ಇನ್ಫೋಸಿಸ್ ಅಧ್ಯಕ್ಷ ನಾರಾಯಣ ಮೂರ್ತಿ ಅವರು ಸಿನಿಮಾ ತಾರೆಯೊಬ್ಬರ ಬಗ್ಗೆ ಬೇಸರ ವ್ಯಕ್ತಪಡಿಸಿರುವ ವಿಡಿಯೊವೊಂದು ಸಾಮಾಜಿಕ ಜಾಲತಾಣದಲ್ಲಿ ಈಗ ವೈರಲ್ ಆಗಿದೆ.
2000 ಇಸವಿಯಿಂದ ಚಲನಚಿತ್ರರಂಗದಲ್ಲಿ ಸಕ್ರಿಯರಾಗಿರುವ ನಟಿ ಕರೀನಾ ಕಪೂರ್ ಈಗಲೂ ಬೇಡಿಕೆ ಪಡೆದಿರುವ ನಟಿ. ಕರೀನಾ ಅವರು ತಮ್ಮ ವರ್ತನೆಯಿಂದಲೂ ಸುದ್ದಿಯಲ್ಲಿರುತ್ತಾರೆ. ಇವರ ಕುರಿತು ಮೂರ್ತಿ ಅವರು ನೀಡಿರುವ ಹೇಳಿಕೆಯ ವಿಡಿಯೊವಿಂದ ಈಗ ಮತ್ತೆ ಸುದ್ದಿಯಲ್ಲಿದ್ದಾರೆ.
ನಾರಾಯಣ ಮೂರ್ತಿ ಅವರು ಹೇಳಿಕೆ ನೀಡಿರುವ ವಿಡಿಯೊ ಹಳೆಯದ್ದು ಎನ್ನಲಾಗಿದೆ. ಆದರೆ ಕರೀನಾ ಅವರ ಕುರಿತು ಆಡಿರುವ ಮಾತುಗಳು ಈಗ ವೈರಲ್ ಆಗಿವೆ.
“ವಿಮಾನದಲ್ಲಿ ಅಭಿಮಾನಿಗಳನ್ನು ನಟಿ ಕರೀನಾ ಕಪೂರ್ ಕಡೆಗಣಿಸಿದರು” ಎಂದು ಮೂರ್ತಿ ಅವರು ಹೇಳಿದ್ದ ಹಳೇ ವಿಡಿಯೊ ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ.
“ನಾನು ಅವತ್ತು ಲಂಡನ್‌ನಿಂದ ವಾಪಸ್ ಆಗುತ್ತಿದ್ದೆ. ನನ್ನ ಪಕ್ಕದಲ್ಲಿ ಕುಳಿತಿದ್ದವರು ಕರೀನಾ ಕಪೂರ್. ಎಷ್ಟೋ ಜನ ಕರೀನಾ ಕಪೂರ್ ಅವರ ಬಳಿ ಬಂದು ‘ಹಾಯ್, ಹಲೋ’ ಹೇಳುತ್ತಿದ್ದರು. ಆದರೆ, ಕರೀನಾ ಕಪೂರ್ ಯಾವುದೇ ರೀತಿಯ ಪ್ರತಿಕ್ರಿಯೆ ಕೊಡಲಿಲ್ಲ. ಅಭಿಮಾನಿಗಳನ್ನು ಕರೀನಾ ಕಡೆಗಣಿಸಿದ್ದನ್ನು ಕಂಡು ನನಗೆ ಆಶ್ಚರ್ಯವಾಯಿತು. ಯಾರೆಲ್ಲಾ ನನ್ನ ಬಳಿ ಬಂದರೋ, ನಾನು ಎದ್ದುನಿಂತು ಅವರುಗಳೊಂದಿಗೆ ಕೆಲಕಾಲ ಮಾತನಾಡಿದೆ. ಅವರೆಲ್ಲಾ ನಿರೀಕ್ಷೆ ಮಾಡೋದು ಅಷ್ಟನ್ನೇ” ಎಂದು ಈ ಹಿಂದೆ ಐಐಟಿ ಖಾನ್ಪುರ್‌ನಲ್ಲಿ ಮಾತನಾಡುವ ವೇಳೆ ನಾರಾಯಣ ಮೂರ್ತಿ ಹೇಳಿದ್ದರು.
“ಯಾರಾದರೂ ತಮ್ಮ ಅಹಂಕಾರವನ್ನು ಕೆಲವು ವಿಧಾನಗಳ ಮೂಲಕ ಕಡಿಮೆ ಮಾಡಿಕೊಳ್ಳಬೇಕು. ಯಾರಾದರೂ ಪ್ರೀತಿಯನ್ನು ತೋರಿಸಿದ್ದರೆ, ನಾವು ಅವರಿಗೆ ಮರಳಿ ಪ್ರೀತಿಯನ್ನು ವ್ಯಕ್ತಪಡಿಸುವುದು ಮಾನವೀಯತೆ” ಎಂದು ನಟಿಯ ವರ್ತನೆಯ ಬಗ್ಗೆ ಅವರು ನೇರವಾಗಿ ಮಾತನಾಡಿದ್ದರು.
ಈ ಸುದ್ದಿ ಓದಿದ್ದೀರಾ? ಚಿತ್ರೀಕರಣ ಆರಂಭಿಸಿದ ಮೋಹನ್ ಲಾಲ್ ಅಭಿನಯದ ಪ್ಯಾನ್ ಇಂಡಿಯಾ ಚಿತ್ರ”ವೃಷಭ”
ನೆಟ್ಟಿಗರಿಂದ ಬೆಂಬಲ
ಕರೀನಾ ಕಪೂರ್ ಅವರ ಬಗ್ಗೆ ಹೇಳಿಕೆ ನೀಡಿದ ನಾರಾಯಣ ಮೂರ್ತಿ ಅವರನ್ನು ನೆಟ್ಟಿಗರು ಬೆಂಬಲಿಸಿದ್ದಾರೆ. ನಟಿಯ ವರ್ತನೆಯನ್ನು ಟೀಕಿಸಿದ್ದಾರೆ.
“ಒಬ್ಬರ ಗುಣ ನಿರ್ಧರಿಸುವಲ್ಲಿ ಅವರ ಶಿಕ್ಷಣ, ಬೆಳೆದ ಪರಿಸರ ಮತ್ತು ಕುಟುಂಬದ ಹಿನ್ನೆಲೆ ಪ್ರಮುಖ ಪಾತ್ರವಹಿಸುತ್ತದೆ” ಎಂದು ನೆಟ್ಟಿಗರೊಬ್ಬರು ಅಣಕವಾಡಿದ್ದಾರೆ.
