಕರು ಸೇರಿದಂತೆ 200ಕ್ಕೂ ಹೆಚ್ಚು ಪ್ರಮುಖ ವ್ಯಕ್ತಿಗಳ ಹೆಸರುಗಳು ಉಲ್ಲೇಖಗೊಂಡಿವೆ. ಅಮೆರಿಕದ ಮಾಜಿ ಅಧ್ಯಕ್ಷ ಬಿಲ್ ಕ್ಲಿಂಟನ್, ಹಾಲಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸೇರಿದಂತೆ ಹಲವು ಗಣ್ಯರು ಈ ದಾಖಲೆಗಳಲ್ಲಿ ಸಂಭಾಷಣೆ, ಭೇಟಿಗಳು ಮತ್ತು ಫೋಟೋಗಳ ಮೂಲಕ ಕಾಣಿಸಿಕೊಂಡಿದ್ದಾರೆ.
ಹೆಚ್ಚು ಗಮನ ಸೆಳೆಯುತ್ತಿರುವ ವಿಚಾರವೆಂದರೆ, ಈ ದಾಖಲೆಗಳಲ್ಲಿ ಯಾರಾದರೂ ನೇರವಾಗಿ ಅಪರಾಧಿಗಳಾಗಿದ್ದಾರೆಂದು ಹೇಳಲು ಸಾಕ್ಷ್ಯವಿಲ್ಲ. ಎಪ್ಸ್ಟೀನ್ 2008ರಲ್ಲಿ ಶಿಕ್ಷೆ ಪಡೆದ ನಂತರವೂ ಕೆಲವು ಗಣ್ಯರೊಂದಿಗೆ ಆತ ಸಂಪರ್ಕ ಇರುವ ಬಗ್ಗೆ ದಾಖಲೆಗಳು ತಿಳಿಸುತ್ತಿವೆ.
ಈ ದಾಖಲೆಗಳಲ್ಲಿ ಛಾಯಾಚಿತ್ರಗಳು, ಇ-ಮೇಲ್ಗಳು, ಆಡಿಯೋ ರೆಕಾರ್ಡಿಂಗ್ಗಳು ಮತ್ತು ಹಲವು ವರ್ಷಗಳ ತನಿಖೆಯ ವಿವರಗಳಿವೆ. ಈ ದಾಖಲೆಗಳು ಬಹಿರಂಗಗೊಂಡ ಕೇವಲ ಒಂದು ದಿನದಲ್ಲಿ, 16ಕ್ಕೂ ಹೆಚ್ಚು ಪ್ರಮುಖ ದಾಖಲೆಗಳು ನ್ಯಾಯಾಂಗ ಇಲಾಖೆಯ ವೆಬ್ಸೈಟ್ನಿಂದ ಯಾವುದೇ ವಿವರಣೆ ನೀಡದೆ ಮಾಯವಾಗಿವೆ. ಇದರಲ್ಲಿ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಪ್ರಥಮ ಮಹಿಳೆ ಮೆಲಾನಿಯಾ ಟ್ರಂಪ್, ಮತ್ತು ಎಪ್ಸ್ಟೀನ್ನ ಆಪ್ತ ಸಹಾಯಕ ಮ್ಯಾಕ್ಸ್ವೆಲ್ ಅವರೊಂದಿಗೆ ಎಪ್ಸ್ಟೀನ್ ಕಾಣಿಸಿಕೊಂಡಿರುವ ಛಾಯಾಚಿತ್ರವೂ ಸೇರಿದೆ ಎನ್ನಲಾಗಿದೆ.
ಜೆಫ್ರಿ ಎಪ್ಸ್ಟೀನ್ ಫೈಲ್ಸ್ ಕೇವಲ ಒಂದೇ ದಾಖಲೆಯಲ್ಲ, ಬದಲಾಗಿ ದಶಕಗಳ ಕಾಲ ನಡೆದ ಲೈಂಗಿಕ ಶೋಷಣೆ, ಅಧಿಕಾರದ ದುರ್ಬಳಕೆಯ ಜಾಗತೀಕ ಮಟ್ಟದ ಅತ್ಯಮೂಲ್ಯ ಸಂಕೀರ್ಣ ದಾಖಲೆಯಾಗಿದೆ. ಈ ಫೈಲ್ಗಳ ಬಿಡುಗಡೆಯು ಅಮೆರಿಕದ ಶ್ರೀಮಂತರು, ರಾಜಕಾರಣಿಗಳು ಮತ್ತು ಪ್ರಭಾವಿ ವ್ಯಕ್ತಿಗಳ ಕರಾಳ ಲೈಂಗಿಕ ಜಾಲವನ್ನು ಜಗತ್ತಿನ ಮುಂದೆ ತೆರೆದಿಟ್ಟಿದೆ. ಎಪ್ಸ್ಟೀನ್ ಫೈಲ್ಸ್ ಬಹಿರಂಗಗೊಳ್ಳಲು ಅಮೆರಿಕದ ನ್ಯಾಯಾಲಯ ಮತ್ತು ಕಾಂಗ್ರೆಸ್ ಒತ್ತಡ ಕಾರಣವಾಯಿತು. ಬಹಿರಂಗಗೊಂಡ ದಾಖಲೆಗಳಲ್ಲಿ ಇ-ಮೇಲ್, ಛಾಯಾಚಿತ್ರಗಳು, ಆಡಿಯೋ ರೆಕಾರ್ಡಿಂಗ್ಗಳು ಮತ್ತು ದಶಕಗಳ ತನಿಖೆಯ ವಿವರಗಳಿವೆ.
