ಸೇನಾ ನೇಮಕಾತಿಗಾಗಿ ತಂದಿರುವ ಸರ್ಕಾರದ ಹೊಸ ಯೋಜನೆ ಅಗ್ನಿಪಥ್‌ಗೆ ದೇಶಾದ್ಯಂತ ತೀವ್ರ ವಿರೋಧ ವ್ಯಕ್ತವಾಗುತ್ತಿದೆ. ಯುಪಿ-ಬಿಹಾರದಿಂದ ಹರಿಯಾಣ ಮತ್ತು ರಾಜಸ್ಥಾನದವರೆಗೆ ಯುವಕರು ರಸ್ತೆಗೆ ಇಳಿದಿದ್ದಾರೆ. ರೈಲುಗಳಿಗೆ ಬೆಂಕಿ ಹಚ್ಚಲಾಗುತ್ತಿದೆ, ಕಲ್ಲು ತೂರಲಾಗುತ್ತಿದೆ. ಪೊಲೀಸ್ ವಾಹನಗಳನ್ನು ಧ್ವಂಸಗೊಳಿಸಲಾಗುತ್ತಿದೆ. ಈ ವೇಳೆ ಹಲವು ಪೊಲೀಸರಿಗೂ ಗಾಯಗಳಾಗಿವೆ. ರಾಜಸ್ಥಾನದ ಬಾರ್ಮರ್‌ನಲ್ಲಿ ಯುವಕರು ರೈಲು ಹಳಿ ಮೇಲೆ ಟೈರ್‌ಗಳನ್ನು ಸುಟ್ಟು ರೈಲು ನಿಲ್ಲಿಸಲು ಯತ್ನಿಸಿದ್ದಾರೆ. ಮಧ್ಯಪ್ರದೇಶದ ಗ್ವಾಲಿಯರ್ ನಲ್ಲೂ ಯುವಕರು ರೈಲ್ವೇ ಹಳಿ ಮೇಲೆ ಓಡಿ ಪ್ರತಿಭಟನೆ ನಡೆಸಿದರು. ಯುವಕರನ್ನು ನಿಯಂತ್ರಿಸಲು ಮಧ್ಯಪ್ರದೇಶ ಪೊಲೀಸರು ಅಶ್ರುವಾಯು ಪ್ರಯೋಗಿಸಿದ್ದಾರೆ.
ದೇಶದ ರಕ್ಷಣಾ ಸಚಿವ ರಾಜನಾಥ್ ಸಿಂಗ್ ಎರಡು ದಿನಗಳ ಹಿಂದೆ ಈ ಯೋಜನೆಗೆ ಚಾಲನೆ ನೀಡಿದ್ದರು. ಈ ಯೋಜನೆಯಡಿ, 17.5 ವರ್ಷದಿಂದ 21 ವರ್ಷದೊಳಗಿನ ಯುವಕರು ಅಲ್ಪಾವಧಿಗೆ ಸೇನೆಯಲ್ಲಿ ಸೇವೆ ಸಲ್ಲಿಸಲು ಅವಕಾಶವನ್ನು ಪಡೆಯುತ್ತಾರೆ. ಸೇನೆಗೆ ನೇಮಕಗೊಳ್ಳುವ ಯುವಕರ ಸೇವಾವಧಿ ಕೇವಲ 4 ವರ್ಷ. 25 ರಷ್ಟು ನೇಮಕಗೊಂಡ ಯುವಕರನ್ನು ನಿಯಮಿತ ಸೇವೆಗೆ ತೆಗೆದುಕೊಳ್ಳಲಾಗುವುದು ಎಂದು ಸರ್ಕಾರ ಹೇಳುತ್ತದೆ.
