ಕೇಂದ್ರದ ಕೃಷಿ ಕಾನೂನುಗಳ ವಿರುದ್ಧ ನಡೆಯುತ್ತಿರುವ ರೈತರ ಪ್ರತಿಭಟನೆಗಳನ್ನು ಭಾರತೀಯ ಜನತಾ ಪಕ್ಷ (ಬಿಜೆಪಿ) ಹಿಂಸಾತ್ಮಕ ಕ್ರಮಗಳನ್ನು ಅನುಸರಿಸುವ ಮೂಲಕ ಹತ್ತಿಕ್ಕಲು ಯತ್ನಿಸುತ್ತಿದೆ ಎಂದು ಸಂಯುಕ್ತ ಕಿಸಾನ್ ಮೋರ್ಚಾ ಆರೋಪಿಸಿದೆ ಮತ್ತು ಉತ್ತರ ಪ್ರದೇಶದ ಲಖಿಂಪುರ್ ಖೇರಿ ಘಟನೆಯ ಮೂಲಕ ಅವರ ಉದ್ದೇಶ ಬಹಿರಂಗವಾಗಿದೆ ಎಂದಿದೆ.
ಹಿರಿಯ ಎಸ್‌ಕೆಎಂ ನಾಯಕ ದರ್ಶನ್ ಪಾಲ್ ಮಾತನಾಡಿ, ಲಖಿಂಪುರ್ ಖೇರಿ ಹಿಂಸಾಚಾರವನ್ನು ಪ್ರತ್ಯೇಕವಾಗಿ ನೋಡಬಾರದು ಏಕೆಂದರೆ, ಈ ಘಟನೆ ರೈತರ ವಿರುದ್ಧ ನಡೆಯುತ್ತಿರುವ ದೊಡ್ಡ ಪಿತೂರಿಯ ಭಾಗವಾಗಿದೆ. “ಲಖೀಂಪುರ್ ಘಟನೆ ಜನರನ್ನು ಭಯಭೀತಗೊಳಿಸಲು ಮತ್ತು ಜನರ ಧ್ವನಿಯನ್ನು ಅಡಗಿಸುವ ವಾತಾವರಣವನ್ನು ಸೃಷ್ಟಿಸುವ ಪ್ರಯತ್ನವಾಗಿದೆ. ಎಸ್‌ಕೆಎಂ ಈ ವಿಧಾನದ ವಿರುದ್ಧ ದೃಢವಾಗಿ ನಿಂತಿದೆ ಮತ್ತು ಧ್ವನಿ ಎತ್ತುವುದನ್ನು ಮುಂದುವರಿಸುತ್ತದೆ, ”ಎಂದು ನವದೆಹಲಿಯಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ಹೇಳಿದ್ದಾರೆ.
ಎಸ್‌ಕೆಎಂ ಘಟಕಗಳಲ್ಲಿ ಒಂದಾದ ಭಾರತೀಯ ಕಿಸಾನ್ ಒಕ್ಕೂಟದ (ಉಗ್ರಗಾನ್) ಅಧ್ಯಕ್ಷ ಜೋಗಿಂದರ್ ಸಿಂಗ್ ಮಾತನಾಡಿ, ರೈತರ ಆಂದೋಲನ ಶಾಂತಿಯುತವಾಗಿ ನಡೆಯುತ್ತಿದೆ, ಆದರೆ ಬಿಜೆಪಿ ಸರ್ಕಾರಗಳು – ಕೇಂದ್ರದಲ್ಲಿರಲಿ ಅಥವಾ ಉತ್ತರ ಪ್ರದೇಶದಲ್ಲಿ ಚಳುವಳಿಯನ್ನು ಕಿತ್ತೊಗೆಯಲು ವಿವಿಧ ತಂತ್ರಗಳನ್ನು ಮಾಡುತ್ತಿವೆ ಎಂದು ಹೇಳಿದ್ದಾರೆ.
