ನಟ ದಳಪತಿ ವಿಜಯ್ ಕ್ರಿಶ್ಚಿಯನ್ ಧರ್ಮಕ್ಕೆ ಸೇರಿದವರಾದರೂ, ಅವರು ಹಿಂದು ದೇವಸ್ಥಾನಗಳು, ಚರ್ಚ್ಗಳು ಮತ್ತು ದರ್ಗಾಗಳಲ್ಲಿ ಕಾಣಿಸಿಕೊಳ್ಳುವುದು ಹಲವರಲ್ಲಿ ಕುತೂಹಲ ಮೂಡಿಸಿದೆ. ಈ ಹಿಂದೆ ನೀಡಿದ ಸಂದರ್ಶನವೊಂದರಲ್ಲಿ ವಿಜಯ್ ತಮ್ಮ ನಂಬಿಕೆಯ ಬಗ್ಗೆ ಸ್ಪಷ್ಟನೆ ನೀಡಿದ್ದರು.“ನಾನು ದೇವರನ್ನು ನಂಬುತ್ತೇನೆ. ಚರ್ಚ್ಗೂ ಹೋಗುತ್ತೇನೆ, ದೇವಸ್ಥಾನಗಳಿಗೂ ಹೋಗುತ್ತೇನೆ, ದರ್ಗಾಕ್ಕೂ ಭೇಟಿ ನೀಡಿದ್ದೇನೆ. ಎಲ್ಲೆಡೆ ನನಗೆ ಒಂದೇ ದೈವಿಕ ಭಾವನೆ ಬರುತ್ತದೆ,” ಎಂದು ಅವರು ಹೇಳಿದ್ದಾರೆ.
ವಿಜಯ್ ಅವರ ಕುಟುಂಬ ಹಿನ್ನೆಲೆ ಕೂಡ ಈ ನಿಲುವಿಗೆ ಕಾರಣವಾಗಿದೆ. ಅವರ ತಾಯಿ ಹಿಂದು ಧರ್ಮದವರಾಗಿದ್ದು, ತಂದೆ ಕ್ರಿಶ್ಚಿಯನ್. ಇಬ್ಬರೂ ಪ್ರೀತಿಸಿ ವಿವಾಹವಾಗಿದ್ದು, ಯಾವ ಧರ್ಮಕ್ಕೂ ಬದ್ಧತೆ ಇರಬೇಕೆಂಬ ಒತ್ತಡವನ್ನು ಮನೆಯಲ್ಲೇ ಇಡಲಾಗಲಿಲ್ಲ. ಇದೇ ಮೌಲ್ಯಗಳನ್ನು ತಮ್ಮ ಮಕ್ಕಳಿಗೂ ಮುಂದುವರಿಸುವುದಾಗಿ ವಿಜಯ್ ತಿಳಿಸಿದ್ದಾರೆ.ವಿಜಯ್ ಅವರ ತಾಯಿ ಸಾಯಿಬಾಬಾ ಭಕ್ತೆಯಾಗಿರುವ ಕಾರಣ, ಅವರಿಗಾಗಿ ಸಾಯಿ ಬಾಬಾ ದೇವಸ್ಥಾನವನ್ನು ನಿರ್ಮಿಸಿರುವುದು ವಿಶೇಷ. ಆದರೆ ಇದನ್ನು ಅವರು ಯಾವುದೇ ಪ್ರಚಾರವಿಲ್ಲದೆ ಸರಳವಾಗಿ ನೆರವೇರಿಸಿದ್ದರು.
ಇದಲ್ಲದೆ, ಹಿಂದು ಸಂಪ್ರದಾಯದಂತೆ ವಿಜಯ್ ಅವರ ತಂದೆ ಎಸ್.ಎ. ಚಂದ್ರಶೇಖರ್ ಅವರ 80ನೇ ವರ್ಷದ ಶಾಂತಿ ಕಾರ್ಯಕ್ರಮವನ್ನು ತಿರುಕಡೈಯೂರ್ ಅಮೃತೇಶ್ವರ ದೇವಸ್ಥಾನದಲ್ಲಿ ನೆರವೇರಿಸಲಾಗಿದೆ. ವಿಜಯ್ ಮತ್ತು ಸಂಗೀತಾ ಅವರ ವಿವಾಹವೂ ಹಿಂದು ಸಂಪ್ರದಾಯದಂತೆ ನಡೆದಿರುವುದಾಗಿ ಕುಟುಂಬವೇ ತಿಳಿಸಿದೆ. ಎಲ್ಲ ಧರ್ಮಗಳನ್ನು ಸಮಾನವಾಗಿ ಗೌರವಿಸುವ ವಿಜಯ್ ಅವರ ನಿಲುವು, ಧರ್ಮಸೌಹಾರ್ದತೆಗೆ ಉದಾಹರಣೆಯಾಗಿ ಕಾಣಿಸಿಕೊಂಡಿದೆ.