ಈಗ ಈ ಯೋಜನೆ ಜಾರಿಗೆ ಬಂದ ನಂತರ ಯುವಕರು ಪ್ರತಿಭಟನೆ ನಡೆಸುತ್ತಿದ್ದು, ನಾಲ್ಕು ವರ್ಷ ಸೇವೆ ಸಲ್ಲಿಸಿ ಏನು ಮಾಡುತ್ತೀರಿ ಎನ್ನುತ್ತಿದ್ದಾರೆ. ಇದಲ್ಲದೇ ಸೇನೆಗೆ ಸೇರಲು ಮೊದಲೇ ತಯಾರಿ ನಡೆಸಿದ್ದ ಯುವಕರು ಬಹಳ ದಿನಗಳಿಂದ ನೇಮಕಾತಿ ಆಗದೆ ಈಗ ವಯಸ್ಸು ಮೀರಿದೆ ಎಂಬುದು ಕೂಡಾ ಅವರ ದೂರಾಗಿದೆ.
ಈಗ ಯುವಕರು ಇದನ್ನು ತೀವ್ರವಾಗಿ ವಿರೋಧಿಸುತ್ತಿದ್ದಾರೆ, ಅನೇಕ ರಾಜ್ಯಗಳಲ್ಲಿ ಯುವಕರ ಪ್ರತಿಭಟನೆಯು ಹಿಂಸಾತ್ಮಕವಾಗಿದೆ. ದೇಶಾದ್ಯಂತ ಸುಮಾರು 22 ರೈಲುಗಳನ್ನು ರದ್ದುಗೊಳಿಸಲಾಗಿದೆ. ಹಲವು ರಾಜ್ಯಗಳಲ್ಲಿ ಅಂಗಡಿಗಳನ್ನು ಮುರಿದು ಲೂಟಿ ಮಾಡಿರುವ ಬಗ್ಗೆ ವರದಿಯಾಗಿದೆ.
ಬಿಹಾರ
ಬಿಹಾರದ ಚಾಪ್ರಾ, ಗೋಪಾಲ್‌ಗಂಜ್ ಮತ್ತು ಕೈಮೂರ್‌ನಲ್ಲಿ ಮೂರು ರೈಲುಗಳಿಗೆ ಬೆಂಕಿ ಹಚ್ಚಲಾಗಿದೆ ಎಂದು ಸುದ್ದಿ ಸಂಸ್ಥೆ ಎಎನ್‌ಐ ವರದಿ ಮಾಡಿದೆ. ‘ನಾವು ಬಹಳ ಸಮಯದಿಂದ ತಯಾರಿ ನಡೆಸಿದ್ದೇವೆ ಮತ್ತು ಈಗ ಅವರು 4 ವರ್ಷಗಳ ಉದ್ಯೋಗವಾಗಿ TOD (ಟೂರ್ ಆಫ್ ಡ್ಯೂಟಿ) ತಂದಿದ್ದಾರೆ. ನಮಗೆ ಇದು ಬೇಡ, ಹಳೆಯ ನೇಮಕಾತಿ ಪ್ರಕ್ರಿಯೆ ಇರಲಿ ಎಂದು ಪ್ರತಿಭಟನಾನಿರತ ಯುವಕರು ಹೇಳುತ್ತಿದ್ದಾರೆ.
ಉತ್ತರ ಪ್ರದೇಶ
ಯುಪಿಯ ಬುಲಂದ್‌ಶಹರ್, ಉನ್ನಾವೋ, ಗೊಂಡಾ, ಗೋರಖ್‌ಪುರ, ಫಿರೋಜಾಬಾದ್, ಬರೇಲಿಯಲ್ಲಿಯೂ ಅಗ್ನಿಪಥ್ ಯೋಜನೆಗೆ ವಿರೋಧ ವ್ಯಕ್ತವಾಗುತ್ತಿದೆ. ‘ಅಗ್ನಿಪಥ್’ ಯೋಜನೆಯ ಬಗೆ ಸುಳ್ಳು ಸುದ್ದಿಗೆ ಬಲಿಯಾಗಬೇಡಿ ಎಂದು ಉತ್ತರ ಪ್ರದೇಶದ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಗುರುವಾರ ಯುವಕರಿಗೆ ಮನವಿ ಮಾಡಿದ್ದಾರೆ, ಈ ಯೋಜನೆಯು ಯುವಕರನ್ನು ದೇಶ ಮತ್ತು ಸಮಾಜಕ್ಕೆ ಸೇವೆ ಸಲ್ಲಿಸಲು ಸಿದ್ಧಗೊಳಿಸುತ್ತದೆ ಎಂದು ಹೇಳಿದ್ದಾರೆ.
