ಬೆಂಗಳೂರು : ಐಪಿಎಲ್ ಪಂದ್ಯದ 19ನೇ ಆವೃತ್ತಿಯ ಆರಂಭಕ್ಕೆ ಕ್ಷಣಗಣನೆ ಆರಂಭವಾಗಿದೆ. ನಾಳೆ ಸಂಜೆ ಅದ್ಧೂರಿ ತೆರೆ ಕಾಣಲಿದೆ. ಇದಕ್ಕೆ ಆರ್ಸಿಬಿ ತಂಡವೂ ಸಂಪೂರ್ಣ ಸಿದ್ಧತೆ ಮಾಡಿಕೊಂಡಿದ್ದು, ಇದೀಗ ತಂಡಕ್ಕೆ ಇನ್ನಷು ಬಲ ಬಂದಂತಾಗಿದ್ದು, ಆಸ್ಟ್ರೇಲಿಯಾದ ವೇಗಿ ಜೋಶ್ ಹ್ಯಾಜಲ್ವುಡ್ ಆರ್ಸಿಬಿ ಪರ ಆಡಲು ನಿನ್ನೆಯಷ್ಟೇ ತಂಡವನ್ನು ಸೇರಿರುವುದು ಅಭಿಮಾನಿಗಳಲ್ಲಿ ಉತ್ಸಾಹ ಮೂಡಲು ಕಾರಣವಾಗಿದೆ.
ಗಾಯದಿಂದ ತವರಿಗೆ ಮರಳಿದ್ದ ಹ್ಯಾಜಲ್ವುಡ್ ಇದೀಗ ಚೇತರಿಸಿಕೊಂಡು ಉದ್ಘಾಟನಾ ಪಂದ್ಯದಲ್ಲಿಯೇ ಸನ್ರೈಸರ್ಸ್ ಹೈದರಾಬಾದ್ ವಿರುದ್ಧದ ಪಂದ್ಯದಲ್ಲಿ ಮಾರಕ ಬೌಲಿಂಗ್ ದಾಳಿ ನಡೆಸಲಿದ್ದಾರೆ. ಈ ಹಿನ್ನೆಲೆಯಲ್ಲಿ ಹಾಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಚಾಂಪಿಯನ್ಗಳಲ್ಲಿ ಈ ವೇಗಿಯ ಆಗಮನದಿಂದ ಇನ್ನಷ್ಟು ನಿರೀಕ್ಷೆ ಹೆಚ್ಚಾಗುವಂತೆ ಮಾಡಿದೆ.
ಈ ಕುರಿತು ವಿಡಿಯೋ ಒಂದನ್ನು ಆರ್ಸಿಬಿ ಆಡಳಿತ ಮಂಡಳಿಯು ತನ್ನ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದೆ. ಹ್ಯಾಜಲ್ವುಡ್ ಕಾರಿನಿಂದ ಇಳಿದು ತಂಡದ ಸದಸ್ಯರೊಂದಿಗೆ ಮಾತನಾಡುವುದನ್ನು ತೋರಿಸುವುದರ ಮೂಲಕ ಮಂಡಳಿಯು ನಮ್ಮ ತಂಡಕ್ಕೆ ಮತ್ತಷ್ಟು ಶಕ್ತಿ ಬಂದಿದೆ ಎಂಬ ಸಂದೇಶ ರವಾನಿಸಿದೆ.
ಇದನ್ನೂ ಓದಿ : ಭಾರತಕ್ಕೆ ಭಯಂಕರ ಮಾದಕ ವಸ್ತು ಎಂಟ್ರಿ? 2 ಗಂಟೆ ಕಲ್ಲಂತೆ ನಿಂತ ಬ್ಲಿಂಕಿಟ್ ಡೆಲಿವರಿ ಬಾಯ್!
ಪ್ರಮುಖವಾಗಿ ಹಲವು ದಿನಗಳ ಹಿಂದಷ್ಟೇ ತಂಡದ ಆಟಗಾರರು ಹ್ಯಾಜಲ್ವುಡ್ ನಮ್ಮ ತಂಡ ಸೇರಲಿದ್ದಾರೆ ಎಂದು ಹೇಳಿದ್ದರು. ಆದರೆ ಅಧಿಕೃತವಾಗಿ ಹ್ಯಾಜಲ್ವುಡ್ ಎಂಟ್ರಿ ಕೊಟ್ಟಿದ್ದಾರೆ.
ಹ್ಯಾಜಲ್ವುಡ್ ಮಂಡಿರಜ್ಜು ಮತ್ತು ಅಕಿಲೀಸ್ ಸಮಸ್ಯೆಗಳಿಂದ ಬಳಲುತ್ತಿದ್ದರು. ಆದರೆ ಅದರಿಂದ ಚೇತರಿಸಿಕೊಂಡು ತಂಡಕ್ಕೆ ಫಿಟ್ನೆಸ್ ಸರ್ಟಿಫಿಕೇಟ್ಗೆ ಸಮೇತ ಆಗಮಿಸಿದ್ದಾರೆ. ಆದರೂ ಸಹ ವೈದ್ಯರ ಸಲಹೆಯಂತೆಯೇ ಹ್ಯಾಜಲ್ವುಡ್ ಈ ಬಾರಿ ಪಂದ್ಯಗಳನ್ನು ಆಡಬೇಕಿದೆ.
