ಭಾರತದ ಷೇರು ಪೇಟೆಯ ಅತಿದೊಡ್ಡ ಐಪಿಒ ಎಂಬ ಹೆಗ್ಗಳಿಕೆ ಪಡೆದಿರುವ ಭಾರತೀಯ ಜೀವ ವಿಮಾ ನಿಗಮದ (ಎಲ್ಐಸಿ) ಆರಂಭಿಕ ಸಾರ್ವಜನಿಕ ಕೊಡುಗೆ (ಐಪಿಒ) ಮೇ 4ರಂದು ತೆರೆದುಕೊಳ್ಳುತ್ತಿದೆ. ಇದುವರೆಗಿನ ಅತಿ ದೊಡ್ಡ ಐಪಿಒ ಪೇಟಿಎಂನದಾಗಿತ್ತು. 18,500 ಕೋಟಿ ರುಪಾಯಿಗಳನ್ನು ಪೇಟಿಎಂ ಐಪಿಒ ಮೂಲಕ ಸಂಗ್ರಹಿಸಿತ್ತು. 2100 ರೂಪಾಯಿಗಳ ಆಜುಬಾಜಿನಲ್ಲಿದ್ದ ಪೇಟಿಎಂ ಷೇರು ದರ ದುಬಾರಿ ಎನಿಸಿದ್ದರಿಂದ ಷೇರುಪೇಟೆಯಲ್ಲಿ ಲಿಸ್ಟಾದ ದಿನಾವೇ ಪೇಟಿಎಂ ಮುಗ್ಗುರಿಸಿತು.
ಪೇಟಿಎಂನಲ್ಲಿ ಹೂಡಿಕೆ ಮಾಡಿದವರೆಲ್ಲ ದೊಡ್ಡ ಮೊತ್ತದ ನಷ್ಟದಲ್ಲಿದ್ದಾರೆ. ಸಾಲ ಮಾಡಿ ಹೂಡಿಕೆ ಮಾಡಿದವರೆಷ್ಟೇ ಜನ ದಿವಾಳಿಯಾಗಿದ್ದಾರೆ. ಏಕೆಂದರೆ 2100 ರೂಪಾಯಿ ಷೇರುದರ ಈಗ 595 ರೂಪಾಯಿ ಆಜುಬಾಜಿನಲ್ಲಿ ವಹಿವಾಟಾಗುತ್ತಿದೆ. ಹೆಚ್ಚು ಕಮ್ಮಿ ಶೇ.75ರಷ್ಟು ನಷ್ಟವಾಗಿದೆ.
ಪೇಟಿಎಂನ ಐಪಿಒ ಮುಗ್ಗರಿಸಿದ ಹಿನ್ನೆಲೆಯಲ್ಲಿ ಎಲ್ಐಸಿ ಅಳೆದು ತೂಗಿ ತನ್ನ ಷೇರ ದರವನ್ನು ನಿಗದಿ ಮಾಡಿದೆ. ಅದು ಚಿಲ್ಲರೆ ಹೂಡಿಕೆದಾರರಿಗೆ ಹೊರೆಯಾಗಬಾರದು ಮತ್ತು ಹೂಡಿಕೆದಾರರು ನಷ್ಟಕ್ಕೀಡಾಗಬಾರದು ಎಂಬುದು ಇದರ ಉದ್ದೇಶ. ಎಲ್ಐಸಿಯಲ್ಲಿ ಬಂಡವಾಳ ಹಿಂತೆಗೆಯಲು ಕೇಂದ್ರ ಸರ್ಕಾರ ನಿರ್ಧರಿಸಿದ ನಂತರ ಎಲ್ಐಸಿ ಐಪಿಒ ಬಗ್ಗೆ ವ್ಯಾಪಕವಾಗಿ ಪ್ರಚಾರ ಮಾಡಲಾಗಿದೆ. ಪ್ರತಿಯೊಬ್ಬ ಎಲ್ಐಸಿ ಪಾಲಿಸಿದಾರರೂ ಷೇರು ಖರೀದಿಸಿ ಪಾಲುದಾರರಾಗಬೇಕೆಂಬ ಆಶಯದಿಂದ ಎಲ್ಐಸಿ ಐಪಿಒ ಅರಿವು ಪ್ರಚಾರಾಂದೋಲನವನ್ನೇ ನಡೆಸಲಾಗಿತ್ತು. ಇದೀಗ ಎಲ್ಐಸಿ ಐಪಿಒ ಸಾಕಾರಗೊಳ್ಳುತ್ತಿದೆ. ಸಾಮಾನ್ಯ ಹೂಡಿಕೆದಾರರು ಹೆಚ್ಚು ಪ್ರಮಾಣದಲ್ಲಿ ಪಾಲ್ಗೊಳ್ಳುತ್ತಾರೆಂಬ ನಿರೀಕ್ಷೆ ಮಾರುಕಟ್ಟೆ ವಲಯದಲ್ಲಿದೆ. ಆರಂಭದಲ್ಲಿ ಭಾರತೀಯ ಜೀವ ವಿಮಾ ನಿಗಮದ (ಎಲ್ಐಸಿ) ಶೇ.10ರಷ್ಟು ಪಾಲನ್ನು ಮಾರಲು ಸಿದ್ದವಾಗಿದ್ದ ಕೇಂದ್ರ ಸರ್ಕಾರ, ನಂತರ ಶೇ.5ರಷ್ಟು ಮಾರುವ ಪ್ರಸ್ತಾಪ ಮಾಡಿತ್ತು. ಅಂತಿಮವಾಗಿ ಶೇ.3.5ರಷ್ಟು ಪಾಲನ್ನು ಮಾರಾಟ ಮಾಡಲು ನಿರ್ಧರಿಸಿದೆ. ಸಾಂಸ್ಥಿಕ ಹೂಡಿಕೆದಾರರು, ಸಾಮಾನ್ಯ ಹೂಡಿಕೆದಾರರಿಗೆ ಶೇ.3.5ರಷ್ಟು ಷೇರುಗಳನ್ನು ಮಾರಾಟ ಮಾಡುವ ಮೂಲಕ 21,000 ಕೋಟಿ ರೂಪಾಯಿಗಳನ್ನು ಸಂಗ್ರಹಿಸಲಿದೆ. ಪ್ರಸ್ತುತ ಎಲ್ಐಸಿಯ ಉದ್ಯಮ ಮೌಲ್ಯವು (ಎಂಟರ್ ಪ್ರೈಸ್ ವ್ಯಾಲ್ಯು) 6,00,000 ಕೋಟಿ ರೂಪಾಯಿಗಳೆಂದು ಅಂದಾಜಿಸಲಾಗಿದೆ. ಯಾವುದೇ ಉದ್ಯಮವು ಷೇರುಪೇಟೆಯಲ್ಲಿ ಲಿಸ್ಟಾಗುವ ಮುನ್ನ ಅದರ ಮೌಲ್ಯವನ್ನು ಉದ್ಯಮ ಮೌಲ್ಯದಿಂದ ಅಳೆಯಲಾಗುತ್ತದೆ. ಲಿಸ್ಟಾದ ನಂತರ ಮಾರುಕಟ್ಟೆ ಬಂಡವಾಳ ಮೌಲ್ಯದಿಂದ ಅಳೆಯಲಾಗುತ್ತದೆ.
ಎಲ್ಐಸಿ ಷೇರುಗಳನ್ನು ಆರಂಭಿಕ ಸಾರ್ವಜನಿಕ ಕೊಡುಗೆ (ಐಪಿಒ) ಮೂಲಕ ಸಾಮಾನ್ಯ ಹೂಡಿಕೆದಾರರಿಗೆ ಹಂಚಿಕೆ ಮಾಡಲಾಗುವ ಪ್ರತಿ ಷೇರಿನ ದರವನ್ನು 902- 949 ರೂಪಾಯಿಗಳೆಂದು ನಿಗದಿ ಮಾಡಲಾಗಿದೆ.
