ಬೆಂಗಳೂರಿನ ರಸ್ತೆ ಗುಂಡಿಗಳು ಜನರಿಗೆ ನರಕ ತೋರಿಸುತ್ತಿದೆ. ಸಾಲು ಸಾಲು ಜೀವಗಳನ್ನು ಬೆಂಗಳೂರಿನ ಯಮ ಗುಂಡಿಗಳೇ ನುಂಗುತ್ತಿದೆ. ಹೀಗಾಗಿ ಇದನ್ನು ವಿರೋಧಿಸಿ ಇಂದು ಜೆಡಿಎಸ್ ಕಾರ್ಯಕರ್ತರು ವಿನೂತನವಾಗಿ ಪ್ರತಿಭಟನೆ ಮಾಡಿ ಆಕ್ರೋಶ ಹೊರಹಾಕಿದರು.
ಮೆಜೆಸ್ಟಿಕ್ ನಲ್ಲಿರುವ ರಸ್ತೆಗುಂಡಿಗಳಲ್ಲಿ ದೀಪ ಹಚ್ಚಿ, ಪಟಾಕಿ ಸಿಡಿಸಿ ದೀಪಾವಳಿ ಆಚರಣೆ
ಮೊನ್ನೆ ಮೊನ್ನೆಯಷ್ಟೇ ಉಮಾ ಎಂಬವರು ರಸ್ತೆಗುಂಡಿಯಿಂದಾಗಿ ಪ್ರಾಣ ಚೆಲ್ಲಿದ್ದರು. ಅದಕ್ಕೂ ಮೊದಲು ಕೂಡ ಈ ರಣ ಗುಂಡಿಗಳಿಗೆ ಹಲವು ಸಾವುಗಳಾಗಿವೆ. ಆದರೂ ಬಿಬಿಎಂಪಿ ಹಾಗೂ ಸರ್ಕಾರ ಮಾತ್ರ ಕಣ್ಣಿದ್ದೂ ಕುರುಡರಂತೆ ವರ್ತಿಸುತ್ತಿದೆ. ಇದನ್ನು ವಿರೋಧಿಸಿ ಇಂದು ಬೆಂಗಳೂರು ನಗರ ಜೆಡಿಎಸ್ ಕಾರ್ಯಕರ್ತರು ವಿನೂತನವಾಗಿ ಪ್ರತಿಭಟನೆ ಮಾಡಿದ್ದು, ದೀಪಾವಳಿ ಹಬ್ಬವನ್ನು ರಸ್ತೆಗುಂಡಿಯಲ್ಲೇ ಆಚರಿಸಿದ್ದಾರೆ. ನಗರದ ಮೆಜೆಸ್ಟಿಕ್ ಬಳಿ ಇರುವ ಕ್ರಾಂತಿವೀರ ಸಂಗೊಳ್ಳಿ ರಾಯಣ್ಣ ಪುತ್ಥಳಿ ಬಳಿ ಇರುವ ರಸ್ತೆ ಗುಂಡಿಗಳಿಗೆ ಹೂವು ಹಾಕಿ ಪೂಜೆ ಮಾಡಿ ಆಕ್ರೋಶ ಹೊರಹಾಕಿದರು. ಅಲ್ಲದೆ ಗುಂಡಿಯ ಸುತ್ತ ದೀಪ ಬೆಳಗೆ ಪಟಾಕಿಯನ್ನೂ ಸಿಡಿಸಿ ಇದೇ ದೀಪಾವಳಿ ಅಂತ ಕಿಡಿ ಕಾರಿದರು.