ಟ್ವಿಟ್ಟರ್ ನಲ್ಲಿ ಆದಿತ್ಯನಾಥ್ ಅವರು, ‘ಯುವ ಸ್ನೇಹಿತರೇ, ‘ಅಗ್ನಿಪಥ್ ಯೋಜನೆ’ ನಿಮ್ಮ ಜೀವನಕ್ಕೆ ಹೊಸ ಆಯಾಮಗಳನ್ನು ನೀಡುವುದರ ಜೊತೆಗೆ ಭವಿಷ್ಯಕ್ಕೆ ಚಿನ್ನದ ನೆಲೆಯನ್ನು ನೀಡುತ್ತದೆ. ದಾರಿತಪ್ಪಿಸಬೇಡಿ’ ಎಂದಿದ್ದಾರೆ.
ಮತ್ತೊಂದು ಟ್ವೀಟ್‌ನಲ್ಲಿ, ಮುಖ್ಯಮಂತ್ರಿಗಳು, ‘ಅಗ್ನಿಪಥ್ ಯೋಜನೆ’ಯು ಯುವಕರನ್ನು ರಾಷ್ಟ್ರ ಮತ್ತು ಸಮಾಜದ ಸೇವೆಗೆ ಸಿದ್ಧಪಡಿಸುತ್ತದೆ, ಗೌರವಾನ್ವಿತ ಪ್ರಧಾನ ಮಂತ್ರಿಗಳ ಆಶಯದಂತೆ ಅವರಿಗೆ ಹೆಮ್ಮೆಯ ಭವಿಷ್ಯಕ್ಕಾಗಿ ಅವಕಾಶವನ್ನು ಒದಗಿಸುತ್ತದೆ ಎಂದಿದ್ದಾರೆ.
ಯುವಕರಿಗೆ ಧೈರ್ಯ ತುಂಬಲು ಪ್ರಯತ್ನಿಸುತ್ತಿರುವ ಆದಿತ್ಯನಾಥ್, “ತಾಯಿ ಭಾರತಿಯ ಸೇವೆ ಮಾಡಲು ನಿರ್ಧರಿಸಿರುವ ನಮ್ಮ ‘ಅಗ್ನಿವೀರ್ಸ್’ ರಾಷ್ಟ್ರದ ಅಮೂಲ್ಯ ನಿಧಿಯಾಗಲಿದೆ ಮತ್ತು ಯುಪಿ ಸರ್ಕಾರವು ಪೊಲೀಸ್ ಮತ್ತು ಇತರ ಸೇವೆಗಳಲ್ಲಿ ಅಗ್ನಿವೀರ್‌ಗಳಿಗೆ ಆದ್ಯತೆ ನೀಡುತ್ತದೆ. ಜೈ ಹಿಂದ್.’ ಎಂದು ಹೇಳಿದ್ದಾರೆ.
ಹರಿಯಾಣ
ಹರ್ಯಾಣದಲ್ಲಿ ಸರ್ಕಾರದ ಈ ಯೋಜನೆಗೆ ತೀವ್ರ ವಿರೋಧ ವ್ಯಕ್ತವಾಗುತ್ತಿದ್ದು, ಇದಕ್ಕೆ ಕಾರಣವಾಗಿ ಯುವಕರು ಜಿಲ್ಲಾಧಿಕಾರಿ ಕಚೇರಿ, ಮನೆಗೆ ಕಲ್ಲು ತೂರಾಟ ನಡೆಸಿ ನಾಲ್ಕು ವಾಹನಗಳಿಗೆ ಬೆಂಕಿ ಹಚ್ಚಿದ್ದಾರೆ. ರಕ್ಷಣಾ ಸೇವೆಗಳಲ್ಲಿ ನೇಮಕಾತಿಗಾಗಿ ಜಾರಿಗೆ ತಂದ ಅಗ್ನಿಪಥ್ ಯೋಜನೆ ವಿರುದ್ಧ ನೂರಾರು ಗುರುವಾರ ಹರಿಯಾಣದ ಗುರುಗ್ರಾಮ್, ರೆವಾರಿ ಮತ್ತು ಪಲ್ವಾಲ್‌ನಲ್ಲಿ ಜನರು ಬೀದಿಗಿಳಿದು ಹೆದ್ದಾರಿಗಳನ್ನು ತಡೆದರು.