ಅಮೇರಿಕಾದ ಪ್ರಭಾವಿಗಳಾದ ಬಿಲ್ ಕ್ಲಿಂಟನ್, ಡೊನಾಲ್ಡ್ ಟ್ರಂಪ್, ಲಾರಿ ಸಮ್ಮರ್ಸ್, ರಾಬರ್ಟ್ ಎಫ್. ಕೆನೆಡಿ ಜೂನಿಯರ್, ಪೀಟರ್ ಮ್ಯಾಂಡೆಲ್ಸನ್, ಎಹುದ್ ಬರಾಕ್, ಬಿಲ್ ರಿಚರ್ಡ್ಸನ್, ಜಾರ್ಜ್ ಮಿಚೆಲ್, ಎಲಾನ್ ಮಸ್ಕ್, ಬಿಲ್ ಗೇಟ್ಸ್, ರೀಡ್ ಹಾಫ್ಮನ್, ಪೀಟರ್ ಥಿಯಲ್, ವೋಮಿ ಕ್ಯಾಂಪ್ಬೆಲ್, ಕಾರ್ಟ್ನಿ ಲವ್, ಕ್ರಿಸ್ ಟಕ್ಕರ್, ಡೇವಿಡ್ ಕಾಪರ್ಫೀಲ್ಡ್, ಪೆಗ್ಗಿ ಸೀಗಲ್, ನೋಮ್ ಚೋಮ್ಸ್ಕಿ ಸೇರಿದಂತೆ ಅನೇಕರ ಹೆಸರು ಈ ದಾಖಲೆಯಲ್ಲಿ ಉಲ್ಲೇಖವಾಗಿದೆ.
ಯಾರು ಜೆಫ್ರಿ ಎಪ್ಸ್ಟೀನ್?
ಜೆಫ್ರಿ ಎಡ್ವರ್ಡ್ ಎಪ್ಸ್ಟೀನ್ ಓರ್ವ ಅಮೆರಿಕನ್ ಹಣಕಾಸುದಾರ ಮತ್ತು ಲೈಂಗಿಕ ಪ್ರಕರಣದಲ್ಲಿ ಶಿಕ್ಷೆಗೊಳಗಾದ ಅಪರಾಧಿ. ದಶಕಗಳ ಕಾಲ ಆತ ತನ್ನ ಅಧಿಕಾರ ಮತ್ತು ಪ್ರಭಾವವನ್ನು ಬಳಸಿಕೊಂಡು, ಹಲವಾರು ಮಹಿಳೆಯರು ಮತ್ತು ಅಪ್ರಾಪ್ತ ಬಾಲಕಿಯರ ಮೇಲೆ ಮೇಲೆ ಲೈಂಗಿಕ ದೌರ್ಜನ್ಯ ಎಸಗಿದ್ದ. ಪ್ರಕರಣದಲ್ಲಿ ದೋಷಿ ಎಂದು ಸಾಬೀತಾಗಿ ಜೈಲು ಶಿಕ್ಷೆ ಅನುಭವಿಸುತ್ತಿದ್ದ ವೇಳೆ, 2019ರಲ್ಲಿ ತನ್ನ ಜೈಲು ಕೊಠಡಿಯಲ್ಲಿ ಜೆಫ್ರಿ ಎಪ್ಸ್ಟೀನ್ ನೇಣು ಬಿಗಿದುಕೊಂಡು ಆತ್ಮಹತ್ಯೆಗೆ ಶರಣಾಗಿದ್ದ ಎಂದು ವರದಿಯಾಗಿದೆ.
ಇನ್ನು ಸದ್ಯದ ದಿನಗಳಲ್ಲಿ ಜೆಫ್ರಿ ಎಪ್ಸ್ಟೀನ್ ಫೈಲ್ಸ್ ಬಹಿರಂಗಗೊಂಡು, ಅಧಿಕಾರ, ಹಣ ಮತ್ತು ಪ್ರಭಾವದ ಬಳಕೆಯಿಂದ ದಶಕಗಳ ಕಾಲ ನಡೆಯುತ್ತಿದ್ದ ಲೈಂಗಿಕ ಅಪರಾಧ ಜಾಲದ ಕರಾಳ ಮುಖವನ್ನು ಜಗತ್ತಿಗೆ ತೋರಿಸಿದೆ. ಪ್ರಕರಣದಲ್ಲಿ ನ್ಯಾಯಕ್ಕಾಗಿ ಹೋರಾಟ ಇನ್ನೂ ಮುಂದುವರೆದಿದೆ.