ಎಲ್ಐಸಿ ಪಾಲಿಸಿದಾರರಿಗೆ 60 ರೂಪಾಯಿ ರಿಯಾಯ್ತಿಯಲ್ಲಿ ಷೇರು ಹಂಚಿಕೆಯಾಗಲಿದೆ. ಸಾಮಾನ್ಯ ಹೂಡಿಕೆದಾರರು 45 ರೂಪಾಯಿ ರಿಯಾಯ್ತಿ ಪಡೆಯಲಿದ್ದಾರೆ. ಮೇ 4ರಿಂದ ಷೇರುಗಳನ್ನು ಹಂಚಿಕೆ ಪ್ರಕ್ರಿಯೆ ಆರಂಭವಾಗುತ್ತದೆ. ಅರ್ಜಿ ಸಲ್ಲಿಸಲು ಡಿ ಮ್ಯಾಟ್ ಖಾತೆ ಅತ್ಯಗತ್ಯ. ಅರ್ಜಿಗಳನ್ನು Applications Supported by Blocked Amount (ASBA) ಮೂಲಕ ಸಲ್ಲಿಸಬಹುದು. ಇದು ಬ್ಯಾಂಕ್ ಖಾತೆಗೆ ಹೊಂದಿಕೊಂಡಂತಿರುತ್ತದೆ. ಎಷ್ಟು ಷೇರುಗಳಿಗೆ ಅರ್ಜಿ ಸಲ್ಲಿಸುತ್ತಾರೋ ಅಷ್ಟು ಮೊತ್ತವು ಬ್ಯಾಂಕ್ ಖಾತೆಯಲ್ಲೇ ಇರುತ್ತದೆ. ಆದರೆ, ಆ ಮೊತ್ತವನ್ನು ಬ್ಲಾಕ್ ಮಾಡಲಾಗಿರುತ್ತದೆ. ಷೇರು ಹಂಚಿಕೆಯಾದರೆ, ಎಷ್ಟು ಹಂಚಿಕೆಯಾಗಿದೆಯೋ ಅಷ್ಟು ಮೊತ್ತ ಕಡಿತವಾಗುತ್ತದೆ. ಉಳಿದದ್ದು ಬಳಕೆಗೆ ಸಿಗುತ್ತದೆ. ಷೇರು ಹಂಚಿಕೆಯಾಗದೆ ಇದ್ದರೆ,ಖಾತೆದಾರರು ಮೊತ್ತ ಬಳಕೆ ಮಾಡಿಕೊಳ್ಳಬಹುದು. ಅರ್ಜಿ ಸಲ್ಲಿಸಿ- ಷೇರು ಹಂಚಿಕೆ ಆಗುವವರೆಗಿನ ಅವಧಿಯಲ್ಲಿ ಮಾತ್ರ ನಿಗದಿತ ಮೊತ್ತ ಬ್ಲಾಕ್ ಆಗಿರುತ್ತದೆ.
![](https://pratidhvani.com/wp-content/uploads/2022/04/1647884528-055.jpg)
ದೀರ್ಘಕಾಲಿಕ ಹೂಡಿಕೆಗೆ ಸಕಾಲ?
