ಸ್ವತಂತ್ರ ಭಾರತದ ಪ್ರಧಾನಿಗಳಲ್ಲಿ ಮತ್ತು ದೇಶವನ್ನು ಆಳಿದ ಪಕ್ಷಗಳಲ್ಲಿ ಭಾರತೀಯ ಸೇನೆಯನ್ನು ಬಿಜೆಪಿ ಹಾಗೂ ಮೋದಿಯಷ್ಟು ರಾಜಕೀಯಕ್ಕೆ ಬಳಸಿಕೊಂಡವರು ಯಾರೂ ಇಲ್ಲ. ಅಷ್ಟಕ್ಕೂ, ಮೋದಿ ಪ್ರಧಾನಿಯಾಗಿರುವ ಕಾಲಘಟ್ಟದಲ್ಲಿ ಮಿತಿ ಮೀರಿದ ಸೇನಾ ದೇಶ ಯುದ್ಧೋನ್ಮಾದದಿಂದ ಸಾಕಷ್ಟು ಬಳಲಿದೆ.
ಸರ್ಜಿಕಲ್‌ ಸ್ಟ್ರೈಕ್‌ ಉದಾಹರಣೆಯನ್ನೇ ತೆಗೆದುಕೊಂಡರೆ, ಅದರ ಸಂಪೂರ್ಣ ಕ್ರೆಡಿಟನ್ನು ನರೇಂದ್ರ ಮೋದಿ 2019 ರ ಲೋಕಸಭಾ ಚುನಾವಣೆಯಲ್ಲಿ ಪಡೆದುಕೊಂಡಿದ್ದಾರೆ. ಅದೇ ವೇಳೆ, ಪುಲ್ವಾಮದಲ್ಲಿ ಹುತಾತ್ಮರಾದ ಸೈನಿಕರ ಹಾಗೂ ಗಾಲ್ವಾನ್‌ ಕಣಿವೆಯಲ್ಲಿ ಜೀವ ತೆತ್ತ ಯೋಧರ ಸಾವಿನ ಲೆಕ್ಕವನ್ನು ಹೊರುವುದರಿಂದ ಪ್ರಧಾನಿ ನುಣುಚಿಕೊಂಡಿದ್ದಾರೆ.
ಆದರೆ, ಇದೀಗ ಸೇನೆ ಸಮವಸ್ತ್ರವನ್ನು ಧರಿಸಿ, ಯೋಧರೊಂದಿಗೆ ಫೋಟೋ ಶೂಟ್‌ ಮಾಡುತ್ತಾ, ಸೇನೆಯನ್ನು ರಾಜಕೀಯ ಸ್ವಹಿತಕ್ಕೆ ಬಳಸಿದ ಪ್ರಧಾನಿ ಮೋದಿಯನ್ನು ಮುಜುಗರಕ್ಕೀಡಾಗಿಸುವಂತಹ ಕ್ರಮವನ್ನು ಉತ್ತರ ಪ್ರದೇಶದ ನ್ಯಾಯಾಲಯವು ಕೈಗೊಂಡಿದೆ.
ಕಳೆದ ವರ್ಷ ಜಮ್ಮು ಕಾಶ್ಮೀರ ಭೇಟಿ ಸಂಧರ್ಭದಲ್ಲಿ, ಭಾರತೀಯ ಸೇನೆಗೆ ಮಾತ್ರ ನಿಗದಿಯಾಗಿರುವ ಸಮವಸ್ತ್ರವನ್ನು ನರೇಂದ್ರ ಮೋದಿ ಧರಿಸಿರುವ ಕುರಿತಂತೆ ಪ್ರಧಾನಮಂತ್ರಿ ಕಾರ್ಯಾಲಯಕ್ಕೆ ಉತ್ತರ ಪ್ರದೇಶದ ಜಿಲ್ಲಾ ನ್ಯಾಯಾಲಯವೊಂದು ನೋಟಿಸ್ ನೀಡಿದೆ.
ಭಾರತೀಯ ದಂಡ ಸಂಹಿತೆಯ ಸೆಕ್ಷನ್ 140 ರ ಅಡಿಯಲ್ಲಿ ಸೈನಿಕರು ಬಳಸುವ ವಸ್ತ್ರವನ್ನು ಧರಿಸುವುದು ಅಥವಾ ಸೇನಾ ಸಿಬ್ಬಂದಿಗಳ ಗುರುತನ್ನು ಬಳಸುವುದು ಶಿಕ್ಷಾರ್ಹ ಅಪರಾಧವಾಗಿದೆ ಎಂದು ಪ್ರಯಾಗರಾಜ್ನ ನ್ಯಾಯಾಲಯದಲ್ಲಿ ಅರ್ಜಿ ಸಲ್ಲಿಸಲಾಗಿತ್ತು.
ದೈನಿಕ್ ಭಾಸ್ಕರ್ ಅವರ ವರದಿಯ ಪ್ರಕಾರ, ಜಿಲ್ಲಾ ನ್ಯಾಯಾಧೀಶ ನಳಿನ್ ಕುಮಾರ್ ಶ್ರೀವಾಸ್ತವ ಅವರು ಅರ್ಜಿಯನ್ನು ಸಲ್ಲಿಸಿದ ವಕೀಲ ರಾಕೇಶ್ ನಾಥ್ ಪಾಂಡೆ ಅವರ ವಾದಗಳನ್ನು ಆಲಿಸಿ ಕ್ರಿಮಿನಲ್ ಪ್ರಕ್ರಿಯಾ ಸಂಹಿತೆಯ ಸೆಕ್ಷನ್ 156 (3) ಅಡಿಯಲ್ಲಿ ನೋಟಿಸ್ ನೀಡಲು ಸೂಚಿಸಿದ್ದಾರೆ.
