ನವದೆಹಲಿ: ಮೂರು ವರ್ಷಗಳ ಅವಧಿಯ ನಿಶ್ಚಿತ ಠೇವಣಿ ಯೋಜನೆಯ ಬಡ್ಡಿ ದರವನ್ನು ಜನವರಿ-ಮಾರ್ಚ್ ತ್ರೈಮಾಸಿಕಕ್ಕೆ ಶೇ.0.10ರಷ್ಟು ಹೆಚ್ಚಿಸಿ ಕೇಂದ್ರ ಸರ್ಕಾರ ಸುತ್ತೋಲೆ ಹೊರಡಿಸಿದೆ.
ಸುಕನ್ಯಾ ಸಮೃದ್ಧಿ ಯೋಜನೆ ಸೇರಿದಂತೆ ಸಣ್ಣ ಉಳಿತಾಯ ಯೋಜನೆಗಳ ಬಡ್ಡಿ ದರವನ್ನು ಅಲ್ಪ ಪ್ರಮಾಣದಲ್ಲಿ ಏರಿಕೆ ಮಾಡಿದ್ದರೆ, ಪಿಪಿಎಫ್ ಸೇರಿದಂತೆ ಉಳಿದ ಎಲ್ಲ ಸಣ್ಣ ಉಳಿತಾಯ ಯೋಜನೆಗಳನ್ನು ಸರಕಾರವು ಯಥಾಸ್ಥಿತಿಯಲ್ಲಿ ಮುಂದುವರೆಸಿದೆ.
ಸುಕನ್ಯಾ ಸಮೃದ್ಧಿ ಯೋಜನೆಯ ಬಡ್ಡಿ ದರವನ್ನು ಹೆಚ್ಚಿಸುವ ಮೂಲಕ ಹೆಣ್ಣು ಮಕ್ಕಳನ್ನು ಪ್ರೋತ್ಸಾಹಿಸಲು ಒತ್ತಡ ಹೆಚ್ಚಿದ ಹಿನ್ನೆಲೆಯಲ್ಲಿ ಸದರಿ ಬಡ್ಡಿ ದರವನ್ನು ಶೇ.0.20ರಷ್ಟು ಏರಿಕೆ ಮಾಡಿದ್ದು, ಶೇ.8ರಿಂದ ಈಗ ಶೇ.8.20ಕ್ಕೆ ಏರಿಕೆಯಾದಂತಾಗಿದೆ. ಸದರಿ ಬಡ್ಡಿದರ ಜನವರಿ 1ರಿಂದ ಮಾರ್ಚ್ 31ರವರೆಗೆ ಅನ್ವಯವಾಗಲಿದೆ.
ಈ ಕುರಿತಂತೆ ಹಣಕಾಸು ಸಚಿವಾಲಯ ಸುತ್ತೋಲೆಯನ್ನು ಹೊರಡಿಸಿದ್ದು, ಮೂರು ವರ್ಷಗಳ ಅವಧಿಯ ನಿಶ್ಚಿತ ಠೇವಣಿ ಯೋಜನೆಯ ಬಡ್ಡಿ ದರವನ್ನು ಜನವರಿ-ಮಾರ್ಚ್ ತ್ರೈಮಾಸಿಕಕ್ಕೆ ಶೇ.0.10 ರಷ್ಟು ಹೆಚ್ಚಿಸಲಾಗಿದೆ. ಈಗ ಈ ಠೇವಣಿ ಮೇಲಿನ ಬಡ್ಡಿ ದರ ಶೇ.7ರಿಂದ 7.1ಕ್ಕೆ ಏರಿದಂತಾಗಿದೆ. ಆದಾಗ್ಯೂ, ಜನಪ್ರಿಯ ಪಿಪಿಎಫ್ ಬಡ್ಡಿ ದರವನ್ನು ಶೇ.7.1 ಮತ್ತು ಉಳಿತಾಯ ಠೇವಣಿಗಳ ಬಡ್ಡಿದರಗಳನ್ನು ಶೇ.4ರಲ್ಲೇ ಉಳಿಸಿಕೊಂಡಿದ್ದರೆ, ಐದು ವರ್ಷಗಳ ಆರ್ಡಿ ದರಗಳಲ್ಲಿ ಅಲ್ಪ ಪ್ರಮಾಣದ ಹೆಚ್ಚಳವನ್ನು ಹೊರತುಪಡಿಸಿ ಅಕ್ಟೋಬರ್-ಡಿಸೆಂಬರ್ ತ್ರೈಮಾಸಿಕದಲ್ಲಿ ಸರ್ಕಾರವು ಸಣ್ಣ ಉಳಿತಾಯ ಬಡ್ಡಿದರಗಳನ್ನು ಸ್ಥಿರವಾಗಿ ಇರಿಸಿತ್ತು.
ಪಿಪಿಎಫ್ ಅನ್ನು ಏಪ್ರಿಲ್-ಜೂನ್ 2020 ತ್ರೈಮಾಸಿಕದಲ್ಲಿ ಶೇ.7.9ರಿಂದ ಶೇ.7.1ಕ್ಕೆ ಕಡಿತಗೊಳಿಸಿದ ಬಳಿಕ ಇದು ಬದಲಾಗದೇ ಉಳಿದುಕೊಂಡಿದೆ.
ಸೀನಿಯರ್ ಸಿಟಿಜನ್ ಉಳಿತಾಯ ಯೋಜನೆ ಕುರಿತಂತೆ ಸತತ ಎರಡು ತ್ರೈಮಾಸಿಕಗಳ ಮೇಲ್ಮುಖ ಪರಿಷ್ಕರಣೆಗಳ ನಂತರ ಜುಲೈ-ಸೆಪ್ಟೆಂಬರ್ ತ್ರೈಮಾಸಿಕಕ್ಕೆ ಬಡ್ಡಿದರವನ್ನು ಶೇ.8.2ರಲ್ಲಿ ಸ್ಥಿರವಾಗಿ ಇರಿಸಲಾಗಿದೆ. ಏಪ್ರಿಲ್-ಜೂನ್ ಅವಧಿಯಲ್ಲಿ ಬಡ್ಡಿ ದರವನ್ನು ಶೇ.8ರಿಂದ ಶೇ.8.2ಕ್ಕೆ ಏರಿಸಲಾಗಿತ್ತು.
ಇದರಿಂದಾಗಿ ಈಗ ಸುಕನ್ಯಾ ಸಮೃದ್ಧಿ ನಿಧಿ ಹಾಗೂ ಹಿರಿಯ ನಾಗರೀಕರ ಠೇವಣಿಗಳಿಗೆ ಒಂದೇ ಪ್ರಮಾಣದ ಬಡ್ಡಿದರವನ್ನು ಸರ್ಕಾರ ನಿಗಧಿ ಮಾಡಿದಂತಾಗಿದೆ.