ಪೇಟಿಎಂ ಷೇರು ಆರಂಭದಲ್ಲೇ ಪಲ್ಟಿ ಹೊಡೆದ ನಂತರ ಹೂಡಿಕೆದಾರರು ಎಚ್ಚೆತ್ತುಕೊಂಡಿದ್ದಾರೆ. ಪೇಟಿಎಂ ನಂತರ ಯಾವುದೇ ಪ್ರಮುಖ ಐಪಿಒಗಳೂ ಬಂದಿಲ್ಲ. ಈಗ ಎಲ್ಐಸಿ ಮೇಲೆ ಎಲ್ಲೂ ಹೂಡಿಕಾದರರ ಗಮನ ನೆಟ್ಟಿದೆ. ಎಲ್ಐಸಿ ಸರ್ಕಾರಿ ಸ್ವಾಮ್ಯದ ಕಂಪೆನಿ. ಶೇ.70ರಷ್ಟು ಮಾರುಕಟ್ಟೆ ಹೊಂದಿದೆ. ಎಲ್ಐಸಿ ವಿಮಾ ಮಾರುಕಟ್ಟೆಯಲ್ಲಿನ ಪ್ರಾಬಲ್ಯ ಹಲವು ದಶಕಗಳ ಕಾಲ ತನ್ನ ಮುಂದುವರೆಯಲಿದೆ. ಪ್ರಸ್ತುತ ವಿಮಾ ಕಂಪನಿಗಳ ಪೈಕಿ ಅತಿ ಹೆಚ್ಚು ಲಾಭ ಮಾಡುತ್ತಿರುವ ಕಂಪನಿ.
ಎಲ್ಐಸಿ ಷೇರುಗಳಲ್ಲಿ ಹೂಡಿಕೆ ಮಾಡಿದರೆ, ವರ್ಷವೂ ಎಲ್ಐಸಿ ಡೆವಿಡೆಂಡ್ (ಲಾಭಾಂಶ) ನೀಡುತ್ತದೆ. ಅದು ಠೇವಣಿಗೆ ಬರುವ ಬಡ್ಡಿಯಂತಿರುತ್ತದೆ. ಅದಕ್ಕಿಂತಲೂ ಹೆಚ್ಚಿರಲೂಬಹುದು. ಹೂಡಿಕೆದಾರರಿಗೆ ವಾಸ್ತವಿಕವಾಗಿ ಲಾಭ ಎಂದರೆ- ಎಲ್ಐಸಿ ಷೇರು ದರ ಏರಿಕೆಯಾದಂತೆ ಹೂಡಿಕೆ ಮೊತ್ತವೂ ಏರುತ್ತಾ ಹೋಗುತ್ತದೆ. ದೀರ್ಘಕಾಲದಲ್ಲಿ ಹೂಡಿಕೆ ಮೊತ್ತ ಬೃಹತ್ ಪ್ರಮಾಣಕ್ಕೇರುತ್ತದೆ.
ಹೂಡಿಕೆದಾರರು ಬೇಕಾದಾಗ ಮಾರಿಕೊಳ್ಳುವ, ತ್ವರಿತ ನಗದೀಕರಿಸಿಕೊಳ್ಳುವ ಅವಕಾಶವೂ ಇದೆ. ಕಾಲಕಾಲಕ್ಕೆ ಬೋನಸ್ ಷೇರುಗಳನ್ನು ನೀಡಿದಾಗಲೂ ಹೂಡಿಕೆದಾರರ ಹೂಡಿಕೆ ವೃದ್ಧಿಸುತ್ತದೆ. ಕನಿಷ್ಠ 10 ವರ್ಷಗಳ ಕಾಲ ಹೂಡಿಕೆ ಮಾಡುವ ತಾಳ್ಮೆಇದ್ದರೆ ಎಲ್ಐಸಿ ಅತ್ಯಂತ ಉತ್ತಮ ಹೂಡಿಕೆ. ಮತ್ತು ಸಂಪತ್ತು ವೃದ್ಧಿಸಿಕೊಳ್ಳುವ ರಹದಾರಿ. ತಾಳ್ಮೆ ಇದೆಯೇ ಹೂಡಿಕೆ ಮಾಡಿ. ಎಲ್ಐಸಿ ಪಾಲಿಸಿಗೆ ಕಂತು ಕಟ್ಟುವ ಬದಲು ಷೇರು ಖರೀದಿಸಿದರೂ ಆದೀತು.