ಕಳೆದ ವರ್ಷದ ಡಿಸೆಂಬರ್ನಲ್ಲಿಯೇ ಪಾಂಡೆ ಅವರು ಅರ್ಜಿ ಸಲ್ಲಿಸಿದ್ದರು. ಆದರೆ ಮುಖ್ಯ ಮ್ಯಾಜಿಸ್ಟ್ರೇಟ್ ಹರೇಂದ್ರ ನಾಥ್ ಅವರು, ಈ ಘಟನೆಯು ಸದರಿ ನ್ಯಾಯಾಲಯದ ವ್ಯಾಪ್ತಿಯಲ್ಲಿ ನಡೆದಿಲ್ಲ ಎಂದು ಅರ್ಜಿಯನ್ನು ತಿರಸ್ಕರಿಸಿದ್ದರು. ಅದೇ ವೇಳೆ, ಘಟನೆ ನಡೆದ ನ್ಯಾಯಾಲಯದ ವ್ಯಾಪ್ತಿಯ ಮ್ಯಾಜಿಸ್ಟ್ರೇಟ್ ಇದರ ವಿಚಾರಣೆ ನಡೆಸಬಹುದು ಎಂದು ಹೇಳಿದ್ದರು. ಈ ಆದೇಶವನ್ನು ಅರ್ಜಿ ಸಲ್ಲಿಸಿದ್ದ ಪಾಂಡೆ ಅವರು ಜಿಲ್ಲಾ ನ್ಯಾಯಾಧೀಶರ ಮುಂದೆ ಪ್ರಶ್ನಿಸಿದ್ದರು. ಇದೀಗ ನ್ಯಾಯಾಲಯವು ಪ್ರಧಾನಿ ಕಾರ್ಯಾಲಯಕ್ಕೆ ನೋಟಿಸ್ ಜಾರಿ ಮಾಡಿದ್ದು, ಮಾರ್ಚ್ 2ರಂದು ಮುಂದಿನ ವಿಚಾರಣೆ ನಡೆಯಲಿದೆ ಎಂದು ವರದಿಯಾಗಿದೆ.
2017 ರಿಂದ ಸೇನಾ ಸಮವಸ್ತ್ರ ಬಳಸುತ್ತಿರುವ ಮೋದಿ ಪ್ರಧಾನಿ ನರೇಂದ್ರ ಮೋದಿ ಅವರು 2016 ರಿಂದ ಸೈನಿಕರೊಂದಿಗೆ ದೀಪಾವಳಿ ಹಬ್ಬವನ್ನು ಆಚರಿಸುತ್ತಿದ್ದಾರೆ. ಸೈನಿಕರನ್ನು ಬಳಸಿ ಪ್ರಧಾನಿ ವೈಯಕ್ತಿಕ ಇಮೇಜ್‌ ಗಳಿಸಿಕೊಳ್ಳುತ್ತಿದ್ದಾರೆ ಎಂಬ ಪ್ರತಿಪಕ್ಷಗಳ ಆರೋಪದ ನಡುವೆಯೇ, ಮೋದಿ, 2017 ರಲ್ಲಿ ಸೇನೆಯ ಸಮವಸ್ತ್ರವನ್ನು ಧರಿಸಿದ್ದು ಸಾಕಷ್ಟು ವಿವಾದಕ್ಕೆ ಕಾರಣವಾಗಿತ್ತು.
ಅದಾಗ್ಯೂ, 2017 ರಿಂದ ದೀಪಾವಳಿ ಸಂದರ್ಭದಲ್ಲಿ ಪ್ರಧಾನಿ ಸೇನಾ ಸಮವಸ್ತ್ರವನ್ನು ಅಕ್ರಮವಾಗಿ ಬಳಸುತ್ತಿದ್ದಾರೆ. 2021 ರ ನವೆಂಬರಿನಲ್ಲಿ ಜಮ್ಮು ಕಾಶ್ಮೀರದ ನೌಷೆರ ಜಿಲ್ಲೆಯಲ್ಲಿ ಭಾರತದ ಸಶಸ್ತ್ರ ಪಡೆಯೊಂದಿಗೆ ದೀಪಾವಳಿ ಆಚರಿಸಿದ್ದ ಮೋದಿ ಸೇನಾ ಸಮವಸ್ತ್ರ ಧರಿಸಿದ್ದರು.
ಸೇನೆಯ ಸಮವಸ್ತ್ರವನ್ನು ಭಾರತದ ಪ್ರಧಾನಿ ಮೋದಿ ಮಾತ್ರವಲ್ಲ, ಜಾಗತಿಕ ಇತರೆ ನಾಯಕರೂ ಬಳಸುತ್ತಿದ್ದಾರೆ. ತುರ್ಕಿಯ ರೆಸೆಪ್‌ ತಯ್ಯಿಪ್‌ ಎರ್ದುಗಾನ್‌, ರಷ್ಯಾದ ವ್ಲಾದಿಮಿರ್‌ ಪುಟಿನ್‌, ಚೀನಾದ ಕ್ಸಿ ಜಿನ್‌ಪಿಂಗ್‌ ಮೊದಲಾದ ನಾಯಕರು ಆಯಾ ದೇಶದ ಸೇನಾ ಸಮವಸ್ತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಅಂದ ಹಾಗೆ, ಇತರೆ ದೇಶದ ಈ ನಾಯಕರುಗಳೆಲ್ಲಾ ನಿರಂಕುಶ ಸರ್ವಾಧಿಕಾರಿಗಳು ಎನ್ನುವುದು ಕಾಕತಾಳೀಯ!
