ಬೆಂಗಳೂರು : ಐಸಿಸಿ ಅಂಡರ್-19 ಕ್ರಿಕೆಟ್ ಪಂದ್ಯದಲ್ಲಿ ಭಾರತ ಆರನೇ ಬಾರಿಗೆ ಗೆಲುವು ಸಾಧಿಸಿರುವುದಕ್ಕೆ ಕೇಂದ್ರ ಸಚಿವ ಹೆಚ್.ಡಿ. ಕುಮಾರಸ್ವಾಮಿ ತಂಡಕ್ಕೆ ಅಭಿನಂದನೆಗಳನ್ನು ತಿಳಿಸಿದ್ದಾರೆ.
ಐಸಿಸಿ ಅಂಡರ್-19 ಕ್ರಿಕೆಟ್ ವಿಶ್ವಕಪ್ ಗೆದ್ದ ಮತ್ತು ಐತಿಹಾಸಿಕ 6ನೇ ಪ್ರಶಸ್ತಿಯನ್ನು ಜಯಿಸಿದ ಭಾರತ ಅಂಡರ್-19 ಕ್ರಿಕೆಟ್ ತಂಡದ ಸಾಧನೆ ಇದು ಯುವ ಕ್ರಿಕೆಟ್ನಲ್ಲಿ ಭಾರತದ ನಿರಂತರ ಶ್ರೇಷ್ಠತೆಗೆ ಗಮನಾರ್ಹ ಸಾಕ್ಷಿಯಾಗಿದೆ ಎಂದು ಶ್ಲಾಘಿಸಿದ್ದಾರೆ.
ಇದನ್ನೂ ಓದಿ : ಇಂಗ್ಲೆಂಡ್ ಬಗ್ಗು ಬಡೆದ ಮರಿಹುಲಿಗಳು : U19 ವಿಶ್ವಕಪ್ ಮುಡಿಗೇರಿಸಿಕೊಂಡ ಭಾರತ..
ಈ ಸ್ಮರಣೀಯ ವಿಜಯವು ವೈಭವ್ ಸೂರ್ಯವಂಶಿ ಅವರ ಸಂವೇದನಾಶೀಲ ಇನ್ನಿಂಗ್ಸ್ನಿಂದ ಬಲಗೊಂಡಿತು. ಕೇವಲ 80 ಎಸೆತಗಳಲ್ಲಿ ಅವರು ಸಿಡಿಸಿದ 175 ರನ್ಗಳು ಇಷ್ಟು ಚಿಕ್ಕ ವಯಸ್ಸಿನಲ್ಲಿ ಅವರ ಅಸಾಧಾರಣ ಪ್ರತಿಭೆ, ಆತ್ಮವಿಶ್ವಾಸ ಮತ್ತು ಪ್ರಬುದ್ಧತೆಯನ್ನು ಪ್ರದರ್ಶಿಸುವಂತಾಗಿದೆ ಎಂದು ಬಣ್ಣಿಸಿದ್ದಾರೆ.
ಯುವ ನಾಯಕ ಆಯುಷ್ ಮ್ಹಾತ್ರೆ ಅವರ ಅತ್ಯುತ್ತಮ ನಾಯಕತ್ವ, ಅವರ ತಾಳ್ಮೆಯ ನಿರ್ಧಾರಗಳು ಮತ್ತು ನಿರ್ಣಾಯಕ ಕ್ಷಣಗಳಲ್ಲಿ ತಂಡದ ಎಲ್ಲಾ ಆಟಗಾರರ ಒಗ್ಗಟ್ಟಿನ ಅಮೋಘ ಪ್ರದರ್ಶನ ಕ್ರಿಕೆಟ್ ಇತಿಹಾಸದಲ್ಲಿ ಒಂದು ಮೈಲಿಗಲ್ಲು. ಈ ಯುವ ಚಾಂಪಿಯನ್ಗಳು ನಿರಂತರ ಯಶಸ್ಸು ಕಾಣಲಿ ಮತ್ತು ಮುಂದೆ ಇನ್ನೂ ಅನೇಕ ಮೈಲಿಗಲ್ಲುಗಳನ್ನು ಸಾಧಿಸಲಿ ಎಂದು ಕುಮಾರಸ್ವಾಮಿ ಶುಭಹಾರೈಸಿದ್ದಾರೆ.
