ಸೌರ ಬಿರುಗಾಳಿಗಳು ಅಥವಾ ಕರೋನಲ್ ಸಾಮೂಹಿಕ ಹೊರಸೂಸುವಿಕೆಗಳು ವಿದ್ಯುತ್ ಗ್ರಿಡ್ಗಳಿಗೆ ಹಾನಿಯನ್ನುಂಟುಮಾಡುತ್ತವೆ ಮತ್ತು ಬ್ಲ್ಯಾಕ್ಔಟ್ಗಳನ್ನು ಉಂಟುಮಾಡುತ್ತವೆ ಎಂಬುವುದು ಈ ಮೊದಲೇ ಸಾಬೀತಾಗಿತ್ತು. ಆದರೆ ಅದು ಅಂತರ್ಜಾಲದ ಮೂಲಸೌಕರ್ಯದ ಮೇಲೆ ಪ್ರತಿಕೂಲ ಪರಿಣಾಮ ಬೀರಬಹುದು ಎಂದು ಈಗ ತಜ್ಞರು ಅಭಿಪ್ರಾಯ ಪಟ್ಟಿದ್ದಾರೆ.
ಕಳೆದ ವಾರ ನಡೆದ SIGCOMM 2021 ಡಾಟಾ ಸಂವಹನ ಸಮ್ಮೇಳನದಲ್ಲಿ ಕ್ಯಾಲಿಫೋರ್ನಿಯಾ ವಿಶ್ವವಿದ್ಯಾಲಯದ ಸಂಗೀತಾ ಅಬ್ದು ಜ್ಯೋತಿ ಈ ಮಾಹಿತಿಯನ್ನು ಬಹಿರಂಗಪಡಿಸಿದ್ದಾರೆ. ಅವರು ತಮ್ಮ ಸಂಶೋಧನೆಯಲ್ಲಿ, ಸ್ಥಳೀಯ ಮತ್ತು ಪ್ರಾದೇಶಿಕ ಅಂತರ್ಜಾಲವು ಹೆಚ್ಚಾಗಿ ಫೈಬರ್ ಆಪ್ಟಿಕ್ ಕೇಬಲ್ಗಳನ್ನು ಬಳಸುವುದರಿಂದ ಇವು ಭೂಕಾಂತೀಯ ಪ್ರೇರಿತ ಪ್ರವಾಹಗಳಿಂದ ಪ್ರಭಾವಿತವಾಗುವುದಿಲ್ಲ. ಆದ್ದರಿಂದ ಈ ವ್ಯವಸ್ಥೆಯ ಮೂಲಸೌಕರ್ಯವು ತೀವ್ರವಾದ ಸೌರ ಬಿರುಗಾಳಿಗಳ ಸಮಯದಲ್ಲೂ ಕಡಿಮೆ ಹಾನಿಗೊಳಗಾಗುತ್ತದೆ ಎಂದು ತಿಳಿಸಿದ್ದಾರೆ.
ಅಬ್ದು ಜ್ಯೋತಿ WIRED ನೊಂದಿಗಿನ ಮಾತಾನಾಡುತ್ತಾ “ಸಾಂಕ್ರಾಮಿಕ ರೋಗಕ್ಕೆ ಜಗತ್ತು ಎಷ್ಟು ಸನ್ನದ್ಧವಾಗಿಲ್ಲದೇ ಇತ್ತು ಎಂದು ನಾವು ಸಾಕ್ಷಿಯಾಗಿದ್ದೇವೆ. ಹಾಗೆಯೇ ಸೌರ ಬಿರುಗಾಳಿಯನ್ನು ಪರಿಣಾಮಕಾರಿಯಾಗಿ ಎದುರಿಸಲು ಯಾವುದೇ ಪ್ರೋಟೋಕಾಲ್ ಇಲ್ಲ. ನಮ್ಮ ಮೂಲಸೌಕರ್ಯ ದೊಡ್ಡ ಪ್ರಮಾಣದ ಸೌರ ಕಾರ್ಯಕ್ರಮಕ್ಕೆ ಸಿದ್ಧವಾಗಿಲ್ಲ. ಹಾನಿಯ ಪ್ರಮಾಣ ಏನೆಂಬುವುದರ ಬಗ್ಗೆಯೂ ಬಹಳ ಸೀಮಿತ ತಿಳುವಳಿಕೆ ಇದೆ” ಎಂದಿದ್ದಾರೆ.