“ಬಿಜೆಪಿ ಪದೇ ಪದೇ ಚಳುವಳಿಯನ್ನು ಒಂದು ಅಥವಾ ಇನ್ನೊಂದರ ಜೊತೆ ಹೊಂದಿಸಲು ಪ್ರಯತ್ನಿಸುತ್ತಿತ್ತು, ಅದನ್ನು ಅಪಖ್ಯಾತಿಗೊಳಿಸುವ ಏಕೈಕ ಉದ್ದೇಶದಿಂದ. ಬಿಜೆಪಿಯವರು ನಮ್ಮ ಚಳುವಳಿಯನ್ನು ‘ಖಲಿಸ್ತಾನಿಗಳು’, ‘ಪಾಕಿಸ್ತಾನ-ಚೀನಾ’ ನಂತರ ನಮ್ಮನ್ನು ದೇಶವಿರೋಧಿ ಎಂದು ಲೇಬಲ್ ಮಾಡಲು ಪ್ರಯತ್ನಿಸಿದರು, ಆದರೆ ಅವರ ಎಲ್ಲಾ ಪ್ರಯತ್ನಗಳು ವಿಫಲವಾಗಿವೆ. ಈಗ, ಕಳೆದ ಕೆಲವು ತಿಂಗಳುಗಳಲ್ಲಿ ಅವರು ಹೊಸ ಆಟವನ್ನು ಆಡಲು ಪ್ರಾರಂಭಿಸಿದರು, ಅವರ ಆಟ ಹಿಂಸಾತ್ಮಕವಾಗಿದ್ದು ತುಂಬಾ ಅಪಾಯಕಾರಿಯಾಗಿದೆ “ಎಂದು ಜೋಗಿಂದರ್ ಸಿಂಗ್ ಹೇಳಿದ್ದಾರೆ.
“ಬಿಜೆಪಿ ಹಿಂಸೆಯಲ್ಲಿ ಭಾಗಿಯಾಗಿದ್ದರೂ, ನಾವು ಶಾಂತಿಯುತವಾಗಿ ಉತ್ತರಿಸುತ್ತೇವೆ, ಇದು ನಮ್ಮ ಚಳುವಳಿಯ ಶಕ್ತಿ. ನಮ್ಮ ಬೇಡಿಕೆಗಳು ಈಡೇರುವವರೆಗೂ ನಮ್ಮ ಆಂದೋಲನ ಮುಂದುವರಿಯುತ್ತದೆ. ಈಗ ಪಶ್ಚಾತ್ತಾಪಪಡುವ ಪ್ರಶ್ನೆಯೇ ಇಲ್ಲ ಎಂದು ಅವರು ಹೇಳಿದ್ದಾರೆ.
ಕೇಂದ್ರ ರಾಜ್ಯ ಖಾತೆ ಸಚಿವ ಅಜಯ್ ಮಿಶ್ರಾ ಅವರನ್ನು ತಕ್ಷಣವೇ ವಜಾಗೊಳಿಸಬೇಕು ಮತ್ತು ಬಂಧಿಸಬೇಕು ಎಂದು ಸಿಂಗ್ ಹೇಳಿದರು. ಆತನ ಮಗ ಆಶಿಶ್ ಮಿಶ್ರಾ ಕೂಡ ವಿಳಂಬ ಮಾಡದೆ ಬಂಧಿಸಬೇಕು ಎಂದು ಆಗ್ರಹಿಸಿದ್ದಾರೆ.
“ನಾವು ಅಕ್ಟೋಬರ್ 12 ಅನ್ನು ‘ಶಹೀದ್ ಕಿಸಾನ್ ದಿವಸ್’ ಎಂದು ಆಚರಿಸುತ್ತೇವೆ ಮತ್ತು ಟಿಕೊನಿಯಾದ ಲಖಿಂಪುರ್ ಖೇರಿಯಲ್ಲಿ ಮೃತಪಟ್ಟ ರೈತರ ‘ಆಂಟಿಮ್ ಅರ್ದಾಸ್’ (ಅಂತಿಮ ವಿಧಿ) ಗೆ ಸೇರುವಂತೆ ನಾವು ದೇಶದಾದ್ಯಂತ ರೈತರಿಗೆ ಮನವಿ ಮಾಡಿದ್ದೇವೆ ಎಂದು ಜೋಗಿಂದರ್ ಸಿಂಗ್ ಹೇಳಿದ್ದಾರೆ.