ಈ ಸಂದರ್ಭದಲ್ಲಿ, ಪಲ್ವಾಲ್‌ನಲ್ಲಿ ನಡೆದ ಕಲ್ಲು ತೂರಾಟದಲ್ಲಿ ಪೊಲೀಸ್ ವಾಹನಕ್ಕೆ ಹಾನಿಯಾಗಿದೆ ಮತ್ತು ರಾಷ್ಟ್ರೀಯ ಹೆದ್ದಾರಿ -19 ರ ಆಗ್ರಾ ಚೌಕ್ ಅನ್ನು ನಿರ್ಬಂಧಿಸಲಾಗಿದೆ.
ಗುರುಗ್ರಾಮ್‌ನ ಬಿಲಾಸ್‌ಪುರ ಮತ್ತು ಸಿಧ್ರಾವಲಿಯಲ್ಲಿ ಪ್ರತಿಭಟನಾಕಾರರು ಬಸ್ ನಿಲ್ದಾಣಗಳನ್ನು ಸುತ್ತುವರಿದು ಬಿಲಾಸ್‌ಪುರ ಚೌಕ್‌ನಲ್ಲಿ ಪ್ರತಿಭಟಿಸಿದರು, ಇದು ಗುರುಗ್ರಾಮ್-ಜೈಪುರ ಹೆದ್ದಾರಿಯಲ್ಲಿ ಸಂಚಾರವನ್ನು ನಿರ್ಬಂಧಿಸಿತು.
ಪ್ರತಿಭಟನೆ ತಡೆಯಲು ಈ ಸ್ಥಳಗಳಲ್ಲಿ ಬಿಗಿ ಪೊಲೀಸ್ ಬಂದೋಬಸ್ತ್ ಮಾಡಲಾಗಿದೆ.
ದೆಹಲಿ
ಹತ್ತಕ್ಕೂ ಹೆಚ್ಚು ಮಹತ್ವಾಕಾಂಕ್ಷಿ ಯುವಕರು ಗುರುವಾರ ದೆಹಲಿಯ ನಂಗ್ಲೋಯ್ ರೈಲು ನಿಲ್ದಾಣದಲ್ಲಿ ಹಳಿಗಳ ಮೇಲೆ ಮಲಗಿ ರೈಲಿನ ಮಾರ್ಗವನ್ನು ನಿರ್ಬಂಧಿಸಿದ್ದಾರೆ. ಸೇನೆಯ ನೇಮಕಾತಿಯಲ್ಲಿ ಕೇಂದ್ರ ಸರ್ಕಾರದ ಹೊಸ ಯೋಜನೆ ವಿರುದ್ಧ ದೇಶದ ಎಲ್ಲೆಡೆ ಪ್ರತಿಭಟನೆ ನಡೆಯುತ್ತಿದೆ.
