“ವಿಶ್ವಸಂಸ್ಥೆ ದಾಖಲೆಯಲ್ಲಿ ‘ರಿಪಬ್ಲಿಕ್ ಆಫ್ ಇಂಡಿಯಾ’ ಎಂದಿದೆ. ಇದನ್ನು ʼರಿಪಬ್ಲಿಕ್ ಅಫ್ ಭಾರತ್’ ಎಂದು ಬದಲಿಸಲು ಸಂವಿಧಾನಕ್ಕೆ ತಿದ್ದುಪಡಿ ಅಗತ್ಯ. ಅಲ್ಲದೆ, ಸಂಬಂಧಿತ ರಾಷ್ಟ್ರಗಳಿಗೆ ಈ ಬಗ್ಗೆ ಮಾಹಿತಿ ಕಳುಹಿಸಬೇಕು” ಎಂದು ಲೋಕಸಭೆಯ ಮಾಜಿ ಪ್ರಧಾನ ಕಾರ್ಯದರ್ಶಿ ಪಿಡಿಟಿ ಅಚಾರಿ ಹೇಳಿದ್ದಾರೆ.
“ಹೆಸರಿನ ಬದಲಾವಣೆ ಯನ್ನು ಸಂವಿಧಾನಕ್ಕೆ ತಿದ್ದುಪಡಿ ಮೂಲಕವೇ ಮಾಡಬೇಕು. ಅದಾಗದಿದ್ದರೆ, ಹೆಸರು ಇಂಡಿಯಾ ಎಂದಷ್ಟೇ ಇರಲಿದೆ. ಸಂವಿಧಾನದ ವಿಧಿ 1ರಲ್ಲಿ ಭಾರತ ಮತ್ತು ಇಂಡಿಯಾ ಎರಡರ ಉಲ್ಲೇಖವಿರುವುದು ವಿಶ್ಲೇಷಣಾತ್ಮಕವಷ್ಟೇ. ಅದರರ್ಥ ಅದಲು-ಬದಲಾಗಿ ಎರಡನ್ನೂ ಬಳಸಬಹುದು ಎಂಬುದಲ್ಲ. ಹಾಗೇ ಮಾಡಿದರೆ ಅದು ಆತ್ಮಹತ್ಯಾ ಕ್ರಮವಾಗಲಿದೆ. ಒಂದು ದೇಶಕ್ಕೆ ಒಂದು ಹೆಸರಷ್ಟೇ ಇರಬೇಕು” ಎಂದು ಪಿಡಿಟಿ ಆಚಾರಿ ಹೇಳಿಕೆ ನೀಡುರುವುದಾಗಿ ಬುಧವಾರ (ಸೆಪ್ಟೆಂಬರ್‌ 6) ವರದಿಯಾಗಿದೆ.
ಸಂವಿಧಾನದ ಹಿಂದಿ ಅವತರಣಿಕೆಯಲ್ಲಿಯೂ ‘ಭಾರತ್.. ಅರ್ಥಾತ್ ಇಂಡಿಯಾ…’ ಎಂದೇ ಉಲ್ಲೇಖವಾಗಿದೆ. ಇಂಡಿಯಾ ಎಂಬುದು ದೇಶದ ಅಧಿಕೃತ ಹೆಸರು. ಇದನ್ನು ಬದಲಿಸಲು ಸಂವಿಧಾನದ ತಿದ್ದುಪಡಿ ಅಗತ್ಯ. ಇದಕ್ಕಾಗಿ ಉಭಯ ಸದನಗಳಲ್ಲಿಯೂ ಮೂರನೇ ಎರಡರಷ್ಟು ಸದಸ್ಯರ ಬೆಂಬಲ ಬೇಕು ಎಂದು ವಿವರಿಸಿದ್ದಾರೆ.
ಹೀಗೆ ಹೆಸರು ಬದಲಿಸುವುದರಿಂದ ಸಂವಿಧಾನದ ಮೂಲ ಸ್ವರೂಪ ಬದಲಾಗುವುದಿಲ್ಲ ಎಂದು ಪಿಡಿಟಿ ಅಚಾರಿ ಪ್ರತಿಪಾದಿಸಿದ್ದಾರೆ.