![](https://pratidhvani.com/wp-content/uploads/2022/10/WhatsApp-Image-2022-10-24-at-7.14.41-PM-1024x576.jpeg)
15 ದಿನಗಳ ಒಳಗಾಗಿ ರಸ್ತೆ ಗುಂಡಿ ಮುಚ್ಚುವಂತೆ ಬಿಬಿಎಂಪಿಗೆ JDS ಡೆಡ್ ಲೈನ್
ಈ ಬಗ್ಗೆ ಮಾತನಾಡಿದ ಜೆಡಿಎಸ್ MLC ಶರವಣ, ಇಡೀ ದೇಶದಲ್ಲಿ ದೀಪಾವಳಿ ಅದ್ದೂರಿಯಾಗಿ ಮಾಡುತ್ತಿದ್ದಾರೆ. ಬೆಂಗಳೂರನ್ನು ಅಂದವನ್ನು ಕೆಡಿಸುವ ಕೆಲಸ ಬಿಜೆಪಿ ಸರ್ಕಾರ ಮಾಡುತ್ತಿದೆ. ಇದಕ್ಕೆ ನಾವು ಪ್ರತಿಭಟನೆ ಮಾಡುತ್ತಿದ್ದೇವೆ. 65% ಟ್ಯಾಕ್ಸ್ ಕಟ್ಟುತ್ತಿದೆ ಬೆಂಗಳೂರು. ಗುಂಡಿಗಳ ನರಕ ದರ್ಶನ ಮಾಡಿಸುತ್ತಿದ್ದಾರೆ. ಗುಂಡಿಗೆ ಬಿದ್ದು ಹಲವಾರು ಜನ ಆಸ್ಪತ್ರೆಗೆ ಸೇರಿದ್ದಾರೆ. ಸರ್ಕಾರಕ್ಕೆ ಮಾನ ಮರ್ಯಾದೆ ಇದ್ರೆ ಹೀಗೆ ಮಾಡುತ್ತಿರಲಿಲ್ಲ. ಬೊಮ್ಮಾಯಿ ಅವರು ಕಣ್ಣು ಮುಚ್ಚಿದ್ದಾರೆ ಅವರ ಕಣ್ಣು ತೆರೆಸುವುದಕ್ಕೆ ದೀಪ ಹಚ್ಚುತ್ತಿದ್ದೇವೆ. 15 ದಿನಗಳ ಒಳಗೆ ರಸ್ತೆ ಗುಂಡಿಗಳನ್ನು ಮುಚ್ಚಬೇಕು. ಬೆಂಗಳೂರು ಮೆಜೆಸ್ಟಿಕ್ ನಲ್ಲಿ ಕೂತಿದ್ದೇವೆ. ಇಲ್ಲಿ ಕೋಟ್ಯಾಂತರ ಜನ ಪ್ರಯಾಣ ಮಾಡುತ್ತಿದ್ದಾರೆ. 15 ದಿನ ಸಮಯ ಕೊಡುತ್ತೇವೆ ಮಾಡಲಿಲ್ಲ ಅಂದ್ರೆ ಪ್ರತಿ ವಾರ್ಡ್ ನಲ್ಲಿ ಈ ಪ್ರತಿಭಟನೆ ಮಾಡುತ್ತೇವೆ ಎಂದರು.
ಒಟ್ಟಾರೆ ದೀಪಾವಳಿ ಹಬ್ಬದ ಹೊಸ್ತಿಲಲ್ಲೇ ವಿನೂತನವಾಗಿ ರಸ್ತೆ ಗುಂಡಿ ಬಗ್ಗೆ ಪ್ರತಿಭಟನೆ ಮಾಡಿ ಸರ್ಕಾರ ಹಾಗೂ ಬಿಬಿಎಂಪಿ ವಿರುದ್ಧ ಜೆಡಿಎಸ್ ಕಾರ್ಯಕರ್ತರು ಸಿಡಿದೆದ್ದಾರೆ. ಅಲ್ಲದೆ 15 ದಿನಗಳ ಕಾಲ ಗಡುವು ನೀಡಿದ್ದು, ರಸ್ತೆ ಗುಂಡಿ ಮುಚ್ಚುವಂತೆ ಆಗ್ರಹಿಸಿದ್ದಾರೆ.