ಕೇಜ್ರಿವಾಲ್ ಅವರು ಸರಣಿ ಟ್ವೀಟ್‌ಗಳಲ್ಲಿ, ‘ಯುವಕರು ತುಂಬಾ ಕೋಪಗೊಂಡಿದ್ದಾರೆ. ಅವರ ಬೇಡಿಕೆ ಸರಿಯಾಗಿದೆ. ಸೇನೆಯು ನಮ್ಮ ದೇಶದ ಹೆಮ್ಮೆ, ನಮ್ಮ ಯುವಕರು ತಮ್ಮ ಇಡೀ ಜೀವನವನ್ನು ದೇಶಕ್ಕಾಗಿ ನೀಡಲು ಬಯಸುತ್ತಾರೆ, ಅವರ ಕನಸುಗಳನ್ನು ನಾಲ್ಕು ವರ್ಷಗಳಲ್ಲಿ ಕೆಡವಬೇಡಿ. ಎಂದಿದ್ದಾರೆ
ಪೊಲೀಸರ ಪ್ರಕಾರ, ರೈಲ್ವೇ ನೇಮಕಾತಿ ಪರೀಕ್ಷೆಗಳ ವಿಳಂಬ ಮತ್ತು ರಾಷ್ಟ್ರ ರಾಜಧಾನಿಯಲ್ಲಿ ಅಗ್ನಿಪಥ್ ಯೋಜನೆಯನ್ನು ವಿರೋಧಿಸಿ ಸುಮಾರು 15-20 ಜನರು ನಂಗ್ಲೋಯ್ ರೈಲು ನಿಲ್ದಾಣದಲ್ಲಿ ಬೆಳಿಗ್ಗೆ 9.45 ರ ಸುಮಾರಿಗೆ ಜಮಾಯಿಸಿದರು. ಹರಿಯಾಣದ ಜಿಂದ್‌ನಿಂದ ಹಳೇ ದೆಹಲಿಗೆ ಹೋಗುತ್ತಿದ್ದ ರೈಲನ್ನು ನಿಲ್ಲಿಸಿದರು ಎಂದು ಹೇಳಲಾಗಿದೆ.
ದೆಹಲಿ ಮುಖ್ಯಮಂತ್ರಿ ಅರವಿಂದ್ ಕೇಜ್ರಿವಾಲ್ ಅವರು ಗುರುವಾರ ‘ಅಗ್ನಿಪಥ’ ಯೋಜನೆ ವಿರೋಧಿಸುತ್ತಿರುವ ಯುವಕರ ಬೆಂಬಲಕ್ಕೆ ಬಂದರು ಮತ್ತು ಯುವಕರಿಗೆ ಕೇವಲ ನಾಲ್ಕು ವರ್ಷಗಳ ಬದಲು ಜೀವನಪರ್ಯಂತ ಕಾಲ ದೇಶಕ್ಕಾಗಿ ಸೇವೆ ಸಲ್ಲಿಸಲು ಅವಕಾಶ ನೀಡುವಂತೆ ಕೇಂದ್ರ ಸರ್ಕಾರಕ್ಕೆ ಮನವಿ ಮಾಡಿದರು.
ಕೇಜ್ರಿವಾಲ್ ಟ್ವೀಟ್‌ನಲ್ಲಿ, ‘ಕೇಂದ್ರ ಸರ್ಕಾರಕ್ಕೆ ಮನವಿ – ಯುವಕರಿಗೆ ನಾಲ್ಕು ವರ್ಷಗಳಲ್ಲ ಇಡೀ ಜೀವನಕ್ಕಾಗಿ ದೇಶ ಸೇವೆ ಮಾಡಲು ಅವಕಾಶ ನೀಡಬೇಕು. ಕಳೆದ ಎರಡು ವರ್ಷಗಳಿಂದ ಸೇನೆಯಲ್ಲಿ ನೇಮಕಾತಿ ನಡೆಯದ ಕಾರಣ ಆಕಾಂಕ್ಷಿ ಯುವಕರು ಅರ್ಹತೆಗಿಂತ ಹಿರಿಯರಾಗಿದ್ದು, ಅವರಿಗೂ ಅವಕಾಶ ನೀಡಬೇಕು ಎಂದಿದ್ದಾರೆ.
ಯುವಕರು “ಕೋಪಗೊಂಡಿದ್ದಾರೆ” ಮತ್ತು ದೇಶದ ಎಲ್ಲೆಡೆ ಅಗ್ನಿಪಥ್ ಯೋಜನೆಯನ್ನು ವಿರೋಧಿಸುತ್ತಿದ್ದಾರೆ ಎಂದು ಅವರು ಹೇಳಿದರು.