ಈ ಹಿಂದೆ 1859, 1921 ಮತ್ತು 1989 ರಲ್ಲಿ ತೀವ್ರ ಸೌರ ಬಿರುಗಾಳಿಗಳು ಸಂಭವಿಸಿದ್ದವು. 1859 ರಲ್ಲಿ ಇಂದಿನಂತೆ ಪವರ್ ಗ್ರಿಡ್ಗಳು ಅಸ್ತಿತ್ವದಲ್ಲಿರಲಿಲ್ಲ, ಆದರೆ ಸೌರ ಗಾಳಿಯು ದಿಕ್ಸೂಚಿ ಸೂಜಿಗಳು ಅನಿಯಂತ್ರಿತವಾಗಿ ಸ್ವಿಂಗ್ ಆಗಲು ಕಾರಣವಾಗಿತ್ತು.
“ಇದು ಹೇಗೆ ಕಾರ್ಯನಿರ್ವಹಿಸುತ್ತದೆ ಎಂಬುದಕ್ಕೆ ಪ್ರಸ್ತುತ ಯಾವುದೇ ಮಾದರಿಗಳು ಲಭ್ಯವಿಲ್ಲ. ಈ ಬಿರುಗಾಳಿಗಳು ವಿದ್ಯುತ್ ವ್ಯವಸ್ಥೆಗಳ ಮೇಲೆ ಹೇಗೆ ಪರಿಣಾಮ ಬೀರುತ್ತವೆ ಎಂಬುದರ ಕುರಿತು ನಮಗೆ ಹೆಚ್ಚಿನ ತಿಳುವಳಿಕೆ ಇದೆ, ಆದರೆ ಈ ತಿಳುವಳಿಕೆ ಭೂಮಿಯ ಮೇಲಿನ ಪರಿಣಾಮಗಳ ಬಗ್ಗೆ ಅಷ್ಟೆ. ಸಾಗರದ ಮೇಲೆ ಇದರಿಂದಾಗುವ ಪರಿಣಾಮಗಳನ್ನು ಊಹಿಸುವುದು ಇನ್ನೂ ಕಷ್ಟ” ಎಂದು ಅವರು ಹೇಳಿದ್ದಾರೆ.
ಒಂದು ಮಾರ್ಗ ವಿಫಲವಾದರೆ ಇನ್ನೊಂದು ಮಾರ್ಗದೊಂದಿಗೆ ನೆಟ್ವರ್ಕ್ ಸಂಪರ್ಕ ಮರುಸ್ಥಾಪಿಸುವಂತೆ ಇಂಟರ್ನೆಟ್ ಸಂಪರ್ಕವನ್ನು ವಿನ್ಯಾಸಗೊಳಿಸಿದರೂ ಅಂತರ್ಜಾಲವು ಬೃಹತ್ತಾಗಿ ಸ್ಥಗಿತಗೊಂಡರೆ ಹೆಚ್ಚಿನ ಗ್ರಿಡ್ಗಳು ಆಫ್ಲೈನ್ಗೆ ಹೋಗಬಹುದು ಎಂದು ತಜ್ಞರು ಅಭಿಪ್ರಾಯ ಪಡುತ್ತಾರೆ. 1989 ರಲ್ಲಿ ಸಂಭವಿಸಿದ ಇತ್ತೀಚಿನ ಸೌರ ಚಂಡಮಾರುತವು ಈಶಾನ್ಯ ಕೆನಡಾದಲ್ಲಿ ಒಂಬತ್ತು ಗಂಟೆಗಳ ವಿದ್ಯುತ್ ನಿಲುಗಡೆಗೆ ಕಾರಣವಾಗಿತ್ತು ಎಂಬುವುದನ್ನು ನಾವಿಲ್ಲಿ ಸ್ಮರಿಸಬಹುದು.