ಕೇವಲ ಬಿಜೆಪಿಯನ್ನು ಮಾತ್ರ ವಿರೋಧಿಸುವುದರಿಂದ ನಮ್ಮ ದೇಶದ ದೀರ್ಘಕಾಲೀನ ಸಮಸ್ಯೆಗಳಿಗೆ ಪರಿಹಾರ ಸಿಗುವುದಿಲ್ಲ ಎಂದು ನಟ, ಸಾಮಾಜಿಕ ಹೋರಾಟಗಾರ ಚೇತನ್ ಹೇಳಿದ್ದಾರೆ.
ಬಿಜೆಪಿಯನ್ನು ಮಾತ್ರವಲ್ಲದೆ, ಅನ್ಯಾಯ ಮತ್ತು ಅಸಮಾನತೆಯ ಸಂಪೂರ್ಣ ವ್ಯವಸ್ಥೆಯನ್ನು ನಾವು ವಿರೋಧಿಸಬೇಕು ಎಂದು ಅವರು ಕರೆ ನೀಡಿದ್ದಾರೆ.
ಇದರರ್ಥ ನಾವು ಬೈನರಿ ಲೆನ್ಸ್ ಮೂಲಕ ಸಮಾಜ ಮತ್ತು ರಾಜಕೀಯವನ್ನು ನೋಡಬಾರದು, ನಾವು ಉದಾರವಾದಿಗಳ (ಯಥಾಸ್ಥಿತಿ ಸೆಂಟ್ರಿಸ್ಟಗಳ) ವಿರುದ್ಧ ಹೋರಾಡಬೇಕು, ಮತ್ತು ನಾವು ಸಮತಾವಾದದ ಪರಿವರ್ತಕ ದೃಷ್ಟಿಯನ್ನು ನೀಡಬೇಕು ಎಂದು ಚೇತನ್ ಆಗ್ರಹಿಸಿದ್ದಾರೆ.
ಕರೋನಾ ಕುರಿತಂತೆ ಕೇಂದ್ರ ಸರ್ಕಾರವನ್ನು ಟೀಕಿಸಿದ ಸೋನಿಯಾ ಗಾಂಧಿಯನ್ನೂ ತರಾಟೆಗೆ ತೆಗೆದುಕೊಂಡ ಚೇತನ್, ಕಾಂಗ್ರೆಸ್ ಅಧ್ಯಕ್ಷೆ ಸೋನಿಯಾ ಗಾಂಧಿ ಅನುಕೂಲಕರವಾಗಿ ‘ವ್ಯವಸ್ಥೆ ವಿಫಲವಾಗಿಲ್ಲ; ಮೋದಿ ಸರ್ಕಾರ ವಿಫಲವಾಗಿದೆ’ ಎಂದು ಹೇಳಿದ್ದಾರೆ. ಇದು ಸುಳ್ಳು. ಎರಡೂ ಕೂಡಾ ವಿಫಲವಾಗಿವೆ ಎಂದು ಹೇಳಿದ್ದಾರೆ.
10 ವರ್ಷಗಳಲ್ಲಿ, ಯುಪಿಎ ಸರ್ಕಾರವು ಮೋದಿ ಸರ್ಕಾರ ನೀಡಿದ್ದಕ್ಕಿಂತ ಕಡಿಮೆ ಹಣವನ್ನು ಆರೋಗ್ಯ ರಕ್ಷಣೆ ಬಜೆಟ್‌ಗಳಿಗೆ ನೀಡಿದೆ. ವ್ಯವಸ್ಥೆಯನ್ನು ಉತ್ತಮಗೊಳಿಸಲು ನೀವು ಎಂದಿಗೂ ಕಾಳಜಿ ವಹಿಸಲಿಲ್ಲ; ನೀವು ಮತ್ತು ನಿಮ್ಮ ಪಕ್ಷವು ವೈಯಕ್ತಿಕ ಲಾಭಕ್ಕಾಗಿ ವ್ಯವಸ್ಥೆಯನ್ನು ಬಳಸಿದ್ದೀರಿ. ಇಂದಿನ ಪರಿಸ್ಥಿತಿಗೂ ನಿಮ್ಮನ್ನು ದೂಷಿಸಬೇಕು ಎಂದು ಸೋನಿಯಾ ಗಾಂಧಿಗೆ ತಿರುಗೇಟು ನೀಡಿದ್ದಾರೆ.