ಮಧ್ಯಪ್ರದೇಶ
ಇಂದೋರ್‌ನ ಸುಮಾರು 150 ಯುವಕರು ಅಲ್ಪಾವಧಿಯ ಗುತ್ತಿಗೆ ನೇಮಕಾತಿಯ ಆಧಾರದ ಮೇಲೆ ಸಶಸ್ತ್ರ ಪಡೆಗಳಲ್ಲಿ ನೇಮಕಾತಿ ಮಾಡುವ ಹೊಸ ‘ಅಗ್ನಿಪಥ್’ ಯೋಜನೆ ವಿರುದ್ಧ ಗುರುವಾರ ರಸ್ತೆಗಿಳಿದರು. ನಗರದ ಜನನಿಬಿಡ ಬಡಾವಣೆಯಲ್ಲಿ ತ್ರಿವರ್ಣ ಧ್ವಜ ಪ್ರದರ್ಶಿಸಿ ಯೋಜನೆ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು.
‘ಅಗ್ನಿಪಥ’ ಯೋಜನೆಯನ್ನು ಕೂಡಲೇ ಹಿಂಪಡೆಯಬೇಕು’ ಎಂದು ಮಾರಿಮಾತಾ ಕ್ರಾಸ್‌ನಲ್ಲಿ ನಡೆದ ಪ್ರತಿಭಟನೆಯಲ್ಲಿ ಸಶಸ್ತ್ರ ಪಡೆಗಳ ನೇಮಕಾತಿಗೆ ಬಹಳ ದಿನಗಳಿಂದ ಸಿದ್ಧತೆ ನಡೆಸುತ್ತಿರುವ ಯುವಕರು ಕೇಂದ್ರ ಸರ್ಕಾರವನ್ನು ಒತ್ತಾಯಿಸಿದರು.
ಸ್ಥಳಕ್ಕಾಗಮಿಸಿದ ಪೊಲೀಸ್ ಪಡೆಗೆ ಸೇರಿದ ಉನ್ನತ ಅಧಿಕಾರಿ, ಪೊಲೀಸ್ ವಾಹನದಿಂದ ಘೋಷಣೆ ಮಾಡಿದರು ಮತ್ತು ಧರಣಿ ನಿರತ ಪ್ರತಿಭಟನಾಕಾರರಿಗೆ ಜ್ಞಾಪಕ ಪತ್ರ ನೀಡಿ ಶಾಂತಿಯುತವಾಗಿ ತಮ್ಮ ಬೇಡಿಕೆಯನ್ನು ಈಡೇರಿಸುವಂತೆ ಮನವಿ ಮಾಡಿದರು.
ಪೊಲೀಸರ ಈ ಮನವಿಯ ನಂತರ, ಪ್ರತಿಭಟನಾಕಾರರು “ಅಗ್ನಿಪಥ್” ಯೋಜನೆ ವಿರುದ್ಧ ಸ್ಥಳದಲ್ಲಿದ್ದ ಅಧಿಕಾರಿಗಳಿಗೆ ಮನವಿಯನ್ನು ಸಲ್ಲಿಸಿದರು.
ಪ್ರತಿಭಟನಾಕಾರರಲ್ಲಿ ಯುವಕನೊಬ್ಬ ಮಾತನಾಡಿ, ”ಲೋಕಸಭಾ ಸಂಸದರು ಕೇವಲ ಐದು ವರ್ಷ ಅಧಿಕಾರದಲ್ಲಿ ಇದ್ದುಕೊಂಡು ಜೀವನ ಪರ್ಯಂತ ಪಿಂಚಣಿ ಪಡೆಯುತ್ತಾರೆ. ಹಾಗಾದರೆ ಅಗ್ನಿಪಥ್ ಯೋಜನೆಯಡಿ ಸೇನೆಗೆ ಸೇರುವ ಯುವಕರಿಗೆ ಪಿಂಚಣಿ ಏಕೆ ನೀಡುತ್ತಿಲ್ಲ? “ ಎಂದು ಪ್ರಶ್ನಿಸಿದ್ದಾರೆ.
